കേരള കത്തോലിക്കാ സഭയുടെ ഒളിഞ്ഞിരിക്കുന്ന കാനോൻ നിയമങ്ങൾ

By ജോസഫ് പടന്നമാക്കൽ   

പ്രശസ്ത സിനിമാനടി  അമലാപോളും തമിഴ് സിനിമാ സംവിധായകൻ ശ്രീ വിജയിയും  തമ്മിലുള്ള വിവാഹനിശ്ചയം പള്ളിയിൽ നടത്തിയതിന്റെ പേരിലുള്ള പ്രതിഷേധവാർത്തകൾ സൈബർപത്രങ്ങളിലും ഫേസ്ബുക്കിലും ബ്ലോഗുകളിലും  നിറഞ്ഞിരിക്കുന്നതായി കാണാം. താരജോഡികളുടെ വിവാഹവാർത്തകൾ ചൂടുള്ള വാർത്തകളായി കൊട്ടിഘോഷിക്കുകയെന്നതും പത്രപ്രസാധകരെ  സംബന്ധിച്ച് രസകരവുമാണ്. അമലാ പോളിന്റെ മനസുചോദ്യം പള്ളിയിൽ നടത്തിയെന്നുള്ളതാണ് വിവാദ വിഷയമായിരിക്കുന്നത്.   പണക്കാർക്ക് ഒരു നിയമവും പാവങ്ങൾക്ക് മറ്റൊരു നിയമവുമെന്ന  കുറ്റാരോപണമാണ് മുഖ്യവിഷയം. സഭാമക്കളുടെ ആശങ്കയ്ക്ക് പരിഹാരമായി സഭയുടെ തലപ്പത്തുനിന്നും നാളിതുവരെ യാതൊരുവിധ  പ്രതികരണങ്ങളും കണ്ടില്ല. സഭയുടെ മൌനം അമലാ പോളിന്റെ പള്ളിയിലുള്ള വിവാഹനിശ്ചയം നീതികരിക്കുന്നതായും കണക്കാക്കാം.  സഭാനിയമങ്ങളിൽ അല്മെനികൾ സംശയത്തിന്റെ നിഴലിൽ  അജ്ഞരായി കഴിയണമെന്നും പുരോഹിതർ കരുതുന്നു. കാനോൻനിയമം പഠിച്ച അവർക്ക് സത്യം വെളിപ്പെടുത്താൻ തന്റേടം കണ്ടെന്നുമിരിക്കില്ല. അതുമൂലം വ്യത്യസ്തമായ നിയമങ്ങൾ സഭയ്ക്കുള്ളിലുണ്ടെന്ന തോന്നൽ  സഭാമക്കളെ അസ്വസ്തരാക്കുകയും ചെയ്യും.

  

ശ്രീ മതി അമലാ പോളും പ്രതിശ്രുത വരനായ  വിജയിയും  വിവാഹിതരാകുന്നത് ക്ഷേത്രത്തിലാണ്. ആ സ്ഥിതിക്ക് പള്ളിയിൽനിന്നും അവർക്ക് വിവാഹമെന്ന കൂദാശ ലഭിക്കുന്നില്ല. ഹിന്ദുവിനെ വിവാഹം ചെയ്യുന്ന അമലാ പോളിനെ പള്ളിയിൽ അനുഗ്രഹിച്ചാൽ സഭാവിരുദ്ധമല്ല. മതം മാറി പിരിഞ്ഞു പോവുന്ന ഒരാൾക്ക് അത് സഭ  നല്കുന്ന അനുഗ്രഹാശംസകളാണ്. ഒരു പക്ഷെ കുടിലിലെ വിവാഹത്തിന് പുരോഹിതർ പ്രാധാന്യം കല്പ്പിച്ചില്ലെന്നു വരാം. പണവും പ്രതാപവും എന്തിനെയും വിലക്കെടുക്കാൻ കഴിയുമെന്ന ജനങ്ങളുടെ തെറ്റിധാരണകളിലും കുറ്റം കാണാൻ സാധിക്കുന്നില്ല. അവിടെ സഭയുടെ വശത്തും ന്യായികരണങ്ങളുണ്ട്. മാത്രവുമല്ല അക്രൈസ്തവനായ  ഒരാളെ അനുഗ്രഹീതമായ മിശ്രവിവാഹംവഴി ക്രിസ്തുമതത്തിലേക്ക് ആകർഷിപ്പിക്കാൻ സാധിക്കുമെന്നും സഭ വിശ്വസിക്കുന്നു. പോരാഞ്ഞ് വിവാഹിതരാകുന്നവർ ലക്ഷക്കണക്കിന് ആരാധകരുള്ള പ്രസിദ്ധരായവരുമാണ്. അമലാ പോളിന്റെ മനസുചോദ്യം സഭയുടെ നിയമങ്ങൾക്കും എതിരല്ല. അവർ കൂദാശകൾ സ്വീകരിക്കുന്നതായും വാർത്തകളിൽ കണ്ടില്ല.  

  

സീറോ മലബാർ പരമാദ്ധ്യക്ഷനായ കർദ്ദിനാൾ അലഞ്ചേരിയുടെ 2013 ഡിസംബറിൽ ഇറക്കിയ ഇടയലേഖനത്തിൽ കത്തോലിക്കർ അന്യമതസ്തരെ വിവാഹം കഴിക്കുന്നത് നിരുത്സാഹപ്പെടുത്തിയിരിക്കുന്നു. കത്തോലിക്കർ അക്രൈസ്തവരുമായി നടത്തുന്ന വിവാഹം കൂദാശയല്ലെന്നും കർദ്ദിനാൾ പറഞ്ഞു. കർദ്ദിനാളിന്റെ ഈ അഭിപ്രായം ആഗോള കത്തോലിക്കാ കാഴ്ചപ്പാടുമായി യോജിക്കാൻ സാധിക്കുന്നില്ല. "ക്രിസ്തുവിൽ വിശ്വസിച്ച് മാമ്മൊദീസ്സാ സ്വീകരിക്കാത്ത വ്യക്തിയുമായുള്ള വിവാഹത്തിൽ ക്രിസ്തുവിനോട് ഐക്യപ്പെടാനാവില്ല" യെന്ന് പുറത്തിറക്കിയ ഇടയലേഖനത്തിലുണ്ട്. ഇത് തികച്ചും കത്തോലിക്കാ സഭകളുടെ നിലപാടുകൾക്ക് വിരുദ്ധമായ അഭിപ്രായമാണ്. സീറോ മലബാർ  പൌരസ്ത്യസഭയുടെ ഈ തീരുമാനം മിശ്രവിവാഹിതരായവരെ ചിന്താക്കുഴപ്പത്തിലുമാക്കും. യഹൂദരായിരുന്ന ക്രിസ്തുശിക്ഷ്യർ വിവാഹം ചെയ്തിരുന്നതും യഹൂദ സ്ത്രീകളെയായിരിക്കണം. ക്രിസ്തുവുമായി ശിക്ഷ്യന്മാർ ഐക്യപ്പെട്ട് ഏകവിശ്വാസത്തിൽ സ്വരൂമയോടെ കഴിഞ്ഞിരുന്നുവെന്ന തിരുവചനങ്ങൾ   ഇടയലേഖനവുമായി പൊരുത്തപ്പെടുന്നുമില്ല. 

 

പത്തിരുപതു വർഷങ്ങൾക്കു മുമ്പ് കത്തോലിക്കർ മറ്റു വിശ്വാസികളുമായി വിവാഹം ചെയ്യുന്നത് അപൂർവ്വമായിരുന്നു. അമേരിക്കൻ ഐക്യനാടുകളിലും യൂറോപ്പിലും ഇന്ന് മിശ്രവിവാഹം സർവ്വസാധാരണമായി മാറിക്കഴിഞ്ഞു. മാറുന്ന പരിതസ്ഥിതിയിൽ സഭയുടെ നയങ്ങളിലും മാറ്റം കണ്ടുതുടങ്ങി. മിശ്രവിവാഹങ്ങൾ ബന്ധുക്കളുടെയും സുഹൃത്തുക്കളുടെയും സാന്നിദ്ധ്യത്തിൽ  അൾത്താരയുടെ മുമ്പിൽ നടത്താതെ പള്ളിവക മറ്റു കെട്ടിടങ്ങളിൽ  സ്വകാര്യമായി നടത്താനും തുടങ്ങി. ആധുനികകാലത്ത് അനേകർ മതത്തിനുപരിയായി ചിന്തിച്ചുകൊണ്ട് മറ്റു മതത്തിലുള്ളവരെ ജീവിത പങ്കാളികളായി കണ്ടെത്തുന്നു. ലോകത്തിലെ മിക്കരാജ്യങ്ങളിലും മിശ്രവിവാഹിതരുടെ എണ്ണം വർദ്ധിച്ചുകൊണ്ടുമിരിക്കുന്നു.  അമേരിക്കയിൽ നാൽപ്പതുശതമാനം ജനങ്ങളും മിശ്രവിവാഹിതരെന്നും കണക്കാക്കുന്നു. കത്തോലിക്കരായവർ മറ്റു മതക്കാരെ വിവാഹം കഴിക്കുന്നത് പ്രോത്സാഹിപ്പിക്കുന്നില്ലെങ്കിലും സഭയിന്ന്   അന്യമതത്തിലുള്ളവരായുള്ള വിവാഹങ്ങളും നടത്തിക്കൊടുക്കാറുണ്ട്. ദൈവശാസ്ത്രജ്ഞൻ റോബർട്ട് ഹേറ്റർ എഴുതിയ പുസ്തകത്തിൽ ഒരു കത്തോലിക്കൻ അകത്തൊലിക്കനെ വിവാഹം കഴിക്കുന്നതിനെപ്പറ്റി  പറഞ്ഞിരിക്കുന്നത്"മിശ്രവിവാഹങ്ങളിൽ നിഷേധപരമായ ന്യൂനതകളുണ്ടെങ്കിലും വിവാഹംവഴി  മിശ്രവിവാഹിതരും  പരിശുദ്ധാത്മവിനാൽ ഒന്നാകുന്നുവെന്നാണ്."

  

അക്രൈസ്തവരുമായുള്ള സഭയുടെ വിവാഹനിയമങ്ങൾ ദൈവ ശാസ്ത്രജ്ഞരുടെയിടയിലും വിഭിന്നതരങ്ങളിലാണ് എഴുതിയിരിക്കുന്നത്. വിവാഹത്തെ രണ്ട് ശ്രേണികളിലായി തിരിച്ചിരിക്കുന്നു. ആദ്യത്തേത് സഭ വിവാഹത്തെ കൂദാശയായി കണക്കാക്കാതെ നിയമപരമായി  സാധുകരിക്കുന്നു. രണ്ടാമത്തേത് സഭയുടെ കൂദാശയുമായി കരുതുന്നു. ഇതിൽ അമലാ പോളിന്റെ മനസമ്മതം ആദ്യത്തെ ശ്രേണിയിൽ ഉൾപ്പെടുത്താം. വിവാഹിതർ രണ്ടുപേരും മാമ്മോദീസാ മുങ്ങിയവരെങ്കിൽ വിവാഹത്തെ കൂദാശയായി കരുതും. പങ്കാളി ഹിന്ദുവോ മുസ്ലിമോ, യഹൂദനോയെങ്കിൽ വിവാഹം സഭയുടെ നിയമചട്ടകൂട്ടിൽ സാധുവായി പരിഗണിക്കും. ക്രിസ്ത്യാനിയല്ലാത്ത പങ്കാളിക്ക് ലഭിക്കുന്നത് കൂദാശയല്ല. നിയമപരമായ വിവാഹത്തിനായി രൂപതാ ബിഷപ്പിന്റെ സമ്മതവും ആവശ്യമാണ്. മറ്റു പ്രതിബന്ധങ്ങൾ ഒന്നുമില്ലെങ്കിൽ കത്തോലിക്കരും ഇതര ക്രിസ്ത്യാനികളും തമ്മിലുള്ള  വിവാഹബന്ധം സഭയുടെ കൂദാശയായി പരിഗണിക്കും. ഹേറ്റർ വിവരിക്കുന്നതുപോലെ "അവരുടെ വിവാഹത്തിന്റെ അടിത്തറ ക്രിസ്ത്യൻ വിശ്വാസത്തിൽ" നിന്നാണ്. ക്രിസ്ത്യൻ വിശ്വാസികളെങ്കിലും  ചില തീവ്രക്രിസ്ത്യൻ വിഭാഗക്കാരുമായ വിവാഹബന്ധത്തിൽ സഭ കൂടുതൽ കരുതലെടുക്കുന്നു. അത്തരക്കാരുമായുള്ള നിയമപരമായ വിവാഹത്തിന് ബിഷപ്പിന്റെ അനുവാദം കിട്ടാനും പ്രയാസമാണ്.  പൊതുവേ ഓർത്തോഡോക്സ്, യാക്കൊബാ, സി.എസ.ഐ.ക്കാരുമായുള്ള വിവാഹബന്ധത്തിന് സഭയുടെ നിയമം അനുസരിച്ച് തടസമില്ല.  അക്രൈസ്തവരുമായ വിവാഹം കൂദാശയായി അംഗീകരിച്ചില്ലെങ്കിലും  നല്ല ജീവിതത്തിൽക്കൂടി ദൈവത്തിന്റെ സ്നേഹം പങ്കാളികൾക്ക് തുല്യമായി ലഭിക്കുന്നുമുണ്ട്.   

  

കത്തോലിക്കസഭയിൽ  വിവാഹമെന്ന കൂദാശ പരിശുദ്ധമായി കരുതുന്നതുകൊണ്ട് പങ്കാളി വ്യത്യസ്ത മതത്തിൽ  നിന്നുള്ളവരാണെങ്കിലും   ഇടവകപള്ളികളിൽ വിവാഹ കർമ്മങ്ങൾ  നടത്തുവാൻ സഭ താല്പര്യപ്പെടുന്നു. വിവാഹം മറ്റുള്ള സ്ഥലങ്ങളിലെങ്കിൽ സ്ഥലത്തെ ബിഷപ്പിന്റെ അനുവാദം ആവശ്യമാണ്. അകത്തോലിക്കാ പള്ളികളിലും വിവാഹ കാർമ്മികൻ അനുശാസിക്കുന്ന മറ്റുസ്ഥലങ്ങളിലും   തക്കതായ കാരണമുണ്ടെങ്കിൽ വിവാഹിതരാകുവാനുള്ള അനുവാദം   കൊടുക്കാൻ   രൂപതാബിഷപ്പിന്  അധികാരമുണ്ട്. അമേരിക്കൻ ബിഷപ്പ് സംഘടനയുടെ തീരുമാനമനുസരിച്ച്  ബിഷപ്പിന്റെ അനുവാദം കൂടാതെയുള്ള (ഡിസ്പെൻസേഷൻ) മിശ്രവിവാഹം   നിയമാനുസൃതമായിരിക്കില്ല.

  

വിവാഹം ആശിർവദിക്കുന്ന സമയം  പങ്കാളിയ്ക്കുവേണ്ടി    അകത്തോലിക്കാ പുരോഹിതനും കർമ്മങ്ങളിൽ പങ്കു ചേരാം.  എന്നാൽ കാനോൻ നിയമപ്രകാരം  കത്തോലിക്കാ പുരോഹിതനു മാത്രമേ കാർമ്മികത്വം വഹിക്കാൻ സാധിക്കുള്ളൂ.  അകത്തോലിക്കനായ  സഹകാർമ്മികന് വിവാഹ ചടങ്ങിലെ പ്രാർത്ഥനകളിൽ പങ്കുകൊണ്ട്  അനുഗ്രഹ പ്രഭാഷണം നടത്താം.   സാധാരണ മിശ്ര വിവാഹചടങ്ങുകളിൽ  അകത്തോലിക്കർ  പള്ളിയിൽ  സമ്മേളിക്കുന്നതുകൊണ്ട് കുർബാന കൊടുക്കുന്നത്  ദിവ്യബലിക്കു ശേഷമായിരിക്കും. മിശ്രവിവാഹിതരുടെ വിവാഹ ചടങ്ങിൽ  കുർബാന പുരോഹിതൻ അർപ്പിക്കണമെങ്കിൽ  ബിഷപ്പിന്റെ അനുവാദം കാലേകൂട്ടി  മേടിച്ചിരിക്കണം. വിവാഹ ചടങ്ങിൽ  കത്തോലിക്കരല്ലാത്ത  ജനം ദിവ്യകാരുണ്യം സ്വീകരിക്കാത്തതുകൊണ്ട് കുർബാനയും അന്നേ ദിവസം പള്ളിയിൽ സ്വാഗതാർഹമല്ല.  അകത്തോലിക്കനായ  പങ്കാളിക്ക് ബിഷപ്പിന്റെ അനുവാദത്തോടെ മാത്രമേ കുർബാനയപ്പം സ്വീകരിക്കാൻ സാധിക്കുള്ളൂ.

  

വിവാഹിതർക്ക് പിന്നീടുള്ള ജീവിതത്തിന്റെ  വരും വരായ്കളെ ബോധ്യപ്പെടുത്താൻ രൂപതകൾ ക്ലാസ്സുകളും കൌണ്സിലും കൊടുക്കാറുണ്ട്. വൈവിധ്യങ്ങളും വൈരുദ്ധ്യങ്ങളുമായ  ഭാവി ജീവിതത്തെപ്പറ്റിയായിരിക്കും വധുവരന്മാരെ ബോധ്യപ്പെടുത്താറുള്ളത്. മിശ്രവിവാഹിതർ തുടരുന്ന വിശ്വാസം ഏതെന്നും കത്തോലിക്കാ വിശ്വാസമോ, പങ്കാളിയുടെ വിശ്വാസമോ അതോ സങ്കരമായ  വിശ്വാസമോ എന്നീ വിവരങ്ങളും സഭയുടെ ചോദ്യാവലിയിൽ വ്യക്തമാക്കേണ്ടി വരും. കുഞ്ഞുങ്ങളെ ഏതു വിശ്വാസത്തിൽ വളർത്തുമെന്നും വ്യക്തമാക്കണം. വ്യത്യസ്ത സംസ്ക്കാരത്തോടുകൂടിയ അകത്തോലിക്കരായ ബന്ധുജനങ്ങളോട് എങ്ങനെ പെരുമാറണമെന്നും  വിഷയമാണ്. രണ്ടു മതക്കാർ തമ്മിൽ പരിശുദ്ധാരൂപിയിൽ എങ്ങനെ ഐക്യം സ്ഥാപിക്കാമെന്നും വധുവരന്മാരെ കൌണ്‍സിലും ക്ലാസ്സുകളുംവഴി ബോധവാന്മാരാക്കും.

  

മിശ്രവിവാഹിതർ അഭിമുഖീകരിക്കുന്ന ഏറ്റവും വലിയ പ്രശ്നം മക്കളെ ഏതു വിശ്വാസത്തിൽ വളർത്തുമെന്നുള്ളതാണ്. ഈ വെല്ലുവിളികൾ കാരണം കത്തോലിക്കാ വിശ്വാസത്തിൽ തന്റെ എല്ലാവിധ  കഴിവുകളുമുപയൊഗിച്ച് മാമ്മോദീസാ നല്കി മക്കളെ വളർത്തിക്കൊള്ളാമെന്ന് ഒരു വാഗ്ദാനപത്രത്തിൽ ഒപ്പു വെയ്ക്കേണ്ടിവരും. 1983ലെ പുതുക്കിയ കാനോൻനിയമം ജനിക്കാൻ പോവുന്ന കുഞ്ഞുങ്ങളെ കത്തോലിക്കനായ പങ്കാളി കത്തോലിക്കാ വിശ്വാസത്തിൽ വളർത്തണമെന്നും അനുശാസിയ്ക്കുന്നു.  

  

കത്തോലിക്കനല്ലാത്ത വിവാഹം ചെയ്യുന്ന പങ്കാളി തനിക്ക് ജനിക്കാൻ പോകുന്ന മക്കളെ കത്തോലിക്കരായി വളർത്താമെന്നുള്ള വാഗ്ദാനങ്ങൾ നല്കേണ്ടതില്ല. പക്ഷെ ഇരുകൂട്ടരും ഇങ്ങനെയൊരു കരാറിൽ ഒപ്പിട്ടുവെന്നും അറിഞ്ഞിരിക്കണം. അതുമൂലം അകത്തോലിക്കരായ ബന്ധുജനങ്ങളുടെ മൌനസമ്മതവും വ്യക്തമാക്കുന്നു. അകത്തൊലിക്കനായ വിവാഹപങ്കാളി മക്കളെ കത്തോലിക്കാന്തരീക്ഷത്തിൽ വളർത്തില്ലായെന്നു കട്ടായം പറഞ്ഞാലും വിവാഹത്തിന് തടസം വരില്ല. കത്തോലിക്കനായ വരൻ അല്ലെങ്കിൽ വധു സമ്മതപത്രം ഒപ്പിടുന്ന പക്ഷം വിവാഹം നടത്തി കൊടുക്കുവാനും കാനോൻനിയമം അനുവദിക്കുന്നുണ്ട്. പിന്നീടുള്ള കാലങ്ങളിൽ മക്കൾ വ്യത്യസ്ത മതത്തിൽ വളർന്നാലും കാനോൻ നിയമം അനുസരിച്ച് അവരുടെ വിവാഹം സാധു തന്നെയാണ്. കത്തോലിക്കാവിശ്വാസവും പാരമ്പര്യവും  മക്കളെ പ്രായപൂർത്തിയാകുംവരെ പഠിപ്പിക്കാൻ കത്തോലിക്കാപങ്കാളി  കടപ്പെട്ടുമിരിക്കും.

