റഷ്യൻ ചരിത്രം ഒരു പഠനം (ലേഖനം 14)

  വ്ലാഡിമർ    പുടിനും നവീകരണ റഷ്യയും

By ജോസഫ് പടന്നമാക്കൽ

റഷ്യയുടെ പ്രസിഡണ്ട് 'വ്ലാഡിമിർ പുടിൻ'   ഇരുപത്തിയൊന്നാം നൂറ്റാണ്ടിലെ ലോകമറിയപ്പെടുന്ന  ശക്തനായ നേതാവും ബൃഹത്തായ  ഒരു രാഷ്ട്രത്തിന്റെ അധിപനും നൂറ്റി നാല്പ്പത്തിമൂന്നു മില്ല്യൻ ജനങ്ങളുടെ ഭരണകർത്താവുമാണ്. ഭൂമി ലോകത്തിലെ ഏറ്റവും സ്വാധീനമുള്ള നേതാവായി പുടിനെ അമേരിക്കയിലെ  ഫോർബ്സ്  ബിസിനസ് മാഗസിൻ ചിത്രികരിച്ചിരിക്കുന്നു. പുടിന്റെ നയപരിപാടികളെയും പ്രവർത്തന മണ്ഡലങ്ങളെയും അനുകൂലിക്കുന്ന ജനത്തിന് അദ്ദേഹം  രാജ്യത്തിന്റെ രക്ഷകനും എതിരാളികൾക്ക്‌ ഏകാധിപതിയുമാണ്. അതിരില്ലാത്ത ആയുധ ന്യൂക്ലിയർ ശേഖരങ്ങളും  വമ്പിച്ച പ്രകൃതി വിഭവങ്ങളും അദ്ദേഹത്തിൻറെ നിയന്ത്രണത്തിലെന്നതും ലോക ശ്രദ്ധയ്ക്ക് കാരണങ്ങളായി കരുതുന്നു.

1952 ഒക്ടോബർ ഏഴാംതിയതി  വ്ലാഡിമർ  പുടിൻ റഷ്യയിലെ ലെനിൻ ഗ്രാഡിൽ ഒരു സാധാരണ കുടുംബത്തിൽ ജനിച്ചു. റഷ്യൻ രഹസ്യാന്വേഷണ വകുപ്പിലെ  ഉദ്യോഗസ്ഥൻ, മേധാവി, രാഷ്ട്ര  തന്ത്രജ്ഞൻ, 1999 മുതൽ  റഷ്യൻ പ്രസിഡണ്ട്,   പ്രധാന മന്ത്രി എന്നീ നിലകളിൽ  വ്ലാഡിമർ  പുടിൻ അറിയപ്പെടുന്നു.  നായാട്ടിലും  കുതിരസവാരിയിലും  വളർത്തു മൃഗങ്ങളെ പരിപാലിക്കലിലും  മീൻ പിടിക്കലിലും താല്പര്യപ്പെട്ടിരുന്നു.  പുടിന്റെ അമ്മ  'മരിയാ ഷെലോമോവ ' സാധുക്കളോട് സഹാനുഭൂതിയും അനുകമ്പയുമുള്ളവരായിരുന്നു.  പുടിൻ   ഒഴിവു സമയങ്ങളിൽ  ജൂഡോയും കരാട്ടിയും   പഠിക്കുന്നതിന് അമ്മയ്ക്കെന്നും എതിർപ്പായിരുന്നു. പിന്നീട് ജൂഡോയിൽ  മകൻ പ്രസിദ്ധനായി കഴിഞ്ഞപ്പോൾ മാതാപിതാക്കൾ മകന്റെ ഉയർച്ചയിൽ അഭിമാനിച്ചു.  അദ്ദേഹത്തിൻറെ പിതാവ് സീനിയർ വ്ലാഡിമർ  'പുടിൻ'  ഒന്നാം  ലോക മഹായുദ്ധത്തിൽ പങ്കെടുത്തിരുന്നു. അതിനുശേഷം 1950 കളിൽ സെക്ക്യൂരിറ്റിയായും ഫോർമാനായും ജോലി ചെയ്തു.  ലോക മഹാ യുദ്ധ കാലത്ത് ജന ജീവിതം ദുരിതവും കഷ്ടപ്പാട് നിറഞ്ഞതുമായിരുന്നു. പഞ്ഞവും പടയും വസന്തയും നാടാകെ വ്യാപിച്ച്  ജനജീവിതം  പൊറുതി മുട്ടിയിരുന്നു. സെന്റ്‌ പീറ്റേഴ്സ് ബർഗിലെ  ജീവിതം കഠിനമായിരുന്നതിനാൽ പുടിൻ കുടുംബം   പോമിനോവോയെന്ന ഗ്രാമ പ്രദേശത്തെയ്ക്ക് മാറിത്താമസിച്ചു.

1985-ൽ വ്ലാഡിമർ 'പുടിൻ' ഈസ്റ്റ്‌ ജർമ്മനിയ്ക്ക് പോവുകയും 1990 വരെ അവിടെ ജോലി ചെയ്യുകയും ചെയ്തു. ഈസ്റ്റ് ജർമ്മനിയ്ക്ക്  പോവുന്നതിനു മുമ്പ്  അതിപ്രധാനമായ  മറ്റൊരു സംഭവവും നടന്നു. അദ്ദേഹം എയർ ഹോസ്റ്റസായിരുന്ന 'ല്യൂഡ്മിലാ'  എന്ന  പെണ്‍കുട്ടിയെ  1983 ജൂലൈ ഇരുപത്തിയെട്ടാം തിയതി  വിവാഹം ചെയ്തു. അവർ  മൂന്നു വർഷത്തോളം സൗഹാർദ്ദ  ബന്ധത്തിലായിരുന്നു. യാദൃശ്ചികമായി, ഒരു കൂട്ടുകാരൻ വഴിയാണ് അവർ തമ്മിൽ കണ്ടു മുട്ടിയത്‌.  1985-ൽ  അവരുടെ ആദ്യത്തെ പെണ്‍കുട്ടി മരിയായും 1986-ൽ രണ്ടാമത്തെ പെണ്‍കുട്ടി കത്രീനയും ജനിച്ചു. 'പുടിൻ' ലോകത്തിലുള്ള എല്ലാ അപ്പന്മാരെക്കാളും കുട്ടികളെ സ്നേഹിക്കുന്നുവെന്നും താൻ കുട്ടികളെ ശിക്ഷണം പഠിപ്പിക്കുമ്പോൾ അദ്ദേഹം കുട്ടികളെ കൊഞ്ചിച്ചു വഷളാക്കിയെന്നും  കുട്ടികളുടെ അമ്മ 'ല്യൂഡ് മിലാ' പറയാറുണ്ട്.  പുടിനെ  ഒരു ജോലി ഭ്രാന്തനെന്ന്  ല്യൂഡ്മിലാ വിശേഷിപ്പിക്കുമായിരുന്നു.   മുപ്പതു വർഷത്തെ വൈവാഹിക ജീവിതത്തിനുശേഷം ഇവർ  രണ്ടു പേരും പരസ്പര സമ്മതത്തോടെ  വിവാഹ മോചനം നടത്തിയിരുന്നു.

പുടിൻ, ലെനിൻ ഗ്രാഡ് സ്റ്റേറ്റ് യൂണിവേഴ് സിറ്റിയിൽ നിയമം പഠിച്ച് ബിരുദം നേടിയ ശേഷം റഷ്യയുടെ രഹസ്യാന്വേഷണ സംഘടനയായ കെ.ജി.ബി. യിൽ പതിനഞ്ചു വർഷം ജോലി ചെയ്തു. കേണൽ റാങ്കിൽ അവിടെനിന്നു വിരമിച്ചു. പിന്നീട് സെന്റ്‌ പീറ്റേഴ്സ്  ബർഗിൽ  തെരഞ്ഞെടുത്ത ആദ്യത്തെ മേയറായി.1998 ജൂലൈയിൽ ബോറീസ് യെൽസിൻ അദ്ദേഹത്തെ ഫെഡറൽ സെക്ക്യൂരിറ്റി സർവീസ് ഡയറക്റ്ററായും 1999-ൽ  പ്രധാനമന്ത്രിയായും നിയമിച്ചു. അതുവരെ പൊതുജന മദ്ധ്യത്തിൽ പ്രശസ്തനല്ലാതിരുന്ന അദ്ദേഹം  ചെച്ചന്യായിൽ നടന്ന പട്ടാളയിടപെടലിൽ  വിജയം കൈവരിച്ചുകൊണ്ട് ജനസമ്മതനായി തീർന്നു. യെല്സിന്റെ ഭരണ പരാജയങ്ങളിലും തെറ്റായ രാജ്യഭരണ നയങ്ങളിലും ജനങ്ങൾ അതൃപ്തരായിരുന്നു. സോവിയറ്റ് നാട് മുഴുവൻ അരാജകത്വത്തിലും സാമ്പത്തിക തകർച്ചയിലുമായിരുന്നു..

1999 ഡിസംബർ മുപ്പത്തിയൊന്നാം തിയതി  യെൽസിൻ   തന്റെ ഭരണ കാര്യങ്ങളിൽനിന്നും രാജി വെക്കുന്ന വിവരം അപ്രതീക്ഷിതമായി രാജ്യത്തെ അറിയിച്ചു.  പുടിനെ താല്ക്കാലിക പ്രസിഡണ്ടായി  നിയമിച്ചുകൊണ്ടുള്ള വിളംബരവും ചെയ്തു. നാശത്തിലേക്ക് കുതിക്കുന്ന റഷ്യയെ പുനർനിർമ്മാണം ചെയ്യുമെന്ന വാഗ്ദാനങ്ങളുമായി അമ്പത്തി മൂന്നു ശതമാനം ജനവോട്ടോടുകൂടി പുടിൻ 2000 മാർച്ചിൽ നടന്ന തെരഞ്ഞെടുപ്പിൽ വിജയിച്ചു. പ്രസിഡൻറെന്ന നിലയിൽ അഴിമതി നിവാരണം അദ്ദേഹത്തിൻറെ മുഖ്യ അജണ്ടയായിരുന്നു. സർക്കാറിന്റെ കുത്തക അവസാനിപ്പിച്ച് വ്യക്തികളും പ്രസ്ഥാനങ്ങളുമടങ്ങിയ മാർക്കറ്റ്  ധനതത്വ ശാസ്ത്രവും അതിനായുള്ള നിയമങ്ങളുമുണ്ടാക്കി.  മീഡിയാകളുടെ കുത്തക അവസാനിപ്പിച്ച് സ്വതന്ത്രമായി  പത്ര സ്വാതന്ത്ര്യം അനുവദിച്ചു. കാര്യനിർവഹണങ്ങൾക്കായി റഷ്യയുടെ 89 പ്രവശ്യകളെ  ഏഴു ഫെഡറൽ  ഡിസ്ട്രിക്റ്റുകളായി  തിരിച്ച് ഓരോ ഡിസ്ട്രിക്റ്റിലും  പ്രസിഡണ്ട്  നേരിട്ടു   പ്രതിനിധികളെ നിയമിക്കുന്ന നിയമവുമുണ്ടാക്കി.  റഷ്യൻ പാർലമെന്റിന്റെ ഉപരിമണ്ഡലമായ ഫെഡറൽ കൌണ്‍സിലിൽ ഗവർണ്ണർമാർക്കും ഇരിക്കാനുള്ള അവകാശം എടുത്തു കളഞ്ഞു. രാജ്യത്തിലെ കുത്തക ബാങ്കിംഗ് സ്ഥാപനങ്ങളുടെ അധികാരം കുറച്ചുകൊണ്ടു പ്രമുഖരായ പലരുടെ പേരിലും ക്രിമിനൽ കേസുകളെടുത്തു. പ്രസിഡന്റെന്ന നിലയിൽ  ആദ്യ വർഷം തന്നെ  എതിരാളികളെയും   വിപ്ലവം നടത്തിയവരെയും അടിച്ചമർത്തിയത് പുടിന്റെ  വിജയമായിരുന്നു. അദ്ദേഹത്തിന്  ഭരണ തടസ്സമെന്നോണം നിർണ്ണായകമായ പ്രശ്നങ്ങളുണ്ടാക്കിയത് ചെച്ചന്യായിലായിരുന്നു. മോസ്ക്കോവരെ ഭീകരന്മാരുടെ വിളയാട്ടങ്ങളുണ്ടായി.  ഗൊറില്ലാ രീതിയിൽ പർവത പ്രദേശങ്ങളിലെ ഒളിത്താവളങ്ങളിൽ നിന്നും റഷ്യൻ പട്ടാളത്തെ ആക്രമിച്ചു കൊണ്ടിരുന്നു.   2002-ൽ ഒളിപ്പോരുകാരെ  നശിപ്പിക്കാൻ അവർക്കെതിരെ പട്ടാളത്തെ അയച്ചു. അനേക റഷ്യൻ പട്ടാളക്കാർ ഗൊറില്ലാകളുടെ ആക്രമങ്ങളെ ചെറുത്തു നിൽക്കുന്നതിനിടയിൽ  മരണമടഞ്ഞു.

