കരുണാനിധിയും കലയും രാഷ്ട്രീയവും വിമർശനങ്ങളും

ജോസഫ് പടന്നമാക്കൽ 
വാക്കുകളുടെ ശക്തിയും പോരാട്ട വീര്യവും ചാണക്യ തന്ത്രവും ഉൾക്കൊണ്ട ഇന്ത്യയുടെ സമുന്നത   നേതാവായിരുന്നു കരുണാനിധി. ഒരു തിരഞ്ഞെടുപ്പിലും തോറ്റില്ല. അഞ്ചു പ്രാവിശ്യം തമിഴ്‌നാടിന്റെ മുഖ്യമന്ത്രിയായി ഭരിച്ചു. ബുദ്ധിയും കർമ്മനിരതയും ഒത്തു ചേർന്ന ഒരു രാഷ്ട്ര തന്ത്രജ്ഞനും ദ്രാവിഡ മുന്നേറ്റ കഴകം (ഡിഎംകെ) രാഷ്ട്രീയ പാർട്ടിയുടെ തുടക്കം മുതലുള്ള നേതാവുമായിരുന്നു. അഴിമതിയും കുടുംബരാഷ്ട്രീയവുമൊക്കെ കരുണാനിധിയുടെ ജീവിതത്തിലും വേട്ടയാടിയെങ്കിലും തമിഴ് മനസുകളിൽ അദ്ദേഹം അവരുടെ ആചാര്യൻ തന്നെയായിരുന്നു. രണ്ടു വർഷം മുമ്പ് ആരോഗ്യപ്രശ്നങ്ങളാൽ സജീവ രാഷ്ട്രീയത്തിൽ നിന്നു വിരമിച്ചെങ്കിലും ഡിഎംകെ യുടെ കാതലായ തീരുമാനങ്ങൾക്കെല്ലാം തീർപ്പു കല്പിച്ചിരുന്നത് മരിക്കുംവരെ അദ്ദേഹം തന്നെയായിരുന്നു.

ദക്ഷിണാമൂർത്തി മുത്തുവേലന്റെയും അഞ്ചുഗമിന്റെയും (Dakshinamoorthy Muthuvel and Anjugam) മകനായി കരുണാനിധി തമിഴ് നാട്ടിലുള്ള 'തിരുകൂവലായ്' എന്ന ഗ്രാമത്തിൽ 'നാഗപട്ടിണം' ജില്ലയിൽ ജനിച്ചു. 1924 ജൂൺ മൂന്നാംതിയതിയായിരുന്നു ജനനം. കരുണാനിധിയെ കലൈഞ്ജർ എന്നും അറിയപ്പെട്ടിരുന്നു. 2018 ആഗസ്റ്റ് ഏഴാം തിയതി മരിക്കുമ്പോൾ അദ്ദേഹത്തിന് 94 വയസു പ്രായമുണ്ടായിരുന്നു. ജനിച്ചപ്പോൾ അദ്ദേഹത്തിന് ദക്ഷിണ മൂർത്തിയെന്നായിരുന്നു പേര് നൽകിയിരുന്നത്. എന്നാൽ പിന്നീട് ദ്രാവിഡകഴക ആശയങ്ങളും യുക്തിചിന്തകളും കാരണം ബ്രാഹ്മണരുടെയോ ദൈവത്തിന്റെയോ പേര് ഇഷ്ടപ്പെട്ടിരുന്നില്ല. അദ്ദേഹം 'കരുണാനിധി' എന്ന പേര് സ്വീകരിച്ചു.

അദ്ദേഹത്തിൻറെ കുടുംബം വെള്ളാളർ സമുദായത്തിലുള്ളവരായിരുന്നു. പാരമ്പര്യമായി സംഗീതവും ഉപകരണവുമായി കുലത്തൊഴിലിൽ ഏർപ്പെട്ടവരായിരുന്നു. കുഞ്ഞായിരുന്നപ്പോൾ സംഗീതത്തിൽ വലിയ വാസനയുണ്ടായിരുന്നു. സ്‌കൂളിലെ പഠന കാര്യങ്ങളിൽ താല്പര്യമുണ്ടായിരുന്നില്ല. ജാതി വ്യവസ്ഥിതികളോടും എതിർത്തിരുന്നു. പ്രാരംഭ സ്‌കൂൾ വിദ്യാഭ്യാസം 'തിരുക്കുവലൈ' എന്ന ഗ്രാമപ്രദേശത്തായിരുന്നു. 1936-ൽ തിരുവാരൂരുള്ള ഹൈസ്‌കൂളിൽ പഠനം തുടങ്ങി. കൗമാര പ്രായത്തിൽ രാഷ്ട്രീയത്തിലെ പേരുകേട്ടവരുടെ ചരിത്രം എഴുതുവാൻ ആഗ്രഹം പ്രകടിപ്പിച്ചിരുന്നു.

പഠനത്തിൽ കാര്യമായി ശ്രദ്ധിക്കാഞ്ഞതു കാരണം പഠിച്ചിരുന്ന ക്ളാസുകളിലെല്ലാം തുടർച്ചയായി പരാജയപ്പെട്ടുകൊണ്ടിരുന്നു. അവസാന വർഷം പൂർത്തിയാക്കാൻ സാധിക്കാതെ പഠനം ഉപേക്ഷിക്കുകയും ചെയ്തു. സ്‌കൂൾകാലം മുതൽ നാടകം, സാഹിത്യം, കവിത, കഥകൾ എന്നിങ്ങനെ കലകളിൽ അതുല്യമായ കഴിവുകൾ പ്രകടിപ്പിച്ചിരുന്നു. തമിഴ് നാട്ടിലുണ്ടായിരുന്ന 'ജസ്റ്റിസ് പാർട്ടിയിലും' സാമൂഹിക പ്രവർത്തനങ്ങളിലും പതിമൂന്നാം വയസുമുതൽ പ്രവർത്തിക്കാൻ ആരംഭിച്ചിരുന്നു. വിദ്യാർത്ഥികളെയും അവരുടെ സാഹിത്യപരമായ കഴിവുകളെയും പരിപോഷിപ്പിക്കാൻ അദ്ദേഹം യുവജന പ്രസ്ഥാനങ്ങൾ സംഘടിപ്പിച്ചു. കുട്ടിക്കാലം മുതൽ രാഷ്ട്രീയത്തിൽ പ്രവർത്തിക്കാനും തുടങ്ങി.

മൂന്നു പ്രാവിശ്യം അദ്ദേഹം വിവാഹം ചെയ്തു. 1944 സെപ്റ്റംബറിൽ പത്മാവതിയെ വിവാഹം കഴിച്ചു. അതിൽ എം.കെ. മുത്തുവെന്ന ഒരു മകനുണ്ടായിരുന്നു. മകൻ തമിഴ് ഫിലിമിലും രാഷ്ട്രീയത്തിലും സജീവമായിരുന്നു. ഒരു കുഞ്ഞിന്റെ ജനനത്തോടെ പത്മാവതി 1948 ൽ മരണമടഞ്ഞു. അതേവർഷം തന്നെ കരുണാനിധി സെപ്റ്റംബറിൽ 'ദയാലു അമ്മാളിനെ' വിവാഹം ചെയ്തു. അവരിൽ മൂന്നു പുത്രന്മാരുണ്ടായി. എം.കെ. അളഗിരി, എംകെ സ്റ്റാലിൻ, എം.കെ. തമിളരശു എന്നിവർ. എം.കെ സെൽവി എന്ന മകളുമുണ്ടായിരുന്നു. അളഗിരിയും സ്റ്റാലിനും രാഷ്ട്രീയത്തിൽ പ്രമുഖരായി അറിയപ്പെടുന്നു. അപ്പന്റെ രാഷ്ട്രീയ പിൻഗാമികളാകാൻ രണ്ടുപേരും ശ്രമിക്കുന്നു. 'തമിളരശു' ഒരു ബിസിനസുകാരനും ഫിലിം പ്രൊഡ്യൂസറും ആണ്. അപ്പന്റെ പാർട്ടിയിൽ തിരഞ്ഞെടുപ്പു പ്രചരണങ്ങളും നടത്തുന്നു. സെൽവിയും രാഷ്ട്രീയത്തിൽ പ്രവർത്തിക്കാറുണ്ട്. അദ്ദേഹത്തിൻറെ മൂന്നാമത്തെ ഭാര്യ 'രാജതി അമ്മാളിൽ' 'കനിമൊഴി' എന്ന ഒരു മകളുണ്ട്. അപ്പന്റെ കലകളിലും സാഹിത്യത്തിലും അവർക്ക് നല്ല വാസനയുണ്ട്.

കരുണാനിധി പതിനാലാം വയസിൽ രാഷ്ട്രീയത്തിൽ പ്രവേശിച്ചു. 'തമിഴ്നാട് മാനവർ മന്ത്രം' എന്ന ഒരു വിദ്യാർത്ഥി സംഘടന രൂപികരിച്ചു. ദ്രാവിഡ നീക്കത്തിന്റെ ആദ്യത്തെ വിദ്യാർത്ഥി പ്രസ്ഥാനം ആയിരുന്നു അത്. അദ്ദേഹം 'മുരസോലി' എന്ന പത്രവും വിദ്യാർത്ഥികൾക്കായി ആരംഭിച്ചു. പിന്നീട് അത് ഡിഎംകെ പാർട്ടിയുടെ ഔദ്യോഗിക പത്രമാവുകയും ചെയ്തു. 'കല്ലക്കൂടി' എന്ന സ്ഥലത്ത് ഒരു വിപ്ലവത്തിന് നേതൃത്വം കൊടുത്തതുമൂലം തമിഴ് രാഷ്ട്രീയത്തിൽ ഉറയ്ക്കുകയും ചെയ്തു.

ഒരു തിരഞ്ഞെടുപ്പിൽപ്പോലും പരാജയപ്പെട്ടിട്ടില്ലാത്ത നേതാവായിരുന്നു അദ്ദേഹം. 1991-ൽ രാജീവ് ഗാന്ധിയുടെ മരണശേഷം ജനങ്ങളുടെ വികാരങ്ങൾ ഡി.എം.കെ യ്ക്കെതിരായിരുന്ന കാലത്തും അദ്ദേഹം തിരഞ്ഞെടുപ്പിൽ വിജയിച്ചു വന്നതും ചരിത്രമാണ്. തിരഞ്ഞെടുപ്പിൽ രണ്ടു ഡി.എം.കെ സാമാജികർ വിജയിച്ച കൂട്ടത്തിൽ കരുണാനിധിയുമുണ്ടായിരുന്നു. ആർക്കും വെല്ലുവിളക്കാൻ സാധിക്കാത്തവിധം തുടർച്ചയായി അമ്പതു വർഷത്തോളം പാർട്ടിയുടെ നേതാവായിരുന്നതും അദ്ദേഹത്തിൻറെ നേട്ടമായിരുന്നു. ഡി.എം.കെ പാർട്ടിയുടെ സ്ഥാപകൻ അണ്ണാദുരെയും  പ്രധാന പ്രവർത്തകനും ശില്പിയും കരുണാനിധിയുമായിരുന്നു.

1957-ൽ അദ്ദേഹത്തെ നിയമസഭാ സാമാജികനായി തിരഞ്ഞെടുത്തു. 1961-ൽ ഡിഎംകെയുടെ ട്രഷറർ ആവുകയും ചെയ്തു. 1962-ൽ പ്രതിപക്ഷ പാർട്ടിയുടെ നേതാവായി തിരഞ്ഞെടുത്തു. 1967-ൽ പൊതുമരാമത്ത് മന്ത്രിയായി അണ്ണാദുരെ മന്ത്രിസഭയിൽ അംഗമായിരുന്നു. 1969-ൽ പാർട്ടിയുടെ സ്ഥാപകനായ സി.എൻ. അണ്ണാദുരൈ മരിച്ച ശേഷം അദ്ദേഹം പാർട്ടിയുടെ നേതാവുമായി. പിന്നീട്, അഞ്ചു തവണകളായി തമിഴ്‌നാടിന്റെ മുഖ്യമന്ത്രി പദം അലങ്കരിച്ചിരുന്നു.

രാഷ്ട്രീയ ജീവിതത്തിന്റെ തുടക്കത്തിൽ ഉറ്റ സുഹൃത്തായിരുന്ന എം.ജി. രാമചന്ദ്രൻ (എം.ജി.ആർ) തന്റെ പാർട്ടി വിട്ടുപോയത് അദ്ദേഹത്തെ വേദനിപ്പിച്ചിരുന്നു. ഡി.എം.കെ യ്ക്കെതിരെ എ.ഐ.ഡി.എം.കെ (AIADMK) എന്ന പുതിയ രാഷ്ട്രീയ പാർട്ടി നിലവിൽ വന്നത് കരുണാനിധിയെ സംബന്ധിച്ച് ഒരു രാഷ്ട്രീയ പരാജയമായിരുന്നു. 1969-ൽ കരുണാനിധിയുടെ ആരാധ്യ പുരുഷനായ അണ്ണാദുരെയുടെ മരണശേഷം എം.ജി.ആർ കരുണാനിധിക്കെതിരെ അഴിമതിയാരോപണങ്ങൾ ഉന്നയിക്കാൻ തുടങ്ങി. അത് അദ്ദേഹത്തെ രാഷ്ട്രീയമായി തളർത്തിയിരുന്നു. രാഷ്ട്രീയക്കളരിയിൽ സ്വാഭാവികമായുണ്ടാകുന്ന വിജയ പരാജയങ്ങൾ എന്നും അദ്ദേഹവും അഭിമുഖീകരിച്ചിരുന്നു. എങ്കിലും വീഴ്ചകളിൽ തളരാതെ രാഷ്ട്രീയ ശത്രുക്കളോടു മല്ലിട്ടുകൊണ്ടു അര നൂറ്റാണ്ടിൽപ്പരം അദ്ദേഹം തമിഴ് രാഷ്ട്രീയത്തോട് പൊരുതിയിരുന്നു. അദ്ദേഹത്തിനെതിരായുള്ള അഴിമതിയാരോപണങ്ങൾ ഒന്നും തന്നെ കോടതിയിൽ തെളിയിക്കാൻ സാധിച്ചിട്ടില്ല.

ഹിന്ദി ഭാഷ തമിഴ് നാട്ടിലെ സ്‌കൂളുകളിൽ നിർബന്ധിത വിഷയമാക്കിയപ്പോൾ കരുണാനിധി അതിനെതിരായുള്ള സമര പരിപാടികൾ സംഘടിപ്പിക്കുകയും സമരങ്ങളിൽ പങ്കു ചേരുകയും ചെയ്തു. ഇന്ദിരാഗാന്ധിയുടെ കാലത്ത് അടിയന്തിരാവസ്ഥയെ എതിർത്ത ഏക ഭരിക്കുന്ന പാർട്ടി കരുണാനിധിയുടെ ഡിഎംകെ മാത്രമായിരുന്നു. അതുമൂലം ഇന്ദിരാഗാന്ധി ഡിഎംകെ സർക്കാരിനെ തമിഴ്‌നാട്ടിൽ പിരിച്ചുവിടുകയും ചെയ്തു. ഡിഎംകെയുടെ പ്രമുഖ നേതാക്കന്മാരെ അറസ്റ്റു ചെയ്യുകയുമുണ്ടായി. അടിയന്തരാവസ്ഥ അവസാനിക്കുംവരെ ജയിലിൽ അടക്കുകയും ചെയ്തു.

ഈറോഡിൽ നിന്നും പ്രസിദ്ധീകരിച്ചിരുന്ന 'കുടിയരൾ' എന്ന പത്ര മാസികയിൽ ഏതാനും നാളുകൾ കരുണാനിധി പത്രാധിപരായി ജോലി നോക്കിയിരുന്നു. പിന്നീട് ദ്രാവിഡ ആശയങ്ങൾ പ്രചരിപ്പിക്കുന്ന 'മുരസോലി' എന്ന പത്രത്തിന്റെ പത്രാധിപരായും പ്രവർത്തിച്ചു. 1947-ൽ എം.ജി രാമചന്ദ്രൻ നായകനായുള്ള 'രാജകുമാരി' സിനിമയ്ക്ക് വേണ്ടി തിരക്കഥ എഴുതിയതു മുതലാണ് കരുണാനിധി സിനിമാ ലോകത്തേക്ക് കടന്നുവന്നത്. അദ്ദേഹം എഴുതിയ സിനിമാ ശബ്ദരേഖകളിൽ കൂടുതലും അഭിനയിച്ചിരുന്നതു എം.ജി രാമചന്ദ്രനായിരുന്നു. കൂടാതെ ദ്രാവിഡ മുന്നേറ്റ കഴകത്തിൽ പ്രവർത്തിക്കാനും രാഷ്ട്രീയത്തിൽ മുന്നേറാനും എം.ജി.ആറിനെ സഹായിച്ചുകൊണ്ടുമിരുന്നു. വാസ്തവത്തിൽ എം.ജി രാമചന്ദ്രനും ശിവാജി ഗണേശനും സിനിമാ ലോകത്ത് വളരാൻ കാരണം കരുണാനിധിയുടെ പേനായുടെ ശക്തിമൂലമായിരുന്നു. നാൽപ്പതു ഫിലിമുകൾക്കായി സ്ക്രിപ്റ്റ് എഴുതിയതിൽ ശിവാജി ഒമ്പതു ഫിലിമുകളിലും എംജിആർ എട്ടു ഫിലിമുകളിലും അഭിനയിച്ചിരുന്നു. 'പരാശക്തി' പോലെ വൈകാരികമായ ഒരു ഫിലിം നാളിതുവരെയും തമിഴ് സിനിമയിൽ ഉണ്ടായിട്ടില്ല. ആ സിനിമയ്ക്ക് ഒരു രാഷ്ട്രീയ മാനദണ്ഡവും ഉണ്ടായിരുന്നു. തമിഴ് നാട്ടിൽ ദ്രാവിഡ മുന്നേറ്റത്തിന് ഈ സിനിമാ ഒരു കാരണവുമായിരുന്നു. ജാതി വ്യവസ്ഥകളും യുക്തിവാദവും  സിനിമയിൽ നിറഞ്ഞിരുന്നു.

എം.ജി.ആർ, കരുണാനിധിയുടെ സഹപ്രവർത്തകനായി ഡിഎംകെയിലുണ്ടായിരുന്ന കാലത്ത് എം.ജി.ആറിന് ഉചിതമായ സ്ഥാനമാനങ്ങൾ കൊടുക്കാൻ കരുണാനിധി പ്രത്യേകം താൽപ്പര്യം പ്രകടിപ്പിച്ചിരുന്നു. എന്നാൽ എം.ജിആർ തന്റെ നിലനിൽപ്പിനു വെല്ലുവിളിയായപ്പോൾ അദ്ദേഹം എം.ജി.ആറിൽ നിന്ന് അകന്നു. എം.ജി.ആർ, എഐഡിഎംകെ (AIADMK) പാർട്ടി രൂപീകരിക്കുകയും അങ്ങനെ ഡിഎംകെ യുടെ വോട്ടുബാങ്ക് കുറയുകയും ചെയ്തു. രാഷ്ട്രീയ ചേരികളിൽ അവർ രണ്ടായി പിരിഞ്ഞ ശേഷം പരസ്പ്പരം മല്ലടിച്ചുകൊണ്ടിരുന്നു. 1987-ൽ എം.ജി. രാമചന്ദ്രന്റെ മരണം വരെ തുടർച്ചയായ പരാജയങ്ങൾ ഡിഎംകെ ഏറ്റു വാങ്ങിയിരുന്നു.

എംജിആർ പുതിയ പാർട്ടി ഉണ്ടാക്കിക്കഴിഞ്ഞ് നാലുവർഷത്തോളം കരുണാനിധിക്കെതിരെ അഴിമതികൾ ആരോപിച്ചുകൊണ്ടിരുന്നു. ഇരുപത്തിയാറിൽപ്പരം അഴിമതികളെപ്പറ്റിയും അധികാര ദുർവിനിയോഗത്തെപ്പറ്റിയും അന്വേഷിക്കാനായി സുപ്രീം കോടതി ജഡ്ജിയായിരുന്ന 'രഞ്ചിത് സിങ്' നിയമിതനായി. ആ വർഷം എം.ജി.ആർ അസംബ്ലി തിരഞ്ഞെടുപ്പിൽ ഭൂരിപക്ഷം നേടി വിജയിയായി. പിന്നീട് 1987-മുതൽ പന്ത്രണ്ടു വർഷത്തോളം എം.ജി.ആർ തമിഴ്നാടിന്റെ മുഖ്യമന്ത്രിയായിരുന്നു. ഗോതമ്പ് കുമ്പക്കോണം കരുണാനിധിയെ ഇക്കാലയളവിൽ നിയമങ്ങളുടെ കുരുക്കിൽപ്പെടുത്തിയിരുന്നു.

രാഷ്ട്രീയ ഭീമനായ 'വൈക്കോയെ' പുറത്താക്കിയത് കരുണാനിധിയുടെ മറ്റൊരു രാഷ്ട്രീയ വീഴ്ചയായിരുന്നു. ഡി.എം.കെ യുടെ ശക്തനും അദ്ദേഹത്തിൻറെ ഉറ്റമിത്രവുമായിരുന്ന വൈക്കോ 1990-ൽ ശ്രീലങ്കൻ ആഭ്യന്തര യുദ്ധകാലത്ത് തമിഴ് ടൈഗറെ പിന്തുണച്ചതായിരുന്നു കാരണം. മുഖ്യമന്ത്രി എന്ന നിലയിൽ അത് കരുണാനിധിക്ക് അപമാനകരമായിരുന്നു. മലേഷ്യയിൽ നിന്ന് വന്നെത്തിയ രോഗബാധിതയായ എൽ.ടി.ടി നേതാവിന്റെ അമ്മയെ രാജ്യത്തുനിന്ന് പുറത്താക്കിയപ്പോഴും സുപ്രധാനമായ ഒരു തീരുമാനം വേദനയോടെ സ്വീകരിക്കേണ്ടി വന്നു. പ്രഭാകരന്റെ മരണവും പ്രഭാകരന്റെ പന്ത്രണ്ടു വയസുള്ള മക്നറെ മരണവും കരുണാനിധിയെ ദുഃഖിതനാക്കിയിരുന്നു

1987-ൽ എം.ജി.ആർ മരിക്കുമ്പോൾ അദ്ദേഹം തിരുന്നൽവേലിയിൽ യാത്രയിലായിരുന്നു. യാത്രക്കിടയിൽ വില്ലുപുരം സ്റ്റേഷനിൽ ഇറങ്ങി. തന്റെ രാഷ്ട്രീയത്തിലെ പ്രതിയോഗിയായിരുന്ന എം. ജി. രാമചന്ദ്രന്റെ ഭവനത്തിൽപ്പോയി അന്ത്യോപചാരം അർപ്പിച്ച ശേഷമാണ് അദ്ദേഹം അവിടെനിന്ന് മടങ്ങിയത്. എം.ജി.ആർന്റെ പിൻഗാമി ജയലളിതയും അദ്ദേഹത്തിന്റെ രാഷ്ട്രീയ പ്രതിയോഗിയായിരുന്നു. എങ്കിലും അദ്ദേഹം ഒരിക്കലും ജയലളിതയോട് വൈരാഗ്യ ഭാവത്തോടെ പ്രവർത്തിച്ചിട്ടില്ല. മൂന്നു പതിറ്റാണ്ടോളം അവർ തമ്മിൽ രാഷ്ട്രീയ നീരസത പുലർത്തിയിരുന്നു. ജയലളിത കുഞ്ഞായി സിനിമയിൽ അഭിനയിക്കുന്ന കാലം മുതൽ കരുണാനിധി അവരെ ഇഷ്ട്ടപ്പെട്ടിരുന്നു. 1996-ൽ ജയലളിതയെ ധനപരമായ അഴിമതികളുടെ മേൽ പോലീസ് അറസ്റ്റ് ചെയ്തപ്പോൾ ഒന്നര മണിക്കൂറോളം അറസ്റ്റ് നീട്ടുന്നതിന് അദ്ദേഹം സഹായിച്ചു. കാരണം, വീട്ടിൽ നിന്ന് വേണ്ടത്ര ഒരുക്കത്തോടെ അറസ്റ്റിന് തയ്യാറാകാൻ ജയലളിതയ്ക്ക് സമയം വേണമായിരുന്നു. അഞ്ചു വർഷത്തിനുശേഷം ജയലളിത മുഖ്യമന്ത്രിയായപ്പോൾ കരുണാനിധിയെ യാതൊരു ദയയും കാണിക്കാതെ ബലമായി വീട്ടിൽ നിന്ന് ഇറക്കി അറസ്റ്റ് ചെയ്യുകയും ചെയ്തു.

തമിഴ് ഫിലിം വ്യവസായത്തിൽ സിനിമകളുടെ തിരക്കഥാ എഴുത്തുകളുമായിട്ടാണ് അദ്ദേഹം തന്റെ തൊഴിൽ തുടങ്ങിയത്. സാമൂഹികവും ചരിത്രപരമായും ഉള്ള കഥകളാണ് കൂടുതലും എഴുതിയിരുന്നത്. ദ്രാവിഡ മുന്നേറ്റ കഴകത്തിന്റെ സോഷ്യലിസ്റ്റ് വ്യവസ്ഥിതിയും യുക്തിവാദ ചിന്തകളും എഴുത്തിൽക്കൂടി പ്രചരിപ്പിച്ചുകൊണ്ടിരുന്നു. 'പരാശക്തി' സിനിമായിൽക്കൂടി അദ്ദേഹത്തിന്റെ രാഷ്ട്രീയ അജണ്ടകൾ പ്രചരിപ്പിക്കാൻ സാധിച്ചു. 'ബ്രാഹ്മണിസം' ശക്തിയായി വിമർശിച്ചതുകൊണ്ടു ഓർത്തോഡോക്സ് ഹിന്ദുക്കളിൽ നിന്നും ശക്തമായ എതിർപ്പുകളും നേരിടേണ്ടി വന്നു. 'പണം, തങ്ക രത്നം' എന്ന സിനിമകളും അതേ സന്ദേശം തന്നെ നൽകിയിരുന്നു. സാമൂഹികമായി ശക്തമായ സന്ദേശം ഉണ്ടായിരുന്നതിനാൽ ഈ രണ്ടു ഫിലിമുകളും സർക്കാർ നിരോധിക്കുകയും ചെയ്തു.