  

യൂറോപ്പ്യൻ രാജ്യങ്ങളിൽ പൊതുവെയും ഇറ്റലിയിൽ പ്രത്യേകിച്ചും കത്തോലിക്കരും മുസ്ലിമുകളുമായുള്ള വിവാഹം വർദ്ധിച്ചുവരുന്നതായി കാണുന്നു. മുസ്ലിമുകളും കത്തോലിക്കരുമായുള്ള വിവാഹത്തിലും വെല്ലുവിളികളുണ്ട്. മുസ്ലിമുകൾ സാധാരണ ക്രിസ്ത്യാനിയേയോ  യഹൂദരായവരെയോ വിവാഹം കഴിക്കാൻ താല്പ്പര്യപ്പെടുന്നു. മതങ്ങൾ തമ്മിലുള്ള സാമ്യതയാണ് കാരണം. വാസ്തവത്തിൽ പ്രവാചകനായ മുഹമ്മദിന്റെ ഭാര്യയും ക്രിസ്ത്യാനിയായിരുന്നു. മുസ്ലിം സ്ത്രീകൾക്ക് വിവാഹിതനാകുന്നയാൾ മതം മാറാതെ മറ്റുള്ള മതങ്ങളിൽനിന്നും വിവാഹം കഴിക്കാൻ അനുവാദമില്ല. മക്കളെ വളർത്തുന്ന കാര്യത്തിൽ മുസ്ലിമുകളുടെ മതനിയമവും കത്തോലിക്കാ നിയമവും ഒന്നുതന്നെയാണ്. കത്തോലിക്കരും മുസ്ലിമുകളുമായി വിവാഹത്തിന്റെ പ്രതിബന്ധവും മക്കളുടെ മതപ്രശ്നം തന്നെ. രണ്ടുമതങ്ങളും ജനിക്കാൻ പോകുന്ന  മക്കളെ തങ്ങളുടെ മതത്തിൽ വളർത്തണമെന്നും നിഷ്കർഷിക്കുന്നു.  അത്തരം വിവാഹങ്ങളും സഭ വിട്ടുവീഴ്ച നല്കി അംഗീകരിക്കാറുണ്ട്. പരസ്പരം വിശ്വാസത്തോടെയുള്ള അവരുടെ ജീവിതത്തിലും  ദൈവത്തിന്റെ സ്നേഹം പ്രതിഫലിക്കുമെന്നും വിശ്വസിക്കുന്നു. മറ്റുള്ള മതങ്ങളിൽ കുടുംബജീവിതം നയിക്കാൻ മിശ്രവിവാഹത്തിലെ ദമ്പതികളെ പള്ളികളിൽ അനുഗ്രഹിക്കാറുണ്ട്. കാനോൻ നിയമമനുസരിച്ച് അത് അനുവദനീയവുമാണ്. 

  

ഒരുവന് യഹൂദനായോ ക്രിസ്ത്യാനിയായോ അല്ലെങ്കിൽ ക്രിസ്ത്യാനിയായോ ഹിന്ദുവായൊ ഒരേസമയം രണ്ടുമതങ്ങളിലും വിശ്വാസിയാകാൻ സാധിക്കില്ല. മിശ്രവിവാഹിതരായ ദമ്പതികൾ മറ്റു മതങ്ങളുടെ പാരമ്പര്യങ്ങളെയും സത്യങ്ങളെയും വിലമതിക്കാൻ കഴിവുള്ളവരായിരിക്കണം. അവരുടെ കുടുംബജീവിതത്തിൽ ഒരിക്കലും മതമൊരു പ്രശ്നമാകരുത്. ഇങ്ങനെയെല്ലാമുള്ള തത്ത്വങ്ങളായി ജീവിച്ചാലും സ്വന്തം വിശ്വാസത്തെപ്പറ്റി ബോധവാന്മാരാകുന്നത് അവർ മക്കളുമായി ജീവിക്കാൻ തുടങ്ങുന്ന കാലങ്ങളിലായിരിക്കും.

  

യഹൂദരും കത്തോലിക്കരുമായുള്ള വിവാഹം കൂടുതൽ പ്രശ്നസങ്കീർണ്ണമായി കാണുന്നു. യഹൂദ യാഥാസ്തിതിക നിയമങ്ങളെക്കാൾ കത്തോലിക്കാ നിയമങ്ങളാണ് ഉദാരമായി കാണുന്നത്. കത്തോലിക്കാ പുരോഹിതർ നിയമങ്ങൾ മറച്ചു വെയ്ക്കുമെങ്കിലും  വിവാഹത്തിൽ ഒരു പുരോഹിതന്റെ മാദ്ധ്യസ്ഥം ആവശ്യമില്ല.   വിവാഹം അനുഗ്രഹിക്കാൻ പുരോഹിതൻ കാർമ്മികനാകണമെന്നുമില്ല. കാർമ്മികർ വിവാഹിതരാകുന്ന വരനും വധുവുമെന്നാണ് വെപ്പ്. കോടതിയിലെ വിവാഹമാണെങ്കിലും നിയമാനുസൃതമായി സാധുവാക്കാൻ സഭയുടെ നിയമങ്ങൾക്ക് സാധിക്കും. യഹൂദവിശ്വാസം അതിന് സമ്മതിക്കില്ല. അവരുടെ റാബിതന്നെ വിവാഹം കഴിപ്പിക്കണം. വിവാഹത്തിന്റെ കാർമ്മികൻ റാബിയാണെങ്കിൽ തന്നെയും സഭ അവരുടെ കത്തോലിക്കാ വിശ്വാസിയുമായ വിവാഹത്തേയും അനുഗ്രഹിക്കാറുണ്ട്. വിവാഹം സഭയുടെ നിയമങ്ങളിൽ ഉൾപ്പെടുത്താറുമുണ്ട്. മക്കളെ വളർത്തുന്ന പ്രശ്നത്തിന്റെ പേരിൽ പലപ്പോഴും കത്തോലിക്കാസഭ യഹൂദരും മുസ്ലിമുകളുമായുള്ള വിവാഹം പ്രോത്സാഹിപ്പിക്കാറില്ല. 

  

വിവാഹമോചനവും  പുനർവിവാഹവും സഭ നിരുത്സാഹപ്പെടുത്തുന്നു. ദൈവം ബന്ധിച്ചത് മനുഷ്യനൊരിക്കലും വേർപെടുത്തരുതെന്നുള്ള വൈവാഹിക നിയമങ്ങളെ സഭ ഉയർത്തിപ്പിടിക്കുന്നു. പുനർവിവാഹം  അനുവദിച്ചു കൊടുക്കുകയില്ലാത്ത സ്ഥിതിക്കു പുനർ വിവാഹത്തിലുണ്ടാകുന്ന  മക്കളുടെ കാര്യം എന്തെന്ന് സഭ ഗൌനിച്ചിട്ടുണ്ടോ? കത്തോലിക്കാ ജീവിതരീതികളിൽനിന്നും മാറിനില്ക്കുന്ന പുനർവിവാഹത്തിലെ കുട്ടികൾ സഭയിൽനിന്നും അകന്നുപോവുന്ന വസ്തുതയും എന്തുകൊണ്ടു ഗൌനിക്കുന്നില്ല? അവർക്കുമുമ്പിൽ സഭ ഒരു അടഞ്ഞ അധ്യായമാവുകയാണ്.

  

ഒരുസ്ത്രീയെ അവരുടെ ഭർത്താവ് തന്റേതല്ലാത്തകാരണം കൊണ്ട് ഉപേക്ഷിച്ചുവെന്നിരിക്കട്ടെ. മൂന്നുമക്കളുമായി കഴിയുന്ന അവർ, സ്വന്തം നിലനില്പ്പിനുവേണ്ടി വീണ്ടും ഒരു കൂട്ടുകാരനെ കണ്ടുമുട്ടുന്നു. അയാൾ, അവരെയും മൂന്നു മക്കളെയും സ്നേഹിച്ചു പരിപാലിക്കുന്നു. രണ്ടാംവിവാഹം വിജയകരമായിട്ടു സന്തുഷ്ടകുടുംബമായി കഴിയുന്നു. ഈ കുടുംബത്തോടു വിവേചനം കാണിക്കുന്നുവെങ്കിൽ, വീണ്ടും വിവാഹം കഴിച്ച ഈ സ്ത്രീയും മക്കളും ഒരുപോലെ സഭയെ വെറുക്കുകയില്ലേ? മാതാപിതാക്കൾ സഭക്കു വെളിയിലാവുമ്പോൾ  ഭാവിതലമുറകളായ ഈ കുഞ്ഞുങ്ങളും സഭയ്ക്കു നഷ്ടപ്പെടുകയും ചെയ്യും. വിവാഹ മോചനംനേടിയ ദമ്പതികള്ക്കു കുര്ബാന സ്വീകരിക്കുവാനും സാധിക്കുകയില്ല. കൊലപാതകം ചെയ്തവനും വ്യഭിചാരിക്കും സ്ഥിരംമോഷ്ടാവിനും കൂദാശകളെ നിഷേധിച്ചിട്ടുമില്ല.  എങ്ങനെ ഈ കൊടുംപാപങ്ങൾകൊണ്ടു കഠിനഹൃദയരായിരിക്കുന്നവര്ക്കു കൂദാശകളാൽ, പരിശുദ്ധാത്മാവിന്റെ ശക്തി ആവഹിക്കുന്നതെന്നു മനസ്സിലാകുന്നില്ല. കത്തോലിക്കാ പള്ളിയിൽ  സഭയുടെ  നിയമപ്രകാരം  വിവാഹിതരാകാതെ  ഇതരസമുദാത്തിൽ വിവാഹിതരായി ജീവിച്ചശേഷം   വിവാഹമോചനം നേടിയവരെ  വീണ്ടും വിവാഹം കഴിപ്പിക്കുന്നതിൽ  സഭയ്ക്ക് പ്രശ്നമില്ല. സഭയുടെ അനുവാദം കൂടാതെയുള്ള അവരുടെ ആദ്യവിവാഹം അസാധുവായിരിക്കും.

  

ഇതര മതക്കാരുമായുള്ള വിവാഹത്തിൽ അകത്തോലിക്കനായ  പങ്കാളിയേ സഭയുടെ ദൌത്യങ്ങൾ പഠിപ്പിക്കാനുള്ള ബാധ്യത കത്തോലിക്കാ പങ്കാളിക്കുണ്ട്. "അവിശ്വാസിയായ ഭർത്താവ് ഭാര്യ മുഖേനയും അവിശ്വാസിയായ ഭാര്യ ഭർത്താവ് മുഖേനയും  വിശുദ്ധീകരിക്കപ്പെടുന്നു"വെന്ന് തിരുവചനം പറയുന്നു. ഈ  വിശുദ്ധീകരണംമൂലം ക്രൈസ്തവ വിശ്വാസത്തിലേക്ക് സ്വന്തം മനസാലെ  അക്രൈസ്തവർ വന്നുചേരണമെന്നും സഭ കാംക്ഷിക്കുന്നു.

 

മിശ്രവിവാഹത്തിലുണ്ടാകുന്ന മക്കൾ സഭയോട് ദുർബലവിശ്വാസം പുലർത്തുന്നതും സാധാരണമാണ്. മത ബോധാവൽക്കരണത്തിൽ അവരിൽ ചിന്താകുഴപ്പങ്ങളും അനുഭവപ്പെടുന്നു. സഭ, മിശ്രവിവാഹത്തെ പ്രോത്സാഹിപ്പിക്കുന്നില്ലെങ്കിലും സഭയ്ക്ക് വെളിയിൽ വിവാഹം ചെയ്യാൻ അനുവാദം കൊടുക്കാറുണ്ട്. രണ്ടുപേരും പരസ്പര ധാരണയോടെ ഒരേ വിശ്വാസം തിരഞ്ഞെടുക്കുകയാണെങ്കിൽ ഉണ്ടാകുന്ന മക്കളിൽ ചിന്താക്കുഴപ്പത്തിന് കാരണമാവില്ലെന്നും പ്രായോഗികമായി ചിന്തിക്കുന്നവർ വെളിപ്പെടുത്തുന്നു.

E Malayalee: http://www.emalayalee.com/varthaFull.php?newsId=79117

Malayalama Daily News: http://www.malayalamdailynews.com/?p=93254
 

പ്രധാനമന്ത്രി മോദിയും മതേതര ഇന്ത്യയുടെ ഊതി വീർപ്പിച്ച ആശങ്കകളും

 

ഇന്ത്യയിലും വിദേശ രാജ്യങ്ങളിലും മോദിയെന്ന വ്യക്തിയെ തികച്ചും വ്യത്യസ്തമായിട്ടാണ് ജനം കരുതുന്നത്. രാഷ്ട്രീയ മാദ്ധ്യമങ്ങളുടെ പ്രചാരണതന്ത്രങ്ങളിൽ മോദിയെ ഒരു മതഭ്രാന്തനായി ചിത്രീകരിക്കുന്നതും കാണാം. ബൌദ്ധിക ലോകംപോലും അദ്ദേഹത്തിലുള്ള മഹിമകളെ  തിരിച്ചറിയാതെ വ്യക്തിഹത്യ നടത്തുന്നതും സാധാരണമാണ്. മഹാത്മാ ഗാന്ധിയുടെ ഘാതകനായ  ഗോദ്സയെ ആരാധിക്കുന്നവൻ ഗാന്ധിജിയുടെ സമാധികുടീരം സന്ദർശിച്ചെന്നുകുറിച്ചാലെ ചിലർക്ക് തൃപ്തി വരുകയുള്ളൂ. ഗുജറാത്ത് കലാപംകൊണ്ട് മോദിയുടെ ഇമേജ് തകർന്നുവെന്നെഴുതുന്ന എഴുത്തുകാർക്കും വാർത്തകൾ റിപ്പോർട്ട് ചെയ്യുന്നവർക്കും ജനങ്ങൾ നല്കിയ അദ്ദേഹത്തിൻറെ ചരിത്രവിജയത്തെപ്പറ്റി ഒന്നും പറയാനുമില്ല. ഗുജറാത്തിലെ കൂട്ടക്കൊലകൾക്കൊപ്പം  കോണ്ഗ്രസ് ഭരണകാലത്തെ ദുരന്തങ്ങളായ സിക്ക് കലാപവും ബാബറി മസ്ജിദ് തകർക്കലും, പഞ്ചാബിലെ സുവർണ്ണയമ്പലത്തിലെ പട്ടാള കുതിപ്പും  കുറ്റപ്പെടുത്തുന്നവർക്ക് അറിയുകയും വേണ്ടാ. വിദേശരാജ്യങ്ങളുടെയും രാഷ്ട്രത്തലവന്മാരുടെയും മോദിയ്ക്കുളള മതിപ്പിനെപ്പറ്റി ചിന്തിക്കുന്നവർ    ദേശസ്നേഹിയായ മോദിയുടെ മറ്റൊരു ചിത്രം കാണുന്നില്ല. സ്വാതന്ത്ര്യം കിട്ടിയ നാളുകൾമുതൽ എന്നും മിന്നിത്തിളങ്ങിയിരുന്ന കോണ്ഗ്രസ് പാർട്ടിക്ക് അമ്പതു  സീറ്റുകളിൽ താഴെ ലഭിച്ചതും ചരിത്രത്തിന്റെയൊരു വികൃതിയായിരുന്നു. 


ഭാരതത്തിലെ വട്നാഗർ എന്ന പൌരാണിക പട്ടണത്തിൽ ശ്രീ നരേന്ദ്ര ദാമോദര മുൽചന്ദ മോദി ജനിച്ചു. പതിനഞ്ചാം നൂറ്റാണ്ടിലെ  സാങ്കേതിക വൈദഗ്ദ്ധ്യത്തോടെ സ്വന്തം ഗ്രാമത്തിൽ പണി കഴിപ്പിച്ച ഹത്കെശ്വര മഹാദേവ അമ്പലം എന്നും അദ്ദേഹത്തിൻറെ ഹൃദയക്ഷേത്രമായിരുന്നു. ഈ പുണ്യഭൂമിയിൽ ഹിന്ദുമതവും ബുദ്ധമതവും ഒന്നുപോലെ തഴച്ചു വളർന്നിരുന്നു. ചരിത്രത്തിലെ വട്നാഗർ ഒരിക്കൽ ഗുജറാത്തിന്റെ തലസ്ഥാനമായിരുന്നു. ഏഴാം നൂറ്റാണ്ടിൽ ചൈനയുടെ പണ്ഡിതനായ ഹുവാൻ സങ്ങ് ഇവിടം സന്ദർശിച്ചതായി തന്റെ ഓർമ്മക്കുറിപ്പുകളിൽ  വിവരിച്ചിട്ടുണ്ട്. 1950 സെപ്റ്റംബർ പതിനേഴാംതിയതി മോദി ജനിച്ചു. പൊതുസ്ഥലങ്ങളിൽ പ്രത്യക്ഷപ്പെടാറില്ലെങ്കിലും അമ്മയും സഹോദരങ്ങളും സഹോദരിയുമടങ്ങിയ സന്തുഷ്ടമായ ഒരു കുടുംബവും അദ്ദേഹത്തിനുണ്ട്. പതിനേഴാം വയസിൽ യശോദരായുമായി വിവാഹിതനായെങ്കിലും അവർ ഒരിക്കലും ഒന്നിച്ച് താമസിച്ചിട്ടില്ല. ബാലവിവാഹം അന്ന് സാധാരണമായിരുന്നു.


ഇസ്തിരിയിട്ട് ഭംഗിയായി ചുളിക്കുകളില്ലാത്ത വേഷങ്ങൾ ധരിച്ചു മോടിയായി നടക്കുകയെന്നതും അദ്ദേഹത്തിന്റെ ജീവിതചര്യയാണ്. അത് കൌമാരപ്രായം മുതലുണ്ടായിരുന്ന സ്വഭാവ ഗുണമായിരുന്നു. നൂറുകണക്കിന് ബ്രാൻഡ് കുർത്തകളും അദ്ദേഹത്തിനുണ്ട്. വാച്ചുകളും സാന്റൽ ചെരിപ്പുകളും വാങ്ങി കൂട്ടുകയെന്നതും മറ്റൊരു ഹോബിയാണ്. എവിടെയും ശുചിത്വം പാലിക്കുന്ന കാര്യത്തിലും കർശന സ്വഭാവക്കാരനാണ്. അദ്ദേഹത്തിൻറെ വീട്, ചുറ്റുപാടുകൾ, വീട്ടിലെ ഉപകരണങ്ങൾ, മേശ കസേര മുതലാവകൾ എന്നും വൃത്തിയായി സൂക്ഷിക്കും. ഗുജറാത്ത് മുഖ്യമന്ത്രിയായ ശേഷം ചാർട്ടർ ചെയ്ത വിമാനത്തിൽ യാത്രചെയ്യാനും  ഇഷ്ടമായിരുന്നു. ഏതു പ്രശ്നങ്ങൾക്കും പരിഹാരം സ്വയം കാണാൻ ശ്രമിക്കുന്നു. അദ്ദേഹത്തിൻറെ മനസ്സിൽനിന്നു വരുന്ന അതിഗംഭീരമായ ആശയങ്ങളും അവർണ്ണനീയമാണ്. ഒരു ഗവേഷകന്റെ ചിന്തകളാണ് എന്നും പ്രവർത്തന ശൈലികളിൽ പ്രകടമാവുന്നത്. ടെക്കനോളജിയുടെ വളർച്ചയ്ക്കൊപ്പം പുതിയവകളിൽ പ്രാവിണ്യം നേടാൻ ശ്രമിക്കും. കാലത്തിനൊത്ത വിവര സാങ്കേതികവിദ്യകൾ പഠിക്കുന്നതിലുള്ള അദ്ദേഹത്തിൻറെ ജിജ്ഞാസ കൊച്ചുകുട്ടികളെപ്പോലെയാണ്. പണമിടപാടുകളിൽ വളരെ കണിശക്കാരനാണ്. ഒരു പൈസാ വരെ കണക്കെഴുതി സൂക്ഷിക്കും. സ്വന്തം ജീവിതത്തിൽനിന്നും പഠിച്ച സാമ്പത്തിക ശാസ്ത്രമാണ് ഗുജറാത്തിൽ മുഖ്യമന്ത്രിയെന്ന നിലയിലും പരീക്ഷിച്ചു വിജയിയായത്. 


ചെറുപ്പകാലങ്ങളിൽ ഗ്രാമീണ ബാലനായി വളർന്ന മോദി ഇംഗ്ലീഷ് ഭാഷ നല്ലവണ്ണം അറിയാമെങ്കിലും മെച്ചമായി കൈകാര്യം ചെയ്യാൻ പഠിച്ചിട്ടില്ല. ഇംഗ്ലീഷ് സംസാരിക്കുമ്പോൾ ഗുജറാത്തിഭാഷയുടെ ചുവയുമുണ്ട്. ആഗോളലോകത്തിൽ   അതൊരു കുറവുമല്ല. റഷ്യാ, ചൈനാ എന്നീ രാജ്യങ്ങളിലെ തലവന്മാരും  ഇംഗ്ലീഷറിയാൻ മേലാതെ മാതൃഭാഷകളിൽ സംസാരിക്കുന്നതു കാണാം. എങ്കിലും അനേക ഭാഷകളിൽ ആശയവിനിമയം നടത്തുവാനറിയാം. ചെറുപ്പകാലങ്ങളിൽ സ്കൂളിലെ ഫണ്ടിനായി നാടകങ്ങൾ അരങ്ങേറിയിട്ടുണ്ട്. ബസ്സ്റ്റാന്റിൽ സ്വന്തം അമ്മാവന്റെ ചായക്കടയിൽ ചായ വിറ്റുകൊണ്ടായിരുന്നു സ്കൂൾവിദ്യാഭ്യാസം നടത്തിയത്. മതാചാരങ്ങൾ അനുഷ്ഠിക്കുന്നതിൽ അദ്ദേഹം വളരെ കണിശക്കാരനാണ്. നവരാത്രികളിൽ ഒമ്പത് ദിവസങ്ങളും നോമ്പും ഭജനയുമായി ഈശ്വരപൂജയ്ക്ക് സമയം കണ്ടെത്തും. ആ ദിവസങ്ങളിൽ പഴവർഗങ്ങിൽ ഏതെങ്കിലും ഒന്നുമാത്രം കഴിക്കും. എവിടെ യാത്ര ചെയ്താലും പത്രം മേടിച്ച് വാർത്തകളുടെ വിവരങ്ങൾ ശേഖരിക്കും. എന്നും രാവിലെ കമ്പ്യൂട്ടർ ലോഗ് ചെയ്ത് അദ്ദേഹത്തെപ്പറ്റി എന്തെങ്കിലുമുണ്ടോയെന്നും നോക്കും. തീരുമാനങ്ങൾ എടുക്കുന്നതിൽ അദ്ദേഹമെന്നും ഒരു ഏകാധിപതിയെപ്പോലെയാണ്. സുപ്രധാന തീരുമാനങ്ങൾ മറ്റുള്ളവർ എടുക്കാൻ അനുവദിക്കില്ല. സുഹൃത്തുക്കളിൽനിന്നും അകന്ന് എന്നും ഏകനായി സമയത്തെ ക്രമപ്പെടുത്തി ജീവിക്കാനും ഇഷ്ടപ്പെടുന്നു.