ഭാഷാ ചാതുര്യവും വാചാലനുമായ അദ്ദേഹം  മാതൃഭാഷ കൂടാതെ ജർമ്മനിയും ഇംഗ്ലീഷും നന്നായി സംസാരിക്കും. ' നിങ്ങൾ നിയമിച്ച ഒരുവനെപ്പോലെ  നിങ്ങളുടെ സേവകനായി എന്നെ കാണൂ'വെന്ന് അദ്ദേഹം റഷ്യൻ ജനതയോട് പറയുന്ന ഒരു പല്ലവിയാണ്.  വളരെക്കാലം ജർമ്മനിയിൽ   കെ.ജി. ബിയിൽ പ്രവർത്തിച്ചിരുന്നു. ജർമ്മനിയിലെ പ്രായോഗിക പരിശീലനം കാരണം  ബെർലിനുമായി നല്ലയൊരു ബന്ധം  സ്ഥാപിക്കാൻ സാധിച്ചു. മിതവാദികളായ പലരെയും പുടിന്റെ കെ.ജി.ബി യിലെ കഴിഞ്ഞ കാല പ്രവർത്തനങ്ങൾ  അസ്വസ്ഥമാക്കുന്നുണ്ട്.അധികാരം കിട്ടി കഴിഞ്ഞ് മിതവാദികളെ  ഭരണത്തിൽനിന്നും പുറത്താക്കുന്ന ഒരു നയമായിരുന്നു അദ്ദേഹം സ്വീകരിച്ചത്.  തീവ്രവാദികളെയൊ  നിഷ്പക്ഷമായിട്ടുള്ളവരെയോ അവരുടെ സ്ഥാനത്തു നിയമിക്കുന്നു. സുപ്രധാനങ്ങളായ തീരുമാനങ്ങളെടുക്കുമ്പോൾ ക്രിയാത്മകമായ ചിന്തകളില്ലാതെ  'അതെ' 'യതെ 'യെന്നു  പറയുന്നവരെ  അദ്ദേഹം ഭരണ കാര്യങ്ങളിൽ പങ്കു കൊള്ളിപ്പിക്കാറില്ല. കുർസ്ക്കിലെ  സബ്മറയിൻ ദുരന്തം സംഭവിച്ചത് ആദ്യതവണ അദ്ദേഹം പ്രസിഡണ്ടായ കാലഘട്ടത്തിലായിരുന്നു.  റഷ്യയുടെ ദേശീയഗാനം പരിഷ്ക്കരിക്കുകയും പുതിയ വാക്കുകളോടെ ഗാനം ഇമ്പമാക്കുകയും ചെയ്തു. 2003-ലെ പൊതുതെരഞ്ഞെടുപ്പിൽ പുടിനും അനുയായികൾക്കും പാർലമെന്റ്  നിയന്ത്രണം ലഭിച്ചു. 2006-ൽ  റഷ്യയിലെ ഏറ്റവും ധനികനായ മൈക്കിൽ കോഡോർകോവ്സ്കിയെ നികുതി വെട്ടിച്ചതിനു ജയിലിൽ അടച്ചു.

ആധുനിക റഷ്യയിലെ  ശക്തനായ ഒരു നേതാവായി  വ്ലാഡിമിർ  പുടിനെ കണക്കാക്കുന്നു. തികഞ്ഞ വ്യക്തിപ്രഭാവനായ അദ്ദേഹം  ആഗോള തലത്തിലും ഇതിനോടകം  പ്രശംസകളും കീർത്തികളും  നേടി കഴിഞ്ഞിരിക്കുന്നു. ഭരണാധികാരിയെന്ന നിലയിൽ രാജ്യത്തിലെ വിഭവങ്ങൾ  ശരിയായി വിനിയോഗിച്ചുകൊണ്ട്‌ റഷ്യയെ സാമ്പത്തികമായി മെച്ചപ്പെടുത്താൻ അദ്ദേഹത്തിനു സാധിച്ചു.  ബോറീസ് യെല്സിന്റെ ഭരണം റഷ്യൻ ജനത മടുത്തു കഴിഞ്ഞിരുന്നു.  സാമ്പത്തികവും രാഷ്ട്രീയവുമായ തലങ്ങളിൽ റഷ്യയെ ശക്തമാക്കാനും രാഷ്ട്രീയ സ്ഥിരതയുണ്ടാക്കാനും പുടിനു സാധിച്ചു. എങ്കിലും രാജ്യം അഭിമുഖീകരിച്ചുകൊണ്ടിരുന്ന  നീണ്ടകാല  പ്രശ്നങ്ങൾക്ക്  ശമനം വന്നിട്ടില്ല. വിലപ്പെരുപ്പത്തെ നിയന്ത്രിക്കാൻ സാധിച്ചിട്ടില്ല. അഴിമതികൾ തുടർന്നുകൊണ്ടിരിക്കുന്നു. റഷ്യയിൽ നിന്നും പിരിഞ്ഞുകൊണ്ട് സ്വതന്ത്രമാകണമെന്ന് ചിന്തിക്കുന്ന സ്റ്റേറ്റുകൾ  ഇന്നും ഭരണ കൂടത്തിനു അസമാധാനം നല്കുന്നു.

പുടിൻ തന്റെ അധികാരങ്ങൾ  സ്വയം കുത്തകയാക്കാതെ  സഹ പ്രവർത്തകർക്കും  തെരഞ്ഞെടുത്ത  ഗവർണ്ണമാർക്കും   പങ്കുവെച്ച് കാര്യക്ഷമതയോടെ  ഭരണം നിർവഹിക്കുന്നു.

കോർപ്പറേറ്റ്  സ്ഥാപനങ്ങളും  ബിസിനസ്സും സ്വകാര്യ മേഖലയിൽ ഉൾപ്പെടുത്തിയപ്പോൾ  'ബോറീസ്  ബെരെസോവ്സ്കിയും'  'വ്ലാഡിമർ ഗുസിസ്ക്കിയും'  വൻകിട  വ്യാവസായിക മുതലാളിമാരായി മാറി. സർക്കാരിനു നികുതി കൊടുക്കാതെ  വെട്ടിപ്പ് നടത്തിയതുമൂലം  അവർ വിദേശത്ത്  പിടികിട്ടാ പുള്ളികളായി കഴിയുന്നു.  അഴിമതികളും നികുതി വെട്ടിപ്പും നടത്തി രാജ്യം മുഴുവൻ അരാജകത്വത്തിലുമായി. മിഖായേൽ കൊഡോർകൊവ്സ്കി  ഒരിയ്ക്കൽ  റഷ്യയുടെ ഏറ്റവും ധനികനായ മനുഷ്യനായിരുന്നു. അദ്ദേഹം  നികുതി വെട്ടിപ്പു  നടത്തിയതിന്  ഇന്ന് ജയിലിലുമാണ്.

സ്വതന്ത്രമായ പത്രപ്രവർത്തന സ്വാതന്ത്ര്യം അനുവദനീയമെങ്കിലും വാർത്താ മീഡിയാകൾ  സർക്കാരിനോടനുഭാവം കാണിക്കുന്നവർ നിയന്ത്രിക്കുന്നു. സർക്കാരിന്റെ ഉടമയിലല്ലാത്ത വിദേശ ഫണ്ടുകൾക്കും നിയന്ത്രണമുണ്ട്‌. മനുഷ്യാവകാശ  പ്രവർത്തനങ്ങൾക്കായി  വിദേശ ഫണ്ടുകൾ രാജ്യത്ത് ഒഴുകുന്നത്‌ ദുരുപയോഗം ചെയ്യാതിരിക്കാനുള്ള സംവിധാനങ്ങളുമുണ്ട്. വാഷിംഗ്ണ്ടന്റെ  ഭീകരതയ്ക്കെതിരായുള്ള പോരാട്ടത്തിൽ പുടിനും സഹകരണം നല്കുന്നു. 'ചെച്ചൻ'  വിഘടനത്തിനായി വിപ്ലവം നടത്തുന്നവരെ 'അല്കാഡാ'  ഭീകരർക്ക് തുല്യമായി അദ്ദേഹം കരുതുന്നു.

1972-ൽ  റഷ്യയും അമേരിക്കയുമായി  'ആന്റി മിസൈയിൽ  സംബന്ധിച്ച  ഒരു കരാറിൽ ഒപ്പുവെച്ചിരുന്നു.  പ്രസിഡണ്ട്  ബുഷ്‌  റഷ്യയുമായി ചർച്ചകൾ നടത്താതെ ആ കരാർ  റദ്ദാക്കിയതിൽ  പുടിൻ  ശക്തമായ പ്രതിഷേധം അമേരിക്കയോട് രേഖപ്പെടുത്തി.  2011 ലെ അമേരിക്കയിലെ സെപ്റ്റംബർ പതിനൊന്നാക്രമണത്തിൽ   റഷ്യയും  സമാധാനം  കാംഷിക്കുന്ന മറ്റു രാജ്യങ്ങളുമൊത്ത് ഭീകരതയ്ക്കെതിരെ ഒത്തൊരുമിച്ചു ചെറുത്തു നില്ക്കാൻ പ്രതിജ്ഞ ചെയ്തു. മാനുഷികപരമായി വിഭവങ്ങൾ വിതരണം ചെയ്യാനും അപകടത്തിൽപ്പെടുന്നവരെ രക്ഷിക്കാനും  റഷ്യയുടെ  മുകളിൽക്കൂടി പറക്കാൻ മറ്റു രാജ്യങ്ങളുടെ വിമാനങ്ങളും അനുവദിച്ചിട്ടുണ്ട്. ഇറാക്കിൽ നിന്നും സദാം ഹുസയിനെ പുറത്താക്കുന്നതിൽ  അമേരിക്കയുടെയും ബ്രിട്ടന്റെയും നിലപാടുകളെ  പുടിൻ ശക്തമായി എതിർത്തിരുന്നു.