തമിഴ് സാഹിത്യത്തിനും കരുണാനിധി വളരെയേറെ സംഭാവനകൾ നൽകിയിട്ടുണ്ട്. നാടകം, കവിതകൾ, സിനിമയ്ക്കുള്ള എഴുത്തുകൾ, നോവലുകൾ, ചരിത്ര നോവലുകൾ, ആത്മകഥ, സിനിമാ പാട്ടുകൾ അങ്ങനെ അദ്ദേഹത്തിൻറെ നീണ്ട സാഹിത്യ കൃതികളുടെ സംഭാവനകളുണ്ട്. സംഗം തമിഴ്, റോമാപുരി പാണ്ട്യൻ, നിഞ്ഞുക്കു നീതി, തിരുക്കുറൾ ഉരൈ, പൊന്നറ ശങ്കർ, തേൻപാണ്ടി സിംഗം, ഇനിയവൾ ഇരുപത്, എന്നിങ്ങനെ നിരവധി കൃതികൾ അദ്ദേഹം രചിച്ചിട്ടുണ്ട്. രാജകുമാരി, ദേവകി തിരുമ്പി പാർ, നാം മനോഹര, മലൈക്കള്ളൻ, കാഞ്ചി തലൈവൻ, മുതലായ സിനിമകൾക്ക് തിരക്കഥകൾ  എഴുതിക്കൊണ്ടിരുന്നു.

കരുണാനിധി ഏകദേശം നാൽപ്പതു സിനിമകൾക്ക് കഥകളെഴുതിയിട്ടുണ്ട്. വിധവകളുടെ പുനർവിവാഹം, വൈവാഹ ജീവിതത്തിന്റെ പവിത്രത, തൊട്ടുകൂടായ്‌മയും വർണ്ണ വ്യവസ്ഥയും അവസാനിപ്പിക്കുക മുതലായ വിഷയങ്ങളെല്ലാം അദ്ദേഹത്തിൻറെ എഴുത്തുകളിലുണ്ടായിരുന്നു. 'പരാശക്തി' എന്ന ആദ്യകാല സിനിമ (1952) വൈകാരികത നിറഞ്ഞ  സംഭാഷണ ശൈലിയിലുള്ളതായിരുന്നു. അതിൽ ശിവാജി ഗണേശന്റെ അതുല്യമായ അഭിനയ കാഴ്ച തമിഴ് സിനിമ ലോകത്തിന്റെ മുതൽക്കൂട്ടാണ്. അതുപോലെ യുക്തിവാദ ചിന്തകൾ സിനിമയിൽ സംസാരിക്കുമ്പോൾ അതിന്റെ ക്രെഡിറ്റ് മുഴുവൻ ലഭിച്ചിരുന്നത് ശിവാജി ഗണേശനായിരുന്നു. എന്നാൽ അതെഴുതുകയും അതിനു ശബ്ദരേഖ കൊടുക്കുകയും ചെയ്ത കരുണാനിധിയും സിനിമയുടെ വിജയത്തിൽ തുല്യമായ പങ്കു വഹിച്ചിട്ടുണ്ട്.

കരുണാനിധിയുടെ എല്ലാ സിനിമയ്ക്കുള്ള എഴുത്തുകളിലും ശക്തമായ ഒരു രാഷ്ട്രീയ അജണ്ടായുണ്ടായിരുന്നു. ദ്രാവിഡ മുന്നേറ്റ കഴകത്തിന്റെ ആശയങ്ങൾ നിറഞ്ഞിരുന്നു. 'ചിലപ്പതികാരം' പോലുള്ള ഇതിഹാസ കഥകളിലും നായകൻറെ വക്താവായിട്ടാണ് സ്ക്രിപ്റ്റ് എഴുതിയിരിക്കുന്നത്. രാഷ്ട്രീയത്തിലെ നീതിയും ധർമ്മവും ഒരോ ഡയലോഗിലും തന്മയത്വത്തോടെ അവതരിപ്പിച്ചിരുന്നു. എഴുത്തിന്റെ ലോകം അദ്ദേഹം ജീവിതാവസാനം വരെ ഇഷ്ടപ്പെട്ടിരുന്നു. മുഖ്യമന്ത്രിയായിരുന്ന കാലത്തുപോലും എഴുത്തിനെ സ്നേഹിച്ചിരുന്നു. ഔദ്യോഗിക ജോലികൾക്കിടയിലും സമയം കിട്ടുമ്പോഴെല്ലാം സിനിമകൾക്ക് തിരക്കഥകൾ എഴുതിക്കൊണ്ടിരുന്നു.

കരുണാനിധി ഇരുന്നൂറോളം പുസ്തകങ്ങൾ രചിച്ചിട്ടുണ്ട്. മാക്സിം ഗോർക്കിയുടെ 'മദർ' എന്ന പുസ്തകത്തിന്റെ പരിഭാഷ ചെയ്തത് കരുണാനിധിയായിരുന്നു. കൂടാതെ സിനിമയ്ക്കായി എഴുപത്തഞ്ചോളം തിരക്കഥകളും എഴുതിയിട്ടുണ്ട്. സാഹിത്യ സംഭാവനകളെ മാനിച്ച് അണ്ണാമല സർവ്വകലാശാല 1971-ൽ ഹോണററി ഡോക്ട്രേറ്റ് നൽകി ആദരിച്ചു. 'തേൻപാണ്ടി സിംഗം' എന്ന പുസ്തകത്തിന് തഞ്ചാവൂർ തമിഴ് യൂണിവേഴ്സിറ്റിയുടെ 'രാജാ രാജൻ അവാർഡ്' ലഭിച്ചിരുന്നു. മധുരൈ കാമരാജ യൂണിവേഴ്‌സിറ്റിയും ഹോണററി ഡോക്ട്രേറ്റ് നൽകിയിരുന്നു. 1975 മുതൽ ''നെഞ്ചിക്കു നീതി'യെന്ന പേരിൽ ആറു വാല്യങ്ങളായി അദ്ദേഹത്തിൻറെ ആത്മകഥയും പ്രസിദ്ധീകരിച്ചിരുന്നു.

2016 ഒക്ടോബർ മുതൽ കരുണാനിധിയുടെ ആരോഗ്യം ക്ഷയിക്കാൻ തുടങ്ങി. രാഷ്ട്രീയ പ്രവത്തനങ്ങളും ചുരുക്കിയിരുന്നു. പൊതു സ്ഥലങ്ങളിലും പ്രത്യക്ഷപ്പെടാറില്ലായിരുന്നു. 2018 ജൂൺ മൂന്നാം തിയതി ജന്മദിനത്തിലാണ് അവസാനമായി സഹപ്രവർത്തകരെ കണ്ടത്. ജൂലൈ ഇരുപത്തിയെട്ടാം തിയതി  ആരോഗ്യം വളരെ മോശമാവുകയും ചെന്നൈയിലുള്ള കാവേരി ഹോസ്പിറ്റലിൽ പ്രവേശിപ്പിക്കുകയും 2018 ആഗസ്റ്റ് മാസം മരണമടയുകയും ചെയ്തു. 2018 ആഗസ്റ്റ് എട്ടാം തിയതി കരുണാനിധിയോടുള്ള ബഹുമാന സൂചകമായി തമിഴ്നാട്, അവധി ദിവസമായി പ്രഖ്യാപിച്ചിരുന്നു. ദേശീയ തലത്തിലും അന്ന് ആദരവ് പ്രകടിപ്പിച്ചു കൊണ്ട് ഇന്ത്യയുടെ ദേശീയ പതാക താഴ്ത്തിക്കെട്ടിയിരുന്നു.

അണ്ണാദുരെയുടെ ശ്മശാന മണ്ഡപത്തിനു സമീപം അദ്ദേഹത്തെ അടക്കണമെന്നായിരുന്നു ആഗ്രഹം.  എന്നാൽ എഐഡിഎംകെ (AIADMK) രാഷ്ട്രീയം ആ തീരുമാനത്തിനെതിരെ എതിർത്തതും പ്രശ്നങ്ങളുണ്ടാക്കി. ഒടുവിൽ കരുണാനിധിയുടെ ഭൗതിക ശരീരം അദ്ദേഹത്തിൻറെ ആഗ്രഹപ്രകാരം അണ്ണാദുരൈ സ്മാരകത്തിന് സമീപം മറവു ചെയ്യാൻ ഹൈക്കോടതിയുടെ തീരുമാനം വേണ്ടി വന്നു. അതുമൂലം അദ്ദേഹത്തിൻറെ മകൻ എംകെ സ്റ്റലിന് ജനങ്ങളുടെ വൈകാരികമായ പിന്തുണയും ലഭിക്കാൻ കാരണമായി. "അച്ഛന് മറീന ബീച്ചില്‍ അന്ത്യവിശ്രമത്തിന് ഇടം നല്‍കിയില്ലായിരുന്നെങ്കില്‍ ഞാന്‍ മരിക്കുമായിരുന്നുവെന്നും" സ്റ്റലിൻ, കരുണാനിധി അനുസ്മരണത്തില്‍ പറഞ്ഞു. 2016ലെ തിരഞ്ഞെടുപ്പിൽ സ്റ്റാലിന്റെ പാർട്ടി ശക്തമായി രാഷ്ട്രീയത്തിൽ ശോഭിച്ചിരുന്നെങ്കിലും കൂടെ നിന്ന ചില പാർട്ടികളുടെ പേരുദോഷം മൂലം അധികാരം ലഭിക്കാൻ സാധിച്ചില്ല. ഡിഎംകെ ജയിക്കാൻ സാധ്യതയുള്ള ചില സീറ്റുകൾ മറ്റു പാർട്ടികൾക്ക് വീതിക്കേണ്ടിയും വന്നു. കൂടുതൽ സീറ്റുകളിൽ മത്സരിച്ചിരുന്നുവെങ്കിൽ അത്തവണ അധികാരം പിടിക്കാൻ പ്രയാസമില്ലായിരുന്നു. ജയലളിത എല്ലാ വിധ തിരഞ്ഞെടുപ്പ് തന്ത്രങ്ങൾ പ്രയോഗിക്കുകയും ചെയ്തു.

നിശ്ചലനായി കിടക്കുന്ന തന്റെ ലീഡറും അപ്പനുമായിരുന്ന കരുണാനിധിയുടെ ഭൗതിക ശരീരത്തെ നോക്കി വിലപിച്ചുകൊണ്ടു കവിയായ മകൻ 'സ്റ്റലിൻ' തമിഴിൽ ഒരു കവിത രചിക്കുകയും പാടുകയും ചെയ്തിരുന്നു. കവി പാടിയ ആത്മാവിൽ നിറഞ്ഞ ഗീതങ്ങളുടെ ചുരുക്കമിങ്ങനെ, "അപ്പാ! ഒരിക്കൽ മാത്രം, ഈ നിമിഷം മാത്രം ഞാൻ അങ്ങയെ 'അപ്പാ' എന്ന് വിളിക്കട്ടെ. എന്റെ പ്രിയപ്പെട്ട 'ലീഡർ', ഞാൻ എന്നും അങ്ങയെ അങ്ങനെ വിളിച്ചിരുന്നു! അങ്ങ് എവിടെ പോയിരുന്നെങ്കിലും എവിടെയാണ്,  പോവുന്നതെന്നു ഞങ്ങളെ അറിയിക്കുമായിരുന്നു. എന്നാൽ, യാതൊന്നും പറയാതെ ഞങ്ങളിൽനിന്നും ഇന്ന് യാത്രയായിരിക്കുന്നു. എന്റെ മനസും ശരീരവും ഹൃദയ വികാരങ്ങളും എന്നും അങ്ങേയ്ക്കൊപ്പം പ്രവർത്തിച്ചിരുന്നു. ഇന്ന് ഞങ്ങളെയെല്ലാം നിത്യം അനാഥരാക്കി അവിടുന്ന് എവിടേക്കാണ് യാത്രയായതെന്നും അറിയില്ല. മുപ്പത്തിമൂന്നു വർഷങ്ങൾക്കു മുമ്പ് അങ്ങ് കുറിച്ച വാക്കുകൾ ഞാൻ ഓർമ്മിക്കുന്നു. 'വിശ്രമമില്ലാതെ യാതൊരുവൻ കഠിനാധ്വാനം ചെയ്യുന്നുവോ അവൻ ഇവിടെ വിശ്രമിക്കട്ടെ.' അങ്ങയുടെ ഓർമ്മയ്ക്ക്‌ മുമ്പിൽ അങ്ങ് പറഞ്ഞ താത്വികമായ ഈ വാക്കുകൾ  എന്നും അങ്ങേക്കായി ഇവിടെ മുദ്രണം ചെയ്യുന്നു.

തമിഴ് സമൂഹത്തിനുവേണ്ടി, അവരുടെ നന്മക്കുവേണ്ടി വിശ്രമമില്ലാതെ ജോലിചെയ്ത അങ്ങ് പോയത് പൂർണ്ണമായും ആത്മാവിനുള്ളിൽ സംതൃപ്തിയോടെയോ! തൊണ്ണൂറ്റിയഞ്ചാം വയസിൽ എൺപതു വർഷത്തെ പൊതു ജീവിതത്തിനു ശേഷം അങ്ങ് യാത്രപറഞ്ഞത്, അങ്ങയുടെ കർമ്മമാർഗങ്ങളിൽക്കൂടി മറ്റുള്ളവരും അങ്ങയെ പിന്തുടരാനോ? കഴിഞ്ഞ ജൂൺ മൂന്നാംതിയ്യതി തൊണ്ണൂറ്റിയഞ്ചാം ജന്മദിനത്തിൽ തിരുവാരൂരിന്റെ മണ്ണിൽവെച്ച് 'അങ്ങയുടെ പകുതി ഊർജവും ശക്തിയും എനിക്ക് തരൂവെന്ന്' ഞാൻ  ചോദിച്ചു. ലീഡറെ! ഇന്നും ഞാൻ അതുതന്നെ ആവർത്തിക്കുന്നു, 'ആ ശക്തിയും അങ്ങ് ആവഹിച്ചിരിക്കുന്ന അണ്ണായുടെ ഹൃദയ ശുദ്ധിയും എനിക്കും തരുമോ!'

അങ്ങയുടെ സാക്ഷാൽക്കരിക്കാത്ത സ്വപ്നങ്ങൾ ഞങ്ങൾ യാഥാർഥ്യമാക്കും. തുടക്കമിട്ട ലക്ഷ്യങ്ങളും പൂർത്തികരിക്കും. ഞങ്ങളുടെ പ്രിയങ്കരനായ നേതാവേ, അങ്ങ് കാണിച്ച വഴികളിൽക്കൂടി ഇനി വരാനിരിക്കുന്ന അടുത്ത നൂറു വർഷങ്ങളും നമ്മുടെ ഭാഷയുടെയും സംസ്ക്കാരത്തിന്റെയും കെട്ടുറപ്പിനായി, അർപ്പിത മനോഭാവത്തോടെ ഞങ്ങൾ പ്രവർത്തിക്കും. ഇത് സത്യം! അങ്ങയെ 'അപ്പാ അപ്പാ' എന്നു വിളിക്കുന്നതിന്‌ പകരം 'ലീഡർ, ലീഡർ' എന്നാണ് എന്നും ഞാൻ വിളിച്ചിരുന്നത്. എന്നാൽ ഇന്ന് ഒരു പ്രാവിശ്യം മാത്രം 'അപ്പാ എന്റെ ലീഡർ' എന്നു ഞാൻ വിളിക്കട്ടെ."

കരുണാനിധിയെപ്പോലെ സ്റ്റലിനും ജനപിന്തുണയുള്ള നേതാവാകാൻ സാധിക്കുമോ? കരുണാനിധിയുടെ കഥയിൽ വെറും ദരിദ്രാവസ്ഥയിൽ നിന്നും ധനികനായ ചരിത്രമാണുള്ളത്. സിനിമാ ലോകവും തമിഴ്‌നാടിന്റെ രാഷ്ട്രീയവും അദ്ദേഹത്തിൻറെ ഉയർച്ചകൾക്ക് ചവിട്ടുപടികളായി മാറി. സ്റ്റലിന് കരുണാനിധിയെപ്പോലെ വ്യക്തിപ്രഭാവമുള്ള രാഷ്ട്രീയ നേതാവാകാൻ സാധിക്കില്ല. തമിഴ് നാട്ടിലെ ഭൂരിഭാഗം ജനത വിശ്വസിക്കുന്നത് ഡിഎംകെ മൊത്തമായി അഴിമതികൾ നിറഞ്ഞിരിക്കുന്നുവെന്നാണ്. അത്തരം കാഴ്ചപ്പാടുകൾ നീക്കം ചെയ്‌താൽ മാത്രമേ സ്റ്റലിന് ഒരു രാഷ്ട്രീയ ഭാവിയുള്ളൂ. കഴിഞ്ഞ നാൽപ്പതു വർഷം പാർട്ടിക്കുവേണ്ടി പ്രവർത്തിച്ചുവെന്നുള്ള നേട്ടം സ്റ്റലിനുണ്ട്. അദ്ദേഹം ചെന്നൈ നഗരത്തിന്റെ മേയറായിരുന്നു. വിവിധ ഭരണ സംവിധാനങ്ങളിൽ നേതൃത്വം വഹിച്ചിട്ടുണ്ട്.

With Annadurai 

ഓണവും ആഘോഷങ്ങളും പൗരാണിക സങ്കൽപ്പങ്ങളും

ജോസഫ് പടന്നമാക്കൽ 

ഓണം, കേരള ജനതയുടെ പാരമ്പര്യമായ മഹോത്സവവും വിശുദ്ധമായി കൊണ്ടാടുന്ന ഒരു സാമൂഹിക ആചാരവുമാണ്. മലയാളികളുടെ മനം കവരുന്ന ഏറ്റവും വലിയ ആഘോഷമാണിത്. ജാതി മത ഭേദ മേന്യേ മനുഷ്യരെല്ലാം ഒന്നാണെന്നുള്ള സങ്കൽപ്പമാണ് ഓണത്തിന്റെ സന്ദേശത്തിലുള്ളത്. ലോകത്തുള്ള നാനാവിധ സംസ്ക്കാരങ്ങളിൽ ജീവിക്കുന്ന എല്ലാ മലയാളികളും മഹാബലിയെ ഹൃദയപൂർവം കൈനീട്ടി സ്വീകരിക്കുന്നു. ചരിത്രവഴികളിൽക്കൂടി തന്നെ മഹാബലിയുടെ ചൈതന്യം കേരള ജനതയുടെമേൽ നിത്യവും പ്രകാശിക്കുകയും ചെയ്യുന്നു. മഹാബലിയുടെ കാലത്ത് മനുഷ്യരെല്ലാം ഐശ്വര്യത്തിലും സത്യത്തിലും ശാന്തിയിലും ജീവിച്ചുവെന്ന സങ്കൽപ്പമാണുള്ളത്.

മലയാളം കലണ്ടറിൽ കൊല്ലവർഷം ആദ്യത്തെ മാസമായ ചിങ്ങമാസത്തിലാണ് ഓണാഘോഷ പരിപാടികൾ ആഘോഷിക്കാറുള്ളത്. പത്തു ദിവസം ആഘോഷമാണ് ഓണത്തിനുള്ളത്. അത്തം മുതൽ തുടങ്ങുന്ന പരിപാടി പത്താം ദിവസം തിരുവോണത്തിൽ അവസാനിക്കുന്നു. ഓണം ആഘോഷിക്കുന്നതിൽക്കൂടി ഒരു അസുരനായ രാജാവിനെ ആദരിക്കുകയും സ്വാഗതം ചെയ്യുകയും ചെയ്യുന്നു. ഐതിഹ്യ കഥയനുസരിച്ച് തിരുവോണമെന്നാൽ മഹാബലിയുടെ ആത്മാവ് കേരളം ഒന്നാകെ തന്റെ പ്രിയപ്പെട്ട പ്രജകളെ സന്ദർശിക്കാൻ വന്നെത്തുന്നുവെന്നുള്ളതാണ്. ഓരോ തരം നിറമാർന്ന ആഘോഷങ്ങൾ വഴി അദ്ദേഹത്തെ കേരളമൊന്നാകെ സ്വീകരിക്കുന്നു.

പഴങ്കാലങ്ങളിലുണ്ടായിരുന്ന ഓണവും ആധുനിക കാലങ്ങളിലെ ഓണവും തമ്മിൽ വളരെയേറെ വ്യത്യാസങ്ങൾ ഉണ്ട്. ഒരു പക്ഷെ കുട്ടിക്കാലത്ത് നാം പഠിക്കുന്ന വേളയിൽ പ്രതീക്ഷകളോടെ കാണുന്ന ദിനങ്ങൾ പത്തു ദിവസമുള്ള ഓണ അവധിയായിരിക്കും. അതിനുമുമ്പ് ഓണപ്പരീക്ഷയെന്ന ഒരു കടമ്പയും കടന്നാലേ ആ വർഷമുള്ള ക്ലാസ് കയറ്റത്തിന് അർഹമാകുമായിരുന്നുള്ളൂ. പരീക്ഷയിൽ പലതും കാണാപാഠം പഠിക്കാനുള്ള ശ്രമത്തിനു ശേഷമുള്ള ഓണ അവധി കുട്ടികളുടെ മനസിന് ഉന്മേഷം നൽകുമായിരുന്നു.

അക്കാലത്തെ ഗ്രാമത്തിലെ ചെറു റോഡുകൾ മുഴുവൻ പൊടിപടലങ്ങൾ നിറഞ്ഞതായിരുന്നു.  കാളവണ്ടികൾ ധാരാളം പൊതുനിരത്തിൽക്കൂടി ഓടിയിരുന്നു. അതിരാവിലെ എഴുന്നേറ്റു കുട്ടികൾ   കുട്ടയിൽ ചാണകം പെറുക്കുന്ന കാഴ്ചകളും പതിവായിരുന്നു. കാറുകൾ വളരെ വിരളം. ചരക്കു ലോറികളും റോഡുകളിൽ കാണാമായിരുന്നു. ബസുകൾ ദിവസത്തിൽ മൂന്നോ നാലോ പ്രാവിശ്യം ഓടിയെങ്കിലായി. കാൽ നടക്കാരായിരുന്നു അധികവും. കുട്ടി നിക്കറും ഇട്ടുകൊണ്ട് സൈക്കിൾ ടയറും ഉരുട്ടി അന്നത്തെ ഗ്രാമത്തിലെ റോഡുകളിൽക്കൂടി ഓടിക്കുന്നതും മനസിൽക്കൂടി പാഞ്ഞെത്തുന്നുണ്ട്. വഴികളിൽ ഒരു ജീപ്പ് കണ്ടാൽ അതിന്റെ പുറകേയോടുന്ന കുട്ടിക്കാലവും ഓർമ്മയിലുണ്ട്. ജീപ്പുകളിലും ഉന്തുവണ്ടികളിലും ലൗഡ് സ്പീക്കറുടെ സഹായത്തോടെ സിനിമാ പരസ്യമായി നോട്ടീസുകൾ വിതരണം ചെയ്യുമ്പോൾ അത് ലഭിക്കാനുള്ള ഓട്ടവും ഗ്രാമീണ ബാലന്മാരുടെ ഹരമായിരുന്നു. പരസ്യ വിപണികൾ പ്രാബല്യമല്ലാതിരുന്ന അക്കാലത്ത് ചെണ്ട കൊട്ടിക്കൊണ്ടു ഓണ സിനിമാ നോട്ടീസുമായി വഴികളിൽ എത്തുന്നവരുടെ കൈകളിൽ നിന്നും നോട്ടീസ് ലഭിക്കുകയെന്നതും വലിയ സന്തോഷത്തിനു ഇടം നൽകിയിരുന്നു.

ഓലപ്പുരകളായിരുന്നു ഭൂരി ഭാഗം പേരുടെയും വീടുകൾ. ഓടിട്ട വീടുകൾ ചുരുക്കം. ഇന്ന് റോഡുകൾ ടാർ ചെയ്തു വീതി കൂട്ടി. കോൺക്രീറ്റ് കെട്ടിടങ്ങൾ നാട് മുഴുവൻ നിറഞ്ഞു കഴിഞ്ഞു. പണ്ടുണ്ടായിരുന്ന നമ്പൂതിരി, ബ്രാഹ്മണ ഇല്ലങ്ങൾ മുഴുവൻ മൺകൂനകൾ പോലെ ഇടിഞ്ഞു പൊളിഞ്ഞു. അനന്തരാവകാശികൾ പഴയ ഇല്ലങ്ങൾക്കൊന്നും ഇല്ലാതായി. പലരുടെയും 'ആൽ മരങ്ങൾ' നട്ടുവളർത്തിയിരുന്ന തറകൾ കോൺക്രീറ്റ് കെട്ടിടങ്ങൾക്കുള്ളിലായി. നെൽപ്പാടങ്ങൾ കൃഷികൾ ഇറക്കാതെ വരണ്ട ഭൂമികളായി തീർന്നു. ശുദ്ധജലം നിറഞ്ഞു നിന്നിരുന്ന തെളിമയാർന്ന അമ്പലക്കുളങ്ങളുടെ പവിത്രതയും ഇല്ലാതായി. അക്കാലത്തുണ്ടായിരുന്നവരിൽ ഭൂരിഭാഗവും യാഥാസ്ഥിതികരായിരുന്നു. അവർ പരസ്പ്പരം സ്നേഹിച്ചിരുന്നു. മൂക്കുത്തി പൂവും ചെമ്പരത്തി പൂവും പറിക്കാൻ പെൺകുട്ടികൾ ഓടി നടക്കുമായിരുന്നു. എവിടെ നോക്കിയാലും മലരണിക്കാടുകൾ തിങ്ങി നിറഞ്ഞിരുന്നു. നെറ്റിയിൽ ചന്ദനവും ചാർത്തി കൈകളിൽ പ്രസാദവുമായി ഓണപ്പുടവയും ഉടുത്തുകൊണ്ടു നീണ്ട, പിന്നിയ, കാർകൂന്തലുമായി അമ്പലത്തിൽ നിന്നും ഇറങ്ങിവരുന്ന തരുണിമാർ കേരളനാടിനൊന്നാകെ അലങ്കാര ഭൂഷണമായിരുന്നു.

മഹാവിഷ്ണുവിന്റെ അവതാരമായ വാമനന്റെയും അസുര രാജാവായ മഹാബലിയുടെയും ഐതിഹ്യ കഥയെ അടിസ്ഥാനമാക്കിയാണ് കേരള ജനത ഓണം ആഘോഷിച്ചു വരുന്നത്. എന്നാൽ ഭാഗവതത്തിലെ വാമനനും മഹാബലിയുമായി ഓണാഘോഷങ്ങൾക്ക് ബന്ധം കാണുന്നില്ല. മഹാവിഷ്ണുവിന്റെ അവതാരമായ വാമനനെ ഒരു വില്ലന്റെ രൂപത്തിലാണ് മലയാളികൾ സങ്കൽപ്പിച്ചിരിക്കുന്നത്. ഓണാഘോഷങ്ങൾ പുരാണത്തിലെ താത്ത്വിക ചിന്തകളുമായി വളരെയധികം അകന്നു നിൽക്കുന്നു.