മോദിയെ ഒരു ജോലിഭ്രാന്തനായി അറിയപ്പെടുന്നു. ഒരു മിനിറ്റിനെയും കൈവിട്ടു കളയാൻ അനുവദിക്കില്ല. രാവിലെ എഴുന്നേക്കുമ്പോഴെ ഇന്റെർനെറ്റും  ഈമെയിലും നോക്കുകയായി. രാഷ്ട്രീയകാര്യങ്ങൾ സംസാരിക്കാൻ സ്വന്തം പാർട്ടികളിലുള്ളവരായി ബന്ധപ്പെടലും ആലോചനാ യോഗങ്ങളും ആരംഭിക്കും. രാവിലെ ഓഫീസ്സിൽ പോയി രാത്രി പത്തുമണിവരെ ജോലി ചെയ്യും. ഉറങ്ങുന്നത് ദിവസം നാലഞ്ചു മണിക്കൂറുകൾ മാത്രം. തലമുടി ചീകലും കണ്ണാടി നോക്കലും കൂടെ കൂടെ വേണം. എന്നും ഒരു മോഡലിനെപ്പോലെ ജീവിക്കാനാഗ്രഹിക്കുന്നു. കൈവശം ഒരു ചീപ്പ് പോകുന്ന സ്ഥലങ്ങളിൽ കൊണ്ടുനടക്കും. സഞ്ചരിക്കുന്ന കാറിലും ഡസൻ കണക്കിന് വസ്ത്രങ്ങൾ കരുതിയിരിക്കും. എത്ര താമസിച്ചു കിടന്നാലും കൃത്യമായി എന്നും അഞ്ചരയ്ക്ക് എഴുന്നേലക്കും. സാഹിത്യമൂല്യങ്ങളില്ലാത്ത കവിതകളും എഴുതും. സ്വാമി വിവേകാനന്ദന്റെ ആരാധകനാണ്. ഇന്ദിരാ ഗാന്ധിയുടെ കഴിവുകളേയും പുകഴ്ത്താറുണ്ട്.

 

 

പതിനേഴു വയസുള്ളപ്പോൾ സ്വന്തം വീടും നാടും വിട്ടു പോയി. അതിനുശേഷം രാജകോട്ടിലുള്ള രാമകൃഷ്ണമിഷിനിൽ താമസിച്ചു.  കർണാടകത്തിലുള്ള ബെലുർ മഠത്തിലും  ഹിമാലയത്തിലും  വസിച്ചിട്ടുണ്ട്. ഇന്ത്യാ മുഴുവൻ അലഞ്ഞു തിരിഞ്ഞ് യാത്ര ചെയ്തു. സ്വന്തമായി ഭക്ഷണം പാകം ചെയ്യാനും അറിയാം. ഭാരതത്തിലെ പ്രസിദ്ധരായ സന്യാസിമാരെ കണ്ടു മുട്ടി അവരോടൊപ്പം താമസിച്ച് വേദങ്ങളെപ്പറ്റിയും അറിവുകൾ നേടിക്കൊണ്ടിരുന്നു.  സ്വാമി പരമാനന്ദ  പ്രിയ ഗുരുവായിരുന്നു. കൂടെ കൂടെ ഗുജറാത്തിലെ മുസ്ലിം നേതാക്കന്മാരെയും അദ്ദേഹം കാണുമായിരുന്നു.

കൂടെയുള്ളവരെയും  സഹപ്രവർത്തകരെയും   ജോലി ചെയ്യാതെ  മടിയന്മാരായി നടക്കാൻ  സമ്മതിക്കില്ല. അപാരമായ ബുദ്ധിശക്തിയും ഓർമ്മശക്തിയുമാണ് അദ്ദേഹത്തിനുള്ളത്. നല്ല നീന്തൽ വിദക്തനുമാണ്. യോഗായിലും അതിന്റെ ഉപശാസത്രങ്ങളിലും  പ്രാവീണ്യം നേടിയിട്ടുണ്ട്.  സസ്യാഹാരം മാത്രമേ കഴിക്കുള്ളൂ.  വ്യക്തി പ്രഭാവത്തോടെയുള്ള അദ്ദേഹത്തിൻറെ  .അസാധാരാണ   ശബ്ദം  ജനകോടികളെ ആകർഷിക്കുന്നതാണ്.  സ്ത്രീ ജനങ്ങൾക്ക്  അങ്ങേയറ്റം  പ്രിയങ്കരനുമാണ്.  ഭാരതത്തെ സാമ്പത്തിക ശക്തിയായി കാണാനാഗ്രഹിക്കുന്ന ഒരു സ്വപ്നലോകത്തിലാണ്  അദ്ദേഹമെന്നും  സഞ്ചരിക്കുന്നത്.



രാഷ്ട്രപിതാവിന്റെയും രാഷ്ട്രശിൽപ്പികളുടെയും പവിത്രപാദങ്ങൾ പതിഞ്ഞ പുണ്യപാർലമെന്റിന്റെ ആദ്യപടിയെ കുമ്പിട്ടുകൊണ്ടായിരുന്നു മോദിജി ഭാരതത്തിന്റെ നൂറായിരം കഥകൾ പറയാനുള്ള ചരിത്രമന്ദിരത്തിലേക്ക് വലതുകാൽ വെച്ചുകയറിയത്. ഒരിക്കലെങ്കിലും അദ്ദേഹത്തെപ്പറ്റി നല്ലൊരുവാക്ക് പറയാൻ പലരുടെയും  നാവനങ്ങില്ലായിരുന്നു.ഇത്രമാത്രം വിവാദങ്ങളിൽക്കൂടി വന്ന ഒരു പ്രധാനമന്ത്രി ഇന്ത്യയുടെ ചരിത്രത്തിൽ ഉണ്ടായിട്ടില്ല. മുസ്ലിമുകളുടെ രക്തത്തിൽ കുളിച്ചവൻ, കൂട്ടക്കൊലകളുടെ സൂത്രധാരകൻ, മതഭീകരൻ, കഠിനഹൃദയൻ എന്നെല്ലാം പ്രതിയോഗികൾ അദ്ദേഹത്തെ വിളിച്ചു. വോട്ടുബാങ്കിനായി നീച കർമ്മങ്ങൾ ചെയ്യാൻ മടിയില്ലാത്ത, സത്യത്തെയും ധർമ്മത്തെയും ഇല്ലാതാക്കിക്കൊണ്ട് അധർമ്മം നിലനിർത്താനാഗ്രഹിക്കുന്ന രാഷ്ട്രീയ പുംഗവൻമാരുടെ മുമ്പിൽ സർദാർ പട്ടേലിന്റെപോലെ ഉരുക്കുഹൃദയമുള്ള ഈ മനുഷ്യൻ ഒരിക്കലും അടിപതറിയിട്ടില്ലായിരുന്നു.



എന്നാൽ പാർലമെന്റ് മന്ദിരത്തിനുള്ളിൽ അനുമോദനങ്ങളുടെ നടുവിലേക്ക് ചുറ്റുംനിന്ന ജനത്തിന്റെ മുമ്പിൽ മോദിജി  പൊട്ടിക്കരഞ്ഞു. അഡ്വാനിജിയായിരുന്നു അതിനു കാരണം. അഡ്വാനിജി പറഞ്ഞു, പ്രിയപ്പെട്ട മോദിജി അങ്ങയുടെ കരുണകൊണ്ടാണ് നമ്മുടെ പാർട്ടി വലുതായി ഇന്ന് അധികാരം പിടിച്ചെടുത്തത്". ഇത് കേട്ടയുടൻ വികാരങ്ങൾകൊണ്ട് അടിമപ്പെട്ടുപോയ മോദിജിക്ക് വാക്കുകളില്ലാതായി. കഠിനഹൃദയനെന്നു കരുതിയ മോദിജി ഒരു നിമിഷംകൊണ്ട് രാഷ്ട്രത്തിന്റെ മുമ്പിൽ ലോലഹൃദയനായി വാക്കുകളെ പതറിപ്പിച്ചുക്കൊണ്ടിരുന്നു. ചുറ്റും നിന്നവർ അദ്ദേഹത്തെ സ്വാന്തനപ്പെടുത്തി കണ്ണുനീരോപ്പുന്നുണ്ടായിരുന്നു.


മോദി പറഞ്ഞു, "എന്റെ ഗുരുവിനെപ്പോലെ ഞാൻ വന്ദിക്കുന്ന അഡ്വാനിജി എന്റെ കരുണകൊണ്ടാണ് പാർട്ടി വിജയിച്ചതെന്ന് ഒരിക്കലും പറയരുതേ ! എന്റെ പ്രിയപ്പെട്ട രാജ്യവും എന്നെ വളർത്തി വലുതാക്കിയ എന്റെ പാർട്ടിയും എന്റെ അമ്മയാണ്. പെറ്റമ്മയ്ക്ക് തുല്യമാണ്. ഭാരതമണ്ണിന്റെ പുത്രനായി എന്നെ ഞാനാക്കിയത് ജീവനു തുല്യമായി ഞാൻ സ്നേഹിക്കുന്ന എന്റെ പാർട്ടിയാണ്. അമ്മയ്ക്ക് കർത്തവ്യങ്ങൾ നിറവേറ്റുമ്പോൾ അത് കരുണയാകുന്നതെങ്ങനെ? ഒരു പാവപ്പെട്ടവന്റെ മകനായി വെറുമൊരു മണ്‍കൂടാരത്തിൽ ഞാൻ വളർന്നു. ഞാൻ മുഖ്യമന്ത്രിയുടെ ഓഫീസ് ആദ്യമായി കാണുന്നതും മുഖ്യമന്ത്രിയായ ശേഷമാണ്. ജീവിക്കാനായുള്ള അവസരങ്ങൾ പാർട്ടി എനിക്ക് തരുകയായിരുന്നു."


മറ്റൊരവസരത്തിൽ മോദിജി പറഞ്ഞു, "അപ്പൻ  ദരിദ്രരായ ഞങ്ങളുടെ കുടുംബത്തെ പോറ്റാൻ  ചക്കാട്ടും. അമ്മ എണ്ണ ശേഖരിക്കും. എണ്ണയും പിണ്ണാക്കും വിറ്റുകൊണ്ട് അവർ ഞങ്ങളെ  പരിപാലിച്ചു. ജീവിക്കാൻ നിവൃത്തിയില്ലാതായപ്പൊൾ ബാലനായ ഞാൻ  നാടും വീടും വിട്ടുപോയി. ഹിമാലയസാനുക്കളിൽ അന്നലഞ്ഞു നടന്നു. പിടിച്ചുനില്ക്കാനായി താഴെക്കിടയിലുള്ള ജോലികളെല്ലാം ചെയ്തു."
വാജ്പെയി സദസിൽ ഇല്ലാതായതും മോദിജിയെ ദുഖിതനാക്കി. അദ്ദേഹത്തിൻറെ ആരോഗ്യത്തിനായും ആശംസിച്ചു. അങ്ങനെ ആദ്യദിവസം തന്നെ മോദിജിയുടെ പാർലമെന്റ് പ്രവേശനം  ചരിത്രത്തിനു തന്നെ മൂർത്തിമത് ഭാവമായി തുടക്കം കുറിച്ചു.


മോദിജി പറഞ്ഞു,  " ഭാരതത്തിന്റെ തെക്കും വടക്കുമായ എല്ലാ ദിശകളിലും  ഞാൻ യാത്ര ചെയ്യാറുണ്ട്.  വഴിയോരങ്ങളിൽ   വിശക്കുന്ന വയറുകളുമായി   ബി.ജെ. പി. പതാകയുമേന്തി ഒറ്റ വസ്ത്രവുമായി ജീവിക്കുന്ന ജനം  അഭിവാദനം ചെയ്യുന്ന വേളകളിലെല്ലാം  എന്റെതായ  പഴങ്കാല  ജീവിതത്തെപ്പറ്റിയും ഓർത്തു പോവുമായിരുന്നു. " വികാരങ്ങൾ  നിറഞ്ഞ  മോദിയുടെ പ്രസംഗങ്ങൾ ജനങ്ങളെ അത്യാഗാധാമായ ചിന്തകളിലേക്കും   ആവഹിക്കുമായിരുന്നു. ഇന്ത്യൻ സാമ്പത്തിക വ്യവസ്ഥയെ പരിഷ്കൃത രാജ്യങ്ങൾക്കൊപ്പം ഉയർത്തണമെന്നുള്ള വിശ്വാസവും  മോദി  ജനങ്ങൾക്ക് പകരുമായിരുന്നു. 



സത്യപ്രതിജ്ഞാ  വേളയിൽ പാക്കിസ്ഥാന്റെ   പ്രധാനമന്ത്രി നവാസ് ഷെരീഫിന്റെ   സാന്നിദ്ധ്യവും  ഒരു ചരിത്രമുഹൂർത്തം കുറിച്ചു. ' അഭിപ്രായ വിത്യാസങ്ങൾ മറന്ന് അയൽ രാജ്യങ്ങളുമായി സുസ്ഥിരമായ ഒരു ബന്ധം ഉറപ്പിക്കണമെന്നും' മോദി  പറഞ്ഞു. 1947-ലെ ഇന്ത്യാ പാക്കിസ്ഥാൻ വേർപിരിയലിനുശേഷം പാക്കിസ്ഥാനിലെ ഒരു നേതാവുമൊന്നിച്ച് വികാരപരമായ സൌഹാർദ്ദം പങ്കുവെച്ച  മറ്റൊരു ചരിത്രം ഇന്ത്യയ്ക്കുണ്ടാവില്ല. എന്നും ശതൃക്കളായി കഴിഞ്ഞ രണ്ടു രാജ്യങ്ങളുടെ പ്രതീക്ഷകളും അഭിലാഷങ്ങളും ഇന്ത്യയുടെയും പാകിസ്ഥാന്റെയും ചർച്ചകളിൽ   തിളങ്ങിയിരുന്നു. 



ചൈനയുമായി ഭാവിയിൽ സംഭവിക്കാൻ പോകുന്ന  വിദേശനയവും മോദിയ്ക്ക് വെല്ലുവിളിയായിരിക്കും. ചൈനയ്ക്കെതിരെ മുന്നേറുന്ന സാമ്പത്തിക ശക്തികളായ കൊറിയായും ജപ്പാനുമായുള്ള ഇന്ത്യയുടെ സഹകരണം ഇന്ത്യാ ചൈന ബന്ധത്തിന് തടസമാണ്. വ്യവസായ പങ്കാളികളായ ഈ   രണ്ടു രാജ്യങ്ങളുടെയും സഹായം  ഇന്ത്യയുടെ സാമ്പത്തിക മുന്നേറ്റത്തിന്  കൂടിയേ തീരൂ. ഇന്ത്യയുടെ സാമ്പത്തിക പ്രത്യായശാസ്ത്രത്തിൽ  ചൈനാ മൌനം പാലിക്കുന്നുണ്ടെങ്കിലും അതിർത്തിയിൽ പട്ടാളത്തെ വികസിപ്പിക്കുന്നതും ഇന്ത്യൻ മിലിട്ടറിയെ ആധുനീകരിക്കുന്നതും  ഭീഷണിയായി കരുതുന്നു. ഇന്ത്യയുടെ സൌത്ത് ഈസ്റ്റ് ഏഷ്യൻ സുഹൃത്ത് രാജ്യങ്ങളായ ജപ്പാനും സിംഗപ്പൂരും സൌത്ത് കൊറിയായും വിയറ്റ്നാമുമായുള്ള ബന്ധങ്ങളും ചൈനയെ വെറി പിടിപ്പിക്കുന്നുണ്ട്. കൊറിയായുടെ കപ്പലുകളും നാവിക ഉപകരണങ്ങളും ഇന്ത്യാ വാങ്ങിക്കുന്നത്  അസ്വസ്ഥമാക്കുകയും ചെയ്യുന്നു.
   

ഗുജറാത്ത് കലാപത്തിനുശേഷം നരേന്ദ്ര മോദിയെ ഒരു മുസ്ലിം വിരോധിയായിട്ടാണ് പൊതുവേ കരുതുന്നത്. തിരഞ്ഞെടുപ്പു വേളകളിൽ എതിർ പക്ഷങ്ങൾ വോട്ടു ബാങ്കിനായി അത് മുതലെടുത്തുകൊണ്ടിരുന്നു. പക്ഷെ ഗുജറാത്തിലെ മുസ്ലിമുകൾ പിന്നീടുള്ള തിരഞ്ഞെടുപ്പുകളിൽ നരേന്ദ്ര മോദിക്കൊപ്പമായിരുന്നു.  ജനക്ഷേമകരമായ അനേക പദ്ധതികൾ മോദി  സർക്കാരിന് അവിടെ നടപ്പിലാക്കാൻ സാധിച്ചതുമൂലം മുസ്ലിമുകളുടെ ആളോഹരി വരുമാനം ഇരട്ടിയാക്കാനും സാധിച്ചു. ഇത്തവണത്തെ തിരഞ്ഞെടുപ്പിൽ  മുസ്ലിമുകൾ ഭൂരിപക്ഷമുള്ള അനേക ഉത്തരേന്ത്യൻ സംസ്ഥാനങ്ങളിൽ വിജയികളായതും  ബി.ജെ.പി. യായിരുന്നു. ഉത്തര ഇന്ത്യയിൽ  എണ്പതു സീറ്റോളം മുസ്ലിം പിന്തുണയോടെ ബി.ജെ.പി.യ്ക്ക് നേടാൻ സാധിച്ചെന്നും  കണക്കുകൾ പറയുന്നു.   


മുസ്ലിം സമുദായത്തിലെ വിഭാഗങ്ങളായ സുന്നികളും ഷിയാകളും തമ്മിലുള്ള മത്സരങ്ങളും ബി.ജെ.പി.യ്ക്ക് അനുകൂലമാക്കി. ഇറാൻ കഴിഞ്ഞാൽ ലോകത്ത് ഷിയാകൾ  കൂടുതൽ വസിക്കുന്ന രാജ്യവും ഇന്ത്യയാണ്. സുന്നി മുസ്ലിമുകളും  ഷിയാ മുസ്ലിമുകളും  തമ്മിലുള്ള ആശയ സംഘട്ടനങ്ങൾ പലപ്പോഴും രാഷ്ട്രീയത്തിലും പ്രതിഫലിക്കാറുണ്ട്. ലക്നൗ, വാരണാസിയിലുള്ള  മുഴുവൻ ഷിയാകളും പിന്തുണ നല്കിയത് ബി.ജെ.പി.യ്ക്കായിരുന്നു.  ഷിയാകൾ ഭൂരിഭാഗവും ചെറുകിട   'കുടിൽ' വ്യവസായങ്ങളിൽ ജീവിക്കുന്നവരാണ്. അത്തരം വ്യവസായങ്ങൾക്ക് പ്രാധാന്യം നല്കികൊണ്ടുള്ള തിരഞ്ഞെടുപ്പു പ്രചരണങ്ങളും ബി.ജെ.പി.യ്ക്ക് അനുകൂലമായി. എല്ലാ മതങ്ങളെയും ഒരുപോലെ ബഹുമാനിക്കുന്ന ഒരു ഭരണഘടന  നമുക്കുണ്ടെങ്കിലും  ഇന്ത്യയിൽ മുസ്ലിമുകൾ താമസിക്കുന്ന ഭൂരിഭാഗം ഗ്രാമങ്ങളും വളരെ പിന്നോക്കാവസ്ഥയിലാണ്. ദരിദ്രർ കൂടുതലും സമ്പത്ത് ഏതാനും ചിലരുടെ കുത്തകയിലുമാണ്. കോണ്ഗ്രസ്സ്  സര്ക്കാരിന്റെ കാലങ്ങളിൽ  ഈ അന്തരം കുറയ്ക്കാൻ  കാര്യമായി ഒന്നും തന്നെ ചെയ്തിട്ടില്ല. അനേക ഗ്രാമങ്ങളിൽ  സ്കൂളുകളോ   വൈദ്യുതിയോ ആരോഗ്യ കേന്ദ്രങ്ങളോ ഹോസ്പ്പിറ്റലുകളോ ഇല്ലാത്ത  ഒരു സ്ഥിതിവിശേഷമാണുള്ളത്.  മുസ്ലിമുകൾക്ക് ബാങ്ക് കടങ്ങൾ അനുവദിക്കാതിരിക്കുക, ജോലി നിഷേധിക്കുക, വാടകയ്ക്ക് താമസിക്കാൻ വീട് കൊടുക്കാതിരിക്കുക  എന്നീ സാമൂഹിക  ദ്രോഹങ്ങൾ മുമ്പുള്ള സർക്കാരിന്റെ കാലങ്ങളിൽ സാധാരണമായിരുന്നു. അവിടെയെല്ലാം പുത്തനായ വാഗ്ദാനങ്ങളുമായി മുസ്ലിമുകളുടെ മനസ്സിനെ പിടിച്ചെടുത്ത്  വോട്ടുകൾ നേടിയതും ബി.ജെ.പി. സുനാമിയുടെ വേലിയേറ്റങ്ങൾക്ക്  കാരണമായി.


പശ്ചിമഘട്ടം സംബന്ധിച്ച്  കേന്ദ്രസർക്കാരും  കേരളത്തിലെ ഏതാനും ക്രിസ്ത്യൻ ബിഷപ്പുമാരുമായി  ഒരു തുറന്ന  സമരത്തിന്  സാധ്യതയുണ്ട്.  രാഷ്രീയ പാർട്ടികളും  ക്രിസ്ത്യൻ ബിഷപ്പുമാരും  തിരസ്ക്കിരിച്ച ഗാഡ്ഗിൽ റിപ്പോർട്ട് നിയമപരമായി നടപ്പാക്കുമെന്നാണ് മോദിസർക്കാർ പറയുന്നത്. അത് അവരുടെ തിരഞ്ഞെടുപ്പ് പത്രികയിലുമുണ്ടായിരുന്നു. ഗാഡ്ഗിൽ റിപ്പോർട്ട് മാറ്റം വരുത്തി  ലഘുകരിച്ച കസ്തൂരി  റിപ്പൊർട്ടുപോലും   ഇടുക്കി, കാഞ്ഞിരപ്പള്ളി, താമരശ്ശേരി മെത്രാൻമാർ എതിർത്തിരുന്നു.  കൃഷിക്കാരുടെ താൽപ്പര്യങ്ങൾ പരിരക്ഷിക്കുന്ന ഗാഡ്ഗിൽ റിപ്പോർട്ട് തികച്ചും ജനാധിപത്യ രീതിയിൽ ശാസ്ത്രീയമായി തയ്യാറാക്കിയതാണ്. ഭൂമിയുടെ സമതുലനാവസ് ത  പരിപാലിക്കുന്നതിൽ സഭ എതിർപ്പുകളൊന്നും ഔദ്യോഗികമായി  പ്രകടിപ്പിച്ചിട്ടില്ലെങ്കിലും ഏതാനും സ്ഥാപിത താല്പര്യക്കാരായ മെത്രാന്മാർ   കൃഷിക്കാരെ തെറ്റിധരിപ്പിച്ച് അതിനെതിരായി  സമരവുമായി രംഗത്തുണ്ട്. ഗാഡ്ഗിൽ റിപ്പോർട്ട്  നടപ്പാക്കുന്നതിനു മുമ്പ്  അതാതു  പ്രദേശങ്ങളിലെ  ജനങ്ങളും ഗ്രാമ പഞ്ചായത്തുകളുമായി ആലോചിക്കണമെന്നത്   വ്യക്തമാക്കിയിട്ടുള്ളതുമാണ്. രാസ വളങ്ങൾ ഉപയോഗിച്ചുള്ള കൃഷിയെ നിരുത്സാഹപ്പെടുത്തി ജൈവ വളങ്ങൾ ഉപയോഗിക്കാനും റിപ്പോർട്ട് ആവശ്യപ്പെടുന്നുണ്ട്. കൂറ്റൻ കെട്ടിടങ്ങളും മണൽവാരലും വനംകൊള്ളയും നിരോധിച്ചിട്ടുണ്ട്. ഗാഡ്ഗിൽ റിപ്പോർട്ടിനെ എതിർക്കുന്നവർ  കൃഷിക്കാരുടെ താല്പര്യങ്ങൾ  സംരക്ഷിക്കാനല്ല മറിച്ചു് ഹൈറെഞ്ച് മുഴുവൻ സഭാവക സ്ഥാപനങ്ങൾ നിറച്ചും ഭൂമി മാഫിയാകളെ സഹായിച്ചും മലകൾ തുരന്ന് പാറ പോട്ടീരുകാരെ പിന്തുണച്ചും  വീതം മേടിച്ചും ഭൂമിയുടെ സമതുലനാവസ്ഥയെ തകർക്കാനാണ്.   ഒരിഞ്ചു ഭൂമിപോലും കൃഷി ചെയ്യുന്നവന് നഷ്ടപ്പെടില്ല.   ഭൂരിപക്ഷമുള്ള മോദി സർക്കാരിന്  ഗാഡ്ഗിൽ റിപ്പൊർട്ട് പ്രായോഗികമാക്കാൻ സാധിക്കുമെന്നതും മെത്രാന്മാർക്ക് തലവേദനയായിട്ടുണ്ട്.