1990 മുതൽ സാമ്പത്തികമായി തകർന്ന റഷ്യയെ കരകയറ്റി പുരോഗതി കൈവരിച്ചതും പുടിന്റെ നേട്ടമായിരുന്നു. എല്ലാ വിധത്തിലും ജനങ്ങളുടെ വിശ്വാസം നേടിയ അദ്ദേഹത്തെ 2004-ലും പ്രസിഡണ്ടായി  തെരഞ്ഞെടുത്തു. 2007-ലെ പാർലമെന്റ്  തെരഞ്ഞെടുപ്പിൽ പുടിന്റെ പാർട്ടിയായ യുണൈറ്റഡ് റഷ്യാ  വമ്പിച്ച ഭൂരിപക്ഷത്തോടെ കൂടുതൽ സീറ്റുകൾ നേടി ഭരണമുറപ്പിച്ചു.   അന്തർദേശീയ  നിരീക്ഷകരും കമ്മ്യൂണിസ്റ്റ്  പാർട്ടിയും  തെരഞ്ഞെടുപ്പ് നീതിപരമായിരുന്നില്ലെന്ന്  പരാതികൾ മുഴക്കിയെങ്കിലും  ഗൗനിക്കാതെ പുടിൻ തന്റെ അധികാരം ഉറപ്പിക്കുകയും ചെയ്തു. ഭരണഘടനയനുസരിച്ച് കാലാവധി തീർന്നപ്പോൾ പുടിൻ  അധികാരത്തിൽ നിന്ന് താഴെയിറങ്ങിയെങ്കിലും ഡിമിട്രി മെഡ് വെദേവിനെ അദ്ദേഹത്തിൻറെ പിൻഗാമിയായി  തെരഞ്ഞെടുത്തു.  

2008-ൽ മെഡ് വെദെവ്  വമ്പിച്ച ഭൂരിപക്ഷത്തോടെ പ്രസിഡണ്ടായി തെരഞ്ഞെടുക്കുകയും പുടിൻ യുണൈറ്റഡ് റഷ്യൻ പാർട്ടിയുടെ ചെയർമാൻ സ്ഥാനം സ്വീകരിക്കുകയും ചെയ്തു.   2008 മെയ് ഏഴാം തിയതി മെഡ് വെദെവ് രാജ്യത്തിന്റെ  പ്രസിഡണ്ടായി ചുമതലയെടുത്ത  ഏതാനും മണിക്കൂറുകൾക്കുള്ളിൽ പുടിനെ പ്രധാന മന്ത്രിയായി നിർദ്ദേശിച്ചു.   അടുത്ത ദിവസം തന്നെ റഷ്യയുടെ പാർലമെന്റ്  പുടിന്റെ നിയമനം ശരി വെക്കുകയും ചെയ്തു. ഭരണപരമായി മെഡ് വെദെവിനു   കൂടുതൽ അവകാശ വാദങ്ങളുണ്ടായിരുന്നെങ്കിലും  ക്രംലിനിലെ പ്രധാന ഭരണാധികാരി പുടിൻ തന്നെയായിരുന്നു. മെഡ് വെദെവ് രണ്ടാം തവണയും പ്രസിഡണ്ടായി മത്സരിക്കുമെന്ന് ഊഹങ്ങളുണ്ടായിരുന്നെങ്കിലും 2011 സെപ്റ്റമ്പറിൽ അദ്ദേഹം പുടിന്‌  പിന്തുണ നൽകുകയാണുണ്ടായത്. തെരഞ്ഞെടുപ്പിൽ കൃത്രിമത്വം നടന്നുവെന്ന് പ്രതിപക്ഷങ്ങൾ ആരോപിച്ചെങ്കിലും   2012  മാർച്ച്  നാലാം തിയതി പുടിനെ മൂന്നാം തവണയും റഷ്യയുടെ പ്രസിഡണ്ടായി തെരഞ്ഞെടുത്തു. പുടിൻ പാർട്ടിയുടെ ചെയർമാൻ സ്ഥാനം രാജി വെയ്ക്കുകയും പകരം മെഡ് വെദെവിനു പാർട്ടിയുടെ നിയന്ത്രണം കൊടുക്കുകയും ചെയ്തു. 2012 മെയ് ഏഴാം തിയതി പ്രസിഡണ്ടായി ഉത്തരവാദിത്വം തുടങ്ങിയ ദിവസം മെഡ് വെദെവിനെ പ്രധാന മന്ത്രിയായി നിർദ്ദേശിക്കുകയും ചെയ്തു.

യൂ എസ് നാഷണൽ സെക്യൂരിറ്റി ഏജൻസിയിലെ കോണ്‍ട്രാക്റ്ററായ 'എഡ്വേർഡ്  സ്നോഡൻ'  ചില രഹസ്യ വിവരങ്ങൾ  കൈമാറിയതിന് 2013-ൽ റഷ്യയിൽ അഭയം തേടിയിരുന്നു. അതിന്റെ പേരിൽ  റഷ്യയും അമേരിക്കയുമായി പ്രശ്നങ്ങളുണ്ടായി. അമേരിക്കയ്ക്ക് ഭാവിയിൽ സ്നോഡൻ ദോഷങ്ങൾ വരുത്തില്ലായെന്ന ഉറപ്പിൻമേൽ  'സ്നോടനെ' പുടിൻ റഷ്യയിൽ ജീവിക്കാൻ അനുവദിച്ചിരുന്നു. ആഗസ്റ്റ് 2013-ൽ ഡമാസ്ക്കസ്സിനു സമീപം  കെമിക്കലായുധങ്ങൾ കൊണ്ടുള്ള ആക്രമണം ഉണ്ടായപ്പോൾ അമേരിക്ക പട്ടാളത്തെ അയച്ച്  അവരുടെ ആഭ്യന്തര യുദ്ധത്തിൽ ഇടപെട്ടിരുന്നു. സിറിയായുടെ കെമിക്കലായുധങ്ങൾ നശിപ്പിക്കാൻ അമേരിക്കയും റഷ്യയുമായി ഉടമ്പടിയുമുണ്ടാക്കി.

സോവിയറ്റ് നാടിന്റെ പതനശേഷം 2013 ഡിസംബർ  പതിമൂന്നാം തിയതി   നടപ്പാക്കിയ ഭരണഘടനയുടെ ആഘോഷവേളയിൽ പുടിൻ  ഏകദേശം ജയിലിൽ കിടക്കുന്ന  25000 പേരെ  മോചിപ്പിച്ചു. ഓയിൽ രാജാവായിരുന്ന 'മൈക്കായിൽ ഖോടോര്കൊവ്സ്കിയ്ക്ക്'  മാപ്പ് നല്കിക്കൊണ്ട് പതിറ്റാണ്ടുകൾ ജയിലിൽ കിടന്ന അദ്ദേഹത്തെയും മോചിപ്പിച്ചു. ഖോടോര്കൊവ്സ്കിയെ ജയിലിൽ അടച്ചത് രാഷ്ട്രീയ പ്രേരണയായിരുന്നുവെന്ന് പലരും വിശ്വസിക്കുന്നു. 2014 ഫെബ്രുവരിയിൽ യുക്രെനിയൻ പ്രസിഡണ്ട്  വിക്റ്റൊർ  യാനുകോവ്ക്  സർക്കാരിനെ വിപ്ലവകാരികൾ പുറത്തു ചാടിച്ചപ്പോൾ  അവിടെ നിന്നും രക്ഷപെട്ട അദ്ദേഹത്തിന് റഷ്യയിൽ അഭയം കൊടുത്തു. കീവിൽ താല്ക്കാലികമായി വന്ന സർക്കാരിനെ പുടിൻ അംഗീകരിച്ചില്ല. റഷ്യയുടെ താല്പര്യം സംരക്ഷിക്കാൻ അവിടെ പട്ടാളത്തെ അയക്കാൻ പാർലമെന്റിന്റെ അംഗീകാരം തേടിയിരുന്നു. 2014 മാർച്ചിൽ റഷ്യൻ പട്ടാളം യുക്രെയിനിലെ ഒരു സ്വതന്ത്ര രാജ്യമായ ക്രിമിയായുടെ നിയന്ത്രണം ഏറ്റെടുത്തു. അവിടുത്തെ  ഹിതപരിശോധനയിലും ജനങ്ങളുടെ താല്പര്യം റഷ്യയോട്  ചേരാനായിരുന്നു. യുക്രയിനിലെ യുദ്ധം അവസാനിപ്പിക്കാൻ ഒത്തുതീർപ്പിനുള്ള വ്യവസ്ഥകളടങ്ങിയ സമാധാന സന്ദേശങ്ങളുമായി  പുടിൻ  ലോക നേതാക്കന്മാരെ കണ്ടിരുന്നു.യുദ്ധത്തിനു ശമനം വന്നെങ്കിലും  അതുമൂലമുണ്ടായ നാശ നഷ്ടങ്ങൾ അതിഗുരുതരമായിരുന്നു. യുണൈറ്റഡ്  നാഷന്റെ കണക്കനുസരിച്ച്   8000 പേർ കൊല്ലപ്പെടുകയും  ഒന്നര മില്ല്യൻ ജനങ്ങൾ പലായനം ചെയ്യുകയും ചെയ്തു. കണക്കില്ലാതെ ജനങ്ങൾ ഭവനരഹിതരാവുകയും മുറിവേല്ക്കുകയുമുണ്ടായി.

2015 സെപ്റ്റംബർ ഇരുപത്തിയെട്ടാം തിയതി പുടിൻ യുണൈറ്റഡ്  നാഷനിൽ ചെയ്ത പ്രസംഗത്തിൽ നാറ്റോയും യുണൈറ്റഡ്  സ്റ്റേറ്റ്സും ലോക സമാധാനത്തിനു ഭീഷണിയെന്നു  പ്രസ്താവിക്കുകയുണ്ടായി.  പുടിന്റെ ഈ പ്രസ്താവനയ്ക്ക്  രണ്ടു ദിവസത്തിനു ശേഷം റഷ്യാ, 'സിറിയായുടെ' ആഭ്യന്തര യുദ്ധത്തിൽ പങ്കു ചേർന്നു. സിറിയായുടെ  ഐ സി എസ്  അധിനിവേശ സ്ഥലങ്ങളായ ' ഹോംസും ഹാമാ' പട്ടണങ്ങൾക്കും  സമീപം റഷ്യാ ബോംബു ചെയ്തു. ഇസ്ലാമിക്ക് സ്റ്റേറ്റ്  ഭീകര വാദികളെ അമർച്ച ചെയ്യാനാണ് ബോംബു ചെയ്തതെന്നു റഷ്യാ അവകാശപ്പെടുന്നു. ഇക്കാര്യത്തിൽ അമേരിക്കയുടെ ഉദാസീനതയെ റഷ്യാ  കുറ്റപ്പെടുത്തുന്നുമുണ്ട്.