ഓണം മഹാബലിയെന്ന ഒരു പരിത്യാഗചക്രവർത്തിയുടെ ഓർമ്മയ്ക്കായുള്ളതാണ്. ഇതിഹാസപുരുഷനായ മഹാബലിയെ കേരള ജനത അത്യധികം ആദരവോടെ ബഹുമാനിക്കുന്നു. മഹാബലിയെ സമർപ്പണത്തിന്റെയും സഹനത്തിന്റെയും ത്യാഗത്തിന്റെയും പ്രതീകമായി കണക്കാക്കുന്നു. മലയാളികളെല്ലാം ഒന്നാണെന്നുള്ള ഒരു സാമൂഹിക ബോധം ഓണം ആഘോഷിക്കുന്നതിൽക്കൂടി ലഭിക്കുന്നു. ജനമനസുകളിൽ ചൈത്യന്യം മുറ്റിനിൽക്കുന്ന ആദ്ധ്യാത്മിക ചിന്തകളും പുഷ്ടിപ്പെടുത്തുന്നു. എന്നാൽ വിദേശ പണ്ഡിതരുടെ കൃതികളിൽ ഓണത്തിന് അദ്ധ്യാത്മികമായ പ്രാധാന്യമൊന്നും കല്പിച്ചിരുന്നില്ല. അവർ ഓണത്തെ കൊയ്ത്തുകാല ഉത്സവമായി മാത്രമേ കരുതിയിരുന്നുള്ളൂ.

ഒരു ശരിയായ ഭക്തൻ ദൈവത്തെ ഭയപ്പെടില്ല. കാരണം, ഭാരത സംസ്ക്കാരവും വൈദിക തത്ത്വങ്ങളും അദ്വൈതവും പഠിപ്പിക്കുന്നത് 'ഞാനും ദൈവവും ഒന്നാണെ'ന്നാണ്. 'അതായത് 'തത് ത്വം അസി'. (അത്) ബ്രഹ്മം നീ തന്നെ. വാഗ്ദാനങ്ങൾ മഹാബലിക്ക് പാലിക്കാൻ സാധിച്ചില്ല. മൂന്നടി സ്ഥലവും നൽകാൻ സാധിച്ചില്ല. മഹാവിഷ്ണു മഹാബലിയെ അനുഗ്രഹിച്ചു. മഹാബലിയുടെ മനസ് സ്വർഗത്തോളം ഉയർത്തി. ഭാഗവതത്തിൽ മഹാബലിയെപ്പറ്റി വിവരിച്ചിരിക്കുന്ന കഥയിൽ മഹത്തായ ഒരു തത്ത്വത്തെ അവിടെ വിലയിരുത്തുന്നു.

മഹാബലിയിൽ സ്വാർത്ഥത പരിത്യജിച്ചിരിക്കുന്നു. ധനവും സന്തോഷവും ഒരു പോലെ ചുറ്റുമുള്ളവർക്കായി വീതിക്കുന്നു. ഒരുവന്റെ ഹൃദയ വിശാലമായ മനസാണ് ലോകത്തിലേക്കും വെച്ച് വലിയ ധനമെന്നു മഹായാഗം നടത്തിയ മഹാബലിയിൽക്കൂടി നാം പഠിക്കുന്നു. മനസ്സ് നഷ്ടപ്പെടുന്നുവെങ്കിൽ നമുക്കെല്ലാം നഷ്ടപ്പെടുന്നു. മനസിനെ പുഷ്ടിപ്പെടുത്തുന്നുവെങ്കിൽ നാം എല്ലാം നേടുന്നു. ദൃഢമായ മനസോടെയുള്ള മഹാബലി ഒരിക്കലും തന്റെ മനസിന്റെ താളനില തെറ്റാൻ അനുവദിച്ചിരുന്നില്ല. ഔചിത്യമേറിയ ഈ പഠനം കാലത്തിനനുസരിച്ചും പ്രസക്തമാണ്. കാരണം ഭൂരിഭാഗം പേരും നമ്മുടെ മനസിന്റെ ശക്തിയെ ഗ്രഹിക്കുന്നില്ല. മനസെന്ന മായാ ചിന്തകളെ ഭയപ്പെടുന്നു. ദൈവം നമ്മോടൊപ്പം ഉണ്ടെന്ന് മതങ്ങൾ നമ്മെ പഠിപ്പിക്കുന്നു. നമ്മുടെ ബുദ്ധിയും വിവേകവും അറിവും സ്വരൂപിച്ച് മനസിനെ ദൃഢമാക്കുക, ശക്തമാക്കുക എന്ന സന്ദേശമാണ് മഹാബലിയുടെ ത്യാഗത്തിൽക്കൂടി മനസിലാക്കേണ്ടത്. അതിനെ ദൈവിക വരദാനമെന്നു പറയാൻ സാധിക്കുന്നു.

പ്രത്യേകമായ ഒരു കാഴ്ചപ്പാടോടെ ജീവിതത്തെ ദർശിക്കാനും മഹാബലി പഠിപ്പിക്കുന്നു. 'മഹാബലി സ്വയം ദൈവത്തിന് അർപ്പിതമായപ്പോൾ ദൈവവുമായി ഐക്യം പ്രാപിച്ചു 'ഏകതാ'  കൈവരിക്കുകയായിരുന്നു. അവിടെ മനസും ദൈവവും ഒന്നാകുന്നു. പിന്നീട് പിന്തിരിയാൻ പാടില്ല. കഴിഞ്ഞതിനെപ്പറ്റി പരിതപിക്കുകയും അരുത്. അങ്ങനെയെങ്കിൽ നമ്മുടെ മനസുകൾ മുമ്പോട്ട് ചലിച്ചുകൊണ്ടിരിക്കും. അപ്പോൾ നാം കണ്ടെത്തുന്ന പരമ സത്യത്തെയാണ് ദൈവമെന്നു പറയുന്നത്.' (റഫ്: സ്വാമി ഉദിത് ചൈതന്യ പ്രഭാഷണങ്ങൾ)

ഓണത്തിന് വ്യത്യസ്ത വ്യാഖ്യാനങ്ങളും ഐതിഹ്യ കഥകളും വിദേശികൾ സൃഷ്ടിച്ചുവെന്നു ചില ഹിന്ദു പണ്ഡിതർ അഭിപ്രായപ്പെടുന്നു. അസുര, ദ്രാവിഡ കുലങ്ങൾക്കെതിരെയുള്ള ബ്രാഹ്‌മണ മേധാവിത്വത്തെ പുച്ഛിച്ചു തള്ളുന്നതിന് വിദേശികൾ വാമനന്റെ കഥ മനഃപൂർവം സൃഷ്ടിച്ചതുമാകാം! അവിടെ ഒരു കുരുടൻ ബ്രാഹ്മണനായ വാമനനെ കഥാപാത്രമായി സൃഷ്ടിച്ചിരിക്കുന്നു. അസുര രാജാവായ മഹാബലിയെ പാതാളത്തിലേക്ക് ശിക്ഷിച്ചയച്ചെന്ന കഥ പ്രചരിപ്പിക്കാനാണ് വിദേശികൾ ശ്രമിച്ചത്. ഒരു പക്ഷെ ഇത് കേരള സംസ്ക്കാരത്തിന് തന്നെ അപമാനകരമായ കഥയായി കരുതുന്നു. മഹാബലിയുടെ മഹത്തായ ത്യാഗത്തെ അപകീർത്തിപ്പെടുത്തുകയും അതോടൊപ്പം ദൈവമായ മഹാവിഷ്ണു അവതാരത്തെ പരിഹസിക്കുകയും ചെയ്യുന്ന രീതികളിലുള്ള വിശ്വാസമാണ് കേരളജനതയ്ക്കുള്ളത്.

വൈഷ്‌ണവ പുരാണം അനുസരിച്ച് മഹാബലി എന്ന അസുരദേവൻ ദൈവങ്ങളെ തോൽപ്പിച്ച് മൂന്നു ലോകങ്ങളെയും കീഴടക്കി അധികാരം കയ്യടക്കിയെന്നുള്ളതാണ്. ചക്രവർത്തി മഹാബലിയുടെ പ്രസിദ്ധി വർദ്ധിക്കുന്നതിൽ ദൈവങ്ങൾ ആകുലരായിരുന്നു. ദേവ ഗണങ്ങൾ ഒന്നിച്ചു കൂടി മഹാവിഷ്ണുവിനോട് അസുര ദേവനായ മഹാബലിയെ കീഴ്പ്പെടുത്താൻ സഹായം അഭ്യർത്ഥിച്ചു. വിഷ്ണു, ദേവ ഗണങ്ങളെ സഹായിക്കാമെന്ന് സമ്മതിച്ചെങ്കിലും മഹാബലിയുമായി ഒരു തുറന്ന യുദ്ധത്തിന് തയ്യാറായിരുന്നില്ല. കാരണം, മഹാബലി മഹാവിഷ്ണുവിന്റെ തികഞ്ഞ ഒരു ഭക്തനായിരുന്നു. ദേവന്മാരെ മഹാബലിക്കെതിരെ ഒരു തുറന്ന യുദ്ധത്തിന് സഹായിക്കുന്നതിനു പകരം വിഷ്ണു ഒരു മുണ്ടനായ സാധു ബ്രാഹ്മണന്റെ രൂപത്തിൽ രൂപാന്തരം പ്രാപിച്ചു. അത് വിഷ്ണുവിന്റെ വാമനാവതാരമായി അറിയപ്പെടുന്നു. കുറിയവനായ ഈ ബ്രാഹ്മണൻ മഹാബലിയെ സന്ദർശിച്ചുകൊണ്ടു ആഗ്രഹങ്ങൾ അറിയിച്ചു. മൂന്നു കാൽപ്പാദങ്ങളുടെ വിസ്തൃതിയിലുള്ള സ്ഥലമാണ് മഹാബലിയോട് ആവശ്യപ്പെട്ടത്. മഹാബലി ബ്രാഹ്മണന്റെ ആഗ്രഹങ്ങൾക്കു കീഴ്വഴങ്ങി സ്ഥലം അളന്നെടുത്തുകൊള്ളാൻ പറഞ്ഞു. പരമശക്തനായ അവതാര മൂർത്തി ദൈവത്തിനോടാണ് ഈ ഇടപാട് നടത്തുന്നതെന്ന കാര്യം മഹാബലിക്ക് വ്യക്തമല്ലായിരുന്നു. ഇതാണ് തൃപ്പൂണിത്തറയിൽ നിന്നാരംഭിക്കുന്ന 'അത്തം' എന്ന ആഘോഷത്തിന്റെ ആരംഭം. അവിടെ മഹാബലിയുടെ ഔദാര്യ മനസിനെ പരീക്ഷിക്കാൻവന്നെത്തിയ വാമനനെയും ആദരിക്കുന്നു.

വാമനരൂപത്തിൽ വന്ന കുറിയവനായ ബ്രാഹ്മണൻ മഹാബലിയുടെ സാന്നിദ്ധ്യത്തിൽ വളരാൻ തുടങ്ങി. വാമനൻ രണ്ടു കാൽപ്പാദങ്ങൾ പൊക്കി ചുവടുവെച്ചപ്പോഴേക്കും പാദങ്ങളുടെ വളർച്ച മഹാബലിയുടെ രാജ്യാതിർത്തിയോളമായി. സ്ഥലം തികയാഞ്ഞതിനാൽ മൂന്നാമത്തെ ചുവടുകൾ വെക്കാനായി മഹാബലി തന്റെ തലയെ വാമനന്റെ മുമ്പിൽ അർപ്പിച്ചു കൊടുത്തു. അങ്ങനെ വാമനൻ സമ്മതിക്കുകയും തന്റെ കാൽപ്പാദങ്ങൾ മഹാബലിയുടെ തലയിൽ വെച്ചു പാതാളത്തിലേക്ക് അയക്കുകയും ചെയ്തു. മഹാബലിയുടെ വിഷ്ണു ഭക്തി മൂലം അദ്ദേഹത്തെ വർഷത്തിൽ ഒരിക്കൽ തന്റെ രാജ്യത്തുള്ള പ്രജകളെ സന്ദർശിക്കാനുള്ള അനുവാദം വിഷ്ണുരൂപമായ വാമനൻ നൽകുകയും ചെയ്തു.

മഹാബലിയെ അവതരിപ്പിക്കുന്നത് ഔദാര്യ നിധിയും സാമൂഹിക വിപ്ലവകാരിയുമായ ഒരു രാജാവായിട്ടാണ്. അദ്ധ്യാത്മികതയുടെ പരിപൂർണ്ണതയിൽ ഭൗതികമായി തനിക്കുള്ളതെല്ലാം, താൻ നേടിയതെല്ലാം ഈശ്വരന് മഹാബലി അർപ്പിക്കുന്നു. അവസാനം സ്വയം മഹാവിഷ്ണുവിന്റെ പാദത്തിങ്കൽ മഹാബലി വീഴുകയാണ് ചെയ്യുന്നത്. ഇവിടെ വേഷപ്രച്ഛന്നനായ ദൈവത്തെ കാപട്യത്തിന്റെ മുഖമാണ് കാണിക്കുന്നതെങ്കിലും മഹാബലി ദൈവമാകുന്ന സത്യത്തെ തിരിച്ചറിയുകയാണ് ചെയ്യുന്നത്. അദ്ദേഹം ഭയരഹിതനായി, ധീരതയോടെ മഹാവിഷ്ണുവിന്റെ മുമ്പിൽ പാദങ്ങളെ നമസ്ക്കരിച്ചു ബലിയായി തീർന്നു. ഒരു അസുരൻ എന്നതിൽ ഉപരി മഹാബലി പ്രജാ വാത്സല്യം ഉള്ളവനും ഔദാര്യ നിധിയും, സർവ്വരോടും ദയ പ്രകടിപ്പിക്കുന്ന രാജാവുമായിരുന്നു. അദ്ദേഹത്തിൻറെ ഭരണകാലം കേരളത്തിലെ സുവർണ്ണ കാലമെന്നു കണക്കാക്കുന്നു. അതുകൊണ്ടാണ് അദ്ദേഹത്തിൻറെ മടങ്ങി വരവിനെ ആഘോഷമായി തലമുറകളായി കേരളജനത കൊണ്ടാടുന്നത്.

'വാമന' എന്ന വാക്ക് കേരളസംസ്ക്കാരവുമായി ഒത്തുപോവുന്നതും വളരെയധികം പ്രാധാന്യം അർഹിക്കുന്നതുമാണ്. വാമന എന്ന പദത്തിൽ കാലവും ധ്വാനിക്കുന്നു. നന്മയും തിന്മയും കാലത്തിൽ അടങ്ങിയിട്ടുണ്ട്. അതുകൊണ്ടു ഓരോ വ്യക്തിയിലും വാമനൻ ചുറ്റപ്പെട്ടിട്ടുണ്ട്. അതായത് 'വാ' എന്നാൽ കൊണ്ട് വരുക, മനം എന്നാൽ അനുഭവ ജ്ഞാനം അല്ലെകിൽ സ്വാനുഭവം എന്നുമാകാം. ജ്ഞാനം നമ്മിൽ ആവഹിക്കട്ടെയെന്ന അർത്ഥധ്വാനി ഈ വാക്കിൽ പ്രതിഫലിക്കുകയും ചെയ്യുന്നു. ശ്രീമദ് ഭാഗവതത്തിൽ മഹാബലിയെ ശിക്ഷിച്ചുവെന്ന് പറഞ്ഞിട്ടില്ല. പാതാളത്തിൽ അയച്ചെന്നും സൂചിപ്പിച്ചിട്ടില്ല. വാമനനെയും മഹാബലിയെയും ഒന്നുപോലെ ആദരിക്കുന്ന ഒരു മഹോത്സവമായി ഓണത്തെ കരുതണമെന്നുള്ള അഭിപ്രായങ്ങളും നവീകരണ ഹിന്ദുക്കളിൽ ശക്തമാകുന്നുണ്ട്. ഓണ സദ്യയും ഓണക്കളികളും സാമൂഹികമായി നാം ഒന്നാണെന്നുള്ള ബോധം ജനിപ്പിക്കുന്നു. പൂക്കൾ കൊണ്ടുള്ള നിരകൾ നിരവധി മനസുകളെ സൂചിപ്പിക്കുന്നു. അതെല്ലാം ഒരേ ദൈവത്തിന്റെ പ്രതിഫലനങ്ങളാണ്. സമൂഹം ഒറ്റക്കെട്ടായി നിൽക്കുമ്പോൾ അതിൽ ഒരു മനോഹാരിതയുണ്ട്. അങ്ങനെ ഓണം എന്നുള്ളത് വൈവിധ്യങ്ങളിൽ 'ഏകതാ' മനോഭാവം സൃഷ്ടിക്കുന്നു.

കൊച്ചിയിലുള്ള തൃക്കാക്കര അമ്പലം വാമനന്റെ പേരിൽ പ്രതിഷ്ഠിച്ചിട്ടുള്ളതാണ്. കൊടി മരം ഉയർത്തലോടെ അവിടെ ആഘോഷങ്ങൾ ആരംഭിക്കുന്നു. കൂടെ കൂത്താട്ടങ്ങളും പ്രാചീന രീതികളിലുള്ള ഡാൻസുകളും ഉണ്ടായിരിക്കും. വാമനനെ ഡ്രസ്സുകൾ അണിയിച്ചുകൊണ്ടു എഴുന്നള്ളിക്കുന്ന ചടങ്ങുകളുമുണ്ട്. 'പുലിക്കളി' ജനക്കൂട്ടത്തെ ആകർഷിക്കുന്ന പ്രസിദ്ധമായ ഒരു ഓണക്കളിയാണ്.

ഒരുവനു ദൃഢമായ മനസ്സുണ്ടെങ്കിൽ അവന്റെ മനസ് സദാ ചലിക്കുന്നത് ദൈവത്തിങ്കലേക്കെങ്കിൽ സമയമാകുമ്പോൾ ഓരോരുത്തരും ആദരണീയരാകും. നാം തന്നെ ദൈവത്തോളം ഉയരും. അതുകൊണ്ടു നമ്മുടെ മനസ്സ് മഹാബലിയെപ്പോലെ ദൈവികമായി ചലിക്കട്ടെയെന്നും ഹൈന്ദവ ഗുരുക്കളുടെ പ്രസംഗങ്ങളിൽ കേൾക്കാം. സ്വാർത്ഥതയും അഹങ്കാരവും നമ്മിൽ കുടികൊള്ളുന്നുണ്ടെങ്കിൽ അങ്ങനെയുള്ള മനസ് അപമാനിതരാകും. സമൂഹം തിരസ്ക്കരിക്കും. നേരെ മറിച്ച് ചുറ്റുമുള്ളവരും നമ്മുടെ മനസിനെ ബഹുമാനിക്കണമെങ്കിൽ മഹാബലിയെപ്പോലെ ലളിതവും മനോഹരവുമായ ജീവിതം പടുത്തുയർത്തേണ്ടതായുമുണ്ട്.

തങ്ങളുടെ പ്രിയപ്പെട്ട സുവർണ്ണ കാലത്തെ രാജാവിനെ സ്വീകരിക്കാനായി ജനങ്ങൾ വീടുകൾ തോറും പൂക്കളം ഉണ്ടാക്കുന്നു. ഓണസദ്യകൾ നടത്തുന്നു. പാരമ്പര്യമായുള്ള ഡാൻസ്, കൂത്തുകളികൾ, നാടൻ പാട്ടുകൾ മുതലായവകൾ ആഘോഷങ്ങളുടെ ഭാഗമാണ്. പലതരം കായിക വിനോദങ്ങൾ സംഘടിപ്പിച്ച് ഓണക്കളി ഗംഭീരമാക്കുന്നു. ഇന്നും പ്രജകൾ ഐശ്വര്യത്തിലും സന്തോഷത്തിലും ജീവിക്കുന്നുവെന്ന് മഹാബലിയെ അറിയിക്കുന്നതിനുവേണ്ടിയാണ് ഈ ആഘോഷങ്ങളെല്ലാം സംഘടിപ്പിക്കുന്നത്.  ഓണസദ്യയാണ് ഇതിൽ ജനങ്ങളെ കൂടുതലായും ആകർഷിക്കുന്നത്. സദ്യയിൽ ചോറ്, സാമ്പാർ, അവിയൽ, രസം, പായസം മുതലായവകൾ തിരുവോണം നാളിൽ വിളമ്പുന്നു.

'അത്തം' നാളോടെയാണ് ഓണം ആരംഭിക്കുന്നത്. പിന്നീട് പത്തു ദിവസങ്ങൾ ഒരു ഹിന്ദുവിനെ സംബന്ധിച്ചിടത്തോളം പവിത്രങ്ങളായ ദിനങ്ങളാണ്. രാവിലെ കുളിച്ച് അമ്പലത്തിൽ പോവുന്നു. മഹാബലി പാതാളത്തിലേക്ക് പോവുന്ന ഒരുക്കങ്ങളുടെ ആരംഭമായിട്ടാണ് അത്തം നാളുകൾ ആഘോഷിക്കുന്നത്. കേരളം മുഴുവൻ ഈ ദിവസത്തെ അത്തച്ചമയമെന്നു പറയും. കൊച്ചിക്കടുത്തുള്ള തൃപ്പുണിത്തറയിൽ നിന്ന് ഒരു ആഘോഷയാത്ര അന്നേ ദിവസമുണ്ടാകും. മഹാബലി ഈ ലോകത്തിൽ നിന്ന് അപ്രത്യക്ഷ്യമായത് ഈ ദിവസമാണെന്ന് കണക്കാക്കുന്നു. അത്തം നാളുകൾ മുതലാണ് പൂക്കൾ കൊണ്ടുള്ള കളങ്ങൾ ഉണ്ടാക്കാനാരംഭിക്കുന്നത്. പിന്നീട് പൂക്കളം ഓരോ ദിവസവും വലുതാകാൻ തുടങ്ങും. മഞ്ഞ പൂക്കളാണ് ഈ ദിവസത്തിൽ ഉപയോഗിക്കാറുള്ളത്. പൂക്കളുകൊണ്ടുള്ള ഡിസൈൻ വളരെ ലളിതമായി നിർമ്മിക്കുന്നു. രണ്ടാം ദിവസം 'ചിത്തിര' നാളിലാണ് വീട് ശുചിയാക്കുന്ന കർമ്മങ്ങൾ ചെയ്യുന്നത്. പൂക്കളത്തിൽ ഒരു രണ്ടാം നിര പൂക്കൾ കൂടി അന്നേ ദിവസം നിരത്തും. മൂന്നാം ദിവസം 'ചോതി' ദിനമായി കണക്കാക്കുന്നു. ചോതിയിൽ പൂക്കളത്തിനെ പല നിലകളാക്കി മനോഹരമാക്കുന്നു. പല തരം പൂക്കളും കളത്തിൽ നിരത്തുന്നു. കുടുംബം മൊത്തം സ്വർണ്ണാഭരണങ്ങളും പുതുവസ്ത്രങ്ങളും മേടിക്കാനായി ഷോപ്പിങ്ങും തുടങ്ങുന്നു. നാലാം ദിവസം 'വിശാഖം' നാളാണ്. ഇത് ഓണം നാളിൽ ഏറ്റവും പരിപാവനമായ ഒരു ദിനമായും കരുതുന്നു. ഓണം സദ്യയുടെ തുടക്കവും കുറിക്കുന്നു. ഓരോ അംഗവും വിഭവങ്ങൾ ഉണ്ടാക്കാൻ സഹകരിക്കുകയും ചെയ്യും. ഓരോ കുടുംബത്തിലും വ്യത്യസ്ത വിഭവങ്ങളാണ് വിളമ്പുന്നതെങ്കിലും 24 തരം ഡിഷുകൾവരെ കുടുംബങ്ങൾ തയ്യാറാക്കാറുണ്ട്. കൃഷി വിഭവങ്ങളുടെ മാർക്കറ്റ് തുറക്കുന്നത് ഈ ദിവസമാണ്. മാർക്കറ്റിൽ അന്ന് ഏറ്റവും തിരക്ക് കൂടിയ ദിവസവും ആയിരിക്കും.

അഞ്ചാം ദിവസമായ 'അനിഴം' നാളിലാണ് സാധാരണ വള്ളം കളി ഉത്സവം ആഘോഷിക്കുന്നത്. ആറാം ദിവസമായ 'ത്രിക്കട്ടയിൽ' പൂക്കളങ്ങളും വിസ്തൃതമാക്കുന്നു. അഞ്ചാറു വിവിധ തരം പൂക്കളുകൂടി അതിനൊപ്പം ചേർക്കുന്നു. കുടുംബങ്ങൾ വന്നു ചേരുകയും സമ്മാനങ്ങൾ കൈമാറുകയും ചെയ്യുന്നു. ഏഴാം ദിവസം 'മൂലം' നാളിൽ ഓരോ കുടുംബങ്ങളിലുമുള്ള ബന്ധുമിത്രാദികൾ പരസ്പ്പരം സൗഹാർദ സന്ദർശനങ്ങൾ നടത്തുന്നു. പാരമ്പര്യമായ സദ്യയും വിളമ്പുന്നു. അമ്പലങ്ങളും ഈ ദിവസത്തിൽ സദ്യകൾ വിളമ്പാറുണ്ട്. പുലിക്കളി, ഡാൻസ്, ചെണ്ടകൊട്ട്, കൂത്താട്ടങ്ങൾ എന്നിവകൾ ഈ ദിവസങ്ങളുടെ പ്രത്യേകതയാണ്. കൈകൊട്ടിക്കളിയും വിവിധ സ്ഥലങ്ങളിൽ കൊണ്ടാടുന്നു. ഊഞ്ഞാൽ കെട്ടുന്നതും ആഘോഷത്തിന്റെ ഭാഗമായിരിക്കും. മഹാബലിയെ സ്വീകരിക്കാൻ വാതിൽക്കൽ പുഷ്പ്പങ്ങൾ വിതറും.

എട്ടാം ദിവസം 'പൂരാടം' നാളിൽ മഹാബലിയുടെയും വാമനനന്റെയും പ്രതിമകൾ കൈകളിലേന്തി വീടിനു ചുറ്റും പ്രദക്ഷിണം നടത്തുന്നു. അതിനുശേഷം പ്രതിമകൾ പൂക്കളത്തിന്റെ നടുഭാഗത്ത് പ്രതിഷ്ഠിക്കുന്നു. അന്നേ ദിവസം മുതലാണ് മഹാബലി ഓരോരുത്തരുടെയും വീടുകൾ സന്ദർശിക്കാറുള്ളത്. പൂക്കളങ്ങളിൽ പ്രതിഷ്ഠിച്ചിരിക്കുന്ന ബിംബങ്ങളെ 'ഓണത്തപ്പൻ' എന്നു വിളിക്കപ്പെടുന്നു. പൂക്കളം വിസ്തൃതമാകുകയും നാനാതരം പൂക്കൾ കൊണ്ട് കളം അലംകൃതമാക്കുകയും ചെയ്യുന്നു. ഒമ്പതാം ദിവസം ഓണത്തിന്റെ 'ഉത്രാടം' നാളാണ്. തിരുവോണത്തിന്റെ സായം ദിനമായി ആ ദിവസത്തെ കണക്കാക്കുന്നു. പച്ചക്കറികൾ വാങ്ങുവാൻ  ഏറ്റവും അനുയോജ്യമായ ദിനവുമാണ്. തിരുവോണത്തിനാവശ്യമുള്ള പഴ വർഗ്ഗങ്ങളും ഉത്രാട ദിവസം വാങ്ങിക്കുന്നു. അതിനടുത്ത ദിവസം നാലു ദിവസത്തോളം മഹാബലി രാജാവ് രാജ്യം മുഴുവൻ കറങ്ങുമെന്ന് പാരമ്പര്യം പറയുന്നു. പ്രജകളെ ആ ദിവസങ്ങളിൽ അനുഗ്രഹിക്കുമെന്നുള്ള വിശ്വാസവും നിലനിൽക്കുന്നു.