അമേരിക്കയുടെ റൊണാൾഡ് റീഗനെയോ ബ്രിട്ടൻറെ മാർഗരേറ്റ് താച്ചറെയോപ്പോലുള്ള  ഒരു നേതാവിനെ ഇന്ത്യയുടെ മോദിയിൽ അദ്ദേഹത്തെ പിന്താങ്ങുന്നവർ സ്വപ്നം കാണുന്നു.   സുസ്ഥിരമായ ഒരു സർക്കാരിനും രാജ്യപുരോഗതിക്കും ജനങ്ങൾ തന്ന കാര്യനിയൊഗമെന്ന്   തിരഞ്ഞെടുപ്പുഫലത്തെ മോദിയും വിലയിരുത്തി.   ഇരുപത്തിയഞ്ചു വർഷത്തെ കൂട്ടുമന്ത്രിസഭയ്ക്കുശേഷം   കഴിഞ്ഞ ഏതാനും വർഷങ്ങളായി നിന്നുപോയ സാമ്പത്തിക മുന്നേറ്റത്തിന്  പുത്തനായ ജീവനും ഉണർവും ഇനി നൽകേണ്ടത് തിരഞ്ഞെടുത്ത മോദിയുടെ പുതിയ ഭരണകൂടമാണ്‌.  കഴിവും മികവുമുള്ള   കോടാനുകോടി ചെറുപ്പക്കാരായവരുടെ ഒരു ലോകം ഇന്ത്യക്കുണ്ട് . അവരുടെ മാനവ ശേഷിയെ പരമാവധി പ്രയോജനപ്പെടുത്തുവാൻ കഴിവുള്ള ഒരു നേതാവിനെയാണ് ഭാരതത്തിനാവശ്യം. വർഗ വർണ്ണ ജാതി രാഷ്ട്രീയത്തിനുപരിയായി ചിന്തിക്കുന്ന നേതാവുമായിരിക്കണം.  അങ്ങനെയുള്ള ഒരു നേതാവാണ്‌ മോദിജിയെന്നും അദ്ദേഹം  പ്രതീക്ഷകൾക്കൊപ്പം.  ശക്തമായ  ഒരു ഭരണം   വാഗ്ദാനം ചെയ്യുമെന്നും പ്രതീക്ഷിക്കാം. നമ്മുടെ നാടിനുള്ളിൽതന്നെ യുവതലമുറകൾക്ക് അർഹിക്കുന്ന അവസരങ്ങളും വ്യക്തിസ്വാതന്ത്ര്യവും നല്കിക്കൊണ്ട്  തുടങ്ങിവെച്ച  ഉദാരവൽക്കരണ സാമ്പത്തിക ശാസ്ത്രം നടപ്പിലാക്കണം.  മോദിജി   അതിനു  കഴിവും പ്രാപ്തനുമായ  നേതാവാണെന്നതിലും സംശയമില്ല.  പൊതുവേ  വ്യത്യസ്ത കഴിവുകൾ  തെളിയിച്ച  ചെറുപ്പക്കാരായവരുടെ   കൂട്ടായ്മയാണ് മോദി മന്ത്രിസഭയിലുള്ളത്.  മുമ്പുള്ള ഭരണാധികാരികൾ  വരുത്തിവെച്ച സാമ്പത്തിക  ക്രമക്കേടുകളും  അരാജകത്വവും ഇല്ലാതാക്കാൻ  ഇനിയും കാലങ്ങളെടുത്തേക്കാം.   എങ്കിലും ഭാരത ജനത മോദിയിലർപ്പിച്ച  ശുഭപ്രതീക്ഷകളുടെതായ സുവർണ്ണദിനങ്ങൾ അദ്ദേഹത്തിന്റെ ഭരണകാലങ്ങളിൽത്തന്നെ  കാത്തിരുന്നു കാണാം.  അന്തർദേശീയ ശക്തിധൃവീകരണത്തിൽ വിഭവ സമൃദ്ധിയാൽ  പുഷ്ടി നേടുന്ന   ഇന്ത്യ  ഏഷ്യയുടെ പതാകവാഹകനാകുന്ന കാലവും വിദൂരമല്ല.

 

Yasodara (Mrs Modi)

അഭയാ കൊലക്കേസും കൈവെടിയുന്ന നീതിയും

By  ജോസഫ് പടന്നമാക്കൽ

കേരളത്തിലെ നീതിന്യായ  ചരിത്രത്തിൽ  അപൂർവങ്ങളിൽ അപൂർവമായ ഒന്നാണ് 1992 മാർച്ച് ഇരുപത്തിയേഴാം തിയതി കോട്ടയം പയസ് മൌണ്ടിൽ നടന്നതായ അഭയായുടെ കൊലപാതകം. അധികാരവും സ്വാധീനവുമുപയോഗിച്ച് ചില തൽപ്പര കഷികൾക്ക്  അഭയായുടെ മരണത്തെ ആത്മഹത്യയാക്കാനും സാധിച്ചു. നീതിയുടെ ഫയലിൽ തെളിയിക്കപ്പെടാതെ ഇന്നും അഭയായെന്ന   പെണ്‍ക്കുട്ടി  വെറുമൊരു ചോദ്യചിന്ഹമായി അവശേഷിച്ചിരിക്കുകയാണ്. സംഭവങ്ങളുടെ നൂലാമാലകൾ കോർത്തിണക്കിയ അവളുടെ ചിത്രം ഇന്നും  ഗതികിട്ടാത്ത ആത്മാവിനെപ്പോലെ മനുഷ്യമനസ്സിൽ ദുർഗ്രാഹിതകളുടെ കഥകളായി മാറിക്കഴിഞ്ഞു. 

   

ഉന്നതരുടെ ഇടപെടൽ കാരണം തെളിവുകളില്ലാതാക്കിയ അഭയായുടെ കേസ്‌ തെളിയുകയെന്നത് എളുപ്പമല്ല. കാരണം, പ്രതികൾ സഭയുടെയും സമൂഹത്തിന്റെയും കരുത്തേറിയവരും  അധികാര ശ്രേണിയിലുള്ളവരെ സ്വാധീനിക്കാൻ കഴിവുള്ള  വ്യക്തികളുമാണ്. നീതിന്യായവും പോലീസും കുറ്റാന്വേഷകരും  അധികാര രാഷ്ട്രീയ, മതമേധാവികളുടെ സ്വാധീന വലയങ്ങളിൽ അകപ്പെട്ടുപോയി. ജയിലും അഴിയെണ്ണലും അതിലെ പാർപ്പിടവും പണമോ സ്വാധീനമോയില്ലാത്ത  പാവപ്പെട്ടവർക്കായി വിധിച്ചിട്ടുള്ളതാണ്. കൂടാതെ മരിച്ചത് ഒരു കന്യാസ്ത്രിയും. മരണം സംഭവിച്ചത് കന്യാസ്ത്രി മതിൽക്കെട്ടിനുള്ളിലും. അവിടെ നടക്കുന്ന ചരിത്രങ്ങളെന്തെന്ന് പുറം ലോകമറിയാനും സാധ്യതയില്ല. അഭയാക്കേസിൽ കുറ്റവാളികളെ കണ്ടുപിടിക്കാതിരിക്കാനുള്ള എല്ലാ തന്ത്രങ്ങളും ബിഷപ്പും അതിനുത്തരവാദികളായവരും മെനഞ്ഞെടുത്തിരുന്നു.  കൂടെ അധികാരം പേറി നടക്കുന്ന രാഷ്ട്രീയകൂട്ടുകെട്ടും ഉന്നതങ്ങളിലുള്ള സമ്മർദ്ദവും പിന്നിലുണ്ടായിരുന്നു. കേസന്വേഷിച്ചിരുന്ന ഉദ്യോഗസ്ഥരുടെ  നിസഹായകഥകളാണ് പിന്നീടവരിൽനിന്നും കേട്ടത്. ദുഷിച്ച പൌരാഹിത്യത്തിന്റെ ചിത്രം പള്ളിയോടും പട്ടക്കാരോടും അടുത്തിട്ടുള്ളവർക്കറിയാം. അധർമ്മത്തിനായി ഏതറ്റവും പോവുമെന്ന് അഭയായുടെ തെളിയപ്പെടാത്ത അസ്വഭാവിക മരണം തന്നെ സാക്ഷിയാണ്. എതിർക്കുന്നവർക്ക് അവർ തെമ്മാടിക്കുഴിയും ഭീഷണിയും മുഴക്കും. 

 

കോട്ടയം ജില്ലയിലെ അരീക്കര സ്വദേശി ശ്രീ തോമസ് എ മത്തായിയുടെയും ലീലാമ്മയുടെയും ഏകപുത്രിയായി അഭയാ ജനിച്ചു. മരിക്കുമ്പോൾ പ്രായം പത്തൊമ്പതു വയസ്സായിരുന്നു.  മാതാപിതാക്കൾ വിശ്വസിക്കുന്നത് തങ്ങളുടെ മകളെ പുരോഹിതരും ഒരു കന്യാസ്ത്രിയുമൊത്ത് കൊന്നുവെന്നു തന്നെയാണ്.  അപ്പൻ ചിലപ്പോൾ മകളെപ്പറ്റിയോർത്ത് നെടുവീർപ്പെടും, "എന്റെ മോളെയന്ന്  വിവാഹം കഴിപ്പിച്ചു  വിട്ടിരുന്നുവെങ്കിൽ പേരക്കുട്ടികളുമായി വാർദ്ധക്യം ഞാൻ അവരോടൊപ്പം കഴിയുമായിരുന്നു. അവളും ഭർത്താവുമായ ഒരു സ്വപനം ഒടുവിൽ കന്യാസ്ത്രിക്കൂടിനുള്ളിൽ പൊലിഞ്ഞുപോയി. സഭയെ വിശ്വസിച്ച്, സഭയിൽ സമർപ്പിച്ച് ഞാനെന്റെ പൊന്നുമോളെ ബലികൊടുത്തു. അവളും ഭർത്താവുമായ സന്തോഷം നിറഞ്ഞ ഒരു ജീവിതം എന്റെ സ്വപ്നത്തിലെങ്കിലും വന്നിരുന്നുവെങ്കിലെന്ന് ഞാനാശിച്ചിട്ടുണ്ട്. കുറ്റബോധം എന്നെയെന്നും വേട്ടയാടുന്നുണ്ടായിരുന്നു."

 

സഭയ്ക്ക് നല്കിയ ഈ മണവാട്ടിയുടെ ഘാതകരെ കണ്ടുപിടിക്കാൻ  നാളിതുവരെയായി ഒരു പുരോഹിതനും തെരുവുകളിൽ ഇറങ്ങുന്നതായി കണ്ടില്ല. അഭയായുടെ അമ്മ ലീലാമ്മ പറയുകയുണ്ടായി,  "ഒരിക്കൽ അയൽവക്കകാരുമൊത്ത് അഭയായെപ്പറ്റിയുള്ള ഒരു സിനിമാ കാണുവാൻ ഞാൻ പോയി. അതിലും ഒരു കൊച്ചിനെ കാലേൽ പിടിച്ച് കിണറ്റിലിടുന്ന രംഗമാണ് കാണുന്നത്. കിണറ്റിനുള്ളിൽ തള്ളുമ്പോൾ എന്റെ ചങ്ക് പൊട്ടി തകർന്നിരുന്നു. അറിയാതെയെന്നും എന്റെ സ്വപ്നാടനലോകത്തിൽ മോളെയോർത്ത് കണ്ണുനീർ പൊഴിക്കാത്ത ദിനരാത്രങ്ങളില്ല" 

 

അഭയാക്കേസ് കോടതികളിൽ ഇല്ലായ്മ ചെയ്ത് ഒത്തു തീർക്കുന്നതിനായി  പിന്നിൽനിന്നും ആരംഭം മുതൽ പ്രവർത്തിച്ചത് ബിഷപ്പ് കുന്നശ്ശേരിയും രാഷ്ട്രീയക്കാരുമെന്ന് ബി.സി.എം. കോളേജ് മുൻ പ്രൊഫസർ ത്രസ്യാമ്മ ചില ടെലിവിഷൻ ചാനലുകാരോട് വെളിപ്പെടുത്തുകയുണ്ടായി. ത്രസ്യാമ്മ  പറയുന്നു," ബിഷപ്പും കെ.എം. മാണിയും നല്ല രാഷ്ട്രീയബന്ധമുള്ള അടുത്ത സുഹൃത്തുക്കളായിരുന്നു. രാഷ്ട്രീയ നേതാക്കൾ വോട്ടുബാങ്കിനായി ഈ സാഹചര്യം മുതലാക്കി അഭയാക്കേസിൽ ഇടപെട്ടിട്ടുണ്ട്. കേസ് നീളാൻകാരണവും ബിഷപ്പും രാഷ്ട്രീയക്കാരും തമ്മിലുള്ള ഒത്തുകളിമൂലമാണ്. അല്ലായിരുന്നെങ്കിൽ അഭയായുടെ മരണത്തിൽ ഉത്തരവാദികളായവരെ അറസ്റ്റു ചെയ്ത് ശിക്ഷയും മേടിച്ച് പുറത്തുവരാൻ സമയവുമായേനെ. രാഷ്ട്രീയനേതാക്കൾ ഇടപ്പെട്ടതായി കോടതിയിൽ ഒരു പത്രികയിലും പരാമർശനവുമില്ല. "സിസ്റ്റർ ലൂസ്സിയും ബിഷപ്പ് കുന്നശ്ശേരിയും തമ്മിലുള്ള കടുത്ത പ്രേമബന്ധം പുറത്തു പറയാതിരിക്കാനാണ് കോട്ടൂരിനെയും പുതുർക്കയെയും സഭ സംരക്ഷിക്കുന്നതെന്നും" ത്രസ്യാമ്മ  വെളിപ്പെടുത്തുകയുണ്ടായി. ലൂസ്സിയും കോട്ടൂരും തമ്മിലും ബന്ധം ഉണ്ടായിരുന്നതുകൊണ്ട് ബിഷപ്പിന്റെ കഥകൾ അഭയാക്കേസിലെ പ്രതികളായ പുരോഹിതർക്കും അറിയാമായിരുന്നു. അത്തരം ആരോപണങ്ങൾ സി.ബി.ഐ. യുടെ ശ്രദ്ധയിൽപ്പെട്ടപ്പോൾ "സി.ബി.ഐ. യ്ക്കെതിരെ മാനനഷ്ടക്കേസ് കൊടുക്കുമെന്നും"അന്ന് ബിഷപ്പ് ഭീഷണിപ്പെടുത്തി. ത്രസ്യാമ്മയുടെ ഈ വെളിപ്പെടുത്തൽ അരമനയൊന്നാകെ ഞെട്ടിച്ചിരുന്നു.  ബിഷപ്പും ലൂസിയുമൊത്തുള്ള  ഈ കഥ ത്രസ്യാമ്മ വെളിച്ചത്താക്കുന്നതിനു മുമ്പുതന്നെ കോട്ടയം പട്ടണത്തിലെ അങ്ങാടിപ്പാട്ടുമായിരുന്നു.

 

അഭയാ പ്രീഡിഗ്രിക്ക് പഠിക്കുമ്പോഴായിരുന്നു ദാരുണമായ ഈ  മരണത്തിനിടയായത്. പ്രാഥമികമായ അന്വേഷണത്തിൽ  മരണം ആത്മഹത്യയെന്നായിരുന്നു പോലീസ് രേഖപ്പെടുത്തിയിരുന്നത്. പിന്നീട് ചില പൌരജനങ്ങളുടെ എതിർപ്പുമൂലം പ്രശ്നം ക്രൈം ബ്രാഞ്ചിന്റെ ശ്രദ്ധയിൽ കൊണ്ടുവന്നു. ക്രൈം ബ്രാഞ്ചിന്റെ അന്വേഷണത്തിലും മരണം ആത്മഹത്യയായി വിധിയെഴുതി.  കേസന്വേഷണം ലോക്കൽ പോലീസിൽ നിന്നുമേറ്റെടുത്ത് ആദ്യംമുതൽ കേസിനെ തുരങ്കം വെച്ചിരുന്നത് അന്നത്തെ ക്രൈംബ്രാഞ്ച് ഡി.വൈ.എസ്.പി. യായിരുന്ന കെ.റ്റി. മൈക്കിളായിരുന്നു. മൈക്കിൾ തുടക്കത്തിലേതന്നെ അഭയാ ആത്മഹത്യ ചെയ്തെന്ന് വരുത്തി തീർക്കാനുള്ള ശ്രമത്തിലായിരുന്നു. അതിനുള്ള സാഹചര്യ തെളിവുകളെല്ലാം എഴുതിയുണ്ടാക്കിയിരുന്നു. പ്രാഥമിക നടപടികളായ സംഭവസ്ഥലത്തെ വിരലടയാളം എടുക്കുവാനോ  പോലീസ്നായെ വരുത്തുവാനോ അന്ന് പോലീസ് തയ്യാറല്ലായിരുന്നു. കോണ്‍വെന്റിന്റെ അടുക്കളയിൽ ബലപ്രയോഗം നടന്നതിന്റെ അടയാളങ്ങളും നിരവധിയുണ്ടായിരുന്നു. അഭയായുടെ ചെരുപ്പും ശിരോവസ്ത്രവും ദുരഹസാഹചര്യത്തിൽ കണ്ടെത്തുകയും ചെയ്തു.   കേസന്വേഷനത്തിന്റെ പ്രാഥമിക കാര്യങ്ങൾപോലും പരിഗണിക്കാതെ ഇതൊരു ആത്മഹത്യയെന്നനുമാനിക്കാൻ തങ്ങൾക്ക് തെളിവിന്റെ ആവശ്യമില്ലെന്നാണ് മൈക്കിളിന്റെ വാദം. അഭയാ മാനിസിക രോഗിയായിരുന്നെന്നു സ്ഥാപിക്കാനും ഒരു ശ്രമം ക്രൈംബ്രാഞ്ച് നടത്തി.  മാതാപിതാക്കൾക്കും ബന്ധുക്കൾക്കും മനോവിഷാദ  രോഗമുണ്ടായിരുന്നെന്നും പറഞ്ഞു പരത്തി. കാനോൻനിയമം അനുസരിച്ച് മാനസികരോഗമുള്ള കുടുംബങ്ങളിൽനിന്ന് സന്യാസിസന്യാസിനികളെ സ്വീകരിക്കുകയില്ലായെന്നുള്ള പ്രാഥമികവിവരവും ക്രൈം ബ്രാഞ്ചിനില്ലാതെ പോയി. മാത്രവുമല്ല അഭയാ മരിക്കുന്നതിനുമുമ്പ് അവരുടെ കുടുംബം മാനസിക ചീകൽസ തേടിയിരുന്നുവെന്ന തെളിവും  ക്രൈംബ്രാഞ്ചിന് ഹാജരാക്കാൻ സാധിച്ചില്ല. നുണകൾ മാത്രം കുത്തി നിറച്ച് അന്ന് കെ.ടി. മൈക്കിൽ അഭയാ ആത്മഹത്യാ ചെയ്തതായി വരുത്തി വെച്ചു. മരിച്ചശേഷം പുറത്തെ വാതിൽ കുറ്റിയിട്ടിരുന്നതും ശിരോവസ്ത്രം വാതിലിൽ ഉടക്കികിടന്നതും ആത്മഹത്യ ചെയ്യുന്ന ഒരാളിന്റെ വികൃതസ്വഭാവമെന്നും മൈക്കിൽ എഴുതിച്ചേർത്തിട്ടുണ്ടായിരുന്നു.