കൃഷിക്കാരുടെ ക്ഷേമ കാര്യത്തിലും കൃഷിയുൽപ്പനന്ങ്ങൾ  വർദ്ധിപ്പിക്കുന്ന കാര്യത്തിലും  പുടിൻ പ്രത്യേക ശ്രദ്ധ പതിപ്പിക്കുന്നുണ്ട്. റഷ്യാ ഇന്ന് ഭക്ഷ്യകാര്യത്തിൽ 'സ്വയം പര്യാപ്തി'  നേടിക്കൊണ്ടിരിക്കുന്നു. കൃഷിക്കാർക്ക് കൊടുത്ത പ്രോത്സാഹനവും അവരുടെ കഠിനപ്രയത്നവുമാണ്‌ ഈ നേട്ടങ്ങൾക്കു  കാരണം. വൻതോതിലുള്ള കന്നുകാലി വളർത്തലും ഭക്ഷ്യവിഭവങ്ങളുടെ പ്രോസ്സസ്സിംഗ് കമ്പനികളും രാജ്യത്തിന്റെ ഉത്ഭാദന മേഖലകളെ പരിപോഷിപ്പിക്കുന്നു. പട്ടാളത്തിൽ ജോലി ചെയ്യുന്നവർക്ക് ആകർഷിണീയമായി  കൂടുതൽ ശമ്പളവും ആനുകൂല്യങ്ങളും  താമസിക്കാൻ വീടുകളും നല്കുന്നുണ്ട്. അദ്ധ്യാപകരുടെ ശമ്പളം വർദ്ധിപ്പിച്ചു.   രാജ്യത്തിന്റെ വിദ്യാഭ്യാസ നിലവാരം ഉയർത്താൻ പുടിൻ നേരിട്ട് ശ്രദ്ധ പതിപ്പിക്കുന്നു.

മോസ്ക്കോയിലെ കൊളോമ്നായിൽ അതിശക്തമായ തീപിടുത്തം മുലം വമ്പിച്ച നാശനഷ്ടങ്ങളും ആളപകടങ്ങളുമുണ്ടായി. വ്ലാഡിമർ പുടിൻ  നേരിട്ട് അവർക്കുള്ള  സഹായ ഹസ്തങ്ങളുമായി രംഗത്തു വന്നു. വീടുകൾ പണിതു കൊടുക്കുകയും നഷ്ടപരിഹാരങ്ങൾ നല്കുകയും ചെയ്തു. പുടിൻ സ്വന്തം വീട്ടിൽ നിന്നും വീടുപണികൾ ക്യാമറയിൽ ക്കൂടി വീക്ഷിച്ചു കൊണ്ടിരുന്നു. 'ഞാൻ എന്തെങ്കിലും മനുഷ്യത്വപരമായി ചെയ്യുന്നുവെങ്കിൽ എനിയ്ക്ക് അതിന്റെ പൂർണ്ണ ഫലം കാണുകയും നേരിട്ട് പ്രവർത്തിക്കുകയും ചെയ്യണമെന്ന്' അദ്ദേഹം പറയുന്നു. നിയമമനുസരിച്ച് 2018 ലും അദ്ദേഹത്തിനു പ്രസിഡണ്ടായി മത്സരിക്കാം.  ഇനി അധികാരത്തിലില്ലെന്ന് പറയുന്നുണ്ടെങ്കിലും അടുത്ത പന്ത്രണ്ടു വർഷം കൂടി  റഷ്യയെ  അദ്ദേഹം നയിക്കുമെന്ന് അദ്ദേഹത്തെ പിന്തുണയ്ക്കുന്നവർ കരുതുന്നു.

ഭീകരന്മാർ കയ്യടക്കി വെച്ചിരിക്കുന്ന സിറിയായിലെ 'റാക്കാ'യെന്ന  പട്ടണം പിടിച്ചെടുക്കാൻ റഷ്യയുടെ  ഒരു ലക്ഷത്തി അമ്പതിനായിരം പട്ടാളത്തെ തയ്യാറാക്കി നിർത്തിയിട്ടുണ്ട്.   ഐ.എസ്.ഐ.എസ്. ഭീകരർ   റാക്കാ പട്ടണത്തെ അവരുടെ തലസ്ഥാന നഗരിയായി വിളംബരം ചെയ്തു കഴിഞ്ഞു. ഏകദേശം അയ്യായിരം ജിഹാദികൾ  പട്ടണത്തിനു കാവൽ നില്പ്പുണ്ട്. പാരിസിലെ ഭീകരർ നടത്തിയ ആക്രമണ ശേഷം ഇസ്ലാമിക്ക് സ്റ്റേറ്റിനെ തകർക്കാർ പടിഞ്ഞാറേ രാജ്യങ്ങളുമായി സഹകരിക്കാൻ പുടിൻ  തയ്യാറെന്നു സൂചന നല്കി കഴിഞ്ഞു.  ഫ്രാൻസിൽ അടുത്തയിട നടന്ന ദുഃഖകരമായ സംഭവങ്ങളുടെ വെളിച്ചത്തിൽ  ഭീകരരെ  അടിച്ചമർത്താൻ ഒത്തൊരുമിച്ചുള്ള സഹകരണം ആവശ്യമെന്നു അദ്ദേഹം ഫ്രാൻസിലെ ഡേവിഡ് കൊമ്രോണിനെ അറിയിച്ചു.    അനേക നഗരങ്ങളെ  ഒരേ സമയം തീ മഴ പെയിപ്പിച്ചു കത്തിക്കാൻ കഴിവുള്ള യുദ്ധോ പകരണങ്ങളും ആയുധങ്ങളുമായി റഷ്യൻ നാവികപ്പട  സിറിയായുടെ കടലതിർത്തിയിൽ തയ്യാറായി നില്ക്കുകയാണ്. ഇറാന്റെ വൻപടയും  റഷ്യയെ സഹായിക്കാൻ ഏതു നിമിഷവും ഒപ്പമുണ്ട്. ഐസിഎസ് നെയും സിറിയയിലെ വിമതരെയും തകർക്കുക എന്ന  റഷ്യയുടെ ലക്‌ഷ്യം ലോക സമാധാനത്തിനു തന്നെ മങ്ങലേറ്റിരിക്കുന്നു. റഷ്യയുടെ ഈ വമ്പൻ പടയെ പാശ്ചാത്യ ലോകവും അമേരിക്കയും എങ്ങനെ കാണുന്നുവെന്ന് കാത്തിരുന്നു കാണാം. ഐ സി എസ ന്റെയും റബലുകളുടെയും താവളങ്ങളിലേയ്ക്ക് റഷ്യൻ സൈന്യം കുതിച്ചു പാഞ്ഞു കൊണ്ടിരിക്കുന്നു. ഒളിത്താവളങ്ങൾ ഉപേക്ഷിച്ചു ഭീകരർ പലായനം ചെയ്യുന്ന കാഴ്ചയാണ് ലോകമിന്ന് കാണുന്നത്‌. ഐ സി എസ ന്റെ ക്രൂരതകൾ അവസാനിപ്പിക്കുമെന്ന് റഷ്യാ  പ്രതിജ്ഞ ചെയ്തിട്ടുണ്ട്. ഭീകരരോട് ക്ഷമിക്കേണ്ടത്‌ കരുണാമയമായ ദൈവമാണെന്നും അവരെ ദൈവത്തിങ്കലേയ്ക്ക് അയക്കേണ്ടത് തന്റെ കടമയാണെന്നും പുടിൻ പറഞ്ഞു. 

(റഷ്യൻ ചരിത്ര  പരമ്പര അവസാനിപ്പിക്കുന്നു. ലേഖനങ്ങൾ ക്ഷമയോടെ വായിച്ച എല്ലാ വായനക്കാർക്കും നന്ദി. )

Putins calmly announce their divorce on state TV | CTV News

Bashar al-Assad (SYRIA)

Parents

Medvedev

റഷ്യൻ ചരിത്രം ഒരു പഠനം (Published in EMalayalee)

1.  രാജവംശ പരമ്പരകൾ 

  
 2.  സാർ നിക്ലൗവൂസ് രണ്ടാമനും  രാജഭരണത്തിന്റെ അന്ത്യവും

         
3. ചക്രവർത്തിനി അലക്സാഡ്ര  ഫ്യൂയോഡോറോവ്നായും വിവാദങ്ങളും വിമർശനങ്ങളും  


4. ഗ്രിഗറി  റാസ്പുട്ടിൻ  റഷ്യയുടെ മഹാനോ വില്ലനോ?  


5.    ബോൾഷേവിക്ക് വെടിയുണ്ടകളേറ്റു  മരിച്ച       രാജകുടുംബവും ദുഃഖ പര്യവസാനവും  

  6. വിപ്ലവത്തിന്റെ  നായകൻ ‘വ്ലാഡിമിർ  ലെനിനും’ സോവിയറ്റ് യൂണിയനെന്ന  കമ്മ്യൂണിസ്റ്റ് രാഷ്ട്രത്തിന്റെ ഉദയവും

           
7.      ജോസഫ്  സ്റ്റലിനും  റഷ്യയുടെ  ഭീകര ഭരണവും 


8.     മലങ്കോവ് - ക്രൂഷ്ചേവ്‌  പോരാട്ടങ്ങളും   ശീതസമരവും  


9.    ബ്രഷ്നേവും  സോവിയറ്റ്  പതനത്തിന്റെ തുടക്കവും 


10.      കോസിജിനും വ്യത്യസ്ത ചിന്തകളും തീവ്രവാദികളുടെ ഭരണവും


11.     സോവിയറ്റ്-അമേരിക്കാ  ശീതസമരങ്ങളും പര്യവസാനവും 


 12.    സോവിയറ്റ് യൂണിയനിലെ ഏകാധിപത്യവും തകർന്ന കമ്മ്യൂണിസവും കഥകൾ 
      

13.    ഗോർബചോവിനിസവും പരിഷ്ക്കാരങ്ങളും പാളീച്ചകളും  



14.      പുടിനും നവീകരണ റഷ്യയും

1. 
   

റഷ്യൻ ചരിത്രം ഒരു പഠനം (Published in Malayalam Daily News)

1. രാജവംശ പരമ്പരകൾ 

  
 2. സാർ നിക്ലൗവൂസ് രണ്ടാമനും  രാജഭരണത്തിന്റെ അന്ത്യവും
        
3. ചക്രവർത്തിനി അലക്സാഡ്ര  ഫ്യൂയോഡോറോവ്നായും വിവാദങ്ങളും വിമർശനങ്ങളും  


4. ഗ്രിഗറി  റാസ്പുട്ടിൻ  റഷ്യയുടെ മഹാനോ വില്ലനോ?  