'തിരുവോണ'മെന്നു പറയുന്നത് ഓണമാഘോഷത്തിന്റെ അവസാന ദിവസമാണ്. അന്നേ ദിവസം വീടുകൾ വൃത്തിയാക്കുന്നു. പ്രധാന കവാടത്തിൽ അരിപ്പൊടി വിതറിയിടുന്നു. നേരം വെളുക്കുമ്പോഴേ എല്ലാവരും കുളിച്ചണിഞ്ഞൊരുങ്ങും. പാവങ്ങൾക്ക് ധർമ്മം കൊടുക്കും. കുടുംബത്തിലെ മൂത്ത കാരണവത്തി മറ്റുള്ള അംഗങ്ങൾക്ക് പുത്തൻ വസ്ത്രങ്ങൾ സമ്മാനങ്ങളായി കൊടുക്കും. കേരളത്തിന്റെ എല്ലാ പ്രദേശങ്ങളിലും വീടുകളിലും ബിസിനസ്സ് സ്ഥാപനങ്ങളിലും അലംകൃതമായ നിരവധി നിറമാർന്ന വൈദ്യുതി വിളക്കുകൾ തെളിക്കും. വെടിക്കെട്ടും ഉണ്ടാകും. വിഭവ സമൃദ്ധമായ ഓണം സദ്യ വിളമ്പുന്നതും അന്നാണ്. ഗ്രാമപ്രദേശങ്ങളിൽ ഉച്ചകഴിയുമ്പോൾ പാരമ്പര്യമായുള്ള കളികളും ഡാൻസും പാട്ടുകളും കൂത്തും അരങ്ങേറും. ഓണത്തോടനുബന്ധിച്ചുള്ള കായിക കളികൾ, മത്സരങ്ങൾ എന്നിവകൾ സംഘടിപ്പിക്കാറുണ്ട്. തിരുവാതിരക്കളി, കുമ്മാട്ടിക്കളി, പുലിക്കളി മുതലായവകൾ ഓണം നാളിൽ അരങ്ങേറുന്നു. വിശുദ്ധമായ ഈ ദിവസത്തിൽ സ്ത്രീ പുരുഷന്മാർ, കുട്ടികളടക്കം കുളിച്ചു ദേഹശുദ്ധി വരുത്തുന്നതോടെ ഓണം ആഘോഷത്തിന്റെ തുടക്കം കുറിക്കുന്നു. അതിനു ശേഷം പ്രാർത്ഥനകൾ ചൊല്ലും. പൂക്കളത്തിൽ പോയി പുതിയ പുഷ്പങ്ങൾ അർപ്പിക്കും. പുതിയ വേഷങ്ങൾ അണിയുന്നു. സസ്യാഹാര സദ്യക്കായി കുടുംബങ്ങൾ മൊത്തമായി സമ്മേളിക്കുകയും ചെയ്യുന്നു.

ചതിയുടെയും വഞ്ചനയുടെയും അനീതിയുടെയും പ്രതീകമാണ് വാമനൻ എന്ന് മലയാളികൾ കരുതുന്നു. ഉത്തരേന്ത്യൻ സംസ്ക്കാരം ബ്രാഹ്മണനായ വാമനനെ പുകഴ്ത്തുകയും ചെയ്യുന്നു. 'മാവേലി നാട് വാണീടും കാലം മാനുഷ്യരെല്ലാം ഒന്നുപോലെ' എന്നുള്ളത്' മലയാളത്തിലെ പ്രസിദ്ധമായ ഒരു നാടോടി പാട്ടാണ്. സോഷ്യലിസ്റ്റ് കമ്മ്യുണിസ്റ്റ് വ്യവസ്ഥിതി മഹാബലിയുടെ രാജ്യത്ത് നടപ്പിലുണ്ടായിരുന്നു.  പ്രജകൾ പരസ്പ്പരം സ്നേഹിച്ചും സഹായിച്ചും അതിസന്തോഷത്തോടെ ജീവിച്ചിരുന്നു. സർവ്വവിധ പീഡനങ്ങളിൽനിന്നും അവർ സ്വതന്ത്രരായിരുന്നു. മാനസിക സമ്മർദ്ദമോ രോഗമോ പ്രജകളിൽ ഉണ്ടായിരുന്നില്ല. ശിശു മരണം കേട്ടുകേൾവി പോലുമുണ്ടായിരുന്നില്ല. ആരും കള്ളം പറഞ്ഞിരുന്നില്ല. കളവും മോഷണവും കൊലയും രാജ്യത്തുണ്ടായിരുന്നില്ല. അയൽക്കാരനെ വഞ്ചിക്കുന്ന ഏർപ്പാടുണ്ടായിരുന്നില്ല. ജാതി വർണ്ണ വ്യത്യാസങ്ങളില്ലാഞ്ഞ ഒരു സമൂഹമായിരുന്നു അന്നുണ്ടായിരുന്നത്. ഓണത്തിന്റെ മഹത്തായ ഈ സന്ദേശത്തിൽക്കൂടി രാജ്യങ്ങളും സർക്കാരുകളും മാവേലിയുടെ ഭരണകാലങ്ങളെപ്പറ്റി പഠിച്ചു വിലയിരുത്തേണ്ടതായുമുണ്ട്.

ഹനാൻ എന്ന പെൺകുട്ടിയുടെ അതി ജീവനത്തിന്റെ കഥ

ജോസഫ് പടന്നമാക്കൽ 

തകർന്ന ഒരു കുടുംബത്തിൽനിന്നുമുള്ള പാവപ്പെട്ട ഒരു പെൺകുട്ടിയുടെ ജീവിത കഥ അടുത്തയിടെ മാദ്ധ്യമങ്ങളിൽ വൻവാർത്തയായിരുന്നു. 'ഹനാൻ' എന്നാണ് അവളുടെ പേര്. അവൾ പഠനവും ഒപ്പം മത്സ്യക്കച്ചവടവും ചെയ്തുകൊണ്ട് ഉപജീവനവുമായി അനാഥയെപ്പോലെ ജീവിക്കുന്നു. തൊടുപുഴയിലുള്ള 'അൽ അസർ കോളേജിൽ' കെമിസ്ട്രി മൂന്നാം വർഷ ബിരുദ വിദ്യാർഥിനിയാണ്.  ഹനാന്റെ പിതാവ് ഒരു മദ്യപാനിയായിരുന്നു. 'അമ്മ മാനസിക രോഗിയും. അവൾക്കു  ഒരു ഇളയ സഹോദരനുമുണ്ട്. രണ്ടു മക്കളെയും വഴിയാധാരമാക്കിക്കൊണ്ടു അവളുടെ ചെറുപ്രായത്തിൽ തന്നെ മാതാപിതാക്കൾ വിവാഹമോചനം നേടിയിരുന്നു.

ബാല്യത്തിൽ അവൾ അപ്പനും അമ്മയും അവളുടെ കുഞ്ഞങ്ങളായുമൊത്തു വാടക വീട്ടിൽ താമസിച്ചിരുന്നു. കാർമേഘങ്ങൾ നിറഞ്ഞ ജീവിതവുമായി നിത്യവും ഏറ്റുമുട്ടി പഠനവും തുടർന്നു. സാമൂഹിക മാദ്ധ്യമങ്ങളുടെയിടയിൽ 'ഹനാൻ' ഒരു തിളങ്ങുന്ന നക്ഷത്രമായത് മാതൃഭൂമി പ്രസിദ്ധീകരിച്ച ഒരു വാർത്തയിൽക്കൂടിയായിരുന്നു. ഇന്ന്, അവളെപ്പറ്റി നല്ലതും ചീത്തയുമായ വാർത്തകൾ സോഷ്യൽ മീഡിയാകളിൽ വൈറൽ പോലെ പ്രചരിക്കുന്നു. കോളേജ് യൂണിഫോമിൽ മത്സ്യം വിൽക്കുന്ന ഈ യുവതിയുടെ വീഡിയോകൾ സാമൂഹിക മാദ്ധ്യമങ്ങൾക്കു ഒരു ഹരമാണ്. അതേ സോഷ്യൽ മീഡിയാ തന്നെ അവളെ അപമാനിക്കാനും മുന്നിൽത്തന്നെ നിൽക്കുന്നു. 'ഹനാൻറെ കഥ കെട്ടി ചമച്ചതെന്നായിരുന്നു ചിലരുടെ വാദം. ഒരു സിനിമയിൽ അഭിനയിക്കാനുള്ള അവസരം കിട്ടിയതിന്റെ  പേരിൽ ട്വിറ്ററും ഫേസ്ബുക്കും പോലുളള സോഷ്യൽ മീഡിയാകൾ അവൾക്കെതിരെ അപവാദ പ്രചാരണങ്ങളും വ്യാജവാർത്തകളും  നിത്യം തൊടുത്തുവിട്ടുകൊണ്ടിരിക്കുന്നുമുണ്ട്‌.

എന്താണ് ഹനാൻറെ ജീവിതവുമായി ബന്ധപ്പെട്ട ആ സത്യം. ആരാണ് ഹനാൻ? അവൾ എന്തിനുവേണ്ടി കഠിനാദ്ധ്വാനം ചെയ്യുന്നു? സ്വന്തം ജീവിതം കരുപിടിപ്പിക്കാനായി പൊരുതുന്നു? പത്തൊമ്പതു വയസുകാരിയായ അവളുടെ ജീവിതാനുഭവങ്ങളെപ്പറ്റി അവൾ തന്നെ വാർത്താ വീഡിയോകളിൽ പറയുന്നുണ്ട്. അവളുടെ സ്വപ്നങ്ങളും ഉച്ചത്തിൽ വിളിച്ചു പറയുന്നു. ദൈനം ദിന ജീവിതത്തിനുള്ള പണം മാത്രമല്ല അവൾ തേടുന്നത്. ഭാവിയെ കരുപിടിപ്പിക്കാനായും അഭിലാഷങ്ങളെ പൂർത്തിയാക്കാനും പണം കണ്ടെത്തണം. അവൾക്കൊരു ഡോക്ടറാകണം. അതിനുവേണ്ടി കൂലിപ്പണി ചെയ്തും മത്സ്യം വിറ്റും ജീവിക്കാനുള്ള പോരാട്ടത്തിലാണ്.

ഹമീദിന്റെയും സൈറബിയുടെയും രണ്ടു കുട്ടികളിൽ മൂത്തവളാണ് അവൾ. ഹമീദ് ഇലക്ട്രീഷ്യനും  സൈറാബി കുടുംബിനിയുമായിരുന്നു. തൃശൂരിൽ സാമ്പത്തികമായി മെച്ചപ്പെട്ട ഒരു കൂട്ടുകുടുംബമായിരുന്നു പിതാവിന്റേത്. ബാല്യകാലത്ത് അവളുടെ കസിൻ സഹോദരികളുമൊത്ത് കളിച്ചു വളർന്നെങ്കിലും മുതിർന്നപ്പോൾ അവരെല്ലാം ആ കുട്ടിയ അറിഞ്ഞ ഭാവം പോലും നടിക്കാതെ അകന്നു പോയിരുന്നു. അവർക്കൊപ്പം അവൾക്ക് ആഡംബര വേഷങ്ങളോ ആഭരണങ്ങളോ ഉണ്ടായിരുന്നില്ല. അവരെപ്പോലെ നല്ല ഭക്ഷണം കഴിച്ചിരുന്നില്ല.

കുടുംബത്തിൽ നിന്നും വീതം ലഭിച്ച ശേഷം ഹമീദ് ഭാര്യയുമൊത്ത് ഒരു വാടക വീട്ടിൽ താമസം തുടങ്ങി. ഹനാന് അന്ന് എട്ടു വയസു മാത്രം പ്രായം. ഹനാൻ പറയുന്നു, "ബാപ്പയ്ക്ക്  നിരവധി ബിസിനസുകളുണ്ടായിരുന്നു. പിക്കിളുണ്ടാക്കുന്ന കമ്പനി, ഇലക്ട്രോണിക്സ് ബിസിനസ്സ്, ജൂവലറി ഉണ്ടാക്കൽ, എന്നിങ്ങനെ ബിസിനസ്സുകളുമായി കുടുംബത്തിന്റെ അന്നത്തിനായി കഠിനാധ്വാനം ചെയ്തിരുന്നു. ഞാനും എന്റെ ഉമ്മയും കഴിയും വിധം ബാപ്പായെ സഹായിക്കുമായിരുന്നു. പട്ടണത്തിലെ ഏറ്റവും നല്ല ഇംഗ്ലീഷ് മീഡിയം സ്‌കൂളിൽ ഞങ്ങളെ പഠിപ്പിച്ചു. അവിടെ പണമുള്ള വീട്ടിലെ കുട്ടികളുമായി ഇടപെട്ടിരുന്നു. ഒരു പ്രസിദ്ധമായ ബാർ ഹോട്ടലിന്റെ ഇലക്ട്രിക്കൽ ജോലിക്കുശേഷം എന്റെ പിതാവ് ഒരു മുഴുക്കുടിയനായി മാറി. അന്നുമുതൽ ദിവസവും കള്ളു കുടിക്കാൻ തുടങ്ങി. ഞങ്ങളുടെ കുടുംബം പൊട്ടിയൊഴുകുന്ന ഒരു വോൾക്കാനയ്ക്ക് തുല്യമായി തീർന്നു. എന്റെ ബാപ്പ വടി ഒടിയുന്നതുവരെ കയ്യിൽ കിട്ടുന്നതു വെച്ച് പാവം ഉമ്മയെ അടിക്കാനും ഉപദ്രവിക്കാനും തുടങ്ങി. ഒരിക്കൽ ഉമ്മയുടെ തലയ്ക്കിട്ടു ഒരു സീലിംഗ് ഫാൻ വെച്ച് അടിച്ചു. അന്നുമുതലാണ് 'ഉമ്മ മാനസികമായി തകർന്നതും പെരുമാറാനും തുടങ്ങിയത്. എന്നിട്ടും ബാപ്പായിൽ മാറ്റങ്ങൾ ഒന്നും സംഭവിച്ചില്ല. ജീവിക്കാൻ മാർഗ്ഗമില്ലാത്തതുകൊണ്ടു ഞാൻ ബാപ്പായുടെ ബിസിനസായ ജൂവലറി ഏറ്റെടുത്തു. മുത്തുകൾ കൊണ്ടുള്ള മാലകളും സ്വർണ്ണ നിറമുള്ള കമ്മലുകളും നെക്‌ലേസുകളും വിറ്റു ജീവിക്കാനുള്ള മാർഗങ്ങൾ തേടിയിരുന്നു. എന്റെ അദ്ധ്യാപകർക്കും കൂട്ടുകാർക്കും അയൽവക്കക്കാർക്കും ജൂവലറി വിറ്റു ജീവിച്ചു വന്നു. പ്രൈമറി സ്‌കൂളിലെ കുട്ടികൾക്ക് ട്യൂഷനും എടുക്കുമായിരുന്നു. അന്ന് ഞാൻ ഏഴാം ക്ലാസിലാണ് പഠിക്കുന്നത്."

അങ്ങനെ, കുട്ടിയായ ഹനാൻ അവളുടെ വിദ്യാഭ്യാസത്തിനും അമ്മയുടെ മരുന്നിനും അനുജന്റെ സ്‌കൂൾ ഫീസിനും വീട്ടിലെ ചെലവുകൾക്കുമായി കഷ്ടിച്ച് പണം ഉണ്ടാക്കിയിരുന്നു. 'സായിറാബി' ഒരു അക്കൗണ്ട് കമ്പനിയിൽ കുറച്ചുകാലം ജോലി ചെയ്തിരുന്നു. എന്നാൽ ഹമീദിന്റെ ക്രൂര പെരുമാറ്റം മൂലവും രോഗിയായതിനാലും വീട്ടിൽ തന്നെ മറ്റു ജോലികളില്ലാതെ താമസിക്കേണ്ടി വന്നു. ഹനാൻ ഹയർ സെക്കണ്ടറി സ്‌കൂളിൽ പഠിക്കുന്ന സമയം അവളുടെ മാതാപിതാക്കൾ നിയമപരമായി വിവാഹ ബന്ധം വേർപെടുത്തി. ഹമീദ് മകനെ ഒപ്പം കൊണ്ടുപോയി. സൈറാബിയുടെ സഹോദരൻ ഹനാന്റെ ചുമതല ഏറ്റെടുത്തിരുന്നെങ്കിലും കാര്യമായ സഹായങ്ങളൊന്നും ലഭിച്ചിരുന്നില്ല.

അവൾ എസ്എസ്എൽസി പരീക്ഷ എഴുതുന്ന സമയം സ്വന്തമായി വീടില്ലാത്ത സ്ഥിതിവിശേഷവും വന്നുകൂടി. ഹനാൻ പറയുന്നു, "വീടില്ലാത്ത ഞാൻ ആദ്യം എന്റെ ഉത്തമ സുഹൃത്തായ ആതിരയുടെ വീട്ടിൽ ഏകദേശം ഒരു മാസത്തോളം താമസിച്ചു. എന്റെ പരീക്ഷാഫലം വന്നു കഴിഞ്ഞപ്പോൾ ഞാൻ കൊച്ചിയിൽ ജോലി അന്വേഷിച്ചു പുറപ്പെട്ടു. ഒരു കാൾ സെന്ററിൽ രാത്രിയും പകലും ഷിഫ്റ്റുകൾ മാറിമാറി ജോലി ചെയ്തു. ആദ്യത്തെ മാസത്തെ ശമ്പളം കിട്ടുന്നവരെ എനിക്ക് താമസിക്കാനായി ഒരു മുറിയുടെ വാടക കൊടുക്കാനുള്ള കഴിവുണ്ടായിരുന്നില്ല. ഒരു മാസം പണമോ പാർപ്പിടമോ ഇല്ലാതെയുള്ള ക്ലേശം മൂലവും തുടർച്ചയായ ചെവിയിലേക്കുള്ള ടെലിഫോണിലെ സൗണ്ട് മൂലവും എന്റെ ഇടത്തെ ചെവിക്ക് തകരാറു സംഭവിച്ചിരുന്നു. ഭാഗികമായി എന്റെ ചെവിയുടെ കേൾവി നഷ്ടപ്പെട്ടു. ആദ്യത്തെ ജോലിയിൽനിന്ന് എന്നെ പുറത്താക്കി. അതിനുശേഷം 'ഡേറ്റ എൻട്രി' സ്റ്റാഫായി ഒരു പ്രൈവറ്റ് കമ്പനിയിൽ ജോലി തുടങ്ങി."

അവളുടെ ഉമ്മയെ കൊച്ചിയിൽ ഒരു അതിഥി മന്ദിരത്തിൽ താമസിപ്പിച്ചു. മടവനയിൽ പിന്നീട് ഒരു വീട് വാടകയ്‌ക്കെടുത്തു. ഉമ്മയുമൊത്ത് ആ വീട്ടിൽ താമസമാക്കി. ജീവിക്കാൻ വേണ്ടി വിശ്രമമില്ലാതെ പഠനവും മീൻകച്ചവടവുമായി നടക്കുന്ന ഹനാനു തന്റെ സ്വന്തം ഭാവി കരുപിടിപ്പിക്കുമെന്നുള്ള ശുപാപ്തി വിശ്വാസവുമുണ്ട്. കുഞ്ഞായിരുന്നപ്പോൾ മുതൽ അവൾക്ക് ഒരു ഡോക്ടറാകണമെന്ന ആഗ്രഹമാണുള്ളത്. അവൾ പറയുന്നു, "ഞാൻ ഒരു മെഡിക്കൽ ഡോക്ടറാകാൻ സ്വപ്നം കാണുന്നു. എങ്കിലും എന്റെ സാഹചര്യങ്ങൾ അതിന്റെ വഴിയേ പോവുന്നു. മാടവന വീട്ടിലേക്ക് മാറിയ ശേഷം ഞാൻ തൊടുപുഴയിലുള്ള 'അൽ അസർ കോളേജിൽ' കെമിസ്ട്രി ബിഎസ്സി യ്ക്ക് ചേർന്നു. എന്നാൽ എന്റെ പഠനം തുടരാനും രോഗിയായ ഉമ്മയെ നോക്കാനും വരുമാനം തേടി പോവണമായിരുന്നു."

അവൾ ചിക്കൻ ഫ്രയ് (Chicken Fry) ഉണ്ടാക്കി കോളേജ് കാന്റീനിൽ വിൽക്കുമായിരുന്നു. നല്ലൊരു പാചകക്കാരിയെന്നും അവകാശപ്പെടുന്നു. അവളുടെ കെഎഫ്‌സി സ്റ്റയിലിൽ ഉണ്ടാക്കുന്ന 'ചിക്കൻ' കോളേജിലെ കുട്ടികളുടെയിടയിൽ പ്രസിദ്ധമാണ്‌. അദ്ധ്യാപകർക്കും സഹപാഠികൾക്കും ചിക്കൻ വിൽക്കുന്ന സമയത്താണ് അവൾക്ക് ചെവിക്കു കേൾവി കുറവുണ്ടെന്ന് അവളുടെ ഗുരുക്കൾ  മനസിലാക്കിയത്. കോളേജ് മാനേജ്‌മെന്റിന്റെ ഹോസ്പിറ്റലിൽ സൗജന്യമായി ചീകത്സ നൽകുകയും  ചെവി സർജറി ചെയ്യുകയും ചെയ്തു.

ആലുവാ ബീച്ചിൽ ഒരു ആഘോഷ വേളയിൽ 'ഏത്തക്കാ ബോളി' വിറ്റിരുന്ന സമയം രണ്ടു ചെറുപ്പക്കാരായ യുവാക്കളെ അവൾ കണ്ടുമുട്ടി. പതിനായിരം രൂപ മീൻ കച്ചവടത്തിൽ ഉണ്ടാക്കാൻ സാധിക്കുമെന്നും അതിനു തയ്യാറെങ്കിൽ അവരെ വിളിക്കാനും പറഞ്ഞു. അവർ അവളെ മീൻ വിൽക്കുന്ന മാർക്കറ്റിൽ കൊണ്ടുപോയി. അതിന്റെ അടുത്ത മാസം തന്നെ അവൾ മാർക്കറ്റിൽ മത്സ്യ വിൽപ്പന തുടങ്ങി. ആ സമയത്ത് തെരുവിൽ എങ്ങനെ കച്ചവടം നടത്താമെന്ന പ്രാഥമിക ജ്ഞാനവും നേടിയിരുന്നു. സിനിമകളിലും സീരിയലുകളിലും ജൂനിയർ ആർട്ടിസ്റ്റായി തൊഴിലിൽ ഏർപ്പെടാനും അവസരങ്ങൾ ലഭിച്ചിരുന്നു.

ഹനാന് വലിയ സ്വപ്നങ്ങളാണുള്ളത്. അവൾ കഠിനാദ്ധ്വാനം ചെയ്യുന്നത് ഒരു മെഡിക്കൽ ഡോക്ടറാകാനാണ്. അതിനായി നിരവധി ജോലികൾ ചെയ്യുന്നു. അവളുടെ അമ്മയെ ശുശ്രുഷിച്ചാൽ മാത്രം പോരാ അവൾക്ക് അവളുടെ വിദ്യാഭ്യാസ കാര്യങ്ങളും നോക്കണം. കൂടാതെ മൗറീഷ്യസിൽ എംബിബിഎസ്‌ പഠനത്തിനായി മുപ്പത്തിയഞ്ചു ലക്ഷം രൂപ കണ്ടെത്താനും ശ്രമിക്കുന്നു. നീറ്റ് (NEET)പരീക്ഷ പാസായ ശേഷം മൗറിഷ്യസിൽ പോയാൽ മെഡിക്കൽ ബിരുദമെടുക്കാമെന്ന് ഒരു സുഹൃത്തുവഴിയാണ് അവൾ അറിഞ്ഞത്‌. ശാസ്ത്രീയ വിഷയമായ കെമിസ്ട്രി മേജർ ചെയ്യുന്നു.

ഹനാൻ പറഞ്ഞു, "എന്റെ കഷ്ടപ്പാടുകൾക്കിടയിലും സ്വന്തമായി വരുമാനമുണ്ടാക്കി കോളേജ് വിദ്യാഭ്യാസം നടത്തുന്നതുകൊണ്ടാണ് മീഡിയായിൽ എന്നെപ്പറ്റിയുള്ള ശ്രദ്ധ പതിഞ്ഞത്. എന്നെപ്പോലെ അനേകം പെൺകുട്ടികൾ എന്റെ പ്രായത്തിലുള്ളവരും എന്നെക്കാൾ പ്രായം കുറഞ്ഞവരും ഈ തെരുവുകളിൽ മീൻ കച്ചവടം നടത്തുന്നുണ്ട്. പച്ചക്കറികളും മാംസവും വിൽക്കുന്നുണ്ട്. ഇരുപതു കുട്ടികളെയെങ്കിലും വ്യക്തിപരമായി എനിക്കറിയാം. ഓരോരുത്തർക്കും അവരുടെ പ്രയാസങ്ങളുടെയും ദുഖങ്ങളുടെയും കഷ്ടപ്പാടുകളുടെയും കഥകൾ പറയാനുണ്ടാകും. ധനികരായ പലരും എന്നെ വന്നു സഹായിച്ചിട്ടുണ്ട്. എന്റെ പഠനാവശ്യത്തിനായി പണം തന്നിട്ടുണ്ട്. എനിക്ക് ആവശ്യത്തിന് പണം ലഭിച്ചിട്ടുണ്ട്. എന്നെ സഹായിച്ചപോലെ ഹൃദയ വിശാലരായവർ തെരുവിൽക്കൂടെ നടക്കുന്ന കുട്ടികളെ സഹായിക്കണമെന്ന ഒരു അപേക്ഷ മാത്രമേ എനിക്ക് പറയാനുള്ളൂ."