 

ആദ്യമായി അഭയായുടെ മരണം കൊലപാതകമെന്ന് സ്ഥിതികരിച്ചത് സി.ബി.ഐ. ഡപ്യൂട്ടി സുപ്രണ്ടായ വർഗീസ് പി. തോമസായിരുന്നു. പ്രസിഡന്റിന്റെ വിശിഷ്ടാ സേവനമെഡൽവരെ കരസ്ഥമാക്കിയ വർഗീസ് ഈ കേസ് തെളിയിക്കുമെന്ന വിശ്വാസവും പൊതുജനത്തിനുണ്ടായിരുന്നു. അദ്ദേഹം കേസന്വേഷണം തുടങ്ങിയപ്പോൾ പ്രധാനപ്പെട്ട റിക്കോർഡുകൾ  വളരെ വിദഗ്ക്തമായിതന്നെ പ്രതിഭാഗം നശിപ്പിച്ചു കളഞ്ഞിരുന്നു. പലതും തേച്ചുമായ്ച്ചും കൃത്രിമമായി ഉണ്ടാക്കിയും ഏതാണ്ട് നഷ്ടപ്പെട്ട നിലയിലുമായിരുന്നു തെളിവുകളെല്ലാം അവശേഷിച്ചിരുന്നത്.ശവത്തിന്റെ  പരിശോധന റിപ്പോർട്ടും മെഡിക്കൽ കോളേജിലെ പോസ്റ്റ്മാർട്ടം റിപ്പോർട്ടും അപൂർണ്ണവും അവ്യക്തവുമായിരുന്നു. അഭയായുടെ മരണം സംബന്ധിച്ച് വർഗീസിന്റെ വ്യത്യസ്തമായ അഭിപ്രായം സഭാതലങ്ങളിലാകെ അങ്കലാപ്പുണ്ടാക്കി. എന്നാൽ അദ്ദേഹം സർവീസിൽ ഏഴുവർഷം ബാക്കിനിൽക്കവേ ജോലിയിൽ നിന്ന് രാജിവെച്ചു. അദ്ദേഹം നിർബന്ധപെൻഷനും വാങ്ങി ഉദ്യോഗത്തിൽനിന്നും വിടപറഞ്ഞത്‌, ഉന്നതങ്ങളിൽനിന്നുള്ള ഭീഷണിയും ജോലിയിൽനിന്ന് പിരിച്ചുവിടുമെന്ന ഘട്ടവും വന്നപ്പോഴായിരുന്നു. ഇതോടെ അഭയാക്കേസ്സിൽ സഭയുടെ ശക്തമായ ഇടപെടലിന്റെ കഥയും പു റത്തുവന്നു. സഭ അഭയാക്കേസ് തേയ്ച്ചു മായിച്ചു കളയാൻ ശ്രമിക്കുന്ന വിവരങ്ങളും പൊതുജനങ്ങൾക്ക് ബോദ്ധ്യമായി.

 

ഇന്ത്യായിലെ  കുറ്റാന്വേഷണ  വിദഗ്ക്തരെയും നിയമപാലകരെയും   സ്വാധീനിക്കാൻ കഴിവുള്ള സഭ ഇതിനുള്ളിൽ പ്രവർത്തിക്കുന്നതുമൂലം ഒരു സത്യാന്വേഷിക്കും കൊലപാതകമോ കവർച്ചയോ തെളിയിക്കപ്പെടാൻ സാധിക്കാത്ത സാഹചര്യങ്ങളാണ് നിലവിലുള്ളത്. അഭയാക്കേസ്സിൽ കൊലപാതകികൾക്കൊപ്പം സീ.ബി.ഐ. യും ലോക്കൽ പോലീസും കൂട്ടുനില്ക്കുന്നുണ്ടായിരുന്നു. 1994 ജനുവരി പത്തൊമ്പതാം തിയതി വർഗീസ് ഇതേ സംബന്ധിച്ച് ഒരു പത്രസമ്മേളനം വിളിച്ചുകൂട്ടി. അന്നത്തെ  വർഗീസിന്റെ പത്രപ്രസ്ഥാവനയിൽക്കൂടി അഭയായുടെ മരണം കൊലപാതകമെന്ന് പൊതുജനസമൂഹത്തെ അറിയിച്ചു. അന്നുമുതലാണ് ആത്മഹത്യായെന്ന അഭയായുടെ മരണം പ്രഖ്യാപിതമായ ഒരു കൊലപാതകമായി മാറിയത്. വളരെ അസൂത്രണത്തോടെ കേസിനെയില്ലാതാക്കാൻ ചില സംഘിടിതശക്തികൾ ചരടു  വലിക്കുന്നുണ്ടായിരുന്നുവെന്നും സമൂഹം മനസിലാക്കാനും തുടങ്ങി.


 2008 നവംബർ പത്തൊമ്പതാം തിയതി ഫാദർ തോമസ് കോട്ടൂരിനെയും ഫാദർ പുതുർക്കയെയും  സിസ്റ്റർ  സെഫിയെയെയും സീ.ബി.ഐ. അറസ്റ്റുചെയ്തു. ബിഷപ്പ് കുന്നശേരിയേയും  ബിഷപ്പ് മൂലെക്കാടിനെയും ചോദ്യവും ചെയ്തു. സംഭവം കഴിഞ്ഞ് ആദ്യമായി  അന്വേഷണ റിപ്പോർട്ട് തയാറാക്കിയ അന്നത്തെ സബ് ഇൻസ്പെക്റ്റർ  വി.വി. ആഗസ്റ്റിൻ  കേസിന്റെ ദുരൂഹതയെന്നോണം 2008  നവംബർ ഇരുപത്തിയഞ്ചാം തിയതി ആത്മഹത്യ ചെയ്തു. സി.ബി.ഐ. യുടെ മാനസിക പീഡനം മൂലമാണ് താൻ മരിക്കുന്നതെന്നും  ഒരു ആത്മഹത്യാക്കുറിപ്പുമുണ്ടായിരുന്നു.   തെളിവുകളെല്ലാം നശിപ്പിച്ച് അഭയായുടെ മരണം ആത്മഹത്യയാക്കിയത് അഗസ്റ്റ്യനാണെന്ന് സീ.ബി.ഐ.യുടെ ആരോപണമുണ്ടായിരുന്നു. അഗസ്റ്റിന്റെ വ്യക്തിപരമായ മറ്റൊരു ഡയറിയിൽ അന്നത്തെ സീ.ബി.ഐ. ഉദ്യോഗസ്ഥർ   അങ്ങനെയെഴുതുവാൻ സ്വാധീനം ചെലുത്തിയതായും കുറിച്ചു വെച്ചിട്ടുണ്ട്.


ഇന്ത്യ വിഷന്റെ  ദൃശ്യ മാദ്ധ്യമത്തിൽ   അഭയാക്കൊലക്കേസിന്റെ നാർക്കോ അനാലിസിസിനെപ്പറ്റിയുള്ള സീഡിയിലെ  സാങ്കേതിക വിവരങ്ങൾ  വിശദമായി  വിക്ഷേപിച്ചിരുന്നു.  അഭയാ അടിച്ചു കൊല  ചെയ്യപ്പെടുകയായിരുന്നുവെന്ന്  നാർക്കോ സീഡിയിൽ പ്രതികളായ പുതുർക്കയും കോട്ടൂരും സെഫിയും വ്യക്തമാക്കുന്നുണ്ട്. അഭയായെ എന്തു സാധനം കൊണ്ടാണ് അടിച്ചുകൊന്നതെന്ന   ചോദ്യം ചോദിച്ചപ്പോൾ കോടാലി, ചുറ്റിക, കൂടം പോലുള്ള സാധനം കൊണ്ടെന്ന് പുതുർക്കയച്ചൻ  നാർക്കോ പരിശോധനയിൽ   ഉത്തരം പറയുന്നുണ്ട്. രണ്ടോ മൂന്നോ പേർ ഒന്നിച്ചാണ് അഭയായെ കിണറ്റിലിട്ടതെന്നും  പറയുന്നുമുണ്ട്. കേസുമായി ബന്ധപ്പെട്ട  ഇത്തരം കാര്യങ്ങൾ പുറത്തു വിടരുതെന്ന് ബിഷപ്പ് വാർത്താ ലേഖകരെ വിലക്കുന്നതും   പുതുർക്ക വെളിപ്പെടുത്തുന്നുണ്ട്.  ഇത്തരം ദൃശ്യങ്ങൾ മാദ്ധ്യമങ്ങളിൽക്കൂടി പുറത്തു വിട്ടെങ്കിലും കോടതി അവർക്ക് പിന്നീട് വിലക്ക് കല്പ്പിച്ചിരുന്നു. ഇതിനായി സിസ്റ്റർ സെഫിയുടെ പരാതി കോടതിയുടെ പരിഗണനയിലുണ്ടായിരുന്നു. നാർക്കോ പരിശോധന വിവരങ്ങൾ മാദ്ധ്യമങ്ങൾ പുറത്തു വിടുന്നതിൽ സിസ്റ്റർ സെഫിയുടെ സ്വകാര്യത  മാനിച്ചാണ് കോടതി വിലക്ക് കല്പ്പിച്ചത്.  അതനുസരിച്ച് ദൃശ്യങ്ങൾ സംപ്രേഷണം ചെയ്യരുതെന്ന് കോടതി  വിലക്കിയെങ്കിലും വാർത്തകൾ പുറത്തു വിടുന്നതിൽ വിലക്കൊന്നും കൽപ്പിച്ചില്ല. ഏതായാലും ഒരു കാര്യം തീർച്ച, അഭയായെ കൊല്ലാൻ ഈ മൂന്നു വ്യക്തികൾക്കും കാര്യമായ പങ്കുണ്ട് ; അത്  നാർക്കോ അനാലിസിസിലെ വിവരങ്ങളിൽ നിന്നും സുനിശ്ചിതമാവുകയും ചെയ്തു.
 

ദൃശ്യങ്ങൾക്ക് വിലക്കു കൽപ്പിച്ചെങ്കിലും അഭയാ കൊലക്കേസ് സംബന്ധിച്ച സുപ്രധാനമായ വിവരങ്ങൾക്ക് ഉപരോധം ഏർപ്പെടുത്തി മറച്ചുവെക്കാൻ അരമനയ്ക്ക് കഴിഞ്ഞില്ല. നാർക്കോ പരിശോധനയിൽ വ്യക്തമായി കാര്യങ്ങൾ ഓരോന്നായി വിവരിക്കുന്നതും ജോസ് പുതുർക്കയിൽ കൂടിയാണ്. കിണറ്റിൽ അഭയായെ തള്ളിയിട്ടശേഷം മതിലുചാടി പുറത്തു പോയിയെന്നാണ് പരീക്ഷണങ്ങളിൽ വ്യക്തമാക്കുന്നത്. സംഭവം നടന്ന ദിവസം കോട്ടൂരിനും പുതുർക്കയ്ക്കും  അടുക്കളയുടെ വാതിൽ തുറന്നു കൊടുത്തത് താനായിരുന്നുവെന്ന് സിസ്റ്റർ സെഫി പറയുന്നുണ്ട്. ഇവരെ ഇടയ്ക്കിടെ കാണാറുണ്ടായിരുന്നെന്നും  വിളിക്കാറുണ്ടായിരുന്നെന്നും  സെഫി പറയുന്നു. പുതർക്കയും കോട്ടൂരുമായി ആത്മബന്ധത്തിനു പുറമേ ശാരീരിക ബന്ധങ്ങളുണ്ടായിരുന്നതായും അവരുടെ ശരീരത്തിൽ സ്പർശിച്ചിട്ടുള്ള കാര്യങ്ങളും സെഫി പറയുന്നുണ്ട്. മൂന്ന് പ്രതികളുടെയും ഉത്തരങ്ങൾ പരസ്പരം യോജിച്ചു പോവുന്നതും ചേർത്തു വെക്കാവുന്നതുമാണ്. ഇത്തരം പൊരുത്തങ്ങൾ സാധാരണ അപൂർവ്വമായേ സംഭവിക്കാറുള്ളൂവെന്നും നിയമ വിദക്തരും സീ ബി ഐ യിലെ പ്രമുഖരും സമ്മതിക്കുന്നുണ്ട്. “പുതിർക്കയും കോട്ടൂരും ഞാനും  ഒന്നിച്ചു നിൽക്കുമ്പോൾ  അഭയായെ ഇടനാഴികകളിൽക്കൂടി കണ്ടുവെന്നും" സെഫി പറയുന്നുണ്ട്. അഭയായുടെ തലയ്ക്കു മീതെ കോടാലികൊണ്ട്  അടിച്ചുകഴിഞ്ഞ് കിണറ്റിലിട്ടന്നാണ് സെഫിയും  പരിശോധനയിൽ പറയുന്നത്. ദൃശ്യങ്ങൾ പലതും എഡിറ്റ് ചെയ്താണ് പുറത്തുവിട്ടത്. അതുകൊണ്ട് അവ്യക്തതകളുമുണ്ട്. അസമയത്ത് രണ്ടു പുരോഹിതർ എന്തിനു വന്നുവെന്ന ഉത്തരങ്ങളും അതിൽ കാണാം. അതെല്ലാം എഡിറ്റു ചെയ്തതുമാകാം. നാർക്കോ അനാലിസിസ് വിവരങ്ങൾ പുറത്തുവിട്ടത് കടുത്ത മനുഷ്യാവകാശ ലംഘനമെന്ന് കോട്ടയം അതിരൂപത പ്രതികരിച്ചിരുന്നു. ഉന്നതരായ പലരും കുടുങ്ങുമെന്ന ഘട്ടം വന്നപ്പോഴായിരുന്നു നാർക്കോ സീഡികൾ  പുറത്തുവിട്ടത്. 



 സത്യവും നീതിപൂർവ്വവുമായ ഒരന്വേഷണം സീ ബി ഐ നടത്തിയിരുന്നെങ്കിൽ അഭയാക്കേസ് കാലഹരണപ്പെടാതെ തെളിയുമായിരുന്നുവെന്നു കോടതി കുറ്റപ്പെടുത്തി. അജ്ഞേയമായ ഏതോ ശക്തി അഭയാക്കേസ് ഇല്ലാതാക്കാൻ ശ്രമിക്കുന്നുവെന്നും അന്വേഷണ കമ്മീഷനെ ഇക്കാലമത്രയും സ്വാധീനിച്ചിരുന്നുവെന്നും കോടതിയുടെ കണ്ടെത്തുലുകളിലുണ്ട്. കേരളത്തിലെ പ്രസിദ്ധനായ ഒരു നേതാവ് കേന്ദ്രം ഭരിക്കുന്ന കോണ്‍ഗ്രസിനെ സ്വാധീനിച്ചതായും അതുവഴി അഭയാകേസ് ഇല്ലാതാക്കാൻ ശ്രമിച്ചതായും പുറത്തുവന്നിട്ടുണ്ട്. കത്തോലിക്കാ അല്മായകമ്മീഷനുകളുംപ്രമുഖരായ അല്മായനേതാക്കളും അന്വേഷണകമ്മീഷനെ സ്വാധീനിക്കുന്നുണ്ടായിരുന്നു. കൂടെ കൂടെയുള്ള സ്വാധീനവും ചില കേന്ദ്രങ്ങളിൽനിന്നുള്ള പണത്തിന്റെ ഒഴുക്കും കാരണം കേസ് തെളിയിക്കുന്നതിനുള്ള പല മാർഗങ്ങളും ഇല്ലാതാവുകയും ചെയ്തു.

  

 

2009 ഡിസംബർ ഇരുപത്തിയൊമ്പതാം തിയതി സി.ബി.ഐ,. എറണാകുളത്തുള്ള  നീതിന്യായ മജിസ്ട്രേറ്റു   കോടതിയിൽ  ഹാജരാക്കിയ പത്രികയിൽ ഇങ്ങനെ കാണുന്നു, "നാർക്കോ അനാലിസീസ് വിവരങ്ങളനുസരിച്ച് 1992 മാർച്ച് ഇരുപത്തിയേഴാം തിയതി സുപ്രഭാതത്തിൽ അഭയാ എഴുന്നേല്ക്കുകയും ഹോസ്റൽ വക അടുക്കളയിലുള്ള  റഫറിജറേറ്ററിൽനിന്നും വെളളം കുടിക്കാനെത്തുകയും ചെയ്തു.  പുറകിൽനിന്ന് സെഫി മൂന്നു പ്രാവിശ്യം അഭയായുടെ തലക്കിട്ടടിച്ചു. അഭയാ ഉടൻ അബോധാവസ്ഥയിലാവുകയും ചെയ്തു.  മരിച്ചുവെന്നു കരുതി കോട്ടൂരും   പുതിർക്കയും സെഫിയുമൊത്ത് അഭയായുടെ ശരീരം  അടുക്കളയിൽനിന്നും പുറത്തെടുത്ത് കെട്ടിടത്തിനു വെളിയിലുള്ള കിണറ്റിലേക്ക് വലിച്ചെറിഞ്ഞു."   എന്നാൽ 2009 ജനുവരി ഒന്നാം തിയതി 'ജഡ്ജി ഹേമാ' നാർക്കോ റിപ്പോർട്ടിന് പരിഗണന നല്കാതെ  സീ.ബി.ഐ യുടെ   ഡയറിയിൽ മാത്രം എഴുതിയിരിക്കുന്ന വസ്തുതകളെ ആധാരമാക്കി പ്രതികൾക്ക് ജാമ്യം നല്കുകയാണുണ്ടായത്. നാർക്കോ അനാലിസിസിനെ തെളിവുകളായി എടുക്കാൻ കോടതിക്ക് കഴിഞ്ഞില്ല. സീ.ബി.ഐ യുടെ ഡയറിയിൽ മറ്റൊരിടത്തുള്ളത് "അഭയാ രാവിലെ ഉണർന്നെഴുന്നേറ്റു അടുക്കളയിൽ വന്ന സമയം കോട്ടൂരും   പുതുർക്കയും പരസ്പരം  ഒരേ സമയം  സെഫിയെ   ലൈംഗികമായി പങ്കിടുകയായിരുന്നു"വെന്നാണ്.  അഭയായെ കണ്ട്  വിവശയായ  സെഫി വിറകുകൊള്ളികൊണ്ട് അഭയായുടെ തലക്കിട്ടടിച്ചുവെന്നും  സി.ബി.ഐ. രേഖപ്പെടുത്തിയിരിക്കുന്നു. 

 

അഭയാ എന്ന മാലാഖ നിത്യ നിദ്രയിലായിട്ട്  ഇരുപത്തിരണ്ട് വർഷങ്ങൾ കടന്നുപോയിരിക്കുന്നു.  കേസിലുടനീളം കൊല നടത്തിയവരെ നീതിപീഠത്തിൽ കൊണ്ടുവരുകയായിരുന്നില്ല  മറിച്ച്  കുറ്റവാളികളെ എങ്ങനെ രക്ഷപ്പെടുത്തണമെന്നായിരുന്നു അന്വേഷണ ഉദ്യോഗസ്ഥരുടെ ലക്‌ഷ്യം.  അതിനായുള്ള ശ്രമങ്ങളും അവർ നടത്തി. വിജയിക്കുകയും ചെയ്തു.  ജീവിച്ചിരിക്കുന്ന അവളുടെ മാതാപിതാക്കളുടെ അശാന്തി ഇന്നും കെട്ടണഞ്ഞിട്ടില്ല. പരിഹാസമായ അന്വേഷണമല്ലാതെ   നാളിതുവരെ ഉത്തരം കണ്ടെത്തിയിട്ടുമില്ല.  അഭയായെന്ന അറിയപ്പെടാത്ത കൊടുങ്കാറ്റിൽ ഗ്രഹിക്കാൻ സാധിക്കാതെ  സത്യം എവിടെയോ അലഞ്ഞുതിരിഞ്ഞു നടപ്പുണ്ട്. തെളിവുകൾ വിദക്തമായി  നശിപ്പിച്ചതുമൂലം സത്യം എവിടെയെന്ന് അന്വേഷിക്കാനും കണ്ടെത്താനും സാധിക്കുന്നില്ല. സാക്ഷിയായിരുന്ന അന്നത്തെ ഹോസ്റ്റൽ നടത്തിപ്പുകാരി കന്യാസ്ത്രിയെ ഇറ്റലിയിലെവിടെയോ സഭയൊളിപ്പിച്ചിരിക്കുകയാണ്. അവരെവിടെയുണ്ടെന്ന് നാളിതുവരെയായി ആർക്കും അറിയില്ല. നൂറുനൂറായിരം സ്ഥാപനങ്ങളുള്ള സഭയുടെ ഒളിത്താവളങ്ങൾ  കണ്ടുപിടിക്കാൻ നീതിന്യായ നിയമപാലകർക്കു സാധിക്കുകയുമില്ല.നീതിയുടെ വിതരണത്തിൽ പാവം അഭയായ്ക്ക് നീതി ലഭിച്ചില്ല.  ഹീനമായി തെളിവുകൾ നശിപ്പിച്ചവരുടെ ചെളിക്കുണ്ടിൽ അവളുടെ നീതി ഒളിഞ്ഞിരിക്കുന്നു.

 Malayalam Daily News: http://www.malayalamdailynews.com/?p=91339

മോഡി സുനാമിയും മോഡിമോഡൽ ധനതത്ത്വ ശാസ്ത്രവും

By ജോസഫ് പടന്നമാക്കൽ 




പതിനാലാം ലോകസഭാതിരഞ്ഞെടുപ്പിലെ   ബി.ജെ.പി. യുടെ   വൻവിജയം  ഇന്ത്യയുടെ രാഷ്ട്രീയവേലിയേറ്റ   ചരിത്രത്തിലെ പുതിയൊരു അദ്ധ്യായമായിരുന്നു. ആ പോരാട്ടത്തിൽ എന്നും ശക്തി തെളിയിച്ചിരുന്ന കോണ്ഗ്രറസിലെ വമ്പന്മാർ പലരും നിലംപതിച്ചു. ജനങ്ങളുടെ വിധിയിൽക്കൂടി  സംഭവിച്ച   ഒരു ഡൈനാസ്റ്റിയുടെ ഭരണകൈമാറ്റം  ഇത്തവണത്തെ   തിരഞ്ഞെടുപ്പിന്റെ പ്രത്യേകതയായിരുന്നു.   ചരിത്ര വിജയമായ ഈ തിരഞ്ഞെടുപ്പിൽ ലോകരാഷ്ട്രങ്ങൾ ഒന്നടങ്കം നരേന്ദ്ര  മോഡിയെ അഭിനന്ദിച്ചു. ഒബാമ അദ്ദേഹത്തെ വൈറ്റ് ഹൌസിലേക്ക് ക്ഷണിക്കുകയും ചെയ്തിട്ടുണ്ട്. ഇരുപത്തിയൊന്നാം നൂറ്റാണ്ടിലെ ഇന്ത്യയുമായി പരസ്പര ധാരണയില്ക്കൂടി    ആഗോള പങ്കാളിത്തബന്ധം സ്ഥാപിക്കാനും മോഡിയെ അഭിനന്ദിച്ചുകൊണ്ട്  അമേരിക്കൻ പ്രസിഡന്റ് ആഗ്രഹം പ്രകടിപ്പിച്ചു.