5.    ബോൾഷേവിക്ക് വെടിയുണ്ടകളേറ്റു  മരിച്ച       രാജകുടുംബവും ദുഃഖ പര്യവസാനവും  


6.     വിപ്ലവത്തിന്റെ  നായകൻ ‘വ്ലാഡിമിർ  ലെനിനും’ സോവിയറ്റ് യൂണിയനെന്ന  കമ്മ്യൂണിസ്റ്റ് രാഷ്ട്രത്തിന്റെ ഉദയവും

           
7.     ജോസഫ്  സ്റ്റലിനും  റഷ്യയുടെ  ഭീകര ഭരണവും 


8.     മലങ്കോവ് - ക്രൂഷ്ചേവ്‌  പോരാട്ടങ്ങളും   ശീതസമരവും  


9.     ബ്രഷ്നേവും  സോവിയറ്റ്  പതനത്തിന്റെ തുടക്കവും 


10.     കോസിജിനും വ്യത്യസ്ത ചിന്തകളും തീവ്രവാദികളുടെ ഭരണവും


11.     സോവിയറ്റ്-അമേരിക്കാ  ശീതസമരങ്ങളും പര്യവസാനവും 


 12.     സോവിയറ്റ് യൂണിയനിലെ ഏകാധിപത്യവും തകർന്ന കമ്മ്യൂണിസവും കഥകൾ 
      


13.     ഗോർബചോവിനിസവും പരിഷ്ക്കാരങ്ങളും പാളീച്ചകളും  


14.     പുടിനും നവീകരണ റഷ്യയും

1. 
   

റഷ്യൻ ചരിത്രം ഒരു പഠനം (ജോയിച്ചൻ പുതുക്കുളം പ്രസിദ്ധീകരിച്ച ലേഖനങ്ങൾ)

1. രാജവംശ പരമ്പരകൾ 

  

 2. സാർ നിക്ലൗവൂസ് രണ്ടാമനും  രാജഭരണത്തിന്റെ അന്ത്യവും

        

3. ചക്രവർത്തിനി അലക്സാഡ്ര  ഫ്യൂയോഡോറോവ്നായും വിവാദങ്ങളും വിമർശനങ്ങളും  

4. ഗ്രിഗറി  റാസ്പുട്ടിൻ  റഷ്യയുടെ മഹാനോ വില്ലനോ?  

5.    ബോൾഷേവിക്ക് വെടിയുണ്ടകളേറ്റു  മരിച്ച       രാജകുടുംബവും ദുഃഖ പര്യവസാനവും  

  

    

6.     വിപ്ലവത്തിന്റെ  നായകൻ ‘വ്ലാഡിമിർ  ലെനിനും’ സോവിയറ്റ് യൂണിയനെന്ന  കമ്മ്യൂണിസ്റ്റ് രാഷ്ട്രത്തിന്റെ ഉദയവും

           

7.     ജോസഫ്  സ്റ്റലിനും  റഷ്യയുടെ  ഭീകര ഭരണവും 

8.     മലങ്കോവ് - ക്രൂഷ്ചേവ്‌  പോരാട്ടങ്ങളും   ശീതസമരവും  

9.     ബ്രഷ്നേവും  സോവിയറ്റ്  പതനത്തിന്റെ തുടക്കവും 

10.     കോസിജിനും വ്യത്യസ്ത ചിന്തകളും തീവ്രവാദികളുടെ ഭരണവും

11.     സോവിയറ്റ്-അമേരിക്കാ  ശീതസമരങ്ങളും പര്യവസാനവും 

 12.     സോവിയറ്റ് യൂണിയനിലെ ഏകാധിപത്യവും തകർന്ന കമ്മ്യൂണിസവും കഥകൾ 

      

13.     ഗോർബചോവിനിസവും പരിഷ്ക്കാരങ്ങളും പാളീച്ചകളും  

14.     പുടിനും നവീകരണ റഷ്യയും

റഷ്യൻ ചരിത്രം ഒരു പഠനം (ലേഖനം 13)

ഗോർബചോവിനിസവും പരിഷ്ക്കാരങ്ങളും പാളീച്ചകളും   

By ജോസഫ് പടന്നമാക്കൽ

സോവിയറ്റ് യൂണിയന്റെ അവസാനത്തെ സുപ്രീം ഭരണാധികാരിയായിരുന്ന മൈക്കിൾ  ഗോർബചോവ്  റഷ്യയിൽ പ്രിവോളിയെന്ന സ്ഥലത്ത് 1931 മാർച്ച് രണ്ടാം തിയതി ജനിച്ചു. സോവിയറ്റ്  യൂണിയനിൽ   ആധികാരികമായ  ഉന്നത സ്ഥാനങ്ങളിലിരുന്ന  നേതാവ്, സർക്കാരിന്റെ  പ്രതിനിധി, ഔദ്യോഗിക വക്താവ്,  1985 മുതൽ 1991 വരെ കമ്മ്യൂണിസ്റ്റ്  പാർട്ടി  ജനറൽ സെക്രട്ടറി,  1990-91 കാലങ്ങളിൽ  സോവിയറ്റ്  യൂണിയൻ  പ്രസിഡണ്ട്, നോബൽ സമ്മാന ജേതാവ്   എന്നീ നിലകളിൽ അദ്ദേഹം അറിയപ്പെടുന്നു. രാജ്യത്തെ ജനാധിപത്യ സംവിധാനമാക്കുന്നതിനും സാമ്പത്തിക  പരിവർത്തനങ്ങൾക്കും വ്യവസായങ്ങൾ സ്വകാര്യവല്ക്കരണത്തിനും അടിസ്ഥാനമിട്ടു.  തന്മൂലമുള്ള അദ്ദേഹത്തിൻറെ പ്രയത്നങ്ങൾ  കമ്മ്യൂണിസത്തിന്റെ അധപതനത്തിനു വഴി തെളിയിച്ചു. 1991-ൽ  സോവിയറ്റ് യൂണിയൻ  ച്ഛിന്നഭിന്നമായി അനേക രാജ്യങ്ങളായി ചിതറുകയും ചെയ്തു. കൂടാതെ  രണ്ടാം ലോകമഹായുദ്ധത്തിനു ശേഷം സോവിയറ്റ് യൂണിയന് കിഴക്കേ യൂറോപ്പിന്റെ മേലുണ്ടായിരുന്ന  ആധിപത്യവും  അവസാനിച്ചു.


ഗോർബചോവിന്റെ  മാതാപിതാക്കൾ  തെക്കു പടിഞ്ഞാറേ റഷ്യയിലെ 'സ്ടാവ്രോപോൾ' പ്രദേശത്തുള്ള  കൃഷിക്കാരായിരുന്നു. യുവാവായിരുന്നപ്പോൾ തന്നെ  1946-ൽ  കമ്മ്യൂണിസ്റ്റ് പാർട്ടിയിൽ ചേർന്നു. മോസ്ക്കോ യൂണിവെഴ് സിറ്റിയിൽ 1952-ൽ  നിയമം പഠിക്കാനാരംഭിച്ചു.1955-ൽ ബിരുദമെടുത്തതിനുശേഷം അദ്ദേഹം കമ്മ്യൂണിസ്റ്റ് പാർട്ടിയിലെ സുപ്രധാനങ്ങളായ പല പദവികളിലുമിരുന്ന് പാർട്ടിയ്ക്കു  വേണ്ടി പ്രവർത്തിച്ചുകൊണ്ടിരുന്നു. 1970-ൽ  പ്രാദേശിക  തലത്തിലെ ഒന്നാം സെക്രട്ടറിയായി.  1971-ൽ ഗോർബച്ചോവിനെ  കേന്ദ്ര കമ്മിറ്റിയംഗമായി തെരഞ്ഞെടുത്തു.  യൂറി അണ്ട്രപ്പോവിന്റെ പതിനഞ്ചു മാസ ഭരണ കാലയളവിൽ 1982 മുതൽ 1984  വരെ കമ്മ്യൂണിസ്റ്റ്  പാർട്ടിയുടെ ജനറൽ സെക്രട്ടറിയായിരുന്നു.


ബ്രഷ്നേവിന്റെ കാലത്തെ തകർന്നു കിടന്നിരുന്ന സോവിയറ്റ് യൂണിയന്റെ സാമ്പത്തികം അഭിവൃദ്ധിപ്പെടുത്തുകയെന്നത് ജനറൽ സെക്രട്ടറിയെന്ന നിലയിൽ അദ്ദേഹത്തിൻറെ ആദ്യത്തെ ശ്രമമായിരുന്നു.  'സോവിയറ്റ് യൂണിയന്റെ സാമ്പത്തിക തലങ്ങൾ തകർന്നുവെന്നും പരിപൂർണ്ണമായ ഒരു പുനരുദ്ധാരണം ആവശ്യമാണെന്നും' 1985-ൽ   അദ്ദേഹം പ്രഖ്യാപിച്ചു. സാമ്പത്തിക വിഷയങ്ങളെപ്പറ്റിയുള്ള  ഏകദേശമായ ഒരു കരടു രൂപം അദ്ദേഹത്തിന്റെ നിർദേശമനുസരിച്ച്   കേന്ദ്ര കമ്മിറ്റിയിൽ കൊണ്ടുവന്നു. അതി വേഗതയിൽ റഷ്യയുടെ ടെക്കനോളജി നവീകരിക്കേണ്ട ആവശ്യവും അദ്ദേഹം  ചൂണ്ടി കാട്ടിയിരുന്നു. വ്യവസായവും കൃഷിയുത്ഭാനവും വർദ്ധിപ്പിക്കാനും  സർക്കാരിന്റെ വിവിധ തലങ്ങളിലുള്ള അഴിമതികളെ ഇല്ലായ്മ ചെയ്യാനും  നിർദേശങ്ങളിലുണ്ടായിരുന്നു.  കമ്മ്യൂണിസ്റ്റ് രാഷ്ട്രത്തിന്റെ രാഷ്ട്രീയവും സാമൂഹികവുമായ അടിസ്ഥാന വ്യവസ്ഥിതിയെ അഴിച്ചു പണിയാതെ  സോവിയറ്റ് യൂണിയന്റെ സാമ്പത്തിക തലങ്ങൾ പരിഷ്ക്കരിക്കുകയെന്നത് എളുപ്പമല്ലെന്നും ഗോർബചോവിനു പിന്നീട് ബോധ്യമായി. വ്യവസായിക ഉത്ഭാതന മേഖലയിൽ ഉൽപ്പന്നങ്ങൾക്ക് സർക്കാരിന്റെ പൊതുവായ ഒരു മാനദണ്ഡം ആവശ്യമാണെന്നു മനസിലാക്കി റഷ്യൻ ഉല്പ്പന്നങ്ങള്ക്ക് മെച്ചമായ ഒരു നിലവാരം (ക്വാളിറ്റി കണ്ട്രോൾ)പുലർത്താനും നേതൃത്വം കൊടുത്തു.