ഹനാന്റെ കഥകൾ സോഷ്യൽ മീഡിയായിൽ പ്രചരിച്ചതോടെ അവൾക്ക് സഹായ ഹസ്തങ്ങളുമായി അനേകർ മുമ്പോട്ട് വന്നു. ചിലർ നല്ല ജോലികൾ വാഗ്ദാനം ചെയ്തു. ഉന്നത വിദ്യാഭ്യാസത്തിനുള്ള സൗകര്യങ്ങളും സാമ്പത്തിക വാഗ്ദാനങ്ങളും നടത്തി. അവരിൽ ഒരാൾ ഫിലിം നിർമ്മാതാവായ അരുൺ ഗോപിയായിരുന്നു. 'രാമ ലീല' എന്ന സിനിമയുടെ നിർമ്മാണത്തോടെ കേരളത്തിൽ അറിയപ്പെടുന്ന വ്യക്തിയാണ് അരുൺ ഗോപി. തന്റെ അടുത്ത സിനിമയിൽ ഹനായ്ക്ക്  സുപ്രധാനമായ നടി സ്ഥാനം നൽകുമെന്ന് അദ്ദേഹം പ്രഖ്യാപിച്ചു. ഹനായുടെ സന്തോഷത്തിന് അതിരില്ലായിരുന്നു. അവൾ പറഞ്ഞു, "എനിക്ക് ഒരു നടിയാകണമെന്ന് കുഞ്ഞുനാൾ മുതലുള്ള മോഹമായിരുന്നു. എന്നാൽ സിനിമയിൽ അഭിനയിക്കാനുള്ള എന്റെ ശ്രമങ്ങൾ എന്നും പരാജയപ്പെടുകയാണുണ്ടായത്. അരുൺ ഗോപിയുടെ സിനിമയിൽ എനിക്ക് അഭിനയിക്കാനുള്ള അവസരം തരുമെന്ന വാഗ്ദാനം വളരെയധികം സന്തോഷത്തോടെയാണ് ഞാൻ സ്വീകരിച്ചത്. ആ വാഗ്ദാനം സ്വീകരിക്കാൻ രണ്ടാമതൊന്ന് എനിക്ക് ചിന്തിക്കേണ്ടി വന്നില്ല."

മാതൃഭൂമി പത്രമാണ് പ്രൈവറ്റ് കോളേജിൽ കെമിസ്ട്രി മൂന്നാം വർഷ വിദ്യാർഥിനിയായ ഹനായുടെ   കഷ്ടപ്പാടുകൾ നിറഞ്ഞ ജീവിതം ലോകത്തെ അറിയിച്ചത്. കോളേജിൽ പോവുന്ന ഈ കൊച്ചു കച്ചവടക്കാരത്തിയുടെ കഥകൾ മാതൃഭൂമി പത്രം റിപ്പോർട്ട് ചെയ്തപ്പോൾ അനേകായിരങ്ങൾ സ്നേഹാദരവോടെ ആ വാർത്തകൾ വായിച്ചു. വായിച്ചവരിൽ ഭൂരിഭാഗം പേരും അവളെ ആദരവോടെ കണ്ടു. അതെ സമയം അവളെ അപമാനിക്കാൻ വലിയ ഒരു വിഭാഗം മുമ്പോട്ട് വരുകയും ചെയ്തു.

മാതൃഭൂമിയിലെ വാർത്തയനുസരിച്ച് ഹനാന്റെ ദിവസം ആരംഭിക്കുന്നത് വെളുപ്പാൻ കാലം മൂന്നുമണി മുതലാണ്. 'മടവനയിലുള്ള വാടക വീട്ടിൽ അവൾ ആ സമയം പഠിക്കാൻ എഴുന്നേൽക്കുന്നു. ഒരു മണിക്കൂറിലെ പഠന ശേഷം അവൾ ചമ്പക്കരയിലുള്ള മത്സ്യ മൊത്ത മാർക്കറ്റിൽ മീൻ മേടിക്കാൻ പോകുന്നു. മൂന്നു കിലോമീറ്റർ സൈക്കിൾ ചവുട്ടിയാണ് പോവുന്നത്. മത്സ്യം സ്റ്റോക്ക് ചെയ്യാൻ അവിടെനിന്നും ഒരു ഓട്ടോ റിക്ഷയിൽ കൊച്ചിയിലെ തമ്മനത്തുള്ള ഒരു ബിസിനസ്സ് പങ്കാളിയുടെ വീട്ടിൽ എത്തുന്നു. വീണ്ടും വീട്ടിൽ മടങ്ങി വരുകയും സ്റ്റേറ്റ് ട്രാൻസ്‌പോർട്ട് ബസ്സിൽ അറുപതു കിലോമീറ്റർ ബസ് യാത്ര ചെയ്തു അവൾ തൊടുപുഴയിലുള്ള അൽ അസർ കോളേജിൽ എത്തുന്നു. ഒരു പകൽ മുഴുവൻ ക്‌ളാസിൽ ഇരുന്ന ശേഷം ഹനാൻ വീണ്ടും തമ്മനത്ത് എത്തുന്നു. വീട്ടിൽ മടങ്ങി പോവുന്നതിനുമുമ്പ് രാവിലെ മേടിച്ച മത്സ്യങ്ങൾ വിൽക്കുകയും ചെയ്യുന്നു. അവിടെ അഞ്ചര വരെ മത്സ്യ കച്ചവടം ചെയ്യും. ഹനാന്റെ 'അമ്മ ഡിന്നർ ഉണ്ടാക്കാനായി അവിടെ അവളെ കാത്തിരിക്കുന്നുണ്ടാവും. ഇളയ  സഹോദരനും ചിലപ്പോൾ കൂടെ താമസിക്കാൻ വരാറുണ്ട്.അതാണ്, അവളുടെ ഒരു ദിവസത്തെ പ്രവർത്തനമണ്ഡലങ്ങളുടെ കഥ.

ക്യാമറായുടെയും മൈക്കുകളുടെയും മുമ്പിൽ അവൾ വിങ്ങുന്ന ഹൃദയത്തോടെ പറഞ്ഞു "എന്നെ തേജോവധം ചെയ്യുന്ന പ്രിയപ്പെട്ടവരേ, നിങ്ങളൊന്നു മനസിലാക്കണം. ജീവിക്കാൻ വേണ്ടി പട്ടിണിയുടെ നാളുകളിൽക്കൂടി കടന്നുപോയ ഒരു പാവം പെൺകുട്ടിയാണ് ഞാൻ. വിശക്കുന്ന വയറുകളുമായി രാത്രിയും പകലും  കഠിനാധ്വാനം ചെയ്തിട്ടുണ്ട്. ലോകത്തുള്ള എല്ലാ പെൺകുട്ടികളെ പ്പോലെ ഞാനും സ്വപ്നങ്ങളുടെ കൂമ്പാരങ്ങൾ പടുത്തുയർത്തിയിരുന്നു. നിങ്ങളെപ്പോലെ ജീവിക്കാൻ എനിക്കും മോഹങ്ങളുണ്ട്. സോഷ്യൽ മീഡിയാകൾ എന്നെ കല്ലെറിയരുതേ! മാദ്ധ്യമങ്ങളിൽ അവാസ്തവങ്ങളായ കമന്റുകൾ കാണുമ്പോൾ ഞാൻ തളർന്നു പോവുന്നു. എനിക്കു ചുറ്റുമുള്ള എന്റെ സമപ്രായക്കാർ തത്തിക്കളിച്ച് കോളേജുകുമാരികളായി അടിച്ചുമിന്നുമ്പോൾ ഞാൻ ഇവിടെ ഈ മത്സ്യമാർക്കറ്റിലെ തിരക്കുപിടിച്ച ജീവിതത്തിൽ ജീവിതവുമായി മല്ലിടുന്നു. ഏഴാം ക്ലാസ് മുതൽ മുത്തുമാല വിറ്റും ട്യൂഷനെടുത്തും ഞാൻ എന്റെ രോഗിണിയായ അമ്മയെ നോക്കുകയും വിദ്യാഭ്യാസം തുടരുകയും ചെയ്തിരുന്നു. ഇങ്ങനെയൊക്കെ ജീവിച്ചു വന്ന എന്നെയാണ് ഇന്ന് സാമൂഹിക മാദ്ധ്യമങ്ങൾ വിസ്തരിക്കുന്നത്."

സത്യത്തിന്റെ നിജസ്ഥിതി മനസിലാക്കാതെയാണ്, സോഷ്യൽ മീഡിയാകൾ അവളെ ക്രൂശിച്ചുകൊണ്ടിരിക്കുന്നത്. തന്റെ ഉമ്മയ്ക്ക് മരുന്നിനു പൈസക്കായി അവൾ തെരുവുകളിൽക്കൂടി  മുത്തുമാല വിറ്റു നടന്നിട്ടുണ്ട്. നാടകത്തിൽ അഭിനയിക്കാൻ പോയിട്ടുണ്ട്. സിനിമയിൽ തുച്ഛമായ പണത്തിനുവേണ്ടി ചെറിയ റോളുകളിൽ അഭിനയിച്ചിരുന്നു. ജൂനിയർ ആർട്ടിസ്റ്റായും ഫ്‌ളവർ ഗേൾ ആയും ജോലി ചെയ്തുകൊണ്ട് അലഞ്ഞു നടന്നിട്ടുണ്ട്. മനസ് നിറയെ ആഗ്രഹങ്ങൾ കുമിഞ്ഞു കൂടിയിരുന്നെങ്കിലും സിനിമയിൽ ഒരു അവസരം തേടി നാളിതുവരെ ഒരു സ്ഥലത്തും അവൾ പോയിട്ടില്ലെന്നും പറഞ്ഞു. ജീവിത ക്ലേശങ്ങളുമായി ഏറ്റുമുട്ടുന്ന സമയങ്ങളിൽ സ്വാന്തന വാക്കുകളുമായി ഓടിവന്ന് അവളെ സഹായിച്ചത് കലാഭവൻ മണി മാത്രമായിരുന്നു.

മാദ്ധ്യമങ്ങൾക്കെതിരെ പ്രതികരിച്ചുകൊണ്ട് ഹനാനെയെപ്പറ്റി സംസാരിക്കാൻ അവളുടെ കോളേജ് പ്രിൻസിപ്പാൾ രംഗത്തു വന്നിരുന്നു. 'സാമൂഹിക മാദ്ധ്യമങ്ങൾ പച്ചക്കള്ളങ്ങൾ തൊടുത്തു വിടുന്നുവെന്ന്' അദ്ദേഹം പറഞ്ഞു. അവൾ വളരെ കഷ്ട്ടപ്പെട്ടു കോളേജിൽ പഠിക്കുന്നവളെന്നും 'അമ്മ ഒരു മാനസിക രോഗിയെന്നും അവളുടെ അച്ഛൻ അമ്മയെ ഉപേക്ഷിച്ചു പോയിരുന്നുവെന്നുമുള്ള യാഥാർഥ്യം പ്രിൻസിപ്പാൾ സോഷ്യൽ മീഡിയാകൾ വഴി പ്രസ്താവിക്കുകയുമുണ്ടായി.

ക്രൂരവും നിന്ദ്യവുമായ ആരോപണങ്ങളാണ് അവൾക്കെതിരെ കുബുദ്ധികളായവർ സാമൂഹിക മാദ്ധ്യമങ്ങൾവഴി പ്രചരിപ്പിച്ചിരുന്നത്. ഒരു സിനിമയുടെ പ്രചാരണത്തിനു വേണ്ടിയായിരുന്നു ഈ  വ്യാജ വാർത്തകളെന്ന് സോഷ്യൽ മീഡിയ പ്രചരിപ്പിച്ചിരുന്നു. സിനിമ താരങ്ങൾക്കൊപ്പം അവൾ നിൽക്കുന്ന ഫോട്ടോകൾ കണ്ടാണ് പലരും അവളെ വിമർശിക്കുന്നത്. ജൂനിയർ ആർട്ടിസ്റ്റായി സിനിമാ താരങ്ങൾക്കൊപ്പം അഭിനയിച്ചപ്പോഴുള്ള ഫോട്ടോകൾ ചേർത്താണ് ഈ  പെൺകുട്ടിയെ നിർദ്ദയരായ ഒരു സമൂഹം അപമാനിച്ചുകൊണ്ടിരിക്കുന്നത്.

ഹനാനയ്ക്ക് ചെവിയിൽ കടുത്ത അസുഖമുണ്ട്. പോരാഞ്ഞു പുറം വേദനയും അലട്ടുന്നുണ്ട്. അൽ അസർ കോളേജിൽ പഠിക്കാനെത്തിയത് കലാഭവൻ മണിയുടെ നിർദേശപ്രകാരമായിരുന്നു. എം.ജി യുണിവേസിറ്റിയിൽ ഒരു കലോത്സവത്തിൽ ഒപ്പന ഡാൻസിന് പോയ സമയം അവൾ സ്റ്റേജിൽ വീഴുകയുണ്ടായി. ചെവിയുടെ സമ്മർദ്ദമായിരുന്നു കാരണം. കോളേജിന്റെ ഉത്തരവാദിത്വത്തിൽ അവൾക്ക് സൗജന്യമായ ചീകത്സ നൽകിക്കൊണ്ടിരിക്കുന്നു.

ജൂനിയർ ആർട്ടിസ്റ്റായി പോവുന്ന ഒരു കുട്ടി എന്തുകൊണ്ട് മീൻ കച്ചവടം ചെയ്തുവെന്നാണ് സാമൂഹിക മാദ്ധ്യമങ്ങൾ അവളോടു ചോദിക്കുന്നത്. ആർട്ടിസ്റ്റായി എല്ലാ സമയത്തും അവൾക്ക് അവസരങ്ങൾ ലഭിക്കാറില്ല. മാത്രമല്ല അവധി ദിവസങ്ങളിൽ മാത്രമേ അവൾക്ക് ആർട്ടിസ്റ്റായി ജോലി ചെയ്യാൻ സാധിക്കുമായിരുന്നുള്ളൂ. തുച്ഛമായി ലഭിക്കുന്ന ആ പണം കൊണ്ട് ജീവിക്കാൻ സാധിക്കുമായിരുന്നില്ല. മീൻകച്ചവടം ആദായകരമായ ഒരു തൊഴിലായതിനാൽ ഈ പെൺകുട്ടി അങ്ങനെയൊരു സാഹസത്തിനു മുതിർന്നു. അതുമൂലം അവളുടെ പ്രാരാബ്ധങ്ങൾക്ക് ആശ്വാസവും ലഭിച്ചിരുന്നു.

മാതൃഭൂമിയിൽ ഹനാനെയെപ്പറ്റി വാർത്തകൾ വന്ന ശേഷമാണ് സിനിമയിൽ അവൾക്ക് അവസരങ്ങൾ തേടി വന്നത്. വാർത്ത വരുന്നതിനുമുമ്പ് സിനിമയിൽ അഭിനയിക്കാനായി അവസരങ്ങളൊന്നും ഒരു സംവിധായകരും നൽകിയിട്ടില്ല. ജീവിതത്തിൽ ആശകൾ നൽകിയിരുന്നത് കലാഭവൻ മണിയായിരുന്നുവെന്നു അവൾ പറയുന്നു. അദ്ദേഹത്തിൻറെ മരണ ശേഷം കൊതിച്ചുപോയ അവളുടെ ആശകളും ഒപ്പം അസ്തമിച്ചുപോയിരുന്നു. കാര്യങ്ങൾ പ്രശ്ന സങ്കീർണ്ണമായതോടെ ജീവിക്കാൻ നിവൃത്തിയില്ലാതെ ആ പെൺകുട്ടി മീൻ കച്ചവടത്തിൽ ഏർപ്പെടുകയും ചെയ്തു.

ഹനാൻ പറയുന്ന വാക്കുകൾ കോളേജ് പ്രിൻസിപ്പാളും അവളുടെ ഡോക്ടറും പ്രൊഫസർമാരും ഒരുപോലെ ശരിവെക്കുന്നുണ്ട്. പലപ്പോഴും കോളേജിലെ ഫീസ് അടക്കാൻ നിവൃത്തിയില്ലാതെ വരുന്ന സമയങ്ങളിൽ കോളേജ് മാനേജ്‌മെന്റ് അവൾക്ക് ഇളവുകൾ നൽകാറുണ്ട്. അവളുടെ പ്രിൻസിപ്പാൾ പറഞ്ഞു, "ഹനാൻ പറയുന്നത് സത്യമാണ്. ഹൃദയം നിറഞ്ഞുള്ള അവളുടെ ക്യാമറായുടെ മുമ്പിലുള്ള ആ പൊട്ടിക്കരച്ചിലുകൾ യഥാർത്ഥ ജീവിതത്തിന്റെ പ്രതിഫലനങ്ങളായിരുന്നു. ഇത്തരത്തിൽ ജീവിക്കുന്ന ഒരു പെൺകുട്ടിയെ സമൂഹം ആക്രമിക്കുന്ന ലക്ഷ്യങ്ങളും മനസിലാകുന്നില്ല."

ജീവിത യാഥാർഥ്യങ്ങൾക്കുമുമ്പിൽ പകച്ചുപോയ ഒരു പെൺകുട്ടി അതിജീവനത്തിനു വേണ്ടി പോരാടുമ്പോൾ അവളോട് സ്നേഹവാത്സ്യങ്ങൾ പ്രകടിപ്പിക്കുന്നതിനു പകരം ദയയില്ലാത്ത  ട്രോളർമാരുടെ അപവാദ കഥകൾ തികച്ചും ദുഃഖകരവും സാമൂഹിക ദ്രോഹവുമാണ്. ഇത്തരം വ്യാജ വാർത്തകൾ പ്രചരിപ്പിക്കുന്നവരെ നിയമത്തിന്റെ മുമ്പിൽ കൊണ്ടുവരേണ്ടതാണ്. അവൾക്കെതിരെയുള്ള ആരോപണങ്ങൾ ഒരു സമൂഹത്തെ മുഴുവൻ തെറ്റിദ്ധരിപ്പിച്ചിരിക്കുന്നു. സാമൂഹിക മാദ്ധ്യമങ്ങളിൽ അസംബന്ധം പ്രചരിപ്പിച്ച ഏതാനും കുത്സിത ചിന്താഗതിക്കാരുടെ  പേരുകളിൽ കേസുകൾ ചാർജ് ചെയ്തതും ആശ്വസകരമാണ്.

വ്യാജ വാർത്തകൾ പ്രചരിപ്പിക്കാൻ നമ്മൾ ഉൾപ്പടെയുള്ളവർ പ്രവർത്തിച്ചെങ്കിൽ അതിനൊരു പുനർചിന്തനം ആവശ്യമാണ്. അറിഞ്ഞും അറിയാതെയും കൂട്ടുനിന്നവർ ആ പാവം പെൺകുട്ടിയുടെ ഹൃദയ വികാരങ്ങൾ മനസിലാക്കിയില്ല. സോഷ്യൽ മീഡിയാകളുടെയും മുഖ്യമാദ്ധ്യമങ്ങളുടെയും  റിപ്പോർട്ടുകൾ ആധികാരികമായി അന്വേഷിക്കാതെ സ്വീകരിക്കുന്ന നയവും ശരിയല്ല. ഒരു വാർത്ത കണ്ടാലുടൻ അതിന്റെ സത്യാവസ്ഥ മനസിലാക്കാതെ ഫോർവേർഡ് ചെയ്യുന്നതിനു മുന്നെ വാർത്തയുടെ നിജസ്ഥിതി ഉറപ്പു വരുത്തുകയും വേണം. സഹായിച്ചില്ലെങ്കിലും ഒരു കൊച്ചു പെൺകുട്ടിയെ ഇങ്ങനെ ഉപദ്രവിക്കുന്നതും മനുഷ്യത്വരഹിതമാണ്.

ഹനാൻന്റെ ജീവിതാനുഭവങ്ങള്‍ മനസ്സിലാക്കുമ്പോള്‍ ആ കുട്ടിയില്‍ അഭിമാനം തോന്നുന്നുവെന്ന് മുഖ്യമന്ത്രി പിണറായി വിജയന്‍ പറയുകയുണ്ടായി. കേരളം മുഴുവന്‍ അവളെ പിന്തുണക്കണമെന്നും അദ്ദേഹം ആവശ്യപ്പെട്ടു. ഇന്ന് സാമൂഹിക മാദ്ധ്യമങ്ങൾ മനുഷ്യനെ ദ്രോഹിക്കാനുള്ള ഇരുതല വാളുകളേക്കാൾ ശക്തിയേറിയതായിരിയ്ക്കുന്നു. സോഷ്യൽ മീഡിയയിലെ ഇടപെടലില്‍ അതി സൂക്ഷ്മത പാലിക്കേണ്ടതായുമുണ്ട്.

അനുഭവങ്ങളുടെയും പാളിച്ചകളുടെയും മദ്ധ്യേ നിറഞ്ഞ പുഞ്ചിരിയോടെ  ജീവിതം തള്ളി നീക്കുന്ന ഈ മലയാളി പെൺകുട്ടിയെ ഇന്ന് സ്വന്തം മകളാക്കാൻ ആഗ്രഹിക്കുന്നവർ അനവധി. തിരക്കുപിടിച്ച ജനജീവിതത്തിനിടയിൽ പാലാരി വട്ടം തമ്മനം കവലയിൽ മീൻ വിൽക്കുന്ന അവളെ അടുത്ത ദിവസം വരെ ആരും ശ്രദ്ധിച്ചിരുന്നില്ല. ഇന്ന് പതിനായിരങ്ങൾ അവളുടെ വാക്കുകളെ ശ്രവിക്കുന്നു. പേരിന്റെ അർത്ഥം പോലെ ആർദ്രയാണവൾ. മനസുനിറയെ ദുഃഖങ്ങൾ പേറുന്നുണ്ടെങ്കിലും അവളുടെ നിഷ്കളങ്കമായ മുഖഭാവങ്ങളിൽ അതൊന്നും പ്രകടമാവുന്നില്ല. മീൻ വിൽക്കാനായി അവൾ സൈക്കിൾ ചവിട്ടുന്നു. ഉമ്മയെയും അവളുടെ ആങ്ങളയെയും പോറ്റുന്നു. നാളത്തെ ശുഭദിനങ്ങളുടെ പ്രതീക്ഷകളുമായി കാലചക്രങ്ങളും അവൾക്കൊപ്പം ചലിക്കുന്നു. വലിയ ഭാഗ്യശാലിയായി അവളിനി കുതിച്ചുയരുന്നത് പരിഹസിച്ചവരും കളിയാക്കിയവരും അറിയുന്ന  സമയം അതി വിദൂരമല്ല. കേരളമണ്ണിന്‌ അഭിമാനമായ ഹനാൻ എന്ന ഈ ചുണക്കുട്ടീ  യുവ തലമുറകൾക്ക് മാതൃകയാണ്. ഉണർവും ആവേശവും നൽകുന്നു.  അവൾ പ്രകാശത്തിന്റെ കൈത്തിരിയും തെളിയിക്കുന്നു.

അസാന്മാർഗിക വൈദീകരും വിശുദ്ധ നുണകളും

ജോസഫ് പടന്നമാക്കൽ 

'ഓർത്തോഡോക്സ്', 'കത്തോലിക്ക' എന്ന രണ്ടു പ്രബല ക്രിസ്ത്യൻ സമൂഹങ്ങളിലുള്ള പുരോഹിതരുടെ ലൈംഗിക കുറ്റകൃത്യങ്ങൾ അടുത്ത കാലത്തായി ദൃശ്യ മാദ്ധ്യമങ്ങളിലും സോഷ്യൽ മീഡിയാകളിലും  പ്രധാന വാർത്തകളായി സ്ഥാനം പിടിച്ചു കഴിഞ്ഞിരിക്കുന്നു. മലങ്കര ഓർത്തോഡോക്സ് പുരോഹിതരുടെയിടെയിലാണ് പുതിയ സംഭവവികാസങ്ങളിൽ ആദ്യത്തെ പീഡന കഥയാരംഭിച്ചത്. സാധാരണ ഇത്തരം കേസുകൾ കത്തോലിക്ക പുരോഹിതരുടെ ഇടയിലാണ് സംഭവിക്കുന്നത്. അതുകൊണ്ടു ഓർത്തോഡോക്സ് പുരോഹിതരുടെ ലൈംഗിക കുറ്റാരോപണങ്ങളിലും സാമൂഹിക മാദ്ധ്യമങ്ങൾ പഴി ചാരുന്നത് കത്തോലിക്കാ സഭയെയാണ്. ഓർത്തോഡോക്സ് സഭയിൽ അഞ്ചു പുരോഹിതർ വിവാഹിതയായ ഒരു സ്ത്രീയെ ലൈംഗികമായി പീഡിപ്പിച്ചുവെന്നാണ് ആ സ്ത്രീയുടെ ഭർത്താവ് പരാതി നൽകിയിരിക്കുന്നത്. അവരിൽ നാലു പുരോഹിതരുടെ പേരിൽ തെളിവുകളുടെ അടിസ്ഥാനത്തിൽ പോലീസ് കേസ് ചാർജ് ചെയ്യുകയും ചെയ്തു.

കത്തോലിക്ക സഭയിൽ ലൈംഗിക അപവാദത്തിൽ പ്രതി ഒരു ബിഷപ്പായതുകൊണ്ടാണ് വാർത്തകൾക്കു കോളിളക്കം സൃഷ്ടിക്കാൻ കാരണമായത്. ബിഷപ്പിനെതിരെ കുറ്റം ആരോപിച്ചത് ഒരു കന്യാസ്ത്രീയും. 2016 മുതൽ ജലന്ധറിലെ ബിഷപ്പായ ഫ്രാങ്കോ മുളയ്ക്കൽ തന്റെ കീഴിലുള്ള ഒരു കോൺവെന്റിലെ കന്യാസ്ത്രിയെ പല കാലങ്ങളായി പതിമൂന്നു തവണകൾ പീഡിപ്പിച്ചുവെന്നായിരുന്നു ആരോപണം. പക്ഷെ ഈ രണ്ടു കേസുകളിലെയും സഭാ നേതൃത്വങ്ങൾ കേസുകളെ മറച്ചുവെക്കാനാണ് ശ്രമിച്ചിട്ടുള്ളത്.

ബിഷപ്പ് ഫ്രാങ്കോ മുളയ്ക്കൽ കുറവിലങ്ങാട്ട് കന്യാസ്ത്രീകളുടെ മഠം വക അതിഥി മന്ദിരത്തിലെ ഇരുപതാം നമ്പർ മുറിയിൽ വെച്ച് കന്യാസ്ത്രിയെ പീഡിപ്പിച്ചുവെന്നാണ്, പൊലീസിനു മൊഴി നൽകിയിരിക്കുന്നത്. ജലന്ധറിൽ നിന്നും കൂടെ കൂടെ ബിഷപ്പ് അശ്ളീല സന്ദേശങ്ങൾ അയച്ചിരുന്നുവെന്നും മഠത്തിൽ വെച്ച് അവരെ പ്രകൃതി വിരുദ്ധത ഉൾപ്പടെ പതിമൂന്നു തവണകൾ പീഡിപ്പിച്ചുവെന്നും   പീഡനം 2014 മുതൽ 2016 വരെയെന്നും പരാതിയിൽ ബോധിപ്പിച്ചിരുന്നു. 2014 മെയ് എട്ടാം തിയതി വൈദികരുടെ പട്ടം കൊടുക്കുന്ന ചടങ്ങിൽ ബിഷപ്പ് കാർമ്മികനായിരുന്നു. അതിനുശേഷമാണ് കുറവിലങ്ങാട്ട് ബിഷപ്പ് താമസിക്കാൻ വന്നത്. തൊട്ടടുത്ത ദിവസം തന്നെ കന്യാസ്ത്രീയുടെ കുടുംബത്തിലുള്ള ഒരു കുട്ടിയുടെ ആദ്യ കുർബാനയിലും ബിഷപ്പ് പങ്കുകൊണ്ടിരുന്നു. പീഡനം നടത്തിയ നാളുകളിലെല്ലാം ഫ്രാങ്കോ മഠത്തിൽ താമസിച്ചിരുന്നതായുള്ള രേഖകൾ മഠം വക രജിസ്റ്ററിൽനിന്നു പോലീസിനു ലഭിച്ചിട്ടുമുണ്ട്.