2063 ദിവസം ഗുജറാത്തിന്റെ മുഖ്യമന്ത്രിയായിരുന്ന മോഡി എന്തുകൊണ്ടും മറ്റേതു നേതാക്കന്മാരേക്കാളും രാജ്യം ഭരിക്കാൻ യോഗ്യൻ തന്നെയാണ്. മോഡി പറയും, "നിങ്ങൾക്കെന്നെ സ്നേഹിക്കാം, വെറുക്കാം ; പക്ഷെ ഇനിമേൽ തഴയാൻ സാധിക്കില്ല". ഊണും ഉറക്കവുമില്ലാതെ ജോലി ചെയ്യണമെന്ന ചിന്തകളുമായി മാത്രം നടക്കുന്ന ഒരു ജോലി ഭ്രാന്തനാണദ്ദേഹം. വർക്ക്ഹോളിക്ക് (Workaholic) എന്ന് ഇംഗ്ലീഷിൽ പറയും. നാല് മണിക്കൂറാണ് ദിവസത്തിൽ ഉറങ്ങുന്നത്. കഴിഞ്ഞ ആറുവർഷമായി തന്റെ ഓഫീസില്നിന്നും ഒരു ദിവസംപോലും അവധിയെടുത്തില്ലെന്ന സത്യവും വിസ്മയമായി തോന്നാം.  ഇനിയുള്ള നാളുകളിൽ നാം കാണുക മോഡിയുടെ ഇന്ത്യയെയാണ്. വരും നാളുകളിൽ മോഡിയുടെ സ്വപ്നം ഇന്ത്യയുടെ സ്വപ്നമായി മാറുന്ന ചരിത്ര മുഹൂർത്തങ്ങളായിരിക്കുമെന്നും കരുതാം.


നരേന്ദ്രമോഡിയെപ്പോലെ  എന്തുകൊണ്ടും ഇന്നത്തെ രാഷ്ട്രീയസാഹചര്യത്തിൽ നേതൃത്വത്തിനുള്ള എല്ലാ ഗുണങ്ങളും തികഞ്ഞ മറ്റൊരു നേതാവിനെ കണ്ടെത്തുക പ്രയാസമാണ്.  ഇന്ത്യാ നയിക്കുവാൻ കരുത്തനായ നേതാവ് മോഡിയെന്നതിലും സംശയമില്ല. ഭരിക്കാൻ വേണ്ട എല്ലാ ഗവേഷണങ്ങളും ഗുജറാത്തിൽ പരീക്ഷിച്ചശേഷമാണ് അദ്ദേഹം ഇന്ത്യയുടെ അമരക്കാരനായി തലപ്പത്ത് വന്നത്. അമേരിക്കയുടെ സി.ആർ.എസ് (Congressional Research Service) റിപ്പോർട്ടനുസരിച്ച് മോഡിയുടെ നേതൃത്വത്തിലുള്ള  ഗുജറാത്തിനെ   'അനുകരിക്കേണ്ട  ഭരണകൂടമെന്നും' വിശേഷിപ്പിച്ചിട്ടുണ്ട്.   ഇന്ന് ഇന്ത്യയിൽ മാറ്റങ്ങൾക്കായി വാഗ്ദാനം ചെയ്യാൻ കഴിവുള്ള നേതാവ് മോഡി മാത്രമാണ്.   ഒരു രാഷ്ട്രത്തിന്റെ സുഗമമായ നടത്തിപ്പിനുള്ള എല്ലാ പ്രായോഗിക വശങ്ങളും അദ്ദേഹം ശരിയായി പഠിച്ചിട്ടുണ്ട്.   മോഡിയുടെ ഭാവിഭാരതം ഏതാനും വർഷങ്ങൾക്കുള്ളിൽ വ്യവസായവൽക്കരണം നേടിയ വ്യതസ്ത രാഷ്ട്രമായിരിക്കുമെന്നും വിദക്തർ അഭിപ്രായപ്പെടുന്നു.   “നികുതി കൊടുക്കുന്നവന്റെ പണം പാഴാക്കി കളയുന്നതല്ല രാഷ്ട്രീയം. അനാവശ്യ പാഴ്ചെലവുകൾ ഇല്ലാതാക്കുമ്പോഴാണ് സാമ്പത്തിക ശാസ്ത്രത്തിന്റെ അവബോധമുളവാകുന്നതെന്ന്"  രാഷ്ട്രീയ പ്രതിയോഗികളെ മോഡി  മിക്കപ്പോഴും ഓർമ്മിപ്പിക്കാറുണ്ട്.  ഗുജറാത്തല്ല ഇന്ത്യയെന്ന് പ്രതീക്ഷകൾ ഇല്ലാത്തവർ പറയും. ഗുജറാത്ത് മോഡലും ഭാരത മോഡലും പരസ്പര വിരുദ്ധമല്ല. മോഡിയുടെ  ഗുജറാത്തിൽ പുതിയ തന്ത്രങ്ങളിൽക്കൂടിയുള്ള സാമ്പത്തിക പരീക്ഷണങ്ങൾ അസൂയാവഹമായ നേട്ടങ്ങളാണ് കൈവരിച്ചത്.


അമ്മ ജീവിച്ചിരിക്കെ ആദ്യമായി ഇന്ത്യയുടെ പ്രധാനമന്ത്രിയാകാനും  മോഡിക്ക്  ഭാഗ്യം ലഭിച്ചു.  മോഡിയെന്ന നേതാവ്   രാഹൂലിനെപ്പോലെ വാരുണ്യവർഗത്തിൽ    ജനിച്ചുവളർന്ന വ്യക്തിപ്രഭാവമായിരുന്നില്ല.  ദുരിതങ്ങളുടെയും കഷ്ടപ്പാടുകളുടെയും നടുവിൽ ജനങ്ങളുടെ ബാലറ്റുപ്പെട്ടികളിൽക്കൂടി ഭാരതസിംഹാസനം പിടിച്ചെടുത്തതും ഒരു സാഹസികതയുടെ വിജയമായിരുന്നു. രാഹൂലിനെപ്പോലെ കൊട്ടാരതുല്യമായ വീടുകളിൽ വളർന്ന് വെള്ളിക്കരണ്ടിയുമായ ഒരു ജീവിതം അദ്ദേഹത്തിനുണ്ടായിരുന്നില്ല.  1950 സെപ്റ്റംബർ 17 ന് ഗുജറാത്തിലെ വഡ്നാഗറിൽ ഒരു ചെറുകച്ചവടക്കാരന്റെ മകനായി ജനിച്ചു. അദ്ദേഹം ദാമോദരദാസ് മുല്ച്ചന്ദ് മോഡിയുടെയും ശ്രീമതി ഹീരാ ബെന്റെയും ആറു മക്കളിൽ മൂന്നാമനായിരുന്നു. സാധാരണക്കാരനിൽ സാധാരണക്കാരനായി എളിമയും വിനയവും ദൈവഭക്തിയുമുള്ള ഒരു കുടുംബത്തിൽ   വളർന്നു.  ബാല്യകാലത്തിൽ അന്നന്നത്തെ അപ്പത്തിനായി   റെയിൽവേ  ട്രാക്കിൽക്കൂടി ചായവിറ്റ്  മാതാപിതാക്കളടങ്ങിയ സ്വന്തം കുടുംബത്തെയും സംരക്ഷിച്ചിരുന്നു.  താഴെക്കിടയിലുള്ള ഒരു സമൂഹത്തിൽ ബാല്യകാലം കഴിച്ചുകൂട്ടി. നന്നേ ചെറുപ്പത്തിൽ ബാലവേല ചെയ്തുകൊണ്ട് ഇന്ത്യയുടെ ഭാവി പ്രധാനമന്ത്രി സ്കൂൾ വിദ്യാഭ്യാസം നടത്തിയിരുന്നു. പത്താം വയസ്സിൽ സ്വതന്ത്ര രാഷ്ട്രീയ പാർട്ടിയായ 'രാഷ്ട്രീയ സ്വയംസേവക സംഘത്തിലെ' മീറ്റിങ്ങുകളിൽ പങ്കു ചേരുമായിരുന്നു.  തുടർച്ചയായ മുഖ്യമന്ത്രി സ്ഥാനത്തേക്കുള്ള മോഡിയുടെ മൂന്നു വിജയങ്ങളും ഗുജറാത്തിന്റെ സാമ്പത്തിക നേട്ടങ്ങളും ഇന്ത്യയുടെ പ്രധാനമന്ത്രി സ്ഥാനത്തോളം അദ്ദേഹത്തെ കൊണ്ടുചെന്നെത്തിച്ചു.      


വിവേകമുള്ളവൻ മോഡിയുടെ ജീവിതവഴികളെ അനുഗമിച്ച് അദ്ദേഹത്തിൽ ഒരു ആദർശപുരുഷനെ കണ്ടുപിടിക്കും.  ഗുജറാത്തിന്റെ നീണ്ടകാല മുഖ്യമന്ത്രിയെന്ന നിലയിൽ അധികാരത്തിന്റെ സുവർണ്ണകലകളിൽ  നല്ലവണ്ണം  പ്രാവിണ്യം നേടിയിട്ടുണ്ട്.  ഒരു നേതാവിനുവേണ്ട എല്ലാ ഗുണങ്ങളും അദ്ദേഹത്തിൽ സമ്പുഷ്ടമായുണ്ട്. അതിനായി രാവുംപകലും ഒന്നുപോലെ   കടന്നുവന്ന വഴികളിൽക്കൂടി കഠിനമായി അദ്ധ്വാനിക്കുകയും ചെയ്തു.  പ്രധാനമന്ത്രിപദത്തിന്റെ പടിവാതിക്കലെത്താൻ നരേന്ദ്ര മോഡി നീണ്ടയൊരു യാത്ര നടത്തേണ്ടി വന്നു.  ഒരു പൈസാ പോലും പാർട്ടിഫണ്ടിൽനിന്നോ ജനങ്ങളുടെ നികുതിപ്പണത്തിൽനിന്നോ സ്വന്തം പോക്കറ്റിൽ ഇട്ടിട്ടില്ല.


ഭാരതത്തിനു  വെളിയിലുള്ള രാജ്യങ്ങളിൽ മോഡിയുടെ നയങ്ങളേയും വ്യക്തിത്വത്തെപ്പറ്റിയും  വ്യത്യസ്തമായ ഒരു കാഴ്ചപ്പാടാണുള്ളത്.  തിരഞ്ഞെടുപ്പു  വേളകളിൽ അദ്ദേഹം വിദേശനയങ്ങളെപ്പറ്റി അധികമൊന്നും സംസാരിച്ചില്ല.  ഇന്ത്യയിലെ വോട്ടർമാർ സാധാരണ ഗതിയിൽ  അത്തരം കാര്യങ്ങൾ കാര്യമായി ഗൌനിക്കാറുമില്ല. എന്നാൽ പാരമ്പര്യമായി ബി.ജെ.പി. യെന്നും  കോണ്ഗ്രസിനേക്കാൾ പാകിസ്ഥാന്റെയും കാശ്മീരിന്റെയും  പ്രശ്നങ്ങൾ  വരുമ്പോൾ ശക്തമായ നിലപാടാണ് എടുക്കാറുള്ളത്. വിദേശ മൂലധനം രാജ്യത്ത് സ്വരൂപിക്കാനും 'മോഡിയെക്ണോമിക്സ്' ശ്രമിക്കുമെന്ന് നിരീക്ഷകർ കരുതുന്നു. തിരഞ്ഞെടുപ്പു വേളകളിലും ഇക്കാര്യം അദ്ദേഹം ഊന്നിപ്പറയാറുണ്ടായിരുന്നു. പാക്കിസ്ഥാൻ പ്രധാനമന്ത്രി നവാസ് ഷെരിഫ് അദ്ദേഹത്തെ അഭിനന്ദിക്കുകയും   ഹാർദ്ദമായി ആ രാജ്യം സന്ദർശിക്കാൻ ക്ഷണിക്കുകയും ചെയ്തു. പുതിയ ഭരണസംവിധാനത്തിൽ   രണ്ട് ന്യൂക്ലീയർ രാജ്യങ്ങൾ തമ്മിൽ  വിദ്വേഷം മറന്ന് പരസ്പരം  വിട്ടുവീഴ്ച്ചകളിൽക്കൂടി സമാധാനം  സൃഷ്ടിക്കുമെന്നും പ്രതീക്ഷകൾ നല്കുന്നു.       


ബുഷിന്റെ കാലംമുതൽ അമേരിക്കയിൽ മാറിമാറി വന്ന ഭരണകൂടങ്ങൾ മോഡിയിലെന്നും കുറ്റാരോപണങ്ങൾ നടത്തിയിട്ടേയുള്ളൂ.  അമേരിക്കാ  സന്ദർശിക്കണമെന്ന് ആഗ്രഹിച്ചിരുന്ന കാലങ്ങളിലെല്ലാം അതാതുകാലത്തെ  സർക്കാരുകൾ അദ്ദേഹത്തിനെന്നും വിസാ നിഷേധിക്കുകയാണുണ്ടായത്. ഗുജറാത്ത് കൂട്ടമരണങ്ങൾക്ക് പൂർണ്ണ ഉത്തരവാദിത്വം മോഡിയിൽ പഴിചാരാൻ  എതിരാളികളെന്നും  ശ്രമിക്കുമായിരുന്നു. ഒരു മുസ്ലിം വിരോധിയെന്ന കാഴ്ച്ചപ്പാടുണ്ടാക്കാനും ലോകം മുഴുവനുള്ള മാധ്യമങ്ങളും ശ്രമിച്ചുകൊണ്ടിരുന്നു. സുപ്രീംകോടതി ഇന്ത്യയിലെ പ്രമുഖരായ നിയമജ്ഞരെ ഉൾപ്പെടുത്തി ഒരു കമ്മിറ്റിയുണ്ടാക്കി  ഗുജറാത്തിലെ  കൂട്ടക്കൊലകളെപ്പറ്റി ഒരു അന്വേഷണം നടത്തിയിരുന്നു. മോഡിയുടെ പേരിലുള്ള  ആരോപണങ്ങൾ അടിസ്ഥാനരഹിതമെന്നും കൂട്ടക്കൊലയിൽ മോഡിക്ക് യാതൊരു പങ്കില്ലെന്നും അന്വേഷണ കമ്മിറ്റി കണ്ടെത്തിയിട്ടും എതിരാളികളുടെ നാവടയ്ക്കുവാൻ സാധിച്ചില്ല.


വിദേശനയങ്ങളെക്കാളും ദേശീയമായ കാഴ്ചപ്പാടുകൾക്കാണ് കൂടുതലും നരേന്ദ്ര മോഡി   പ്രാധാന്യം കൊടുത്തിരിക്കുന്നത്. 2000 മുതൽ 2010 വരെയുള്ള കാലയളവുകൾ നോക്കുകയാണെങ്കിലും ശരാശരി ഇന്ത്യയുടെ ദേശീയ വരുമാനം ഒരോ വർഷവും  9 ശതമാനം വെച്ച് കൂടുന്നുണ്ടായിരുന്നു.   ജനസംഖ്യാ നിരക്ക് വർദ്ധിക്കുന്നതോടൊപ്പം  ഈ കാലയളവുകളിൽ ജനങ്ങളുടെ ആളോഹരി വരുമാനവും  ഇരട്ടിച്ചതായി സ്ഥിതിവിവരക്കണക്കുകൾ വെളിപ്പെടുത്തുന്നു. 2013 ആയപ്പോഴേക്കും ഇന്ത്യയുടെ സാമ്പത്തിക വളർച്ച താഴോട്ടാവുകയും വിലപ്പെരുപ്പം വർദ്ധിക്കുകയും ചെയ്തു. ആഗോള മാക്രോ ഇക്കണോമിക്സ് ഇന്ത്യൻ സാമ്പത്തിക വ്യവസ്ഥയേയും ബാധിച്ചുവെന്നതാണ് സത്യം. പ്രതിപക്ഷങ്ങൾ അതിൽ മുതലെടുക്കുകയും ചെയ്തു. മോഡിയുടെ വൻ വിജയത്തിനും ഇതൊരു കാരണമായി നിരീക്ഷകർ വിലയിരുത്തുന്നു. എന്നിരുന്നാലും   ഇന്ത്യയെ സംബന്ധിച്ച് കഴിഞ്ഞുപോയത് സാമ്പത്തികനേട്ടങ്ങളുടെ അത്ഭുതപരമ്പരകൾ  സൃഷ്ടിച്ച കാലങ്ങളായിരുന്നു . എന്നാൽ 2013-14 കാലങ്ങളിൽ ദേശീയ വളർച്ച 5 ശതമാനമായി ചുരുങ്ങി. തിരഞ്ഞെടുപ്പു  വേളകളിൽ രാഷ്ട്രത്തിന്റെ സാമ്പത്തിക ആന്തരികഘടകങ്ങൾക്ക് സമൂലം മാറ്റം വരുത്തുമെന്നും മോഡിയുടെ വാഗ്ദാനങ്ങളിൽ ഉണ്ടായിരുന്നു. മോഡിതരംഗങ്ങളുടെ  ശുഭാബ്ദിവേളയിൽ  അന്നേ ദിവസം ഇന്ത്യയിൽ ഓഹരികളുടെ വില വർദ്ധിക്കുകയും ചെയ്തു.     


മോഡിയുടെ ഉദാരവല്ക്കരണ സാമ്പത്തികശാസ്ത്രം ഭാരതവും ലോകം മുഴുവനും ഇന്ന് ഉറ്റു നോക്കിക്കൊണ്ടിരിക്കുകയാണ്. ഗുജറാത്തിൽ നടപ്പാക്കിയപോലെ 'മോഡിസാമ്പത്തികം' ഭാരതത്തിന്റെ മറ്റു സംസ്ഥാനങ്ങളിൽ വ്യാപിപ്പിക്കുകയെന്നത് അദ്ദേഹത്തെ സംബന്ധിച്ച് വെല്ലുവിളികളായിരിക്കും. മോഡിയുടെ അജണ്ടാകൾ നടപ്പിലാക്കാൻ ഏകപാർട്ടി ഭരണസംവിധാനം കഴിഞ്ഞ 30 വർഷങ്ങൾകൂടി ഭാരതത്തിൽ നിലവിൽവന്നതും ആശ്വാസകരമാണ്. കുത്തഴിഞ്ഞ കഴിഞ്ഞകാല ഭരണസംവിധാനങ്ങളെ ഇല്ലാതാക്കി മോഡിയെന്നും  പുത്തനായ മാറ്റങ്ങൾക്കായി ആഹ്വാനം ചെയ്യുന്നുണ്ടായിരുന്നു.


സത്യവും നീതിയുമുള്ള അഴിമതിരഹിതനായ രാഷ്ട്രീയക്കാരനാണ് മോഡിയെങ്കിലും അദ്ദേഹത്തിൻറെ കർമ്മരംഗങ്ങളിൽ വിമർശകർ ധാരാളമുണ്ട്. എന്നിരുന്നാലും ശതൃക്കൾപോലും അദ്ദേഹം നല്ലൊരു ഭരണാധികാരിയെന്ന് സമ്മതിക്കും.  ജോലികാര്യങ്ങളിൽ കൃത്യനിഷ്ഠ പാലിക്കുന്ന വലിയ കർശനക്കാരനാണ്.   സദാ ഭയത്തോടെയാണ് കൂടെയുള്ളവർ ജോലി ചെയ്യുന്നത്. ഇങ്ങനെയുള്ള വ്യക്തിഗുണങ്ങളിലും അദ്ദേഹം ചുറ്റുമുള്ള എല്ലാ ജനങ്ങൾക്കും സുസമ്മതനാണ്. വിശ്രമമില്ലാതെ ജോലിചെയ്യുന്ന ഈ കഠിനാധ്വാനി വൈകാരികമായ ജനസമ്പർക്ക പരിപാടികളിൽ എന്നും പുറകോട്ടായിരുന്നു. പകരം 2001 മുതൽ ഗുജറാത്തിനു വന്നിരിക്കുന്ന നേട്ടങ്ങളാണ് അദ്ദേഹത്തിന് കൂടുതലായും പറയാനുള്ളത്. ഏതാണ്ട് 60 മില്ല്യൻ ജനങ്ങളുള്ള ഗുജറാത്ത് സംസ്ഥാനം ചൈനയോടൊപ്പംതന്നെ മറ്റ് സംസ്ഥാനങ്ങൾക്ക് മാതൃകയാകത്തക്കവണ്ണം. പുരോഗമിച്ചിട്ടുണ്ട്. 


'ഗുജറാത്ത് മോഡൽ' എന്ന  മോഡിപദംകൊണ്ടുദ്ദേശിക്കുന്നത് രാജ്യത്തിനുള്ളിലെ ഉപഭോഗവസ്തുക്കളുടെ ആന്തരിക ധനതത്ത്വശാസ്ത്ര പുരോഗതിയെന്നാണ്. നാഗരികത പടുത്തുയർത്തുക, അധികാര വികേന്ദ്രീകരണം നടത്തി ചുവപ്പുനാടകളെ ഇല്ലാതാക്കുക, ആഗോള വ്യവസാവൽക്കരണത്തിൽ രാജ്യത്തെ പ്രമുഖ ഗണങ്ങളിലെത്തിക്കുക മുതലായവകൾ രാഷ്ട്രപുഷ്ടിയുടെ ഘടകങ്ങളാണ്.  മോഡിയുടെ പാർട്ടി തിരഞ്ഞെടുപ്പിൽ മഹാഭൂരിപക്ഷം നേടിയയുടൻ ഇന്ത്യൻസ്റ്റോക്കുകൾ പതിനെട്ടു ശതമാനമുയർന്നതും മോഡിയിൽ ഇന്ത്യയുടെ സ്വപ്നങ്ങളെപ്പറ്റിയുള്ള പ്രതീക്ഷകളാണ് സ്പുരിക്കുന്നത്.   ഇന്ത്യയുടെ വ്യവസായ രാജാവായ ടാറ്റായുടെ  കാർനിർമ്മാണ ഫാക്ടറി ഗുജറാത്തിൽ മാറ്റപ്പെട്ടതും മോഡിയുടെ ഇടപെടൽ കാരണമായിരുന്നു.        


'ഗുജറാത്ത് മോഡ'ലെന്നത് പൊലിപ്പിച്ചു പറയുന്നതെന്നും അദ്ദേഹത്തിൻറെ രാഷ്ട്രീയ പ്രതിയോഗികൾ വിമർശിക്കാറുണ്ട്. ഗുജറാത്തിലെ സാമ്പത്തിക പുരോഗതിയിൽ ഉള്ളവനും ഇല്ലാത്തവനും തമ്മിലുള്ള അന്തരം വർദ്ധിച്ചതും ചൂണ്ടികാണിക്കുന്നു.  സാധാരണക്കാരുടെ നിലവാരങ്ങളിൽ കാര്യമായ മാറ്റങ്ങളൊന്നും സംഭവിച്ചില്ലന്നും പറയുന്നു.  സാമ്പത്തിക സുരഷിതത്വം നേടിയവർക്കുമാത്രം വിദ്യാഭ്യാസത്തിലും വ്യവസായ സംരംഭങ്ങളിലും പുരോഗതിയുണ്ടായി. ദരിദ്രർ വീണ്ടും ദരിദ്രരായ സ്ഥിതിവിശേഷമാണ് മോഡി ധനതത്ത്വശാസ്ത്രത്തിൽ ഇന്നുമവിടെ പ്രതിഫലിക്കുന്നത്.  മോഡിയുടെ വിദേശകോർപ്പറേറ്റ് പദ്ധതികൾ സ്വദേശവല്ക്കരണ സാമൂഹിക വ്യവസ്ഥയെ തകിടം മറിക്കുന്നതുമൂലം രാജ്യത്തിനുള്ളിൽ വ്യവസായ അസമത്വങ്ങളും അസ്വസ്ഥതകളും അസമാധാനവും സൃഷ്ടിക്കുമെന്ന് രാഷ്ട്രീയ പ്രതിയോഗികൾ ആരോപിക്കുന്നു. മോഡിയുടെ പദ്ധതികളിൽ ശുഭാപ്തി വിശ്വാസം കാണാതെ വലിയൊരു ജനം അതൃപ്തരായിരിക്കും.  വ്യവസായസ്ഥാപനങ്ങൾക്ക് സ്ഥലം വിട്ടുകൊടുക്കാൻ ജനം സമ്മതിച്ചെന്നിരിക്കില്ല.   അവിടെ സാമൂഹിക അരാജകത്വവും ഉണ്ടാകാം.  ഭാരതം മുഴുവൻ വ്യവസായവൽക്കരിക്കുന്നത് പ്രയാസമുള്ള വിഷയമല്ലെന്ന്  മോഡിയും  കരുതുന്നു. 