സോവിയറ്റ് യൂണിയനിൽ മദ്യപാനികൾ  വർദ്ധിച്ച കാരണം 1985-ൽ മദ്യ നിരോധനവും  അദ്ദേഹത്തിൻറെ പരിഷ്ക്കാരങ്ങളിൽ ഒന്നായിരുന്നു. വോട്ക്കായുടെയും വൈനിന്റെയും ബീയറിന്റെയും വില കൂട്ടിക്കൊണ്ട് മദ്യവില്പ്പനയ്ക്ക് നിയന്ത്രണം കൊണ്ടുവന്നു. മദ്യം നിരോധിച്ചപ്പോൾ സർക്കാരിന്റെ വരുമാനവും കുറഞ്ഞു. അതിന്റെ ഫലമായി  കരിഞ്ചന്തയിൽ മദ്യം വില്പ്പന തുടങ്ങി. റഷ്യയുടെ  സാമ്പത്തിക വരുമാനത്തിൽ 100 ബില്ല്യൻ റൂബിൾസ്   കുറഞ്ഞു. എന്നിരുന്നാലും അദ്ദേഹത്തിൻറെ ഈ പരിഷ്ക്കാരങ്ങൾക്ക് ജനങ്ങളിൽനിന്നു സ്വാഗതവും  രാജ്യത്തിന്‌ ഗുണപ്രദവുമെന്നും  പൊതുവേ വിലയിരുത്തലുണ്ടായിരുന്നു.


കേന്ദ്രീകൃത സാമ്പത്തിക പരിഷ്ക്കാരങ്ങൾ  ലക്‌ഷ്യം വെച്ചുകൊണ്ടുള്ള അദ്ദേഹത്തിൻറെ പ്രവർത്തനങ്ങൾ തുടർന്നുകൊണ്ടിരുന്നു. സോഷ്യലിസ്റ്റ് വ്യവസ്ഥയിലുള്ള മാർക്കറ്റ്  സമ്പ്രദായത്തിനു മാറ്റങ്ങളും ആഗ്രഹിച്ചു.  1985-ൽ കേന്ദ്ര കമ്മിറ്റിയിലെ സാമ്പത്തിക സമ്മേളനത്തിൽ ഗോർബചോവ് ചെയ്ത പ്രസംഗത്തിൽ അദ്ദേഹം പറഞ്ഞു, 'സർക്കാരിന്റെ നേരിട്ടുള്ള പദ്ധതികളെക്കാളും മാർക്കറ്റ്  ധനതത്ത്വ  ശാസ്ത്രം നിങ്ങളുടെ പ്രശ്നങ്ങൾക്ക് പരിഹാരമായി കാണുന്നു. നിങ്ങളുടെ ധനതത്വ ശാസ്ത്രത്തിൽ മാർക്കറ്റ് ജീവരക്ഷകനായും കാണുന്നു.(ലൈഫ് സേവർ). എന്നാൽ സുഹൃത്തുക്കളെ നിങ്ങൾ ജീവ രക്ഷകനെ ചിന്തിക്കരുത്. ഓടുന്ന കപ്പലിനെപ്പറ്റി മാത്രം ചിന്തിക്കുക. സോഷ്യലിസമെന്നു  പറയുന്നത് ആ കപ്പലാണ്.'


1988 ജൂണിൽ  കമ്മ്യൂണിസ്റ്റ് പാർട്ടി  കോണ്‍ഫ്രൻസിൽ ഗോർബചോവ് സർക്കാരിൽ പാർട്ടിയ്ക്കുള്ള  നിയന്ത്രണം കുറച്ചുകൊണ്ട്  വിപ്ലവകരമായ മാറ്റങ്ങൾ അവതരിപ്പിച്ചു. ഭരിക്കുന്ന സർക്കാരിന്റെ നയ പരിപാടികളെ ആസൂത്രണം ചെയ്യാൻ സർക്കാർ നോമിനേറ്റു ചെയ്യുന്ന ജനകീയ ഡെപ്യൂട്ടി കോണ്‍ഗ്രസ്സെന്ന  സംഘടന രൂപീകരിച്ചു. ജനകീയ ഡപ്യൂട്ടികോണ്‍ഗ്രസ്സിന്റെ ഭൂരിപക്ഷ തീരുമാനത്തിന്മേൽ  സർക്കാർ വക്താകളടങ്ങിയ പ്രസിഡണ്ട് സമ്പ്രദായം  നിയമപരമായി  നടപ്പാക്കി.  അതനുസരിച്ച് 1917-നു ശേഷം സോവിയറ്റ് യൂണിയനിൽ സ്വതന്ത്രമായ ഒരു തെരഞ്ഞെടുപ്പ് നടന്നു. 1989 മെയ്‌ ഇരുപത്തിയഞ്ചാം തിയതി ഗോർബചോവ്  സോവിയറ്റ് യൂണിയന്റെ തലവനായി തെരഞ്ഞെടുക്കപ്പെട്ടു. മാറി മാറി വരുന്ന സർക്കാരുകളെ നിയന്ത്രിക്കാൻ കമ്മ്യൂണിസ്റ്റ്  പാർട്ടി കയ്യടക്കി വെച്ചിരുന്ന അധികാര കുത്തക അവസാനിപ്പിച്ച് 1990-ൽ ഗോർബചോവ്   സർക്കാരിന്റെ നടത്തിപ്പ്  സർക്കാർ നിശ്ചയിക്കുന്നവർക്കായി നല്കി വന്നു. അതെ സമയത്തു തന്നെ  ഡെപ്യൂട്ടി കോണ്‍ഗ്രസ്,  കമ്മ്യൂണിണിസ്റ്റ് പാർട്ടിയ്ക്കുണ്ടായിരുന്ന  ഭരണഘടനാപരമായ രാഷ്ട്രീയ  കുത്തകയധികാരം ഇല്ലാതാക്കി.  മറ്റുള്ള രാഷ്ട്രീയ പാർട്ടികൾക്കും നിയമപരമായി രാഷ്ട്രീയത്തിൽ പ്രവർത്തിക്കാനുള്ള വഴിയുമൊരുക്കി. സോവിയറ്റ് യൂണിയന്റെ ഏകാധിപത്യം അവസാനിപ്പിച്ച് ജനാധിപത്യത്തിൽ രാജ്യം പ്രവർത്തിക്കാനും ഗോർബചോവ്  അവസരങ്ങൾ ഒരുക്കി കൊടുത്തു.
1990 മാർച്ച് പതിനഞ്ചാം തിയതി അമ്പത്തിയൊമ്പത് ശതമാനം ഡെപ്യൂട്ടികളുടെ വോട്ടോടെ ഗോർബചോവ്  സോവിയറ്റ് യൂണിയന്റെ ഒന്നാം എക്സിക്യൂട്ടീവ് പ്രസിഡണ്ടായി ചുമതലകളേറ്റെടുത്തു.  മാർച്ച്  ഇരുപത്തിയഞ്ചാം തിയതി സോവിയറ്റ് കോണ്‍ഗ്രസ്സിലെ പ്രതിനിധികളെ തെരഞ്ഞെടുക്കാനായി സമ്മേളിച്ചു. ആ സമ്മേളനത്തിൽ കോണ്‍ഗ്രസ് ഗോർബചോവിനു പ്രശ്നങ്ങളൊന്നും കൊടുത്തില്ല. സോവിയറ്റ് യൂണിയനിലെ മാറ്റങ്ങൾ ലോകം മുഴുവനുമുളള  ടെലിവിഷനിലും വാർത്താ മീഡിയാകളിലും നിറഞ്ഞിരുന്നു. വിമർശനങ്ങളും മാറ്റങ്ങൾക്കായുള്ള  നിർദേശങ്ങളും പ്രോത്സാഹിപ്പിച്ചു. തെരഞ്ഞെടുപ്പിൽ  കമ്മ്യൂണിസ്റ്റ്  പാർട്ടിയിലുള്ള പലരും പരാജയപ്പെട്ടു. മോസ്ക്കോയിൽ നിന്ന് ബോറീസ് യെൽസിൻ തെരഞ്ഞെടുക്കപ്പെട്ടു. അദ്ദേഹം ഗോർബചോവിന്റെ ഏറ്റവും വലിയ വിമർശകനായി മാറി .  അമേരിക്കൻ രീതി പോലെ ഗോർബചോവ് ഒരു വൈസ് പ്രസിഡൻണ്ടിനേയും തെരഞ്ഞെടുത്തു.


സോവിയറ്റ് നേതൃത്വത്തിനു മീതെ ഗോർബചോവ്‌  തന്റെ വ്യക്തിപരമായ അധികാരമെടുക്കാനാരംഭിച്ചു. ബ്രഷ്നേവിന്റെ കാലം മുതൽ തകർന്നു കിടന്ന റഷ്യൻ സാമ്പത്തിക മാന്ദ്യത്തിന് പരിഹാരം കാണുകയെന്നത്   അദ്ദേഹത്തിൻറെ ലക്ഷ്യമായിരുന്നു. അതിനായി സോവിയറ്റ് യൂണിയനിൽ നിലവിലുള്ള പഴഞ്ചനായ ടെക്കനോളജിയെ   ആധുനികരിക്കാൻ തീരുമാനിച്ചു. പ്രോത്സാഹനങ്ങൾ നല്കി  തൊഴിലാളികളിൽ നിന്നും രാജ്യത്തിന്റെ വ്യാവസായികോത്ഭാദനം  വർദ്ധിപ്പിക്കാനും പദ്ധതികളിട്ടു.  സർക്കാർ തലങ്ങളിലുള്ള ഉദ്യോഗസ്ഥ  മേധാവിത്വവും അഴിഞ്ഞാട്ടവും ചുവപ്പു നാടകളുമില്ലാതാക്കി  സർക്കാർ സ്ഥാപനങ്ങൾ  കാര്യക്ഷമമാക്കാനും ശ്രദ്ധിച്ചിരുന്നു.   സോവിയറ്റ് യൂണിയനിൽ  ഗോർബചോവ് തുടങ്ങി വെച്ച മാറ്റങ്ങൾക്ക് ഫലം ലഭിക്കാത്തതിനാൽ രാജ്യത്തിനുള്ളിലെ രാഷ്ട്രീയ, സാമ്പത്തിക മേഖലകളിൽ  സമൂലമായ മാറ്റങ്ങൾക്കായി  ശ്രമം തുടങ്ങി.   പൌരാവകാശങ്ങളും  അഭിപ്രായ സ്വാതന്ത്ര്യങ്ങളും  വിവര സാങ്കേതിക വികസനങ്ങളും  വാർത്താ  മാദ്ധ്യമങ്ങളിൽ വിമർശിക്കാനുള്ള സ്വാതന്ത്ര്യവും സ്റ്റലിന്റെ ഏകാധിപത്യത്തെ  തിരസ്ക്കരിക്കലും  ഗോർബചോവിന്റെ ശ്രമഫലമായ മാറ്റങ്ങളായിരുന്നു. സോവിയറ്റ് രാഷ്ട്രീയ വ്യവസ്ഥിതിയെ പരിവർത്തന വിധേയമായ  ജനാധിപത്യ വ്യവസ്ഥിതിയിലാക്കാനും തീരുമാനിച്ചു. സർക്കാരിന്റെ ഔദ്യോഗിക പോസ്റ്റുകളിലേയ്ക്ക് വിവിധ പാർട്ടികളിൽ നിന്നും രഹസ്യ ബാലറ്റുവഴി തെരഞ്ഞെടുപ്പുകളും നടത്തിയിരുന്നു. സോവിയറ്റ് സാമ്പത്തിക ശാസ്ത്രത്തിൽ സ്വതന്ത്രമായ മാർക്കറ്റ് സമ്പ്രദായവും നടപ്പാക്കി.  മാറ്റങ്ങളെ കമ്മ്യൂണിസ്റ്റു   പാർട്ടിയ്ക്കുള്ളിലുള്ളവരും സർക്കാരിന്റെ ചുവപ്പ് നാടകളും ഒരുപോലെ എതിർത്തിരുന്നു. സാമ്പത്തിക തലങ്ങളിൽ അവർക്കുണ്ടായിരുന്ന കുത്തക സ്വാതന്ത്ര്യം വിട്ടു കളയാൻ  തയ്യാറല്ലായിരുന്നു.