സ്ത്രീകൾ മാത്രം താമസിക്കാറുള്ള ഒരു മഠത്തിനുള്ളിൽ ബിഷപ്പിന് താമസിക്കാനുള്ള അനുവാദമുണ്ടായിരുന്നില്ല. ഫോണിൽക്കൂടി നിത്യം ബിഷപ്പിന്റെ ശല്യം സഹിക്ക വയ്യാതെ സന്യാസിനി ജീവിതം ഉപേക്ഷിക്കാനായും ആത്മഹത്യയെപ്പറ്റി ചിന്തിച്ചിരുന്നതായും  പോലീസിനോടു ഇരയായ ഈ കന്യാസ്ത്രി  പറഞ്ഞു.  പള്ളി വികാരിയോട് പീഡന കഥകൾ പറഞ്ഞപ്പോൾ അദ്ദേഹം ഈ വിവരം പാലാ ബിഷപ്പിനെ അറിയിച്ചതായും കന്യാസ്ത്രീയുടെ മൊഴിയിലുണ്ട്. പാലാ ബിഷപ്പ് കുറവിലങ്ങാട്ടുള്ള പള്ളി മേടയിൽ വെച്ച് നേരിട്ട് കന്യാസ്ത്രിയിൽ നിന്ന് വിവരങ്ങൾ ശേഖരിക്കുകയും ചെയ്തു. അതിനുശേഷം താൻ അനുഭവിച്ചതായ പീഡന കഥകളെപ്പറ്റി കന്യാസ്ത്രി ആലഞ്ചേരിക്ക് നേരിട്ട് പരാതി കൊടുക്കുകയും ചെയ്തു. വിവരങ്ങൾ ഒന്നൊന്നായി സത്യാവസ്ഥകൾ സഹിതം പുറത്തു വന്നതോടെ ബിഷപ്പിനെ അറസ്റ്റ് ചെയ്യാനുള്ള സാഹചര്യങ്ങളും തെളിഞ്ഞു വന്നുകൊണ്ടിരിക്കുന്നു. ഇന്ത്യൻ ശിക്ഷാ നിയമം നൂറ്റി അറുപത്തിനാലാം വകുപ്പനുസരിച്ചാണ് പോലീസ് കേസ് ചാർജ് ചെയ്തിരിക്കുന്നത്. കന്യാസ്ത്രിയോട് മജിസ്‌ട്രേറ്റിന്റെ മുമ്പിൽ രഹസ്യ മൊഴി നൽകാനും പോലീസ് ആവശ്യപ്പെടുകയും അതനുസരിച്ച് അവർ മൊഴി നൽകുകയും ചെയ്തു. കന്യാസ്ത്രീയുടെ കന്യകാത്വത്തെ അറിയാൻ വൈദ്യ പരിശോധന നടത്തിയതിലും പീഡനം നടന്നതായി തെളിഞ്ഞിട്ടുണ്ട്. അക്കാര്യം ഡോക്ടറും സ്ഥിതീകരിച്ചു. പതിമൂന്നു തവണകൾ പീഡിപ്പിച്ച ദിനങ്ങളിലെല്ലാം ബിഷപ്പ് മഠത്തിൽ വന്നതായി രജിസ്റ്റർ ബുക്കിൽ രേഖകളുമുണ്ട്. ഇക്കാലയളവിൽ മഠത്തിലുണ്ടായിരുന്ന മറ്റു കന്യാസ്ത്രീകളുടെ മൊഴികളും ബിഷപ്പിന് അനുകൂലമായിരുന്നില്ല.

കന്യാസ്ത്രീയെ പീഡിപ്പിച്ച വിവരങ്ങൾ കർദ്ദിനാൾ ആലഞ്ചേരിയെ അറിയിച്ചിട്ടും അദ്ദേഹത്തിൻറെ ഭാഗത്തുനിന്നു യാതൊരു പ്രതികരണവും ഉണ്ടായില്ലെന്ന് ജലന്ധർ രൂപതയിലെ ഒരു പുരോഹിതന്റെ റിപ്പോർട്ടിൽ പറയുന്നു. അദ്ദേഹം പറയുന്നു, "കേരള കത്തോലിക്ക സഭകളുടെ തലവനെന്ന നിലയിൽ കർദ്ദിനാൾ ആലഞ്ചേരിയിൽനിന്ന് മാന്യമായ പ്രതികരണം പ്രതീക്ഷിച്ചു. അദ്ദേഹത്തിന് ഫോൺ നമ്പറും ഇമെയിലും കൊടുത്തിരുന്നു. കന്യാസ്ത്രീയുടെ ദുഃഖത്തിൽ പങ്കുചേർന്നുള്ള ഒരു മറുപടി പോലും ആലഞ്ചേരിയുടെ അരമനയിൽ നിന്നും ലഭിച്ചില്ല. അദ്ദേഹത്തെ കർദ്ദിനാളായി ഉയർത്തിയത് റോമിൽ നിന്നാണ്. റോമ്മാ സഭയിലെ കർദ്ദിനാളെന്ന സ്ഥാനത്തിന്റെ പേരിൽ ജലന്ധർ ബിഷപ്പിനു മുകളിൽ ആലഞ്ചേരിക്ക് തീർച്ചയായും ആദ്ധ്യാത്മിക അധികാരവും കാണേണ്ടതാണ്. എന്നാൽ അദ്ദേഹം സംസാരിക്കുന്നതെല്ലാം വസ്തുതകളെ മറച്ചുവെച്ചുകൊണ്ടായിരുന്നു. ചാനലുകാരുടെ മുമ്പിൽ ഒന്നും അറിഞ്ഞില്ലാത്ത വിധം കാര്യ കാരണ വിരുദ്ധമായി സംസാരിക്കുകയും ചെയ്യുന്നു. റോമിൽ നിന്ന് തുടങ്ങിയ സീറോ മലബാർ സഭ നിരുത്തരവാദപരമായ ഒരു സമീപനമാണ് കന്യാസ്ത്രീയുടെ കാര്യത്തിൽ സ്വീകരിച്ചിരിക്കുന്നത്."

ഒരു കന്യാസ്ത്രീയുടെ ജീവിതം തുടങ്ങുന്നത് കൂട്ടിനകത്ത് അടച്ചിട്ട കിളിയെപ്പോലെയാണ്. പല പുരോഹിതരും കന്യാസ്ത്രീകളെ വീക്ഷിക്കുന്നത് അവരുടെ ഭോഗ വസ്തുവായിട്ടും. സഭയെ വിശ്വസിച്ചേൽപ്പിച്ച പെൺകുട്ടികളെ കന്യാസ്ത്രി മഠങ്ങളിൽ ചിലർ അധികാരത്തിന്റെ മറവിൽ  ചവുട്ടി മെതിക്കുകയാണ് ചെയ്യുന്നത്. വീടും സ്വന്തം മാതാപിതാക്കളെയും സഹോദരരേയും ഉപേക്ഷിച്ചുകൊണ്ടാണ് ഒരു പെൺക്കുട്ടി മഠത്തിൽ ചേരുന്നത്. അങ്ങനെയുള്ള ഒരു കന്യാസ്ത്രീയുടെ ഹൃദയം തകർന്നുള്ള ശബ്ദമാണ് ജലന്ധർ ബിഷപ്പിനെതിരെ പ്രതികരിച്ചത്.

ശബ്ദിക്കാൻ കഴിയാത്തവരെ അതിക്രമിച്ചു കീഴടക്കുകയെന്നതാണ്, അധികാരം കൈമുതലായുള്ള  പുരോഹിതരുടെ നയം. സ്വന്തം കാമം പൂർത്തികരിക്കപ്പെട്ടശേഷം ഇവർ പാവപ്പെട്ട കന്യാസ്ത്രീകളെ നിയന്ത്രിക്കുകയും ചെയ്യുന്നു. ഒരു മുതിർന്ന സിസ്റ്ററിനോട് ഇത്രമാത്രം അപകീർത്തികരമായ പ്രവർത്തികൾ ചെയ്ത ഈ ബിഷപ്പ് തീർച്ചയായും കൊച്ചു കന്യാസ്ത്രികളുടെയും കന്യകാത്വം അപഹരിച്ചു കാണും. സഭയ്ക്ക് അപകീർത്തികരമായ ലൈംഗിക കഥകൾ പുറത്തു വരുമെന്ന് ഭയപ്പെട്ട് 'ജലന്തർ രൂപത', കന്യാസ്‌ത്രിയെയും കന്യാസ്ത്രീയുടെ കുടുംബത്തെയും ഭീക്ഷണിപ്പെടുത്തിയതായ വാർത്തകളും പുറത്തു വരുന്നു.

പണവും പ്രതാപവും അധികാരവുമില്ലാത്ത പാവപ്പെട്ട ഒരു സാധാരണ വ്യക്തി എന്തെങ്കിലും കുറ്റകൃത്യങ്ങൾ ചെയ്‌താൽ യാതൊരു ദയാ ദാക്ഷണ്യവും ഇല്ലാതെ നിയമവും വ്യവസ്ഥിതികളും പ്രതിയെ ഉടൻ അറസ്റ്റു ചെയ്യും. എന്നാൽ ഭാരതത്തിൽ ബിഷപ്പിനും പുരോഹിതർക്കും മറ്റൊരു നിയമമാണ് നിലവിലുള്ളത്. പരാതി കൊടുത്ത കന്യാസ്‌ത്രിയെയും കുടുംബത്തെയും കേസിൽ നിന്ന് പിൻവാങ്ങാനായി സമ്മർദ്ദവും കൊടുക്കുന്നുണ്ട്. കുറ്റക്കാരെ രക്ഷിക്കാൻ സഭ എത്ര പണം ചെലവാക്കിയും അധികാരികളെ പ്രീതിപ്പെടുത്തുകയും ചെയ്യും.

കന്യാസ്ത്രി മഠങ്ങളിൽ പോയി കന്യാസ്ത്രീകളെ പീഡിപ്പിക്കുകയെന്നത് ജലന്ധർ ബിഷപ്പിന്റെ വർഷങ്ങളായുള്ള പ്രവൃത്തികളായിരുന്നുവെന്ന് മറ്റു കന്യാസ്ത്രികളും ആരോപിക്കുന്നു. ഇന്ത്യയുടെ ശിക്ഷാ വിധിയനുസരിച്ച് ലൈംഗികാക്രമണ കേസുകളിൽ അറസ്റ്റ് ഉടൻ ഉണ്ടാവേണ്ടതാണ്. എന്നാൽ അങ്ങനെയൊന്ന് നിയമവ്യവസ്ഥ പാലിക്കേണ്ടവരുടെ വശത്തുനിന്നും ഉണ്ടായില്ല. നിരപരാധികളെ സ്വന്തം വീട്ടിൽനിന്നും പുറത്തിറക്കി ചവുട്ടി കൊല്ലാനുള്ള തന്റേടം പോലീസ് പ്രകടിപ്പിക്കാറുണ്ട്. കന്യാസ്ത്രിയുടെയും അവരുടെ സുഹൃത്തുക്കളായ കന്യാസ്ത്രികളുടെയും സ്വന്തം പിതാവിന്റെയും പരാതികൾ പോലീസിന്റെ കൈവശമുണ്ട്. പുരോഹിതർ കുറ്റകൃത്യങ്ങളിൽ നിന്ന് രക്ഷപെടാൻ മതവും പൗരാഹിത്യവും അവരുടെ കുപ്പായങ്ങളും ദുരുപയോഗപ്പെടുത്തുന്നു. ഇന്ത്യയിലെ നിയമങ്ങൾ അവർക്ക് ബാധകമല്ലെന്നുള്ള മട്ടിൽ പെരുമാറുകയും ചെയ്യുന്നു. ഇതെല്ലാം മനസ്സിലാക്കിയിട്ടും വിശ്വാസികൾ അഴിമതിക്കാരായ പുരോഹിതരോടും വിധേയത്വം പുലർത്തി അവരെ ദൈവതുല്യരായി കരുതുകയും ചെയ്യുന്നു. ചൂഷണവും പീഡനവും അനുഭവിക്കുകയെന്നത് അല്മെനികളുടെ മതപരമായ താല്പര്യത്തിനും ആവശ്യമാണ്. അതുകൊണ്ടു ബിഷപ്പിന് ഒരു നീതിയും സാധാരണക്കാർക്ക് മറ്റൊരു നീതിയുമായിരിക്കും.

ഒരു പുരോഹിതൻ വ്യപിചാരക്കുറ്റത്തിനു പിടിക്കപ്പെട്ടാൽ സഭ കുറ്റം ചെയ്തവന്റെ പക്ഷത്തായിരിക്കും. ക്രിസ്തുവിന്റെ പന്ത്രണ്ടു ശിക്ഷ്യരിൽ ഒരാളായ യൂദാ പിഴച്ച കഥയും വിളമ്പും. കൂടാതെ അനേകം പുരോഹിതർ നല്ലവരായി ജീവിക്കുന്ന മഹത്വവും മാതൃകയായി അവതരിപ്പിക്കും.  പിഴച്ചു പോയ പുരോഹിതരല്ല ക്രിസ്തുവാണ് സഭയെന്നൊക്കെ പറഞ്ഞു വിശ്വാസികളുടെ കണ്ണിൽ പൊടിയിടും. ഒരിക്കലും കുറ്റകൃത്യങ്ങൾക്കു ബലിയാടാകുന്നവരുടെ പക്ഷം കൂടി സംസാരിക്കുന്ന ഒരു ചരിത്രം സഭയ്ക്കുണ്ടായിട്ടില്ല. 2017 ഫെബ്രുവരിയിൽ റോബിൻ വടക്കഞ്ചേരി എന്ന ലൈംഗിക കുറ്റവാളിയായ പുരോഹിതൻ പ്രായ പൂർത്തിയാകാത്ത പെൺക്കുട്ടിയെ ഗർഭിണിയാക്കി. അയാൾ മാനേജരായിരുന്ന സ്‌കൂളിലെ വിദ്യാർത്ഥിനിയായിരുന്നു, ആ കുട്ടി. എന്നാൽ പോലീസ് കുറ്റവാളിയെപ്പറ്റി അന്വേഷണം നടത്തുന്ന വേളകളിൽ അയാളുടെ കുറ്റകൃത്യങ്ങളെ മാനന്തവാടി ബിഷപ്പ് ജോസ് പൊരുന്നേടൻ മറച്ചു വെക്കാനാണ് ശ്രമിച്ചിരുന്നത്.

ഒരു പുരോഹിതനിൽ നിന്നും അവിഹിത ബന്ധത്തിൽ കുട്ടികളുണ്ടായാൽ അക്കാര്യം രഹസ്യമാക്കുവാൻ ഹോസ്പിറ്റലുകളും അനാഥാലയങ്ങളും സഭയ്ക്കുവേണ്ടി പ്രവർത്തിക്കുന്നു. പ്രായ പൂർത്തിയാകാത്ത പെൺകുട്ടി പ്രസവിച്ചാലും സഭാവക ഹോസ്പിറ്റലുകളോ അവിടുത്തെ ഡോക്ടർമാരോ ഈ വിവരം അധികാരികളെ അറിയിക്കുകയുമില്ല. അവിഹിതമായി ജനിക്കുന്ന കുഞ്ഞുങ്ങളെ കന്യാസ്ത്രികൾ എടുത്തുകൊണ്ടു പോയി സഭാവക അനാഥാലയങ്ങളിൽ വളർത്തുകയും ചെയ്യും.

ക്രിസ്ത്യൻ സഭകളുടെ പ്രസിദ്ധീകരണമായ ശാലോം മാഗസിനിൽ വന്ന വാർത്തയും വിചിത്രമായിരുന്നു. ലൈംഗിക കുറ്റാരോപണ വിധേയനായ ഫാദർ റോബിനെ ന്യായികരിച്ചുകൊണ്ടുള്ള വാർത്തയായിരുന്നു അത്. ശാലോം മാസിക റോബിന്റെ കുഞ്ഞിനെ പ്രസവിച്ച കൗമാരക്കാരിയായ  അമ്മയെ ഉപദേശിച്ചുകൊണ്ടു എഴുതി, "മോളെ നിനക്ക് പതിനഞ്ചു വയസു കഴിഞ്ഞവളായിരുന്നു. എന്റെ മകളെപ്പോലെ നിന്നോട് ഞാൻ പറയട്ടെ, നീയും തെറ്റുകാരിയാണ്. ദൈവത്തിന്റെ മുമ്പിൽ ആദ്യം ഉത്തരം പറയേണ്ടത് നീയായിരിക്കും. നീ ഫാദർ റോബിനുമായി ലൈംഗിക ബന്ധം തുടർന്നപ്പോൾ അദ്ദേഹം ഒരു പുരോഹിതനായിരുന്ന കാര്യം നീ എന്തുകൊണ്ട് ചിന്തിച്ചില്ല? ദുർബല നിമിഷങ്ങളിൽ ബലഹീനതകൾ ഏതു മനുഷ്യനും വന്നു ഭവിക്കാം. അദ്ദേഹം ഒരു പുരോഹിതനെന്ന കാര്യവും ഓർത്തുകാണില്ലായിരിക്കാം. പരിശുദ്ധ കുർബാന സ്വീകരിക്കുന്ന കുഞ്ഞേ നീ എന്തുകൊണ്ട് അദ്ദേഹത്തെ തടഞ്ഞില്ല! തെറ്റാണെന്ന് അദ്ദേഹത്തെ ബോധവൽക്കരിച്ചുകൊണ്ടു തിരുത്തിയില്ല?"

2016 ഫെബ്രുവരിയിൽ 'എഡ്വിൻ ഫിഗരേസ്' എന്ന പുരോഹിതൻ! പതിന്നാലു വയസുള്ള ഒരു കുട്ടിയെ  പീഡിപ്പിച്ചിരുന്നു. 2015 ജനുവരിക്കും മാർച്ചിനും ഇടയ്ക്കായിരുന്നു അയാൾ കുട്ടിയെ ലൈംഗികമായി ഉപയോഗിച്ചുകൊണ്ടിരുന്നത്. അതിന് അയാൾക്ക് ഇരട്ടി ജീവപര്യന്തം ലഭിക്കുകയും ചെയ്തു. ഒമ്പതു വയസുള്ള കുട്ടിയെ പീഡിപ്പിച്ചതിന് 2014-ൽ തൃശൂരുള്ള 'രാജു കൊക്ക'നെന്ന മറ്റൊരു പുരോഹിതനെയും   അറസ്റ്റ് ചെയ്തിരുന്നു. ആദ്യകുർബാനയ്ക്കുള്ള ഡ്രസ്സിന്റെ അളവെടുക്കുന്ന വ്യാജേനയാണ് ഈ പെൺകുട്ടിയെ ഇയാൾ പീഡിപ്പിച്ചത്. 2016-ൽ കോയമ്പത്തൂരിൽ ഫാദർ ആരോഗ്യ രാജിനെ പ്രായപൂർത്തിയാകാത്ത പതിനേഴു വയസുളള പെൺകുട്ടിയെ പീഡിപ്പിച്ച ശേഷം കൊന്നു കളഞ്ഞതിലും അറസ്റ്റു ചെയ്തു. നാളിതു വരെയായിട്ടും കേരള ഹൈക്കോടതി കേസിനു യാതൊരു തീരുമാനവും എടുത്തിട്ടില്ല. 2013ൽ ദുരൂഹ സാഹചര്യത്തിൽ ഈ പെൺകുട്ടി ഫാദർ ആരോഗ്യ രാജിന്റെ മുറിയിൽ മരിച്ചുകിടക്കുന്നതായിരുന്നു കണ്ടത്. ആദ്യം ഈ കേസ് ആത്മഹത്യയായി വരുത്തി വെച്ചു. എന്നാൽ കുട്ടിയുടെ അമ്മയുടെ തീവ്ര പരിശ്രമം മൂലം അതൊരു കൊലപാതകമെന്നും തെളിഞ്ഞു. പുരോഹിതൻ ആ കുട്ടിയെ ലൈംഗികമായി പീഡിപ്പിച്ചിരുന്നുവെന്നു സമ്മതിച്ച പ്രകാരം പൗരാഹിത്യത്തിന്റെ ചുമതലകളിൽ നിന്നും അയാളെ മാറ്റുകയും ചെയ്തു.

മദ്ധ്യപ്രദേശിലെ ഒരു കോൺവെന്റിലുണ്ടായിരുന്ന യുവ കന്യാസ്ത്രിയായ 'സിസ്റ്റർ അനിതയുടെ' പരാതിയും വാർത്തകളിൽ പ്രാധാന്യം നേടിയിരുന്നു. 2011-ൽ അവർ ഒരു ഹൈസ്‌കൂൾ അദ്ധ്യാപികയായിരുന്ന സമയം ഒരു പുരോഹിതൻ അവരെ പീഡിപ്പിക്കാൻ ശ്രമിച്ചപ്പോൾ അവർ നിന്നുകൊടുത്തില്ല. അതിന്റെ പേരിൽ ആ പുരോഹിതൻ കന്യാസ്ത്രിയ്ക്കെതിരെ അധികാരം ഉപയോഗിച്ച് പലവിധ മാനസിക പീഡനങ്ങളും നല്കിപ്പോന്നു. കാമഭ്രാന്തു പിടിച്ച ആ പുരോഹിതന്റെ പീഡന വിവരം അധികാരികളെ അറിയിച്ചതിന് എല്ലാവിധ സഹനങ്ങളും ആ യുവ കന്യാസ്ത്രിക്ക് മഠത്തിലെ സഹ സിസ്റ്റേഴ്‌സിൽനിന്നും സഹിക്കേണ്ടി വന്നു. അതിന്റെ പേരിൽ ഇറ്റലിയിലേക്ക് അവർക്കു സ്ഥലം മാറ്റം കൊടുക്കുകയും ചെയ്തു. അവിടെയും ഇതിന്റെ പേരിൽ കൂടുതൽ പീഡനങ്ങൾ നേരിടേണ്ടി വന്നു. പാതിരാത്രിക്ക് യുവതിയായ ഈ കന്യാസ്ത്രിയെ മഠത്തിൽ നിന്നു ഇറക്കി വിടുകയുമുണ്ടായി. ചില മലയാളി സംഘടനകളുടെ സഹായത്തോടെ അവർ ഇന്ത്യയിൽ മടങ്ങി വന്നു. അവരുടെ ആലുവായിലുള്ള മഠം അവരെ അകത്തു കയറാൻ അനുവദിക്കാതെ വീണ്ടും പുറത്താക്കുകയും ചെയ്തു. കൊണ്ടുവന്ന പെട്ടിയും കിടക്കയും പുറത്തേക്ക് അവിടുത്തെ ക്രൂരരായ കന്യാസ്ത്രികൾ വലിച്ചെറിഞ്ഞു. സിസ്റ്റർ അനിത കോൺവെന്റിനു മുമ്പിൽ നിരാഹാര സത്യാഗ്രഹം കിടക്കുമെന്ന് പ്രഖ്യാപിച്ചപ്പോൾ എറണാകുളം രൂപത ഇതിൽ ഇടപെടുകയുണ്ടായി. പന്ത്രണ്ടു ലക്ഷം രൂപ കൊടുത്ത് കേസ് ഒത്തുതീർപ്പിലാക്കുകയും ചെയ്തു.

മാടത്തരുവി കേസും അഭയാ കേസും സഭയുടെ ചരിത്രത്തിൽ ഏറ്റവും വിവാദപരമായ രണ്ടു കേസുകളായിരുന്നു. മാടത്തരുവി കേസ്സിൽ മറിയക്കുട്ടിയെന്ന വിധവയായ സ്ത്രീയെ ഫാദർ ബെനഡിക്ക്റ്റ് കത്തികൊണ്ട് കുത്തി കൊന്നശേഷം മൃതദേഹം റാന്നിയ്ക്കടുത്തുള്ള മാടത്തരുവിൽ ഉപേക്ഷിച്ചു. ഈ കേസിൽ കീഴ്കോടതി അയാളെ തൂക്കാൻ വിധിച്ചിരുന്നു. ഹൈക്കോടതിയിൽ സുപ്രസിദ്ധനായ വക്കീൽ 'ചാരി'യുടെ വാദത്താൽ ബെനഡിക്റ്റ് മോചിതനാവുകയും ചെയ്തു.  ബെനഡിക്റ്റ് കുറ്റക്കാരനല്ലെന്ന് ഹൈക്കോടതി കണ്ടെത്തിയില്ലെങ്കിലും തെളിവുകളുടെ അഭാവത്തിൽ നിരുപാധികം മോചിപ്പിക്കുന്നുവെന്നായിരുന്നു വിധി.

1992-ൽ സിസ്റ്റർ അഭയ എന്ന ഇരുപതു വയസുകാരി കോട്ടയം പയസ് മൗണ്ടിലുള്ള കിണറിനകത്ത് മരിച്ച നിലയിൽ കണ്ടെത്തിയിരുന്നു. സ്ഥലത്തെ പോലീസ് ഈ കേസ് ഒരു ആത്മഹത്യയാക്കി മാറ്റി കേസ് ഇല്ലാതാക്കിയിരുന്നു. എന്നാൽ ഒരു വർഷത്തിനു ശേഷം 1993-ൽ കേസ് വീണ്ടും പുനാരാരംഭിച്ചു. സി.ബി.ഐ കേസ് ഏറ്റെടുക്കുകയും ചെയ്തു. ഫാദർ പുതൃക്കയിലും ഫാദർ തോമസ് കോട്ടൂരും സിസ്റ്റർ സെഫിയും ഈ കുറ്റകൃത്യത്തിൽ പങ്കാളികളായിരുന്നുവെന്ന ആരോപണവും ഉയർന്നു. കുറ്റവാളികളെന്നു കരുതുന്ന ഇവർ മൂവരെയും അറസ്റ്റു ചെയ്യുകയും ചെയ്തു. സി.ബി.ഐ.യുടെ അന്വേഷണത്തിൽ ഈ രണ്ടു പുരോഹിതരും ഒന്നിച്ച് സിസ്റ്റർ സെഫിയുമായി പ്രകൃതി വിരുദ്ധ ലൈംഗികതയിൽ ഏർപ്പെട്ടിരുന്നത് സിസ്റ്റർ അഭയ കണ്ടുവെന്നായിരുന്നു. സിസ്റ്റർ സെഫി കോടാലിയുടെ കൈകൊണ്ട് സിസ്റ്റർ അഭയയുടെ തലക്കിട്ടു അടിച്ചുവെന്നും സി.ബി.ഐ. കരുതുന്നു. അതിനു ശേഷം പുരോഹിതരും കന്യാസ്ത്രിയുംകൂടി അഭയായെ കിണറ്റിൽ തള്ളിയെന്നും അനുമാനിക്കുന്നു. കേരളത്തിന്റെ ചരിത്രത്തിൽ ഏറ്റവും നീണ്ട ഒരു കുറ്റാന്വേഷണ ചരിത്രമാണിത്. ആ കേസ് ഇന്നും കോടതിയിൽ തീരുമാനമാകാതെ കിടക്കുന്നു.