തീരുമാനങ്ങളെടുക്കുന്നതിൽ മോഡി പലപ്പോഴും ഏകാധിപതിയെപ്പോലെയാണ്.  ആരും ചോദ്യം ചെയ്യപ്പെടാത്ത ചൈനാമോഡൽ തീരുമാനങ്ങൾ അദ്ദേഹം എടുക്കുമ്പോൾ ജനാധിപത്യ മൂല്യങ്ങളെ ബലികഴിക്കേണ്ടിയും വരുന്നു.  ഓഫീസുകളിലെ ചുവപ്പുനാടകളോട് അദ്ദേഹം പറയും " ഇവിടം ബട്ടനമർത്തി ജോലി ചെയ്യുന്നവിടമല്ല, ജനങ്ങളുമായി ഒത്തൊരുമിച്ച് ജോലി ചെയ്യൂ"  ഇത്തരം ചിന്തകൾ പ്രധാന മന്ത്രിയെന്ന നിലയിൽ നടപ്പാക്കുക എളുപ്പമായിരിക്കില്ല. ആ സ്ഥാനം വഹിക്കുമ്പോൾ ആയിരക്കണക്കിന് ജനങ്ങളുടെ നൂറായിരം പ്രശ്നങ്ങൾ കൈകാര്യം ചെയ്യേണ്ടി വരും. മോഡിയുടെ പദ്ധതികൾപോലെ ജനാധിപത്യ ഇന്ത്യയെ ചൈനയെപ്പോലെ മാറ്റം വരുത്തുകയെന്നത് അപ്രായോഗികമാണ്. അങ്ങനെയുള്ള ചിന്താഗതികൾ ഇന്ദിരാ ഗാന്ധിയുടെ അടിയന്തിരാവസ്ഥക്ക് സമമാകും.   


നരേന്ദ്ര മോഡി ഇന്ത്യയെ ശാക്തികചേരിയിലുള്ള രാഷ്ട്രങ്ങളിൽ മുമ്പനായി മാറ്റാനുള്ള സ്വപ്നത്തിലാണ്. ഉത്ഭാതനത്തിലും ശാസ്ത്ര സാങ്കേതിക വിദ്യകളിലും ഇന്ത്യ സ്വയംപര്യാപ്തി നേടണമെന്നും ആഗ്രഹിക്കുന്നു. ഭരണ സംവിധാനങ്ങളിൽ ലക്ഷ്യബോധത്തോടെയുള്ള യാത്രയായിരുന്നു എന്നുമദ്ദേഹം പിന്തുടർന്നിരുന്നത്. നൂറുകണക്കിന് ഇന്ത്യയിലെ പട്ടണങ്ങൾ നവീകരിക്കാനുള്ള പദ്ധതികളും ആവിഷ്കരിച്ചിട്ടുണ്ട്. ഗംഗാനദിയിലെ അഴുക്കുചാലുകൾ ഇല്ലാതാക്കി വെള്ളം ശുദ്ധീകരിക്കാനും പ്രകൃതിയെ രക്ഷിക്കാനും പരിപാടിയിടുന്നു. ഗുജറാത്തിലെ അദ്ദേഹത്തിന്റെ ഭരണം പൊതുവേ  അഴിമതിരഹിതമെന്ന് കണക്കാക്കുന്നു. അതേ നയം തന്നെ ഇന്ത്യാ മുഴുവനായി നടപ്പിലാക്കുമെന്നും അദ്ദേഹം വിശ്വസിക്കുന്നു.


മോഡിയിൽ പ്രതീക്ഷകളേറെയുണ്ടെങ്കിലും വ്യക്തിപരമായ നിലയിൽ അദ്ദേഹത്തിൻറെ പുരോഗമനാശയങ്ങൾക്കെതിരെ കാർമേഘങ്ങളും പടർന്നിട്ടുണ്ട്.  ഹിന്ദുത്വാ പ്രചരിപ്പിക്കുന്ന ഹിന്ദുദേശീയവാദിയെന്ന നിലയിൽ  അദ്ദേഹത്തെ അറിയപ്പെടുന്നു. 2002 ലെ മുസ്ലീം കൂട്ടകൊലകളിലെ മാനഹാനി ഇന്നും അദ്ദേഹത്തിൽ പഴിചാരുന്നുണ്ട്. സുപ്രീം കോടതി,  കേസുകളിൽനിന്ന് വിമുക്തനാക്കിയെങ്കിലും അതെ ചൊല്ലിയുള്ള ചോദ്യശരങ്ങൾക്ക് വ്യക്തമായ ഉത്തരം നല്കാതെ  അദ്ദേഹമെന്നും നിശബ്ദത പാലിക്കുന്നതും രാഷ്ട്രീയ പ്രതിയോഗികൾ മുതലെടുത്തിരുന്നു. 


എന്തെല്ലാം കുറവുകളുണ്ടെങ്കിലും നരേന്ദ്ര മോഡി നല്ലയൊരു ഭരണാധികാരിയെന്ന് പ്രതിയോഗികൾപോലും പറയും. ഇന്ന് ഗുജറാത്തിൽ മാത്രമല്ല ഭാരതം മുഴുവനും അദ്ദേഹത്തെ ജനം ആദരിക്കുന്നു. മൂന്നു പ്രാവിശ്യം ഗുജറാത്തിന്റെ മുഖ്യമന്ത്രിക്കസേര നിലനിർത്തിക്കൊണ്ട് ഏകനായ പടയാളിയെപ്പോലെ അദ്ദേഹം പൊരുതി. ഗുജറാത്തിലെ 'രാജീവ് ഗാന്ധി ഫൗണ്ടേഷൻ' ഗവേഷണമനുസരിച്ച് മോഡിയുടെ ഗുജറാത്തിനെ സാമ്പത്തിക മേഖലയിലുള്ള ഏറ്റവും  അഭിവൃത്തി പ്രാപിച്ച സംസ്ഥാനമെന്ന് രേഖപ്പെടുത്തിയിരിക്കുന്നു.  ലോകസഭയിൽ ഒറ്റയ്ക്ക് ഭരിക്കാനും ഭൂരിപക്ഷമുള്ളതുകൊണ്ട്  ശക്തമായ തീരുമാനങ്ങളെടുക്കാനും പ്രയാസമുണ്ടാവില്ല.   ജനങ്ങളുടെ ക്ഷേമത്തിനായി പ്രയത്നിക്കുമ്പോൾ  പ്രധാനമന്ത്രിയെന്ന നിലയിൽ വിഭാഗിയ മതചിന്തകൾ കടന്നുവരാനും സാധ്യതയില്ല.  മതരാഷ്ട്രീയത്തിലും മതന്യൂനപക്ഷ രാഷ്ട്രീയത്തിലും ഉപരിയായിമാത്രമേ വൈരുദ്ധ്യങ്ങളും വൈവിധ്യങ്ങളും നിറഞ്ഞ രാജ്യമായ ഇന്ത്യയുടെ പ്രധാനമന്ത്രിക്ക് ഇനിമേൽ ചിന്തിക്കാൻ സാധിക്കുകയുള്ളൂ.

 

 

 



മോഡിയും അമ്മയും



 

മദ്ധ്യകേരള മഹായിടവക ബിഷപ്പ് തോമസ്‌ കെ ഉമ്മനും സി.എസ.ഐ. യുടെ ചരിത്രവും, അവലോകനം

By ജോസഫ്‌ പടന്നമാക്കൽ

റവ. ബിഷപ്പ് തോമസ്‌ കെ ഉമ്മൻ 1953 നവംബർ, ഇരുപത്തിയൊമ്പതാം തിയതി ആലപ്പുഴ ജില്ലയിലുള്ള തലവടിയിൽ പരേതരായ കെ.സി.ഉമ്മന്റെയും മറിയാമ്മയുടെയും മകനായി ഒരു കൃഷി കുടുംബത്തിൽ ജനിച്ചു. തലവടിയിൽ  ഇദ്ദേഹത്തിന്റെ കുടുംബം തലമുറകളായി  കാഞ്ഞിരപ്പള്ളിയെന്ന വീട്ടുപേരിൽ അറിയപ്പെടുന്നു. തലവടിക്കരയിലുള്ള നൂറുകണക്കിന് കാഞ്ഞിരപ്പള്ളി കുടുംബങ്ങളിൽ  കത്തോലിക്കാ, യാക്കൊബാ, ഓർത്തോഡോക്സ്, സി.എസ.ഐ. എന്നിങ്ങനെ എല്ലാ സഭാ വിഭാഗക്കാരെയും കാണാം.


പൂർവികരെ തേടിയുള്ള വംശാവലി ചരിത്രങ്ങൾ  ബിബ്ലിക്കൽക്കാലം മുതലുണ്ട്. പുതിയനിയമത്തിൽ  ദാവീദിന്റെ ഗോത്രങ്ങൾമുതൽ യേശുവിന്റെ വംശാവലിവരെ വിവരിച്ചിട്ടുണ്ട്. ബിഷപ്പ് തോമസ്‌ ഉമ്മന്റെയും വംശാവലിയെ സംബന്ധിച്ച വിവരങ്ങൾ  ചുരുക്കമായി വിവരിക്കാം. കാരണം, പൂർവിക തലമുറകളെ തേടി അദ്ദേഹവും കുടുംബചരിത്രം രചിച്ചും കുടുംബയോഗങ്ങൾ വിളിച്ചുകൂട്ടിയും
നാടുമുഴുവൻ സഞ്ചരിച്ചതായി അറിയാം.


തലവടിയിലുള്ള 'കാഞ്ഞിരപ്പള്ളി കുടുംബം' നിലയ്ക്കൽ നിന്നും കോട്ടയം ജില്ലയിലുള്ള കാഞ്ഞിരപ്പള്ളിയിൽ കുടിയേറിയ പൂർവിക കുടുംബങ്ങളിൽനിന്ന് പതിനഞ്ചാം നൂറ്റാണ്ടിൽ പിരിഞ്ഞുപോയവരാണ്.  പൂർവ്വകുടുംബത്തെപ്പറ്റി ഏകദേശം 200 കൊല്ലം മുമ്പ് തമിഴിന്റെ ഒരു ഉപഭാഷയായ നാനംമോനത്തിൽ,  താളിയോല ഗ്രന്ഥത്തിൽ രചിച്ചത് ശ്രീ പങ്കപ്പാട്ട് തങ്കപ്പൻപിള്ള തർജ്ജമ ചെയ്യുകയുണ്ടായി. 1913-ൽ നസ്രാണി ദീപികയിൽ അത് പ്രസിദ്ധീകരിക്കുകയും പിന്നീട് പരേതനായ കാഞ്ഞിരപ്പള്ളി കല്ലറക്കൽ കുരുവിള വർക്കി കാഞ്ഞിരപ്പള്ളി ദേശചരിത്രത്തിൽ ചേർക്കുകയും ചെയ്തു. 

ചരിത്രം തുടങ്ങുന്നതിങ്ങനെ, "ചായൽപ്പള്ളിയാകുന്ന നിലയ്ക്കൽപ്പള്ളി കൈക്കാരനായിട്ട് പൊറുത്തുവരുന്ന കാലങ്ങളിൽ ജന്തുക്കളുടെ ഉപദ്രവം കൊണ്ട് തൊമ്മിയെന്ന കാരണവർ കുടുംബങ്ങൾ സഹിതം നിലയ്ക്കൽനിന്നു പലായനം ചെയ്ത്‌ കാഞ്ഞിരപ്പള്ളിയിൽ വന്നു പാർത്തു." നിലയ്ക്കൽ നിന്ന് ഒരു തൊമ്മി കാരണവരിൽ നിന്ന് തുടങ്ങി പതിമൂന്നു തലമുറകളുടെ ചരിത്രം ഈ കൃതിയിൽ മുറിയാതെയുണ്ട്. അവരിൽ അഞ്ചാം തലമുറക്കാരൻ  തൊമ്മിയാണ് കാഞ്ഞിരപ്പള്ളി പഴയപള്ളി സ്ഥാപിച്ചത്. "പള്ളിയ്ക്ക് സ്ഥാനം നിർണ്ണയിക്കാനായി തെക്കുകൂർ രാജാവ് ഇടത്തിപ്പറമ്പിൽ കൊട്ടാരത്തിൽനിന്നും എഴുന്നള്ളിവന്ന് കാഞ്ഞിരമരത്തിന്റെ ശിഖരം മുറിച്ച് തിരുമേനി തന്നെ തന്റെ തൃക്കൈകൊണ്ട്  അളന്ന് മംഗാശ്ശേരി പുരയിടത്തിനു സമീപം കാവു നിന്ന സ്ഥലത്ത് പള്ളിയ്ക്ക് സ്ഥാനം തീർപ്പ് കല്പ്പിച്ചു."

"അതിനുശേഷം പെരിയ(വലിയ)വീടെന്നു പറയുന്ന വീടും മരപ്പണിയായ പള്ളിയും വെയ്പ്പിച്ചു. മാർ യൌസേപ്പ് മെത്രാന്റെ അനുവാദത്താൽ പള്ളികൂദാശ ചെയ്ത് ഉമ്മയുടെ (യേശുവിന്റെ അമ്മ) രൂപവും വെച്ച് കുർബാന ചൊല്ലിച്ചു. (കൊല്ലവർഷം 625, ചിങ്ങം 21; എ.ഡി. 1449 സെപ്റ്റംബർ 8). അഞ്ചാം തലമുറക്കാരൻ തൊമ്മിക്ക് രണ്ടു മക്കൾ. മൂത്ത മകൻ പട്ടമേറ്റു. രണ്ടാമത്തെ മകൻ കുഞ്ഞാക്കോയ്ക്ക് തൊമ്മിയെന്ന മകനുണ്ടായി. തൊമ്മി മുണ്ടിയപ്പള്ളിയിൽനിന്ന് വിവാഹം കഴിച്ച് തൊമ്മി, കുഞ്ഞാക്കോ, പുന്നൂസ് എന്ന് മൂന്നു മക്കൾ. കുഞ്ഞാക്കോയെന്ന മകൻ നിരണത്ത് പട്ടമുക്കിൽ നിന്ന് വിവാഹം കഴിച്ച് തൊമ്മിയെന്നും കുഞ്ഞാക്കൊയെന്നും മക്കൾ രണ്ടു പേർ. ഇവരിൽ തൊമ്മി കടശനാട്ടു നിന്നും വിവാഹം ചെയ്ത് വലിയവീട്ടിൽ താമസിച്ചു. രണ്ടാമൻ കുഞ്ഞാക്കോ ജേഷ്ഠനോട് പിണങ്ങി തലവടിയിൽപ്പോയി കാഞ്ഞിരപ്പള്ളിയെന്ന വീട്ടുപെരിൽ ഒരു ശാഖ സ്ഥാപിച്ചു." ജന്മനാടിന്റെ പേരിൽ തലവടി പ്രദേശങ്ങളിൽ കാഞ്ഞിരപ്പള്ളിയെന്നു കാണുന്ന കുടുംബങ്ങളുടെ മൂലകുടുംബം വലിയ വീടാണ്. കാഞ്ഞിരപ്പള്ളിയിലെ പടന്നമാക്കൽ, കടമപ്പുഴ, കുരിശും മൂട്ടിൽ, (തീമ്പള്ളി, മണ്ണിൽപ്പറമ്പിൽ) കരിപ്പാപറമ്പിൽ, കിഴക്കേത്തലയ്ക്കൽ എന്നീ കുടുംബങ്ങൾ മൂലകുടുംബത്തിൽ നിന്നും പിരിഞ്ഞു പോയതായി  താളിയോല ഗ്രന്ഥത്തിൽ രചിച്ച കൃതിയിലുണ്ട്. (റഫ. കാഞ്ഞിരപ്പള്ളി ചരിത്രം, 1952)    

ബിഷപ്പ് ഉമ്മൻ തോമസ്‌ കാഞ്ഞിരപ്പള്ളി, ചങ്ങനാശേരി എൻ.എസ്.എസ് കോളേജിൽ വിദ്യാഭ്യാസം നടത്തിയ ശേഷം മദ്ധ്യപ്രദേശിലെ ജബൽപ്പൂരുള്ള  ലീയൊനാർഡ്  തീയോളജിക്കൽ കോളേജിൽ നിന്ന്  ദൈവശാസ്ത്രത്തിൽ ഡിഗ്രിയും പൂനാ ബിബ്ലിക്കൽ സെമിനാരിയിൽനിന്ന് ബിരുദാനന്തര ഡിഗ്രിയും നേടി. 1982-ൽ സഭയുടെ ഡീക്കനായി. അതിനടുത്ത വർഷം തന്നെ പ്രെസ്ബൈറ്ററായി സഭാചുമതലകളിൽ ഏർപ്പെട്ടു.  2011 ഫെബ്രുവരിയിൽ ചർച്ച് ഓഫ് സൌത്ത് ഇന്ത്യയുടെ മദ്ധ്യകേരള രൂപതയിൽ ബിഷപ്പായി സ്ഥാനം ലഭിച്ചു. കോട്ടയം ഹോളി ട്രിനിറ്റി കത്തീഡ്രലിൽ സി.എസ.ഐ (ചർച്ച് ഓഫ് സൌത്ത് ഇന്ത്യാ) യുടെ പന്ത്രണ്ടാമത്തെ  ബിഷപ്പായി വാഴിച്ചു. സഭയുടെ മോഡറെറ്ററായ ബിഷപ്പ് വസന്ത കുമാറിന്റെ കാർമ്മികത്വത്തിലായിരുന്നു  സ്ഥാനാരോഹണം. 2014 ജനുവരി പതിനൊന്നാംതിയതി അദ്ദേഹത്തെ വിജയവാഡായിൽ ചർച്ച് ഓഫ് സൌത്ത് ഇന്ത്യയുടെ സിനഡിൽ വെച്ച് ഡെപ്യൂട്ടി മോഡറെറ്ററായി തിരഞ്ഞെടുത്തു.

ബിഷപ്പ് തോമസ്‌ ഉമ്മൻ വിവാഹം ചെയ്തത് ഡോ. സൂസൻ തോമസിനെയാണ്. ആത്മീയമായ ഒരു കുടുംബാന്തരീക്ഷമാണ് ഈ ഭവനത്തിലുള്ളത്. സൂസൻ തോമസിന് പൂനാ ബിബ്ലിക്കൽ സെമിനാരിയിൽ നിന്ന് ബിരുദാനന്തര തീയോളജിയിൽ  ഡിഗ്രിയുമുണ്ട്. സൂസൻന്റെ കുടുംബം നെടുങ്കപ്പള്ളി, ചവണിക്കാമണ്ണിൽ എന്നറിയപ്പെടുന്നു.  ദൈവശാസ്ത്രത്തിൽ ലക്ചറർ  ആണ്. സോഷ്യൽ വർക്കറായും ജോലി ചെയ്തിട്ടുണ്ട്. ഈ ദമ്പതികൾക്ക് സോണിയും സൻറ്റീനായും രണ്ടു മക്കൾ, മരുമക്കൾ ആഷായും ഡോ. ജീനും.

 

ബിഷപ്പ് ഉമ്മൻ തോമസ്‌ ന്യൂയോർക്കിൽ സേവനം ചെയ്യവേ നോർമാൻ ഗോട്ട് വാൾഡിനു കീഴിൽ  ദൈവശാസ്ത്ര പഠനത്തിൽ ഗവേഷണം നടത്തിയിരുന്നു. 1994-ൽ  അദ്ദേഹം ന്യൂയോർക്കിലെ ചർച്ച്  ഓഫ് ഇന്ത്യയുടെ വികാരിയായിരുന്നു. 1982 ലാണ് ഈ പള്ളി സ്ഥാപിച്ചത്.

 

സഭയുടെ അവകാശങ്ങൾ പങ്കുപറ്റാൻ രാഷ്ട്രീയത്തിലും സഭാമക്കൾ ഇടപെടണമെന്നാണ് അദ്ദേഹത്തിൻറെ അഭിപ്രായം. രാജ്യത്തിലെ പൌരന്മാർക്കായി ജീവിക്കുകയെന്നത് രാഷ്ട്രത്തിന്റെയും സഭയുടെയും  ചുമതലയായി അദ്ദേഹം കരുതുന്നു. ജനങ്ങളിൽ സമാധാനം തകരുന്നുവെങ്കിൽ രാഷ്ട്രീയപാർട്ടികളെക്കാൾ
കൂടുതൽ സഭ ജനങ്ങളോടൊപ്പം നിൽക്കണമെന്ന കാഴ്ചപ്പാടും അദ്ദേഹത്തിനുണ്ട്.  നാടിനുപദ്രവം നല്കുന്ന രാഷ്ട്രീയ ശക്തികൾക്കെതിരെ പോരാടാൻ കൂടെകൂടെ ആഹ്വാനം ചെയ്യാറുണ്ട്. മാരാമണ്‍ കണ്‍വൻഷനിൽ അദ്ദേഹം  നല്ലൊരു  വാഗ്മിയും കൂടിയാണ്.