രാജ്യത്തിലെ ആഭ്യന്തര പ്രശ്നങ്ങൾ കൂടാതെ ഗോർബചോവിന്റെ വിദേശ കാര്യചിന്തകളെ പടിഞ്ഞാറൻ രാജ്യങ്ങൾ അഭിനന്ദിച്ചിരുന്നു. ശീതസമരത്തിന്റെ പ്രശ്നങ്ങൾ ഇല്ലാതാക്കി പടിഞ്ഞാറൻ രാജ്യങ്ങളുമായി ബന്ധങ്ങൾ പുതുക്കുന്ന കാര്യവും ഗോർബചോവ് ആരാഞ്ഞിരുന്നു. പടിഞ്ഞാറുള്ള പ്രമുഖരായ  നേതാക്കന്മാരുമായി അദ്ദേഹം നല്ല ബന്ധങ്ങൾ സ്ഥാപിക്കുകയും ചെയ്തു.  ജർമ്മൻ ചാൻസലർ ഹെല്മട്ട് കൌൾ, അമേരിക്കൻ പ്രസിഡണ്ട് റൊണാൾഡ് റേഗൻ, ബ്രിട്ടീഷ് പ്രധാന മന്ത്രി മാർഗരെറ്റ്  താച്ചർ എന്നിവർ  അദ്ദേഹത്തിൻറെ സുഹൃത്തുക്കളായിരുന്നു. താച്ചർ പറഞ്ഞു, 'ഞാൻ ഗോർബചോവിനെ ഇഷ്ടപ്പെടുന്നു. നമുക്കൊന്നിച്ച് ബിസിനസ്‌ പങ്കാളികളാകാം.'  ആഭ്യന്തര പരിഷ്ക്കാര ചിന്താഗതികൾ പോലെ സോവിയറ്റ് യൂണിയന്റെ ദീർഘ കാലമായ അന്തർ ദേശീയ ചിന്താഗതികൾക്കും അദ്ദേഹം മാറ്റങ്ങൾ വരുത്തി.


1988-ൽ ഗോർബചോവ്, ബ്രഷ്നെവിന്റെ തത്ത്വങ്ങൾ തിരസ്ക്കരിച്ചുകൊണ്ട് 'കാലഹരണപ്പെട്ട അത്തരം ചിന്താഗതികൾ ഇനിമേൽ രാജ്യത്തിനാവശ്യമില്ലെന്നും'  പ്രഖ്യാപിച്ചു. കിഴക്കുള്ള രാജ്യങ്ങൾക്ക് അവരുടെ ആഭ്യന്തര കാര്യങ്ങളിൽ തനതായ  തീരുമാനങ്ങളും അഭിപ്രായ സ്വാതന്ത്ര്യവും അനുവദിച്ചു. 1989 ജൂലൈ ആറിലെ  ഫ്രാൻസിൽ നടന്ന യൂറോപ്പ്യൻ കൌണ്‍സിലിൽ ചെയ്ത പ്രസംഗത്തിൽ ഗോർബചോവ് പറഞ്ഞു, 'കഴിഞ്ഞ കാലങ്ങളിൽ ഏതാനും രാജ്യങ്ങളിൽ സാമൂഹിക രാഷ്ട്രീയ കാഴ്ച്ചപ്പാടുകൾക്ക്  മാറ്റങ്ങൾ വന്നിട്ടുണ്ട്. ഭാവിയിലും അവിടങ്ങളിൽ മാറ്റങ്ങൾ വരും. എന്നാൽ ഇത്  അതാതു രാജ്യങ്ങളിലെ ജനങ്ങളാണ് തീരുമാനിക്കേണ്ടത്. ഒരു രാജ്യത്തിന്റെ ആഭ്യന്തര കാര്യങ്ങളിൽ ഇടപെടലോ, മറ്റൊരു രാജ്യത്തിന്റെ പരമാധികാരത്തിൽ കൈകടത്തുകയോ, സുഹൃത്തുക്കളെങ്കിലും സഖ്യ കക്ഷികളെങ്കിലും അനുവദനീയമല്ല.' ഒരു മാസത്തിനു ശേഷം 1989 ജൂണ്‍ നാലാം തിയതി പോളണ്ടിൽ തെരഞ്ഞെടുപ്പ് നടക്കുകയും കമ്മ്യൂണിസ്റ്റ്  സർക്കാരിനെ പുറത്താക്കുകയും ചെയ്തു.  1989-ൽ   ബ്രഷ്നെവിന്റെ തത്ത്വങ്ങൾ മോസ്ക്കോ തിരസ്ക്കരിച്ചതു കിഴക്കേ യൂറോപ്പ്യൻ രാജ്യങ്ങളിൽ ജനകീയ മുന്നേറ്റത്തിനു കാരണമായി. അവിടങ്ങളിൽ കമ്മ്യൂണിസം വേരോടെ പിഴുതു കളഞ്ഞു. ജനകീയ വിപ്ലവം മൂലം രണ്ടാം ലോക മഹാ യുദ്ധത്തിനു ശേഷം നടന്ന രക്ത ചൊരിച്ചിലുകൾ കിഴക്കേ യൂറോപ്പ് മുഴുവൻ വ്യാപിച്ചിരുന്നു. സോവിയറ്റ് യൂണിയന് കിഴക്കേ യൂറോപ്പിലുണ്ടായിരുന്ന  സ്വാധീനവും ഇല്ലാതായി.


നവംബർ മാസം ഒമ്പതാം തിയതി   ബർലിൻ മതിൽക്കെട്ടുകൾ ഭേദിച്ച് കിഴക്കേ യൂറോപ്പിലുള്ളവർ പടിഞ്ഞാറേ ജർമ്മനിയിൽ പോകാൻ അനുവദിച്ചു. കിഴക്കേ ജർമ്മനിയിലെ ഏകാധിപത്യ ഭരണകൂടത്തിനെതിരെയും പ്രതിക്ഷേധറാലികളുണ്ടായിരുന്നു. ഏകദേശം ഒരു മില്ല്യൻ  കിഴക്കൻ യൂറോപ്പിലുള്ളവർ പ്രതിഷേധങ്ങളിൽ പങ്കെടുത്തിരുന്നു. മുമ്പുണ്ടായ വിപ്ലവങ്ങൾ സോവിയറ്റ് യൂണിയന്റെ പട്ടാളം അടിച്ചമർത്തിയിരുന്നു. ഗൊർബി എന്ന് പശ്ചിമ ജർമ്മനിയിലെ ജനങ്ങൾ  വിളിക്കുന്ന ഗോർബചോവ് അവരുടെ വിപ്ളവ മുന്നേറ്റത്തിൽ ഇടപെടുന്നില്ലെന്നും തീരുമാനിച്ചു. ജർമ്മനിയുടെ പുനരൈക്യം അവരുടെ ആഭ്യന്തര പ്രശ്നമെന്നും അദ്ദേഹം പറഞ്ഞു. കിഴക്കും പടിഞ്ഞാറുമുള്ള  രാജ്യങ്ങളുമായി  ഗോർബചോവ് സുധാര്യമായ  ബന്ധങ്ങൾ പടുത്തുയർത്തി. 1987- ഡിസംബറിൽ മദ്ധ്യറേഞ്ചിലുള്ള ന്യൂക്ലീയർ മിസൈലുകളുടെ  സ്റ്റോക്ക്  നശിപ്പിച്ചു കളയാൻ അമേരിക്കയിലെ റൊണാൾഡ്‌ റേഗനുമായി ഒരു ഉടമ്പടിയിൽ  ഒപ്പുവെച്ചു. സോവിയറ്റ് യൂണിയനും അമേരിക്കയും ന്യൂക്ലീയറായുധങ്ങൾ പകുതിയാക്കിക്കൊണ്ടുള്ള  തീരുമാനങ്ങളുമെടുത്തു.  1987 ഡിസംബറിൽ പ്രസിഡണ്ട് റൊണാൾഡ്‌ റേഗനും  ഫസ്റ്റ് ലേഡി  നാൻസിയുമൊത്തു ഗോർബചോവ്  വാഷിംഗ്ണ്ടണിൽ ഡിന്നർ കഴിച്ചു.1988-89-ൽ അഫ്ഗാനിസ്ഥാനിലെ  പട്ടാളക്കാരെ  പിൻവലിച്ചു. നീണ്ട ഒമ്പത് വർഷങ്ങൾ സോവിയറ്റ് പട്ടാളം അഫ്ഗാനിസ്ഥാനിൽ താവളമടിച്ചിരിക്കുകയായിരുന്നു.1979 നും 1989 നുമിടയിൽ ഏകദേശം മുപ്പതിനായിരം സോവിയറ്റ് ജനത അഫ്ഗാനിസ്ഥാനിൽ മരണമടഞ്ഞിട്ടുണ്ട്.


1989-1990 കളിലെ സംഭവ ബഹുലമായ ലോക വാർത്തകളിൽ നിറഞ്ഞിരുന്നത് ഗോർബചോവായിരുന്നു. യൂറോപ്പിന്റെ രാഷ്ട്രീയ സ്ഥിതികളെ തന്നെ ഗോർബചോവ്  തരംഗങ്ങൾ  തകിടം മറിച്ചു കളഞ്ഞു. 1989 കളിൽ കിഴക്കേ യൂറോപ്പിൽ  കമ്മ്യൂണിസം തകർന്നുകൊണ്ടിരുന്നു.  ആ രാജ്യങ്ങളിലെ ഭരണകൂടങ്ങളും ഒപ്പം തകർന്നു നിലം പതിച്ചു. കമ്മ്യൂണിസത്തിന്റെ നവോത്ഥാനത്തിനായുള്ള എല്ലാ  അവസരങ്ങളും  ഗോർബചോവ് വിനിയോഗിച്ചു. പുത്തനായ ആശയസംഹിതകളടങ്ങിയ ഒരു വ്യവസ്ഥയുടെ നല്ല നാളെക്കായി അദ്ദേഹം  ലോകത്തിന്റെ മുമ്പിൽ ശബ്ദിച്ചുകൊണ്ടുമിരുന്നു. 1989-90 കളിൽ ഈസ്റ്റ് ജർമ്മനി, പോളണ്ട്, ഹംഗറി, ചെക്കോസ്ലോവോക്കിയ എന്നീ രാജ്യങ്ങളിൽ  ജനാധിപത്യ സർക്കാരുകളും നിലവിൽ വന്നു. 1990-ലെ വേനൽക്കാലത്തിൽ കിഴക്കേ ജർമ്മനിയും പശ്ചിമ ജർമ്മനിയും തമ്മിൽ യോജിക്കാൻ തീരുമാനിച്ചു. അദ്ദേഹം അതിന് തടസവും നിന്നില്ല.  വേർപെട്ടു പോയ രാജ്യങ്ങളുമായി ശത്രുതാ മനോഭാവം പുലർത്താതെ  സൌഹാർദ ബന്ധങ്ങൾ ദൃഡമാക്കികൊണ്ടിരുന്നു.  പുതിയതായി രൂപം പ്രാപിച്ച രാജ്യങ്ങളിൽ സമാധാന സംവിധാനങ്ങൾക്കായും നേതൃത്വം നല്കി. ലോക രാജ്യങ്ങളുടെ  ക്ഷേമത്തിനായും സമാധാനത്തിനായും  സമയം വിനിയോഗിച്ചുകൊണ്ടിരുന്ന ഗോർബചോവിന്  അക്കൊല്ലത്തെ നോബൽ സമ്മാനം നല്കി ബഹുമാനിച്ചു. ഗോർബചോവ്  വിഭാവന ചെയ്ത ജനാധിപത്യ സ്വാതന്ത്ര്യവും  രാഷ്ട്രീയ വ്യവസ്ഥകളുടെ വികീന്ദ്രികരണവും പുതിയതായി രൂപം പ്രാപിച്ച രാജ്യങ്ങളായ അസർബൈജാൻ,ജോർജിയാ , ഉസ്ബക്കിസ്ഥാൻ, എന്നിവടങ്ങളിൽ അസമാധാനം  സൃഷ്ടിച്ചു. ചില വംശീയമായ  ഗ്രൂപ്പുകൾ ലിത്വാനിയ പോലുള്ള രാജ്യങ്ങളിൽ പ്രശ്നങ്ങളുമുണ്ടാക്കി. അവിടെയെല്ലാം  വിപ്ലവത്തിൽ അനേക ജനങ്ങൾ മരിച്ചു.