സഭയ്ക്കുള്ളിലെ പീഡനങ്ങൾമൂലം ബലിയാടാകുന്നവർ മറ്റാരോടും പറയാതെ രഹസ്യമായി സൂക്ഷിക്കുകയാണ് പതിവ്. എന്നാൽ തൃശൂർ സെന്റ് മേരീസ് കോളേജിലെ പ്രിൻസിപ്പാളായിരുന്ന സിസ്റ്റർ ജെസ്മി 'ആമേൻ' എന്ന തന്റെ ആത്മകഥയിൽ പുരോഹിതരുടെ ലൈംഗിക അസാന്മാർഗിക ജീവിതത്തെപ്പറ്റി വിവരിച്ചിട്ടുണ്ട്. കോൺവെന്റിലെ സ്വവര്‍ഗ്ഗാനുരാഗികളായ കന്യാസ്ത്രികളുടെ വിവരങ്ങളും ഉൾക്കൊള്ളിച്ചിട്ടുണ്ട്. പുരോഹിതരുമൊത്തുളള ലൈംഗികതയിൽ ഏർപ്പെടുന്ന കന്യാസ്ത്രികളും അവരുടെ മറ്റു ബന്ധങ്ങളും ജെസ്മിയുടെ പുസ്തകത്തിലുണ്ട്. 178 പേജുകളുള്ള ഈ പുസ്തകം സഭയ്ക്കുള്ളിലും പുറംലോകത്തും വലിയ കോളിളക്കം സൃഷ്ടിച്ചിരുന്നു.

സിസ്റ്റര്‍ മേരി ചാണ്ടിയുടെ "നന്മ നിറഞ്ഞവരേ സ്വസ്തി"യെന്ന ആത്മകഥാപുസ്തകം ഒരു കന്യാസ്ത്രീയുടെ നൊമ്പരപ്പെടുത്തുന്ന അനുഭവങ്ങള്‍നിറഞ്ഞ ജീവിതകഥയാണ്. സഭയെ ഞെട്ടിപ്പിക്കുന്ന പൌരാഹിത്യ ലൈംഗിക വാര്‍ത്തകളുമായി ഗ്രന്ഥപ്പുരയില്‍ ഈ പുസ്തകം സ്ഥാനം പിടിച്ചു കഴിഞ്ഞു. നാല്‍പ്പതില്‍പ്പരം വര്‍ഷങ്ങള്‍ അമ്മ മതിൽക്കെട്ടിനുള്ളില്‍, ജീവിതം ഹോമിച്ച് സന്യാസിനീജീവിതം ഉപേക്ഷിച്ച മേരി ചാണ്ടിയുടെ സ്വാനുഭവങ്ങളാണ് ഇതിലെ ഉള്ളടക്കം. പണമുള്ള വീടുകളിലെ അവിഹിതഗര്‍ഭങ്ങളെല്ലാം സാധാരണ പുറത്തു വരുന്നതിനുമുമ്പു ആ കഥതന്നെ നാമാവിശേഷമാകും. അരമനക്കു പണം ഉള്ളടത്തോളംകാലം കന്യാസ്ത്രീമതില്‍ക്കെട്ടിലുള്ളിലെ അരമനരഹസ്യങ്ങളും ക്രൂരതകളും തുടരുക തന്നെചെയ്യും. അസഹ്യമായ അപമാനത്തിന്‍റെയും വേദനകളുടെയും കഥകളാണ് ആശ്രമ ജീവിതത്തിനുള്ളിലുള്ളത്. ചില പെൺകുട്ടികൾ ആശ്രമത്തില്‍‍നിന്നും രക്ഷപ്പെട്ട് ഒളിച്ചോടുന്നു. മറ്റു ചിലർ ആത്മഹത്യ ചെയ്യുന്നു. പെണ്‍ക്കുട്ടികളെ ബലാല്‍സംഗം ചെയ്യുന്ന പല പുരോഹിതരെയും കന്യാസ്ത്രീവളപ്പില്‍ കാണാം. അത്തരം സംഭവങ്ങളില്‍ ആരെങ്കിലും പ്രതികരിച്ചാല്‍ ‍കുറ്റവാളിയായ പുരോഹിതനൊപ്പമേ സഹകന്യാസ്ത്രീകളും നില്‍ക്കുകയുള്ളൂ.

മേരി ചാണ്ടിയുടെ ജീവിതത്തിലും ദുഖകരമായ ഒരു സംഭവം ഉണ്ടായിട്ടുണ്ട്. ആറാംവയസ്സുമുതല്‍ യേശുവിനെമാത്രം ഹൃദയത്തിലെന്നും താലോലിച്ചുനടന്ന ഈ സഹോദരിയെ ഒരു പുരോഹിതന്‍ ബലാല്‍സംഗം ചെയ്യാനായി ശ്രമിച്ചതും സംഭവിക്കരുതാത്ത ഒരു അനുഭവം ആയിരുന്നു. ‍തന്‍റെ ചാരിത്രത്തിനു കളങ്കം വരുത്തുവാന്‍ ശ്രമിച്ച അയാളെ മേരി നല്ലവണ്ണം കൈകാര്യം  ചെയ്തു. പുരോഹിതൻ എന്തു  തെറ്റുചെയ്താലും പ്രതികരിക്കരുതെന്നുള്ള എഴുതപ്പെടാത്ത ഒരു നിയമവും കന്യാസ്ത്രി മഠങ്ങളിലുണ്ടായിരുന്നു. അന്നു മേരിക്കു പ്രായം ഇരുപതുവയസ്സു മാത്രം. ചേവായൂര്‍മഠം ആശ്രമത്തിലാണു ബലാല്‍സംഗത്തിനു പുരോഹിതൻ തുനിഞ്ഞത്. ഒരു സുപ്രഭാതത്തില്‍ കുര്‍‍ബാനയ്ക്കുശേഷം രാവിലത്തെ ഭക്ഷണം നല്കിയപ്പോഴായിരുന്നു സംഭവം. പുരോഹിതന്‍റെ കള്ളനോട്ടം കണ്ടപ്പോഴേ മേരി വിറക്കുവാൻ തുടങ്ങിയിരുന്നു. പ്രഭാതഭക്ഷണം കൊടുക്കാതെ പിന്‍‍വാങ്ങാൻ ശ്രമിച്ചു. പുരോഹിതന്‍, ‍കസേരയില്‍നിന്നും എഴുന്നേറ്റു വാതിലിനു കുറ്റിയിടുകയും ബലമായി കൈകളില്‍ കയറിപ്പിടിക്കുകയും ചെയ്തു. "മേരി നിനക്ക് ഇതൊക്കെ അറിയില്ലേ" എന്നു പറഞ്ഞു അയാള്‍ മേരിയെ മാറോടമര്‍‍ത്തി. തന്‍റെ നിലവിളിച്ചുള്ള കരച്ചിലിന് ആരും ചെവികൊടുത്തില്ല. അയാളില്‍നിന്നും വിടുവിച്ച് ഓടിയ ഈ സഹോദരിയുടെ പിന്നാലെ പിടിക്കുവാന്‍ അയാൾ വീണ്ടും വന്നു. അപ്പോഴാണു കയ്യില്‍കിട്ടിയ സ്റ്റൂള്‍വെച്ച് നിര്‍ദ്ദയമായി പുരോഹിതനെ മര്‍ദ്ദിക്കേണ്ടിവന്നത്. അയാളുടെ നെറ്റിത്തടത്തില്‍നിന്നും രക്തം ചീറ്റുന്നുണ്ടായിരുന്നു. മേരിയെ മഠം അധികാരികൾ ദ്രോഹിയായും കുറ്റവാളിയായും ചിത്രീകരിച്ചു.

ജെസ്മിയുടെ ചോദ്യമാണ് ഇവിടെ പ്രസക്തമാകുന്നത് !"ഒരു സ്ത്രീയുടെ ചാരിത്രം കവർ‍ന്നെടുത്താൽ, ലൈംഗികമായി പീഡിപ്പിച്ചാൽ‍ പ്രതികരിക്കുന്നവരില്ലേ? ആയിരത്തിലൊരാളെങ്കിലും പ്രതികരിക്കുകയില്ലേ? കന്യാസ്ത്രീ സഹോദരികളെക്കുറിച്ച് ഒരു നിമിഷം ചിന്തിക്കൂ? നിസ്സഹായരായ അവർ ഒരിക്കലും പ്രതികരിക്കുകയില്ല. കന്യകാത്വം നഷ്ടപ്പെട്ടാൽ, സന്യാസിനിജീവിതം നഷ്ടപ്പെടുമെന്ന് ഭയപ്പെടുന്നു."

ബിഷപ്പ് ഫ്രാങ്കോയുടെ ഇരയായ കന്യാസ്ത്രീ കരഞ്ഞു. ചാരിത്രവ്രതം നഷ്ടപ്പെട്ടതിൽ ഒറ്റക്കും കരഞ്ഞു. ഒരു തീരുമാനത്തിനായി മുട്ടാവുന്ന വാതിലുകൾ എല്ലാം അവർ മുട്ടി. സഭയുടെ മൗനം മാത്രമായിരുന്നു അവർക്കുള്ള മറുപടി. പൂർവികരുടെ അദ്ധ്വാനഫലവും പിടിയരിയും കൊടുത്തു സമ്പാദിച്ച സ്വത്തുക്കൾ പുരോഹിതരുടെ ലൈംഗിക പീഡന കേസുകൾക്കായി ചെലവഴിക്കുന്ന കാഴ്ചകളാണ് ഇന്ന് കേരള കത്തോലിക്ക സഭയിൽ കാണുന്നത്. മറിയക്കുട്ടി കൊലക്കേസ് വന്നപ്പോഴും അഭയാക്കേസ് വന്നപ്പോഴും സഭയുടെ അളവില്ലാത്ത അൾത്താരപ്പണം കുറ്റവാളികളായ പുരോഹിതർക്കു വേണ്ടി ചെലവഴിക്കുകയായിരുന്നു. പണവും പ്രതാപവും പിടിപാടും കാരണം ഈ രണ്ടു കേസുകളിലും ഉൾപ്പെട്ടിരുന്ന പുരോഹിതർ ഇന്ത്യൻ നിയമവ്യവസ്ഥയെ തന്നെ വിലയ്ക്കു വാങ്ങുകയും ചെയ്തു. ബെനഡിക്റ്റ് ഓണംകുളവും, സെഫിയും, കൊട്ടൂരും പുതൃക്കയുമെല്ലാം കുറ്റക്കാരെന്ന് യുക്തിപൂർവം ചിന്തിക്കുന്നവർക്ക് അറിയാമെങ്കിലും ഭൂരിഭാഗം വിശ്വാസികളും പുരോഹിതരുടെ നെയ്തെടുത്ത നുണകളേ വിശ്വസിക്കുള്ളൂ. അതുപോലെ ബിഷപ്പ് ഫ്രാങ്കോ മുളയ്ക്കലും വിശുദ്ധ നുണകൾകൊണ്ട് വിശ്വാസികളെ അഭിഷേകം ചെയ്തുകൊണ്ടിരിക്കുന്നു.

ഗ്ലോക്കോമയും കാറ്ററാക്റ്റ്സും, ഒരു പഠനം

ജോസഫ് പടന്നമാക്കൽ 

നാം അറിയാതെ പോവുന്ന രണ്ടു നേത്ര രോഗങ്ങളാണ് ഗ്ലോക്കോമയും തിമിരം അഥവാ കാറ്ററാക്റ്റ്സും. ഗ്ലോക്കോമയെ കണ്ണിന്റെ നിശബ്ദമായ കൊലയാളിയെന്നും വിളിക്കുന്നു. നമ്മുടെ ശരീരത്തെപ്പറ്റി സ്വയം ബോധവാന്മാരെങ്കിൽ ആരോഗ്യത്തിനെ തുരങ്കം വെക്കുന്ന പല രോഗങ്ങളിൽനിന്നും നമുക്ക് വിമുക്തി നേടാൻ സാധിക്കും. നാം തന്നെയും നാം ഉൾക്കൊള്ളുന്ന മനസ്സും നമ്മുടെ ശരീരവുമാണ് ഏറ്റവും നല്ല വൈദ്യനെന്നു ആരോ പറഞ്ഞിട്ടുള്ളതും ഓർമ്മിക്കുന്നു.  ഏകദേശം ഇരുപത്തിയഞ്ചു വർഷം മുമ്പ് അവിചാരിതമായിട്ടായിരുന്നു ഞാൻ എന്റെ കണ്ണുകൾ ന്യൂയോർക്കിലുള്ള  'ന്യൂ റോഷലിലെ' കണ്ണു ഡോക്ടറായ ഡോക്ടർ മോറോല്ലോയെക്കൊണ്ട് പരിശോധിപ്പിച്ചത്. എന്റെ കണ്ണുകൾക്കും ഗ്ലോക്കോമ ബാധിച്ചുവെന്ന കാര്യം  അന്നാണ് തിരിച്ചറിഞ്ഞത്. അതിനുശേഷം നാളിതുവരെ വർഷത്തിൽ രണ്ടു പ്രാവിശ്യം ഡോക്ടറെ കാണുകയും കണ്ണിൽ ദിവസവും മരുന്നൊഴിക്കുകയും കണ്ണുകൾ സൂക്ഷ്മതയോടെ പരിപാലിക്കുകയും ചെയ്യുന്നു.

ഗ്ലോക്കോമ ഒരു പാരമ്പര്യ രോഗമായി കണക്കാക്കുന്നു. എന്റെ മുത്തച്ഛനും പിതാവിനും ബന്ധുജനങ്ങളിൽ പലർക്കും കണ്ണുകളിൽ ഗ്ലോക്കോമയുണ്ടായിരുന്നു. ഈ രോഗം മൂലം മുത്തച്ഛന്റെ കണ്ണുകൾ നഷ്ടപ്പെടുകയുമുണ്ടായി. കണ്ണു കാണില്ലാത്ത മുത്തച്ഛന്റെ വടിയെ പിടിച്ച് അദ്ദേഹത്തെ സഹായിച്ചിരുന്ന ബാല്യകാലങ്ങളും ഓർമ്മയിലുണ്ട്. എന്റെ കണ്ണുകൾ ശരിയാം വിധം  സംരക്ഷിച്ചിരുന്നതുകൊണ്ടു നാളിതു വരെ   സർജറിയില്ലാതെ ജീവിതം തള്ളി നീക്കാൻ സാധിച്ചു. എന്നാൽ ഈ അടുത്ത ദിവസം ഓർക്കാപ്പുറത്ത് പ്രായമാകുമ്പോഴുണ്ടാകുന്ന കാറ്ററാക്റ്റ്സുകൂടി ബാധിച്ചപ്പോഴാണ് കണ്ണിന്റെ ഈ രണ്ടു രോഗങ്ങളെപ്പറ്റി ഒരു ലേഖനം എഴുതണമെന്നുള്ള ആശയമുണ്ടായത്. കാറ്ററാക്റ്റ്സിനുള്ള സർജറി ഈ മാസം ചെയ്യുകയും വേണം.

പ്രായം കഴിയുംതോറും ആരോഗ്യം ക്ഷയിക്കുകയെന്നത് പ്രകൃതിയുടെ നിശ്ചയമാണ്. ഒരുവന്റെ ജീവിതത്തിലെ കടന്നുപോവുന്ന കാലങ്ങളിൽ വാർദ്ധക്യത്തിന്റെ നൊമ്പരങ്ങൾ അഭിമുഖീകരിക്കുകയും വേണം. അക്കൂടെ ഡയബീറ്റിക്സ്, ഹൃദയാഘാത പ്രശ്നങ്ങൾ എന്നിവകളെല്ലാം കാരണങ്ങളാകാം. അതുപോലെ പ്രായമാകുമ്പോൾ കണ്ണിനും രോഗം വരുകയെന്നത് സാധാരണമാണ്.  പതിവായി ഡോക്ടറെ സന്ദർശിച്ച് കണ്ണുകൾ പരിശോധിച്ചുകൊണ്ടിരുന്നാൽ നമ്മുടെ കണ്ണുകളെ സംരക്ഷിക്കാൻ നമ്മളാൽ കഴിയുന്നതു ചെയ്തുവെന്ന സംതൃപ്തിയും  ലഭിക്കും. ഗ്ലോക്കോമായും  കാറ്ററാക്റ്റ്സും (തിമിരം)  പ്രായമായശേഷമുള്ള കണ്ണിന്റെ മറ്റു രോഗങ്ങളും പെട്ടെന്ന് കാണപ്പെടാനോ അറിയാനോ സാധിക്കില്ല. കണ്ണിന്റെ കാഴ്ച നഷ്ടപ്പെടുന്നത് വളരെ സാവധാനമായിരിക്കും. ഈ രോഗങ്ങൾ  ആരംഭത്തിൽ തന്നെ കണ്ടുപിടിച്ചാൽ രോഗം നിയന്ത്രിച്ചുകൊണ്ടു കണ്ണിനെ പരിപാലിക്കാൻ സാധിക്കും.

ഡയബീറ്റിക്സുള്ളവർ കണ്ണുകൾ പരിശോധിച്ചുകൊണ്ടിരിക്കണം. കാരണം ഡയബീറ്റിക്സ് പെട്ടെന്ന് കണ്ണുകളെ ബാധിക്കുകയും കാറ്ററാക്റ്റ്സിനു വഴി തെളിയിക്കുകയും ചെയ്യും. അമേരിക്കൻ ഡയബെറ്റിക്സ് സംഘടനയുടെ സ്ഥിതിവിവര കണക്കുകളനുസരിച്ച് ഏകദേശം 22 മില്യൺ രോഗികൾ തങ്ങൾക്കു ഡയബെറ്റിക്സുണ്ടെന്നുള്ള വസ്തുത അറിയുന്നില്ല. കണ്ണുകൾ ഡോക്ടർ പരിശോധിക്കുമ്പോഴാണ് ഡയബെറ്റിക്സ് ഉള്ള വിവരം അറിയുന്നത്. 'റേറ്റിനായിൽ' രക്ത വാഹിനിയിൽ ഷുഗർ ലവൽ ശേഖരിക്കുമ്പോൾ പ്രോട്ടീൻ ചോരാൻ സാധ്യതയുണ്ട്. അങ്ങനെ കണ്ണിന്റെ റെറ്റിനയ്ക്ക് തകരാറ് സംഭവിക്കുന്നു. ഡയബീറ്റിക്സ് ഉള്ളവർക്ക് കണ്ണിന്റെ കാഴ്‌ച കുറയാൻ സാധ്യതയുണ്ട്. ഓക്സിജനും ന്യുട്രിജനും കണ്ണിൽ എത്താത്തതാണ് കാരണം. വർഷം തോറും കണ്ണിന്റെ പരിശോധനയ്ക്ക് പോയാൽ പ്രശ്നങ്ങൾ കണ്ടുപിടിക്കാൻ സാധിക്കും. ബ്ലഡ് ഷുഗർ ലെവൽ നിയന്ത്രിച്ച് കണ്ണിനെ രക്ഷിക്കാനും സാധിക്കും.

നാം അറിയാതെ പതിയെ നമ്മുടെ കണ്ണിനെ അന്ധമാക്കുന്ന ഒരു രോഗമാണ് ഗ്ലോക്കോമ. ഒരിക്കൽ കാഴ്ച കുറഞ്ഞാൽ പിന്നീട് പൂർവ്വ സ്ഥിതിയിൽ ഒരിക്കലും കണ്ണിനെ കൊണ്ടുവരാൻ സാധിക്കില്ല. ഗ്ലോക്കോമയുടെ ആരംഭത്തിൽ നേരെയുള്ള വസ്തുക്കൾ വ്യക്തമായി നാം കാണുന്നുണ്ടെങ്കിലും പാർശ വശങ്ങൾ അദൃശ്യങ്ങളായിരിക്കും. കണ്ണിന്റെ മർദ്ദം സാധാരണ ലെവലിൽ നിന്ന് അധികമായാൽ ചീകത്സ തുടങ്ങേണ്ടതാണ്. വർഷത്തിൽ ഒന്നു രണ്ടു പ്രാവശ്യം ഡോക്ടറെ കണ്ടുകൊണ്ടിരിക്കണം. കണ്ണിലെ റെറ്റിനയുടെ ആവരണത്തിൽ സെല്ലുകൾ നശിക്കുന്ന കാരണം മങ്ങിയ വെളിച്ചത്തിൽ വസ്തുക്കൾ കാണാൻ ബുദ്ധിമുട്ടാകും. ചിലപ്പോൾ വസ്തുക്കളെ രണ്ടായി കാണും. രണ്ടു വശങ്ങളും സൂക്ഷ്മ ദൃഷ്ടിയോടെ കാണാൻ സാധിക്കാത്തതുകൊണ്ടു ഗ്ലോക്കോമയുള്ളവർ ഡ്രൈവ് ചെയ്യുമ്പോൾ കൂടുതൽ അപകടങ്ങൾ ഉണ്ടാക്കാറുണ്ട്. കണ്ണ് വീർക്കുകയും ചുമക്കുകയും അമിതമായി കണ്ണിൽ വെള്ളം വരുകയും ചെയ്യാം. ഗ്ലോക്കോമയുടെ ആരംഭ പ്രശ്നങ്ങളെല്ലാം കണ്ണിൽ മരുന്നൊഴിച്ച് പരിഹരിക്കാനും സാധിക്കുന്നു.

ആരോഗ്യം സംരക്ഷിക്കാനുള്ള വ്യായാമങ്ങൾ നല്ലതു തന്നെ. എന്നാൽ ചില തരം വ്യായാമങ്ങൾ ചിലപ്പോൾ കണ്ണിന് തകരാറുണ്ടാക്കും. അമിതമായ ഭാരം എടുത്തുകൊണ്ടുള്ള വ്യായാമം (Weight Lifting)കണ്ണിന് നല്ലതല്ല. ഭാരം എടുത്തുകൊണ്ടു ശ്വസോച്ഛാസത്തെ നിയന്ത്രിച്ചാൽ കണ്ണിനെ ബാധിക്കുമെന്ന് ഗവേഷണപ്രബന്ധങ്ങളിൽ കാണുന്നു. നീണ്ട സമയം ഭാരം ചുമക്കുന്നതുമൂലം കണ്ണിന്റെ സമ്മർദ്ദം കൂടുകയും ഗ്ലോക്കോമ, തിമിരംപോലുള്ള കണ്ണിന്റെ അസുഖങ്ങൾ വഷളാവുകയും ചെയ്യും. കൂടാതെ ബ്ലഡ് പ്രഷർ കൂടിയാലും ഗ്ലോക്കോമയ്ക്കു വഴിയൊരുക്കും.

കണ്ണിൽ സ്വാഭാവികമായുണ്ടാകുന്ന ദ്രാവകം ഉത്ഭാദിപ്പിക്കുകയും ആ ദ്രാവകം ഒഴുകിപോവുകയും ചെയ്യുന്ന അനുപാതം തെറ്റുമ്പോഴാണ് ഗ്ലോക്കോമ ഉണ്ടാവുന്നത്. ഒരു ബാസ്‌ക്കറ്റ് ബോളിന്‌ അതിന്റെ ശരിയായ ആകൃതിക്ക് കാറ്റു നിറക്കേണ്ടത് ആവശ്യമാണ്. എങ്കിലേ അതിന്റെ വട്ടത്തിലുള്ള ആകൃതി നിലനിൽക്കുള്ളൂ. അതുപോലെ കണ്ണിലെ ഉണ്ണിക്ക് സ്വയം ഉണ്ടാവുന്ന ദ്രാവകം ആവശ്യമാണ്. എന്നാൽ മാത്രമേ അത് പന്തിന്റെ ആകൃതിയിലാവുകയും നമുക്ക് കാണാൻ സാധിക്കുകയുമുള്ളൂ. കണ്ണിന് എന്തെങ്കിലും തകരാറു സംഭവിച്ചാൽ ദ്രാവകം ഉത്ഭാദിപ്പിക്കാതെ വരുകയും ഗ്ലോക്കോമയുണ്ടാവുകയും ചെയ്യും. ശരിയായ പരിപാലനമില്ലെങ്കിൽ കണ്ണിന്റെ കാഴ്ച നഷ്ടപ്പെടുകയും ചെയ്യും.

ഗ്ലോക്കോമ സൂക്ഷിച്ചില്ലെങ്കിൽ വളരെ വഷളാകുന്ന ഒരു കണ്ണു രോഗമാണ്. കണ്ണിനകത്തുള്ള സമ്മർദം (pressure) കൂടുന്നതുകൊണ്ടാണ് ഗ്ലോക്കോമയായി രൂപാന്തരപ്പെടുന്നത്. കണ്ണിലെ ഈ രോഗം ഏതു പ്രായത്തിലുള്ളവർക്കും ഉണ്ടാകാം. രോഗം മൂർച്ഛിച്ചാൽ കണ്ണിന്റെ കാഴ്ച ശക്തിയും നശിക്കാം. സാധാരണ ആരോഗ്യമുള്ള ഒരു കണ്ണിന്റെ മർദ്ദം പന്ത്രണ്ടു മുതൽ ഇരുപതുവരെയാണ് നിശ്ചയിച്ചിരിക്കുന്നത്. അതിന്റെ പരിധി കഴിഞ്ഞാൽ ഗ്ലോക്കോമ രോഗമായി മാറും. സമ്മർദം ഇരുപത്തിയഞ്ചു കഴിയുമ്പോൾ കണ്ണിന് ലേസർ സർജറി മുതലായ പരിഹാര മാർഗങ്ങൾ തേടേണ്ടി വരും. പരിധി കഴിഞ്ഞുള്ള സമ്മർദ്ദം കുറയ്ക്കാൻ ഡോക്ടറിന്റെ നിർദ്ദേശങ്ങളനുസരിച്ച് 'ലുമീഗൻ', 'കോംബിഗൻ' മുതലായ ഔഷധ ദ്രാവകങ്ങൾ കണ്ണിലൊഴിക്കേണ്ടി  വരുന്നു.

കണ്ണിന്റെ ബാഹ്യമായ അറകളിൽനിന്നും തെളിമയാർന്ന ഒരു ദ്രാവകം സാധാരണ ഊർന്നുകൊണ്ടിരിക്കും. അത് രക്തവാഹിനിക്കുഴലിൽ നിന്നും രൂപാന്തരം പ്രാപിച്ചു  വരുന്ന ദ്രാവകമാണ്. ഈ ദ്രാവകം മറുവശത്തുകൂടി പൊയ്ക്കൊണ്ടുമിരിക്കും. മനുഷ്യ ശരീരത്തിൽ പ്രായമനുസരിച്ച് മർദ്ദങ്ങളുടെ മാറ്റമുണ്ടാകാം. കണ്ണിന്റെ അളവുകോലായ പന്ത്രണ്ടിനും പത്തൊമ്പതിനുമിടക്ക് മർദ്ദം നിന്നില്ലെങ്കിൽ ദ്രാവകം അറയിൽ ശേഖരിച്ച് കണ്ണിന്റെ ലെൻസിനെ പുറകോട്ടു തള്ളാൻ കാരണമാകും. അത് കാഴ്ച്ചയെ  ബാധിക്കും.