  

ഇന്ത്യയ്ക്ക് സ്വാതന്ത്ര്യം ലഭിക്കുന്നതിനുമുമ്പ് ചർച്ച് ഓഫ് ഇംഗ്ലണ്ട് എന്ന പേരിലായിരുന്നു ഈ സഭ അറിയപ്പെട്ടിരുന്നത്. സ്വാതന്ത്ര്യം ലഭിച്ച് ഒരു മാസം കഴിഞ്ഞയുടൻ സഭയുടെ പേര് മാറ്റി ' ചർച്ച് ഓഫ് ഇന്ത്യാ' (സി.എസ.ഐ) എന്നാക്കി. ഭാരതത്തിന്റെ ദേശീയ പുഷ്പമായ താമരയാണ് കുരിശിനോടുകൂടി അടയാളമായി സഭ സ്വീകരിച്ചിരിക്കുന്നത്. തെക്കേ ഇന്ത്യയിലെ ആംഗ്ലിക്കൻ നവീകരണ സഭകളുടെ യൂണിയനാണ് സി.എസ് .ഐ. സഭകൾ. പ്രൊട്ടസ്റ്റന്റ്  സഭകളും അതിനോടനുബന്ധിച്ച മറ്റു സഭകളും  ഒന്നായി അറിയപ്പെടുന്ന ഈ സഭയിൽ അഞ്ചുമില്ലിയനിൽപ്പരം വിശ്വാസികളുണ്ട്‌.  കത്തോലിക്കാസഭ കഴിഞ്ഞാൽ അംഗസംഖ്യയിൽ ഇന്ത്യയിൽ ഏറ്റവും വലിയ സഭയാണ് സി.എസ്..ഐ.  കത്തോലിക്കാസഭയിലെ പാരമ്പര്യ തത്ത്വങ്ങളെക്കാളും യേശുവിന്റെ വചനങ്ങളിലാണ് സ്.എസ.ഐ സഭ പ്രാധാന്യം കല്പ്പിച്ചിരിക്കുന്നത്. യോഹന്നാൻ പതിനേഴാം അദ്ധ്യായം ഇരുപത്തിയൊന്നാം വാക്യം സഭയുടെ പ്രതിച്ഛായ ഉണർത്തുന്ന ആപ്ത വചനമായി സഭ കരുതുന്നു. "അവരെല്ലാവരും ഒന്നായിരിക്കാൻ വേണ്ടി, പിതാവേ അങ്ങ് എന്നിലും ഞാൻ അങ്ങയിലും ആയിരിക്കുമ്പോലെ അവരും നമ്മിൽ ആയിരിക്കുന്നതിനും അങ്ങനെ അവിടുന്ന് എന്നെ അയച്ചുവെന്നു ലോകം അറിയുന്നതിനുവേണ്ടി ഞാൻ പ്രാർഥിക്കുന്നു". "അവരെല്ലാവരും ഒന്നായിരിക്കാൻ വേണ്ടി " എന്ന വചനം  സഭയുടെ പ്രാമാണിക സിദ്ധാന്തവും മുഖമുദ്രയുമാണ്.

 

 ഏ.ഡി. 1600-ൽ ബ്രിട്ടനിൽ ഒന്നാം എലിസബത്ത്  രാജ്ഞി ഭരിച്ചിരുന്ന കാലം മുതൽ ഇന്ത്യയിൽ ആംഗ്ലിക്കൻ സഭകളുടെ വേരൂകളൂന്നിയിരുന്നു.  ബ്രിട്ടീഷ് മിഷ്യനറിമാർ ഈ രാജ്യത്തുവന്ന് മതപ്രചരണം നടത്തിക്കൊണ്ടിരുന്നു. 1947-ൽ  ഇന്ത്യയ്ക്ക് സ്വാതന്ത്ര്യം നേടി ഒരു മാസം കഴിഞ്ഞ് സെപ്റ്റംബർ ഇരുപത്തിയേഴാം തിയതി മദ്രാസിലെ സെന്റ്‌. ജോർജ് കത്തീഡ്രലിൽ വെച്ച് ആഗ്ലിക്കൻ സഭകളുടെ ഒരു സമ്മേളനം കൂടി.  അന്നത്തെ തീരുമാനമനുസരിച്ച് സഭയ്ക്ക് ചർച്ച് ഓഫ് സൌത്ത്  ഇന്ത്യാ (സി.എസ.ഐ.) എന്നും നാമകരണം നല്കി. ബിഷപ്പ് സി.കെ. ജേക്കബ് ചരിത്ര പ്രസിദ്ധമായ ഈ നവോത്ഥാനസമ്മേളനം ഉത്ഘാടനം ചെയ്തു.  എപ്പിസ്ക്കൊപ്പൽകാരും അല്ലാത്തവരുമായുള്ള ആംഗ്ലിക്കൽ സഭകളുടെ ഈ ഒത്തുചേരൽ വിവിധ സഭകളിലെ പാരമ്പര്യ വിശ്വാസങ്ങളും ഓരോ  സഭകളും അനുഷ്ടിക്കേണ്ട പൊതുധാരണകളും ഉൾക്കൊണ്ടതായിരുന്നു. ആംഗ്ലിക്കൽ എപ്പിസ്കോപ്പൽ, കോണ്‍ഗ്രിഗേഷൻ, പ്രസ്ബിറ്റേറിയൻ,  മെതഡിസ്റ്റ് എന്നീ സഭകളുടെ കൂട്ടായ്മ അന്നൊരു ചരിത്രനേട്ടമായിരുന്നു.  ഭാരതത്തിന്റെ ദേശീയ പുഷപമായ താമരയും കുരിശും സഭയുടെ അടയാളമായി സ്വീകരിച്ചതും ദേശീയമായ  ഒരു കാഴ്ചപ്പാടും കൂടിയായിരുന്നു.  

റവ. ബിഷപ്പ് തോമസ്‌ ഉമ്മന്റെ ചുമതലയിലുള്ള  മദ്ധ്യകേരള സഭ,  അഖിലേന്ത്യാ സി.എസ്.ഐ സഭകളുടെ 22 രൂപതകളിൽപ്പെട്ട ഒന്നാണ്. അദ്ദേഹം സഭകളുടെ ഡെപ്യൂട്ടി മോഡറേറ്ററും കൂടിയാണ്.  ആംഗളിക്കൻ സഭ സ്വാതന്ത്ര്യം കിട്ടിയശേഷം അതിന്റെ വിദേശനാമം ഉപേക്ഷിച്ച് മദ്ധ്യ തിരുവിതാംകൂർ  രൂപതയെന്നറിയപ്പെട്ടിരുന്നു. പിന്നീട് കേരളം രൂപീകരിച്ചശേഷം മദ്ധ്യകേരള രൂപതയായി പേരിന് മാറ്റം വരുത്തി. രൂപതയുടെ ആസ്ഥാനം കോട്ടയവുമായി സ്ഥാപിച്ചു. 1879-ൽ ആംഗളിക്കൻ സഭയായിരുന്നപ്പോൾ സഭയുടെ ആദ്യത്തെ ബിഷപ്പ് റവ. ജെ.എം. സ്പീച്ചിയായിരുന്നു. 1947-ൽ സി.എസ.ഐ. ആയി പുനവിഷ്ക്കരിച്ച സമയം ബിഷപ്പ് റവ. സി.കെ.ജേക്കബായിരുന്നു സഭയെ നയിച്ചിരുന്നത്. 2011 മുതൽ സഭയുടെ ബിഷപ്പ് റവ. ഉമ്മൻ കെ തോമസാണ്. കോട്ടയം സി.എം.എസ് കോളേജുൾപ്പടെ   രൂപതവക അനേകമനേക സ്കൂളുകളും കോളേജുകളും ഹോസ്പ്പിറ്റലുകളും സഭയുടെ കീഴിൽ  പ്രവർത്തിക്കുന്നു.

 ദൈവത്തിൽ നിന്നകലുമ്പോഴാണ് മനുഷ്യൻ  ധാർമ്മികമായി അധപതിക്കുന്നതെന്ന് ബിഷപ്പ് ഉമ്മന്റെ മാരാമണ്‍ കണ്‍വെൻഷനിലെ പണ്ഡിതോചിതമായ  പ്രസംഗത്തിൽ മുഴങ്ങി കേൾക്കാം. പഴകിയ ചരിത്രത്തിന്റെ താളുകൾ തേടുകയാണെങ്കിലും ഈ അടിസ്ഥാന കാരണം ഓർമ്മിക്കാൻ സാധിക്കുമെന്ന് അദ്ദേഹം പറയുന്നു. അദ്ദേഹം തുടരുന്നു, "ഇങ്ങനെ പോവുകയാണെങ്കിൽ, ധാർമ്മികത തകരുകയാണെങ്കിൽ അടിസ്ഥാനപരമായ ഒരു വിപ്ലവം ഈ രാജ്യത്തുണ്ടാകും. ഏതു ചരിത്രവും പഠിച്ചാൽ രാജ്യം തകരുന്നത്, ഭരണ കേന്ദ്രം തകരുന്നത്, എവിടെയെങ്കിലും മതം തകരുന്നത്, മഹാ യുദ്ധങ്ങൾ പൊട്ടിപ്പുറപ്പെടുന്നതെല്ലാം കാരണം മതം അധപതിച്ചതുകൊണ്ടാണ്. തിരുത്തേണ്ട മതം, തിരുത്തേണ്ട വിശ്വാസി സമൂഹം തിരുത്തുവാൻ പരാജയപ്പെട്ടപ്പോഴാണ് ലോകത്തിലുണ്ടായ വിപ്ലവങ്ങൾക്കും പോരാട്ടങ്ങൾക്കും കാരണമെന്നും മനസിലാക്കുന്നു. അങ്ങനെയെങ്കിൽ വിശ്വാസി സമൂഹമേ ഞാനല്ലെങ്കിൽ അടുത്ത തലമുറ ഒരു വിപ്ലവത്തിന്റെ വക്കത്താണെന്ന് ഓർമ്മിപ്പിക്കട്ടെ. അതുകൊണ്ട് തിന്മ വർധിക്കുന്നത് ദൈവത്തിൽ നിന്നുള്ള അകല്ച്ചയാണ്."മാർത്തോമ്മാസഭയിലെ വലിയ മെത്രാപോലീത്താ  ക്രിസ്റ്റോസം ഉൾപ്പടെയുള്ളയുള്ളവർ അദ്ദേഹത്തിൻറെ പ്രസംഗം നിശബ്ദമായി ശ്രവിക്കുന്നത് യൂടുബിൽ കേൾക്കാം.

 

പ്രസംഗത്തിലെ ഒരു പ്രസക്തഭാഗത്തിൽ പറയുന്നു, " എന്റെ ബാല്യത്തിൽ ഒരു മദ്യപാനിക്ക് കിട്ടിയിരുന്ന പരിഗണന വീടിന്റെ പിന്നാമ്പുറമായിരുന്നു. ഇന്ന് എന്റെ കാലത്തെ മദ്യപാനിയുടെ സ്ഥാനം എന്നോടൊപ്പം വേദിയിലും. വ്യപിചാര കുറ്റത്തിന് ഒരുവളോ ഒരുവനോ പിടിയിലായാൽ അവന് അല്ലെങ്കിൽ അവൾക്ക് അംഗീകാരം കല്പ്പിച്ചിരുന്നത് ഗ്രാമത്തിന്റെ മൂലയിലായിരുന്നു. ഇന്ന് വേദികൾ പങ്കിടുന്നതും വ്യപിചാരിണികൾക്കാണ്. എത്ര ദയനീയമായ ചിത്രം. വീടും നാടും കുടുംബവും നശിക്കുന്ന ഒരു ധാർമ്മിക തകർച്ച നാടിന് ഭവിച്ചുകൊണ്ടിരിക്കുന്നതും ദുഃഖകരമാണ്. അധർമ്മം അധർമ്മമായി കാണാനുള്ള ഒരു പ്രാഥമിക ബോധം നമുക്കുണ്ടാവണം."

 

കേരള രാഷ്ട്രീയവും വിവിധ ക്രിസ്ത്യൻ വിഭാഗങ്ങളും കസ്തൂരി,  ഗാഡ്ഗിൽ റിപ്പോർട്ടുകളെ പ്രതികൂലിച്ചുകൊണ്ട് സമരങ്ങൾ നടത്തുമ്പോൾ ബിഷപ്പ് ഉമ്മൻ വ്യത്യസ്തമായ ഒരു നിലപാട് സ്വീകരിച്ചിരിക്കുന്നതും ചിന്തനീയമാണ്. ഗാഡ്‌ഗിൽ, കസ്തൂരി റിപ്പോർട്ടുകളെ അനുകൂലിച്ചു സംസാരിച്ചുകൊണ്ട് നാം വസിക്കുന്ന പ്രകൃതിയേയും, ഭൂമിയുടെ സമതുലനാവസ്ഥയേയും നമുക്കുവേണ്ടിയും നമ്മുടെ വരാനിരിക്കുന്ന തലമുറകൾക്കു വേണ്ടിയും സംരക്ഷിക്കണമെന്നും അദ്ദേഹം വാദിക്കുന്നു. ഭൂമിയെയൊ, വെള്ളത്തെയോ, വായുവിനെയോ ചൂഷണം ചെയ്യുന്ന ഒരു വ്യവസായ സംരംഭത്തെയും  അംഗീകരിക്കാൻ സാധിക്കില്ലെന്ന് അദ്ദേഹം വ്യക്തമാക്കി. കൃത്രിമമായ കൃഷി ഉത്ഭാദനത്തെയും എതിർക്കുന്നു. രാസവളങ്ങൾ മണ്ണിനെ വിഷമയമുള്ളതാക്കുമെന്നും വിശ്വസിക്കുന്നു. ഗാഡ്ഗിൽ, കസ്തൂരി റിപ്പോർട്ടുകൾ ഇല്ലാതാക്കാനുള്ള ഏതു നീക്കത്തെയും സഭ എതിർക്കുമെന്നും അദ്ദേഹം വ്യക്തമാക്കി. ഗാഡ്ഗിൽ റിപ്പോർട്ടനുസരിച്ചുള്ള  പരിധിയ്ക്കുള്ളിൽ കൃഷിക്കാർക്ക് ഭൂമി പട്ടയം നല്കണമെന്നാണ് അദ്ദേഹത്തിൻറെ വാദം.  

 

കസ്തൂരിരംഗ റിപ്പോർട്ടിനെതിരായ   ഹർത്താലുകളെയും പ്രതിഷേധങ്ങളെയും ശക്തിയായി  എതിർത്തുകൊണ്ടുള്ള നയമാണ് അദ്ദേഹവും സഭയും എടുത്തിരിക്കുന്നത്. രാഷ്ട്രീയപാർട്ടികളും ജനവും  പശ്ചിമഘട്ട റിപ്പോർട്ടിനെ  ശരിയായി വിലയിരുത്താതുകൊണ്ടാണ് ഇന്ന് രാഷ്ട്രീയ അസമത്വങ്ങൾക്ക് കാരണമെന്ന് അദ്ദേഹം വിശ്വസിക്കുന്നു. കസ്തൂരി, ഗാഡ്ഗിൽ റിപ്പോർട്ടുകളെ പരിപൂർണ്ണമായും പിന്താങ്ങിക്കൊണ്ട് സഭാവക പ്രസ്താവനകൾ ഇറക്കുകയും ചെയ്തു. ഇതിൽ  അദ്ദേഹത്തിനെതിരെ മറ്റുള്ള ക്രിസ്ത്യൻ മതങ്ങളുടെയും സ്ഥാപിത താല്പര്യക്കാരുടെയും  വിമർശനങ്ങളുമുണ്ട്. കേരള സംസ്ഥാനവും കേന്ദ്ര സർക്കാരും റിപ്പോർട്ടുകളെ അംഗീകരിച്ച് വേണ്ടവിധ നടപടികൾ സ്വീകരിക്കണമെന്നും അദ്ദേഹം ആഹ്വാനം ചെയ്യാറുണ്ട്. പ്രകൃതിയെ നശിപ്പിക്കുന്നവർക്കാണ് റിപ്പോർട്ടുകൊണ്ട് ദോഷം വരുകയെന്നും  വിശ്വസിക്കുന്നു. പശ്ചിമഘട്ടം റിപ്പോർട്ടുകളെ പരിഗണിക്കാൻ അതാത് പ്രദേശത്ത് വസിക്കുന്ന ജനങ്ങൾക്കാണ്‌ അവകാശമെന്ന ഗാഡ്‌ഗിലിന്റെ അഭിപ്രായം ബിഷപ്പ് ഉമ്മനും ശരിവെയ്ക്കുന്നു. ഭൂമിയുടെ സമതുലനാവസ്ഥ നിലനിർത്തി പ്രകൃതിയെ രക്ഷിക്കുകയെന്നുള്ളത് അദ്ദേഹത്തിന്റെ സിദ്ധാന്തവാക്യവുമാണ്.  

 

വ്യത്യസ്ഥങ്ങളായ  അനേകമനേക  വ്യക്തിഗുണങ്ങൾ റവ. തോമസ്‌ ഉമ്മനിലുണ്ട്. സമയത്തിന്റെ വിലയിൽ അമിതപ്രാധാന്യം കൊടുക്കുന്നതും അദ്ദേഹത്തിൻറെ സവിശേഷതകളിൽ ഒന്നാണ്. അത് തന്റെ  കർമ്മജീവിതത്തിലുടനീളം പ്രകടമായി കാണാം. ചെയ്യേണ്ട ജോലികൾ പൂർത്തിയാക്കാതെ മറ്റു സാമൂഹിക  പരിപാടികളിൽ  അദ്ദേഹം സംബന്ധിക്കാറില്ല. സമയത്തിന്റെ വില നല്ലവണ്ണം വിലയിരുത്തി പ്രയോജനപ്പെടുത്തുന്നതുമൂലം സമയത്തെ ഒരിക്കലും ദുരുപയോഗം ചെയ്യുകയില്ല. ഒരു ദിവസം അവസാനിക്കുന്നത് അദ്ദേഹത്തിന് അപര്യാപ്തമായിട്ടാണ് അനുഭവപ്പെടാറുള്ളത്. സമയം രക്ഷിക്കാൻ സ്വന്തം ഇടവക ജനത്തോടുപോലും  മിതമായെ സംസാരിക്കുകയും ഇടപെടുകയുമുള്ളൂ. അധികം സംസാരിക്കുന്ന പ്രകൃതവുമില്ല. പുരോഹിതനായിരുന്ന കാലംമുതൽ മറ്റു പുരോഹിതരെപ്പോലെ അനാവശ്യമായി സമയം കളഞ്ഞ് നടക്കാറില്ലായിരുന്നു. പഞ്ചാരവാക്കുകൾ പറഞ്ഞ് ആരെയും പ്രീതിപ്പെടുത്താനും  മെനക്കെടാറില്ല. ഓരോ ദിവസം അനുഷ്ടിക്കേണ്ട  സുപ്രധാന തീരുമാനങ്ങളെ എങ്ങനെയെന്നും വിലയിരുത്തും. കാതലായ വിഷയങ്ങൾ പ്രാധാന്യം അനുസരിച്ച് ആദ്യം കൈകാര്യം ചെയ്യും.  വിഭിന്നങ്ങളായ അഭിപ്രായങ്ങൾ ചിലപ്പോൾ ചെവികൊള്ളാതെ സ്വയം യുക്തിപരമായ തീരുമാനങ്ങൾ എടുക്കുകകയും ചെയ്യുന്ന സ്വഭാവഗുണമാണ് അദ്ദേഹത്തിനുള്ളത്. 

 

അദ്ദേഹത്തോടൊപ്പം പ്രവർത്തിക്കുന്നവർക്ക്  അദ്ദേഹമൊരു കർശന സ്വഭാവക്കാരനെന്ന്    തോന്നിയേക്കാം. ചിലർ അദ്ദേഹത്തിൻറെ വിട്ടുവീഴ്ച്ചാ മനോഭാവങ്ങളിൽ നീരസവും പ്രകടിപ്പിക്കാറുണ്ട്.  തീരുമാനങ്ങളെ ഇഷ്ടപ്പെടാത്ത ചിലർ തെറ്റിധാരണകൾ മൂലം മുഖം വീർപ്പിച്ചു നടക്കും. അതൊന്നും അദ്ദേഹം ഗൌനിക്കാറില്ല. എതിർപ്പുകാരുടെ വായ് അടപ്പിക്കുവാനും ശ്രമിക്കില്ല. ഉത്തരവാദിത്വത്തോടെ  കർത്തവ്യബോധത്തോടെ ആത്മാർഥതയോടെ സ്വന്തം ചുമതലകളെ നിർവഹിക്കുന്ന അദ്ദേഹത്തിനെതിരെ ആർക്കും ഒരു ആരോപണവും ഉന്നയിക്കാൻ സാധിക്കില്ല. ചുറ്റുമുള്ള സഹപ്രവർത്തകരെയും പുരോഹിതരെയും മടിയന്മാരായി നടക്കാൻ അനുവദിക്കുകയുമില്ല. സത്യത്തിൽ മാത്രം വിശ്വസിക്കുന്ന, മറ്റുള്ളവരുടെ നന്മ മാത്രം ചിന്തിക്കുന്ന, അദ്ദേഹത്തിനെതിരെ എതിർപ്പുകാരുടെ  തന്ത്രങ്ങളും വിലപ്പോവില്ല. മനസ്സുനിറയെ നന്മകൾ നിറച്ചുകൊണ്ടാണ് അദ്ദേഹം ദൈവത്തിന്റെ വചനങ്ങൾ പ്രചരിപ്പിക്കാറുള്ളത്.

 

ഏതു സാഹചര്യങ്ങളിലും കാലാവസ്ഥയിലും ദുരിതവും കഠിനവുമായ പ്രദേശങ്ങളിലും ജോലിചെയ്യാൻ മടിയില്ല. ജനങ്ങൾ തിങ്ങി പാർക്കുന്ന നഗരങ്ങളിലും,  ദരിദ്ര കോളനികളിലും, മത ഭ്രാന്തന്മാരുടെ കോട്ടകളിലും ജീവിച്ച് സുവിശേഷ ജോലികൾ നിർവഹിക്കാൻ ഒരിക്കലും അമാന്തം  കാണിക്കാറുമില്ല. അദ്ദേഹം മദ്യനിരോധനത്തിനായുള്ള  തീവ്രവക്താവും കൂടിയാണ്. സമർഥനായ ഒരു ആത്മീയ ഭരണാധികാരിയെന്നതിനു പുറമേ ജന്മനാ ലഭിച്ച നാനാതുറകളിലുള്ള അനേക കഴിവുകളും അദ്ദേഹത്തിൽ പ്രകടമായി കാണാം. നല്ല  വാഗ്മിയായതുകൊണ്ട് ജാതി മത ഭേദമേന്യേ  പ്രഭാഷണങ്ങൾ കേള്ക്കാൻ ജനം തിങ്ങിക്കൂടാറുണ്ട്.  മാരാമണ്‍ കണ്‍വൻഷനിലും നീണ്ട പ്രസംഗങ്ങൾ നടത്തി ജനങ്ങളുടെ പ്രശംസകൾ നേടാറുമുണ്ട്.

 

 

EMalayalee:http://emalayalee.com/varthaFull.php?newsId=77257

Malayalam Daily News: http://www.malayalamdailynews.com/?p=89243