മാറ്റങ്ങൾക്കായി  തെരഞ്ഞെടുക്കപ്പെട്ടവരായ ഡപ്യൂട്ടികോണ്‍ഗ്രസ്സിൽ   കമ്മ്യൂണിസ്റ്റ്  തീവ്രവാദികളുമുണ്ടായിരുന്നു.  അവർ ഗോർബചോവിന്റെ പരിഷ്ക്കാരങ്ങളിൽ ആത്മാർത്ഥതയുള്ളവരായിരുന്നില്ല.  സർക്കാരിന്റെ സുഗമമായ പ്രവർത്തനത്തിനും  നല്ല നടത്തിപ്പിനും   അവരെ വിശ്വസിക്കാനും സാധിക്കില്ലായിരുന്നു. 1991- ആഗസ്റ്റ് പത്തൊമ്പതു മുതൽ ഇരുപത്തിയൊന്നു വരെ ഗോർബചോവും കുടുംബവും  ഭരണത്തിലെതിർപ്പുള്ള റിബലുകളുടെ നിയന്ത്രണത്തിൽ വീട്ടു തടങ്കലിലായിരുന്നു. എങ്കിലും അവരുടെ വിപ്ലവം അധിക ദിവസം നീണ്ടു നിന്നില്ല, ബോറീസ് യെല്സിന്റെ നേതൃത്വത്തിലും   മാറ്റങ്ങൾക്കായി ആഗ്രഹിച്ചവരും  വിപ്ലവകാരികളെ അടിച്ചമർത്തി. ഗോർബചോവ്  പ്രസിഡണ്ടായി തുടർന്നുവെങ്കിലും അദ്ദേഹത്തിൻറെ അധികാരം  താമസിയാതെ ക്ഷയിക്കാൻ തുടങ്ങി. യെൽസിനുമായും മാറ്റങ്ങൾക്കായി മുറവിളി കൂട്ടുന്നവരുമൊത്ത് സർക്കാർ  നടത്തിപ്പ് എളുപ്പമായിരുന്നില്ല.  ഡെപ്യൂട്ടി കോണ്‍ഗ്രസിനുള്ള അധികാരം   ജനകീയ പരിഷ്ക്കാരങ്ങളിൽക്കൂടി വർദ്ധിച്ചതു  കാരണം അവരുടെ ഇഷ്ടത്തിനനുസരിച്ച്  ഭരിക്കാൻ സാധിക്കില്ലായിരുന്നു. ഗോർബചോവ്‌ കമ്മ്യൂണിസ്റ്റ്  പാർട്ടിയിൽ നിന്നും രാജി വെച്ചു.  പാർട്ടിയുടെ സെൻട്രൽ കമ്മിറ്റി പിരിച്ചു വിട്ടു. പാർട്ടിയ്ക്ക്  പട്ടാളത്തിന്റെ മേലും കെ ജി ബി  യുടെ മേലുള്ള നിയന്ത്രണവും നിറുത്തി. സോവിയറ്റ് യൂണിയന്റെ രാഷ്ട്രീയാധികാരങ്ങളെക്കാൾ  ഭരണഘടനാപരമായ അധികാരങ്ങൾക്ക്  വില കല്പ്പിച്ചു. 1991 ഡിസംബർ ഇരുപത്തിയഞ്ചാം തിയതി ഗോർബചോവ് സോവിയറ്റ് യൂണിയന്റെ പ്രസിഡണ്ട്  സ്ഥാനം രാജി വെച്ചു. അന്നു തന്നെ സോവിയറ്റ് യൂണിയനും ഇല്ലാതായി.


1996-ൽ  ഗോർബചോവ്  റഷ്യയുടെ പ്രസിഡണ്ടായി മത്സരിച്ചെങ്കിലും  ഒരു ശതമാനത്തിൽ താഴെ വോട്ടാണ് കിട്ടിയത്. പിന്നീട് അദ്ദേഹം പൊതു ജീവിതത്തിൽ സജീവമായിരുന്നില്ല. നല്ലയൊരു പ്രാസംഗികൻ, ബുദ്ധി ജീവികളുടെ സംഘടനയിലെ അംഗം, ചിന്തകൻ എന്നീ നിലകളിൽ അദ്ദേഹം അറിയപ്പെടാൻ തുടങ്ങി. 2006-ൽ റഷ്യൻ ബില്ല്യനേയറും   നിയമജ്ഞനുമായ അലക്സാണ്ടർ ലെബെദെവ് മായി പങ്കു ചേർന്ന്  സ്വതന്ത്ര പത്രങ്ങളും മാസികകളും തുടങ്ങി. പത്രങ്ങളിൽക്കൂടി  ക്രംലിന്റെ നയപരിപാടികളെ വിമർശിച്ചുകൊണ്ടിരുന്നു. 2008 സെപ്റ്റംബർ മുപ്പതാം തിയതി ഗോർബചോവും ലെബെ ദേവും മൊത്തു ഒരു പുതിയ രാഷ്ട്രീയ പാർട്ടി രൂപികരിച്ചു.


ഗോർബചോവ് ഒരു ക്രിസ്ത്യൻ  ദൈവവിശ്വാസിയെന്ന് ചില മാധ്യമങ്ങൾ കൊട്ടിഘോഷിച്ചിരുന്നു.  2005 ഏപ്രിൽ രണ്ടാം തിയതി ജോണ്‍ പോൾ രണ്ടാമൻ മാർപ്പാപ്പാ മരിച്ചപ്പോൾ ഗോർബചോവ്പറഞ്ഞു, "ആത്മീയ തലങ്ങളിൽ കോടാനുകോടി ജനങ്ങൾ ജോണ്‍ പോളിൽ ആവേശഭരിതനായിരുന്നു. അദ്ദേഹത്തിന്റെ  മരണശേഷവും നമുക്കെല്ലാം ആ മഹാനുഭാവൻ  ഒരു മാതൃക തന്നെയാണ്. ദൈവത്തിന്റെ ഈ വിധിയിൽ എനിയ്ക്കൊന്നും പറയാനാവുന്നില്ല."   2005  നവംബർ ഇരുപതാം തിയതി,  മാനുഷിക മൂല്യങ്ങൾക്കായി നല്കി വരുന്ന  അത്താനാഗോറസ് ഹ്യൂമാനിറ്റോറിയനെന്ന ക്രിസ്ത്യനവാർഡ്  ലഭിച്ചത്  ഗോർബചോവിനായിരുന്നു. "താനൊരു ക്രിസ്ത്യാനിയായിരുന്നുവെന്നും വോൾഗാ നദിയിൽ തന്നെ മാമ്മോദീസ്സാ മുക്കിയെന്നും "കൂടെ കൂടെ അദ്ദേഹം പറയാറുണ്ട്. 2008 മാർച്ച് പത്തൊമ്പതാം തിയതി ഇറ്റലിയിലെ സെയിന്റ് ഫ്രാൻസീസ് അസീസ്സിയുടെ  ഭൌതിക ശരീരമടക്കിയിരിക്കുന്ന  കുടീരത്തിങ്കൽ  അവിചാരിതമായി അദ്ദേഹം പ്രാർത്ഥിക്കാനായി  എത്തിയിരുന്നു.  മുട്ടിന്മേൽ  പ്രാർത്ഥനയിൽ മുഴുകിയിരുന്ന അദ്ദേഹത്തെ കണ്ടപ്പോൾ  അദ്ദേഹമൊരു  ക്രിസ്ത്യാനിയെന്ന് ലോകം വ്യാഖ്യാനിച്ചു. കൂടാതെ ഒരു ക്രിസ്ത്യൻ വിശ്വാസിയെപ്പോലെ ഗോർബചോവ്  പറഞ്ഞു, "സെന്റ്‌ ഫ്രാൻസീസ് അസീസ്സി എന്നെ സംബന്ധിച്ചടത്തോളം  ക്രിസ്തുവിന്റെ മറ്റൊരു ബലിപീഠമാണ്. മറ്റൊരു കൃസ്തു. അസീസ്സിയുടെ  ജീവിത കഥ എന്നിൽ  ഉണർവും ഉത്തേജനവും നല്കിയിരുന്നു. അസീസ്സിയിൽ  ആവേശ ഭരിതനായി തന്നെയാണ്  ഈ മഹാകുടീരം സന്ദർശിച്ചത്." എന്നാൽ ഏതാനും ദിവസങ്ങൾക്കുള്ളിൽ ഗോർബചൊവ്  മാധ്യമ പ്രവർത്തകരോട് പറഞ്ഞു,  "കഴിഞ്ഞ ഏതാനും നാളുകളായി മാധ്യമങ്ങൾ  എന്നെ  കൃസ്ത്യാനിയാക്കാൻ ശ്രമിക്കുന്നു. നിങ്ങളുടെ തെറ്റിധാരണ നീങ്ങാൻ നിങ്ങൾ വിചാരിക്കുന്ന എന്റെ രഹസ്യമായ ആ കത്തോലിസത്തെപ്പറ്റി   ഞാനൊന്നു  പറയട്ടെ, ഞാനൊരു നാസ്തികനാണ്. ശിഷ്ടകാലവും ഈ വിശ്വാസത്തിൽ മാത്രം  എന്റെ ജീവിതം മാറ്റമില്ലാതെ  തുടരും."

(അടുത്ത ലക്കത്തോടുകൂടി ലേഖന പരമ്പര അവസാനിക്കുന്നു)

Gorbachov with Yuri Andropov