ഗ്ലോക്കോമ കൂടാതെ കണ്ണിനെ പ്രായമാകുമ്പോൾ ബാധിക്കുന്ന മറ്റൊരു രോഗമാണ് കാറ്ററാക്റ്റ്സ് അഥവാ തിമിരം. കാറ്ററാക്റ്റ്സ്   തന്നെ പലവിധമുണ്ട്. ഏറ്റവും പ്രധാനമായത് പ്രായത്തിനെ അടിസ്ഥാനമാക്കിയുള്ള കാറ്ററാക്റ്റ്സാണ്.  അറുപതും എഴുപതും പ്രായമടുക്കുമ്പോൾ കണ്ണുകളിൽ ഈ രോഗമുണ്ടാകാം. മറ്റൊന്ന് മുറിവുകൾ കൊണ്ട് പരിക്കേൽക്കുമ്പോഴുള്ള കാറ്ററാക്റ്റ്സാണ്. അത് സാധാരണ കായിക കളി മേഖലകളിൽ ഏർപ്പെടുന്നവർക്കുണ്ടാവാം. അല്ലെങ്കിൽ കണ്ണിനുള്ളിൽ അപകടം സംഭവിക്കുന്ന വിധം ജോലി ചെയ്യുന്നവർക്കും വരാം. ജന്മനാലുള്ള കാറ്ററാക്റ്റ്‌സുകളുമുണ്ട്. അത് ഒരു വയസുള്ള കുഞ്ഞിനും സംഭവിക്കാം. അത്തരംകാറ്ററാക്റ്റ്സുകൾ അപൂർവമാണ്. കോർട്ടികൊ സ്റ്റിറോയ്ഡ്, ഡയബീറ്റിക്സ്, കൂടാതെ ചില മെഡിക്കേഷൻ മൂലവും കാറ്ററാക്റ്റ്സ് അപൂർവമായി സംഭവിക്കാറുണ്ട്.

കണ്ണ് ധാരാളം പ്രവർത്തിച്ചതുകൊണ്ടോ, വളരെയധികം വായിച്ചതുകൊണ്ടോ ടെലിവിഷൻ അമിതമായി കണ്ടതുകൊണ്ടോ നീണ്ട സമയം കംപ്യൂട്ടറിന്റെ മുമ്പിലിരുന്നതുകൊണ്ടോ, കുറച്ചു സമയം ഉറങ്ങിയതുകൊണ്ടോ കാറ്ററാക്റ്റ്സ് ഉണ്ടാവില്ല. നാം പുലർത്തുന്ന പല പാരമ്പര്യങ്ങളായ ധാരണകളും തെറ്റായ വിശ്വാസങ്ങളാണ്. കാറ്ററാക്റ്റ്സ് പാരമ്പര്യമായി ലഭിച്ച രോഗമാകാം. അതായത് മാതാപിതാക്കൾക്കോ അടുത്ത ബന്ധുക്കൾക്കോ കാറ്ററാക്റ്റ്സ് ഉണ്ടെങ്കിൽ അത് തലമുറകളിൽക്കൂടി ലഭിക്കുകയുമാവാം. കണ്ണിനു മുറിവ് പറ്റിയാലോ കണ്ണ് എവിടെയെങ്കിലും മുട്ടിയാലോ കാറ്ററാക്റ്റ്സിലേക്ക് നയിച്ചേക്കാം.

നിരവധി ടെസ്റ്റുകളിൽക്കൂടി കാറ്ററാക്റ്റ്സുണ്ടോയെന്നു അറിയാൻ സാധിക്കുന്നു. ടെസ്റ്റുകൾ നടത്തുന്നത് കണ്ണിന്റെ സ്പെഷ്യലിസ്റ്റുകളായിരിക്കും. പ്രകാശം നിറഞ്ഞ ലൈറ്റിൽക്കൂടി ഡോക്ടർമാർ  കണ്ണിന്റെ 'ബാൾ' ടെസ്റ്റ് ചെയ്യും. എന്നിട്ട് കാറ്ററാക്റ്റ്സ് ഉണ്ടോയെന്ന് തീരുമാനിക്കും. കണ്ണ് മുഴുവനായി ടെസ്റ്റ് ചെയ്യാതെ കാറ്ററാക്റ്റ്സ് നിശ്ചയിക്കുക സാധിക്കില്ല. കാറ്ററാക്റ്റ്സ് പഴകി പോയില്ലെങ്കിൽ, അടുത്ത നാളുകളിലാണ് കണ്ണിന്റെ കാഴ്ച്ച മങ്ങിയതെങ്കിൽ ഭയപ്പെടേണ്ട ആവശ്യവുമില്ല.

ചിലർക്ക് കാറ്ററാക്റ്റ്സ് അവരുടെ സുവർണ്ണ കാലത്തു തന്നെ സംഭവിക്കുന്നു. കൂടിയതും കുറഞ്ഞതുമായ കാറ്ററാക്റ്റ്സുകൾ ഭേദപ്പെടുത്തുവാൻ ആധുനിക മെഡിക്കൽ ശാസ്ത്രത്തിന് ഇന്ന് പല പോംവഴികളുണ്ട്. എങ്കിലും കാറ്ററാക്റ്റ്സ് എന്തെന്ന് രോഗം ബാധിച്ചവർ അറിഞ്ഞിരിക്കേണ്ടതായുമുണ്ട്. ഇത് പാരമ്പര്യ രോഗമായതുകൊണ്ടും പ്രായമായവർക്ക് ഉണ്ടാവുന്ന രോഗമായതുകൊണ്ടും അതിന്റെ വളർച്ചയെ തടയാൻ സാധിക്കില്ല. എങ്കിലും കണ്ണിന്റെ സുരക്ഷിതത്വത്തിനുവേണ്ടി പലതും ചെയ്യാൻ സാധിക്കും. പുറത്തിറങ്ങുമ്പോൾ സൂര്യ താപമേൽക്കേണ്ടി വരുന്നുവെങ്കിൽ, പ്രത്യേകിച്ച് വേനൽക്കാലങ്ങളിൽ  കണ്ണിനെ പ്രതിരോധിക്കാൻ കൂളിംഗ് ഗ്ളാസ് ധരിക്കുന്നത് നന്നായിരിക്കും. തലയിൽ തൊപ്പി ധരിക്കുന്നതും കണ്ണിന്റെ സുരക്ഷിതത്വത്തിനു സഹായകമാകും. അതുപോലെ വോളിബാൾ, ഫുട്ട്ബാൾ കളിക്കുന്നവരും കെട്ടിട നിർമാണ തൊഴിലുകളിൽ ഏർപ്പെടുന്നവരും കണ്ണിന് പരിക്കേൽക്കാതെ ശ്രദ്ധിക്കണം.  വേണ്ട രീതികളിൽ കണ്ണിനെ സംരക്ഷിച്ചില്ലെങ്കിൽ അവർക്ക് കണ്ണിന് കേടുകൾ സംഭവിക്കാൻ സാധ്യതകളുണ്ട്.

മനുഷ്യ ശരീരത്തിലെ അഞ്ച് ഇന്ദിരീയങ്ങളിൽ കണ്ണാണ് ഏറ്റവും പ്രധാനമായിട്ടുള്ളത്. ഒരുവന് കാഴ്ച നഷ്ടപ്പെടുന്ന ഒരു സ്ഥിതിവിശേഷം ചിന്തിക്കാനും സാധിക്കില്ല. എല്ലാ പ്രായത്തിലുള്ളവർക്കും കണ്ണിന്റെ ലെൻസിൽ പ്രശ്നങ്ങൾ ഉണ്ടാകാറുണ്ട്. നമ്മുടെ ജീവിത സാഹചര്യങ്ങളായ പുകവലി, മദ്യപാനം കൊണ്ടും കണ്ണിലെ മൂടൽ അനുഭവപ്പെടാം. പുകവലി ആരോഗ്യത്തിന് ഹാനികരമെന്ന് നമുക്കെല്ലാവർക്കും അറിയാം. അതിന്റ ദുരിത ഫലം അനുഭവിക്കുന്നതും നമ്മുടെ കണ്ണുകളാണ്. പുകവലിയും പ്രായം ഏറെയാകുന്നതും കാറ്ററാക്റ്റ്സിനു കാരണമാകും. പുകവലി നിർത്തുന്നവരിൽ കാറ്ററാക്റ്റ്സ് കുറവെന്നും കാണുന്നു. കുടിയന്മാർക്കും കാലക്രമത്തിൽ ഈ രോഗം ബാധിക്കാം. രോഗം ബാധിക്കുന്നത്
 കുടിക്കുന്ന കാലഘട്ടത്തിലായിരിക്കില്ല. കള്ളുകുടിയുടെ അളവ് കുറയ്ക്കുന്നതു ആരോഗ്യത്തിനും കണ്ണിനും നല്ലതായിരിക്കും. ഭക്ഷണം ശരിക്കു കഴിക്കാതിരുന്നാലും  സ്റ്റിറോയ്ഡ് പോലുള്ള മെഡിക്കേഷൻ എടുക്കുന്നവർക്കും കണ്ണിന്റെ പ്രശ്നങ്ങൾ അനുഭവപ്പെടാം. ചുവന്ന വൈൻ മിതമായി കുടിക്കുന്നത് കാറ്ററാക്റ്റ്സ് ഉണ്ടാകാതിരിക്കാൻ നല്ലതെന്നും പറയപ്പെടുന്നു. ഒരിക്കലും കുടിക്കാത്തവർക്കും അല്പം ചുവന്ന വൈൻ ആരോഗ്യത്തിനു നല്ലതു തന്നെ. കണ്ണിനു ശരിയാം വിധം  സുരക്ഷിതത്വം  നൽകാതെ സൂര്യ പ്രകാശത്തിൽ നടന്നാലും കൂടുതൽ സമയം നട്ടുച്ചകളിൽ സമയം ചെലവഴിച്ചാലും കണ്ണിന്റെ ആരോഗ്യം നശിച്ചേക്കാം.

കാറ്ററാക്റ്റ്സ് മൂലം കാഴ്ച്ചയുടെ പ്രശ്നമുണ്ടാവുന്നെങ്കിൽ ആദ്യം കണ്ണിനുള്ളിൽ മഴക്കാറുകൾ പോലെ കാണുക മാത്രമല്ല തീർത്തും ദൃശ്യങ്ങൾ അവ്യക്തവുമായിരിക്കും. അതിന്റെ കാരണം കാറ്ററാക്റ്റ്സിനു
ആവശ്യമുള്ള പ്രോട്ടീൻ ഒരു പ്രത്യേക സ്ഥലത്ത് കൂടിയിരിക്കുന്നതുകൊണ്ടാണ്. കാറ്ററാക്റ്റ്സ്  കൂടുതോറും പുറമെയുള്ള വസ്തുക്കൾ മഞ്ഞ നിറത്തിലോ ബ്രൗൺ നിറത്തിലോ കണ്ണുകളിൽ കാണപ്പെടും. ശരിയായി കണ്ണുകളുടെ സുരക്ഷിതത്വം പാലിക്കാത്തവർ ഈ രോഗം മൂലം കണ്ണിനെ അന്ധമാക്കും.

കാറ്ററാക്റ്റ്സിന്റെ ലക്ഷണങ്ങളെന്തെന്നും ഭാവിയിൽ കാറ്ററാക്റ്റ്സ് എങ്ങനെ പ്രശ്നങ്ങൾ ഉണ്ടാക്കുന്നുവെന്നും അറിയേണ്ടിയിരിക്കുന്നു. കാറ്ററാക്റ്റ്സ് അനുഭവപ്പെടുന്നത് കണ്ണിനു മൂടൽ വരുകയോ, കാണുന്ന വസ്തുക്കൾ അവ്യക്തമായി കാണുമ്പോഴാണ്. ആരംഭത്തിൽ ഇടയ്ക്കിടെ മാത്രം മങ്ങലുകൾ അനുഭവപ്പെടാം. ഡ്രൈവിംഗ് സമയത്തോ ജോലി ചെയ്യുമ്പോഴോ മൂടലിനെപ്പറ്റി ശ്രദ്ധിച്ചേക്കാം. വളരെ സാവധാനം കണ്ണിന്റെ കാഴ്ച്ച മങ്ങുകയും ചെയ്യുന്നു. മനുഷ്യരുടെ മുഖം തിരിച്ചറിയാനും കാറോടിക്കാനും പ്രയാസമായി വരുകയും ചെയ്യും. രാത്രിയിൽ വസ്തുക്കൾ തിരിച്ചറിയാനും കാണാനും ബുദ്ധിമുട്ടായിരിക്കും. കാരണം, കാറ്ററാക്റ്റ്സ് കണ്ണിന്റെ കാഴ്ച്ച ഇരുട്ടാക്കുന്നു. കാറ്ററാക്റ്റ്സിന്റെ ആരംഭത്തിൽ, പകൽസമയങ്ങളിൽ കാഴ്ചയ്ക്ക് അധികം പ്രശ്നങ്ങൾ ഉണ്ടാവുകയില്ല. രാത്രികാലങ്ങളിൽ വണ്ടികൾ ഓടിക്കുന്നവർക്ക് കാറ്ററാക്റ്റ്സുമൂലം കാണാൻ സാധിക്കാതെ അപകടങ്ങളുണ്ടാകാം.

പ്രായേണ ആരോഗ്യമുള്ള ഒരു വ്യക്തിക്ക് കണ്ണിലേക്ക് ലൈറ്റ് വരുമ്പോൾ പെട്ടെന്നു കണ്ണിന് അസ്വസ്ഥത അനുഭവപ്പെടുക സാധാരണമാണ്. അതുപോലെ ഇരുട്ടുമുറിയിൽ നിന്നും പ്രകാശത്തിലേക്ക് പോവുമ്പോഴും കണ്ണിന് മഞ്ചലുണ്ടാവുന്നു. കണ്ണിലേക്ക് ഫ്‌ളാഷ് ലൈറ്റ് വന്നടിക്കുമ്പോഴും കണ്ണ് അറിയാതെ അടച്ചുപോകും. ലൈറ്റിൽ നിന്നും പെട്ടെന്നു ഭവിക്കുന്ന പ്രതിഫലനം മാറി പോവുകയും ചെയ്യും. എന്നാൽ കാറ്ററാക്റ്റ്സുള്ളവർക്കു ലൈറ്റിൽ നിന്നുള്ള പ്രകാശവും പ്രതിഫലനങ്ങളും കൂടുതൽ അസ്വസ്ഥതയുണ്ടാക്കുന്നു. ചിലപ്പോൾ അവർക്ക് വെളിച്ചം വേദനാജനകവും ആയിരിക്കും. കഴിഞ്ഞ കാലത്തേക്കാളും പ്രകാശത്തോട് കൂടുതൽ അലർജിയുണ്ടാവുകയും ചെയ്യും.

കത്തി നിൽക്കുന്ന ഒരു ബൾബിനു ചുറ്റും  കണ്ണുകൾക്ക് വ്യത്യസ്തമായി ദീപ്തി വലയം കാണുന്നുവെങ്കിൽ കാറ്ററാക്റ്റ്സുണ്ടന്നു അനുമാനിക്കാം. അങ്ങനെയുള്ളവർക്ക് രാത്രിയിൽ ഡ്രൈവ് ചെയ്യുമ്പോൾ എതിരെയുള്ള കാറിന്റെ പ്രകാശ വലയം അപകടത്തിലേക്ക് വലിച്ചിഴക്കാൻ കാരണമാകാം. പ്രത്യേകിച്ച് പട്ടണത്തിൽ കൂടി ഓടിക്കുമ്പോൾ കൂടുതൽ അപകട സാധ്യതകളും തെളിയും.

പുതിയ പുതിയ കണ്ണടകളും കോണ്ടാക്റ്റ് ലെൻസുകളും മാറി മാറി ആവശ്യം വരുന്നതും കാറ്ററാക്റ്റ്സിന്റെ ലക്ഷണമാണ്. സാധാരണ കണ്ണടയിലുള്ള ഗ്ലാസ്സുകൾക്ക് മാറ്റങ്ങളാവശ്യം വരുന്നത് മൂന്നും നാലും വർഷങ്ങൾക്കു ശേഷമായിരിക്കും. ഏതാനും മാസങ്ങൾക്കുള്ളിലോ ഒരു വർഷത്തിനു ശേഷമോ കണ്ണടകൾ മാറ്റേണ്ട ആവശ്യം വരില്ല. കണ്ണടകൾ കൂടെക്കൂടെ മാറേണ്ട ആവശ്യം വരുന്നുവെങ്കിൽ കണ്ണിന്റെ ഡോക്ടറെ കാണേണ്ടത് അത്യാവശ്യമായി വരുന്നു. കാറ്ററാക്റ്റ്സ് അല്ലെങ്കിൽ കണ്ണിന് മറ്റെന്തെങ്കിലും പ്രശ്നവുമാകാനും സാധ്യതയേറും.

കണ്ണുകൾ കൊണ്ട് നോക്കുമ്പോൾ ഒരു വസ്തുവിനെ രണ്ടായി കാണുന്നതും കാറ്ററാക്റ്റ്സിന്റെ  അടയാളമാണ്. കണ്ണിന്റെ ലെൻസിനു ചുറ്റും പ്രോട്ടീൻ സമാഹരിക്കുന്നതുകൊണ്ടാണ് കാറ്ററാക്റ്റ്സ് ബാധിച്ചവർക്കു  കാണുവാൻ ബുദ്ധിമുട്ടാകുന്നത്. അത്തരം അടയാളങ്ങൾ കണ്ണിനു വീർപ്പോ, നീരോ, സ്ട്രോക്കോ, തലച്ചോറിന് ക്യാൻസറോ വന്നവർക്കും വരാം.

കാറ്ററാക്റ്റ്സ് രൂപീകരിക്കുന്ന ആദ്യഘട്ടത്തിൽ കണ്ണുകൾക്കു കാണാൻ ബുദ്ധിമുട്ടു വരണമെന്നില്ല. എന്നാൽ പ്രായമാകുംതോറും കണ്ണിലെ പ്രോട്ടീൻ വളരെയധികം ക്ഷയിക്കും. സാവധാനമേ കണ്ണിൽ ഈ രോഗം വളരുകയുള്ളൂ. ചിലപ്പോൾ കാറ്ററാക്റ്റ്സ് തുടങ്ങി പൂർണ്ണ വളർച്ചയെടുക്കാൻ വളരെ വർഷങ്ങൾ വേണ്ടി വരും. ചില സന്ദർഭങ്ങളിൽ കണ്ണിന്റെ ഈ രോഗം ബാധിക്കുന്നതു ഒരുവന്റെ എഴുപതും എൺപതും വയസുകൾ കഴിഞ്ഞ കാലഘട്ടങ്ങളിലായിരിക്കാം. ഒരു വസ്തു കാണുമ്പോൾ ചില ഭാഗങ്ങൾ അദൃശ്യങ്ങളായിരിക്കാം. നിറങ്ങളും മങ്ങിയതായി മാത്രമേ കാണാൻ സാധിക്കുള്ളൂ.

ആരോഗ്യ പരിപാലനത്തിന് ധാരാളം വെള്ളം കുടിക്കേണ്ടതും ആവശ്യമാണ്. കണ്ണിന്റെ കാഴ്ച നഷ്ടപ്പെടാതിരിക്കാൻ ആവശ്യത്തിനുള്ള വ്യായാമവും വേണം. നടക്കുകയും ഓടുകയും നീന്തുകയും മുതലായ വ്യായാമങ്ങൾ ആരോഗ്യത്തിന് ഉത്തമമാണ്. ആരോഗ്യം മെച്ചമായിരിക്കുന്നടത്തോളം നമ്മുടെ കണ്ണുകളും ആരോഗ്യമായി തന്നെ നിലകൊള്ളും. പോഷകാംശമുള്ള ഭക്ഷണങ്ങൾ കഴിച്ചുകൊണ്ടിരുന്നാൽ പ്രായമാകുമ്പോഴുളള ആരോഗ്യ പ്രശ്നങ്ങൾക്ക് ശമനം വരാം. കണ്ണിന്റെ ആരോഗ്യ രക്ഷയ്ക്ക് വിറ്റാമിൻ എ.സി.ഇ ഭക്ഷണ പദാർത്ഥങ്ങൾ സഹായകമെന്നു ഗവേഷകരുടെ കുറിപ്പുകളിൽ കാണുന്നു. ഈ വിറ്റാമിനുകൾ പഴവർഗങ്ങളിലും പച്ചക്കറികളിലും ഉണ്ട്. ബ്രോക്കളിയും ഓറഞ്ചും ക്യാരറ്റും കണ്ണിന്റെ ആരോഗ്യം നിലനിർത്താൻ സഹായകമാണ്. ക്യാരറ്റുകൾ കണ്ണിന്റെ ആരോഗ്യത്തിന് ഉത്തമമെന്നു പഴമക്കാരും പറയാറുണ്ട്.  ശരീര ഭാരം അധികം കൂടാതെ വ്യായാമത്തിൽക്കൂടി ഡയബീറ്റിക്സിനെയും നിയന്ത്രിച്ചാൽ കണ്ണിന്റെ ആരോഗ്യം നില നിർത്താൻ സാധിക്കും.  പ്രായം കൂടുംതോറും കണ്ണിൽ പലയിടത്തും അന്ധമാകാനുള്ള ലക്ഷണങ്ങളുമുണ്ടാകും. മറ്റൊരാളിന്റെ മുഖം തന്നെ തിരിച്ചറിയാനുള്ള ബുദ്ധിമുട്ടുകളുമുണ്ടാകാം.

കാറ്ററാക്റ്റ്സ് മൂർച്ഛിക്കുമ്പോൾ സർജറി വേണ്ടി വരും. സർജറിയിൽക്കൂടി മൂടിക്കിടക്കുന്ന കണ്ണിന്റെ സ്വാഭാവിക ലെൻസിനെ നീക്കം ചെയ്തശേഷം അതേ സ്ഥാനത്ത് കൃത്രിമമായ മറ്റൊരു ലെൻസ് സ്ഥാപിക്കുന്നു. ഓരോ വർഷവും അമേരിക്കയിൽ നാലു മില്യൺ കാറ്ററാക്റ്റ്സ് സർജറികൾ നടത്തപ്പെടാറുണ്ട്. ഇത്തരം സർജറികൾ അമേരിക്കയിൽ സർവ്വ സാധാരണമാണ്. കാറ്ററാക്റ്റ്സ് രോഗത്തെ സ്വാഭാവിക രീതിയിൽ തടയാൻ സാധിക്കില്ല. സർജറിയിൽക്കൂടി മാത്രമേ മങ്ങിക്കിടക്കുന്ന കണ്ണിനു രോഗ നിവാരണം നടത്താൻ സാധിക്കുള്ളൂ.

കാറ്ററാക്റ്റ്സിനുള്ള സർജറി നടത്തിയ ഭൂരിഭാഗം പേരും സർജറിയിൽ തൃപ്തരും അത് ആവശ്യമെന്നു കരുതുകയും ചെയ്യുന്നു. തങ്ങളുടെ സുഹൃത്തുക്കൾക്കും കുടുംബാംഗങ്ങൾക്കും രോഗ നിവാരണത്തിന് സർജറിയുടെ ആവശ്യകതയെപ്പറ്റി ശുപാർശ ചെയ്യുകയും ചെയ്യുന്നു. ഭൂരിഭാഗം പേർക്കും പിന്നീട് കണ്ണട വെക്കേണ്ട ആവശ്യം വരില്ല. ഇത് അമേരിക്കയിലെ ഏറ്റവും സുരക്ഷിതമായ സർജറിയായിട്ടാണ് കരുതുന്നത്‌. എന്നിരുന്നാലും പ്രശ്നങ്ങളും ഉണ്ടാകാറുണ്ട്. അണുബാധ, വ്രണം, പഴുപ്പ് മുതലായവകൾ കണ്ണിനെ ബാധിക്കാം. സർജറിക്കുമുമ്പ് സർജറി ചെയ്യുന്ന ഡോക്ടർ സംഭവിക്കാവുന്ന ഭവിഷ്യത്തുകൾ നേരത്തെ തന്നെ രോഗിയെ അറിയിക്കുകയും ചെയ്യും.

കാറ്ററാക്റ്റ്സിനു പല രീതികളിലുള്ള ചീകത്സാസമ്പ്രദായങ്ങളുണ്ട്. കൂടുതലും കേസുകളിൽ സർജറി വേണ്ടി വരും. കാറ്ററാക്റ്റ്സ് നീക്കം ചെയ്തിട്ട് അവിടെ കൃത്രിമമായ ലെൻസ് വെക്കുന്നു. സർജറിക്ക് മുമ്പ് ഏതു തരം ലെൻസാണ് അനുയോജ്യമെന്ന് ഡോക്ടർ തീരുമാനിക്കും. സർജറി മൂലം എസ്റ്റിമാറ്റിസം (Astimaticsm) പോലുള്ള കണ്ണിന്റെ പ്രശ്നവും ഒപ്പം പരിഹരിക്കാൻ സാധിക്കും. അതായത് ദൂരെയുള്ള കാഴ്ചകൾക്ക് ബുദ്ധിമുട്ടുണ്ടെങ്കിൽ സർജറിയിൽക്കൂടി പ്രശ്നങ്ങൾ പരിഹരിക്കുന്നു. സർജറിയല്ലാതെ കാറ്ററാക്റ്റ്സിന്റെ രോഗനിവാരണത്തിനായി പ്രത്യേകമായ ഒരു മെഡിക്കേഷനും മാർക്കറ്റിലില്ല.

സാധാരണ കാറ്ററാക്റ്റ്സ് സർജറിയ്ക്ക് ഹോസ്പിറ്റലിൽ കിടക്കേണ്ട ആവശ്യമില്ല. ലോക്കൽ അനസ്‌തേഷ്യ തരും. അതിനുശേഷം അന്നേ ദിവസം തന്നെ വീട്ടിൽ പോവാനും സാധിക്കുന്നു. സർജറിയുടെ എല്ലാ നടപടി ക്രമങ്ങളും അപ്പോൾത്തന്നെ പൂർത്തിയാക്കുകയും ചെയ്യും. സർജറിയുടെ ചിട്ടകൾ വളരെ ലളിതമാണെങ്കിലും സർജറി എപ്പോഴും ഗൗരവമേറിയതു തന്നെയാണ്. ഡോക്ടർമാരുമായി ഇതേപ്പറ്റി വിശദമായ ഒരു ചർച്ചയും സർജറിക്ക് മുമ്പ് ആവശ്യമാണ്. അതുപോലെ ഏറ്റവും അനുയോജ്യമായ സമയം നോക്കി സർജറി നടത്തുകയും ചെയ്യണം.