മിശ്രവിവാഹം, അനുകൂലവും പ്രതികൂലവും

മിശ്രവിവാഹത്തിന്റെ വിഷയങ്ങളിലേക്ക് കടക്കുമ്പോൾ ഒരുപക്ഷേ  നമ്മുടെ മനസ്സിലാദ്യം വരുന്നത് ഭാരതത്തിന്റെ ചരിത്രതാളുകളിൽ എഴുതപ്പെട്ട ഇന്ദിരയുടെയും ഫെറോസ് ഗാന്ധിയുടെയും പ്രേമകഥയും അതിനുശേഷം അവരുടെ കുടുംബം വേർപിരിഞ്ഞതുമായിരിക്കാം. കാശ്മീരി ബ്രാഹ്മണവംശത്തിൽ ജനിച്ച ഇന്ദിരയും പാർസി വിഭിന്ന മതക്കാരനായ ഫെറോസും തമ്മിലുള്ള ബന്ധത്തിൽ നെഹ്രു നിരാശനായിരുന്നു. കറുത്തവരായ തമിഴരും വെളുത്തവരായ കാശ്മീരികളും ഒന്നാണെന്ന് വാതോരാതെ നെഹ്രു പ്ലാറ്റ്ഫോറങ്ങളിൽ പ്രസംഗിച്ചു നടന്നിരുന്നുവെങ്കിലും സ്വന്തം മകളുടെ വിവാഹപ്രശ്നം വന്നപ്പോൾ അതുൾക്കൊള്ളാൻ അദ്ദേഹത്തിനന്ന് സാധിച്ചില്ല. ഒടുവിൽ മഹാത്മാഗാന്ധിയുടെ പ്രേരണമൂലമാണ് അവരുടെ വിവാഹം നടന്നത്. അക്കാലങ്ങളിൽ ഇന്ദിരാ-ഫെറോസ് മിശ്രവിവാഹം ഇന്ത്യയിലെ പ്രമുഖപത്രങ്ങളിലെ പ്രധാന വാർത്തയായിരുന്നു. രണ്ടു മക്കൾ ജനിച്ചുകഴിഞ്ഞ് ഇന്ദിരാ-ഫെറോസ് ഗാന്ധിയുടെ കുടുംബജീവിതം തകർന്നു. പരസ്പരം വേർപിരിഞ്ഞ് അവർ രണ്ടായി താമസിച്ചു. നെഹ്രുവും ഫെറോസും  തമ്മിലുള്ള അഭിപ്രായ വിത്യാസങ്ങൾ ഇവരുടെ കുടുംബജീവിതത്തെ താറുമാറാക്കിയെന്നും പറയുന്നു. ചരിത്രം ആവർത്തിച്ചുതന്നെ ഇന്ദിരയുടെ പ്രസിദ്ധനായ മകൻ രജീവ്‌ ഗാന്ധിയും ഇറ്റലിക്കാരിയായ സോണിയായെ വധുവാക്കി. ആ വിവാഹം  ഇന്ദിരയുടെ അംഗീകാരത്തോടെയായിരുന്നു.
 

സ്വന്തം സമൂഹത്തിൽനിന്നും വിവാഹിതരാകാതെ ജാതിയും മതവും സംസ്ക്കാരവും ഭാഷയും രാജ്യങ്ങളുടെ അതിരുകളും കടന്നുള്ള മിശ്രവിവാഹം ദാമ്പത്യജീവിതത്തിന് ഗുണപ്രദമോ? സർവ്വേ കണക്കിൻപ്രകാരം അമേരിക്കയിൽ എകദേശം 45 ശതമാനം ജനങ്ങളും മിശ്രവിവാഹിതരാണ്. ഒരേ മതവിശ്വാസം പുലർത്തുന്നവരെക്കാൾ മിശ്രവിവാഹതരിൽ കൂടുതൽ ദാമ്പത്യ പരാജയങ്ങളുള്ളതായി കാണുന്നു. മിശ്രവിവാഹത്തിൽക്കൂടി ദാമ്പത്യജീവിതം നയിക്കുന്നവരിൽ സ്ത്രീകളാണ് നിസഹായരായി ജീവിക്കുന്നത്. മനസാക്ഷിക്കെതിരെ പുരുഷന്റെ മതം അവൾ സ്വീകരിക്കണം. അല്ലെങ്കിൽ പുരുഷനവന്റെ  അധികാരമുപയോഗിച്ച് മതം മാറ്റിക്കും. പുരുഷന്റെ കുടുംബം അവളോട് മതം മാറാൻ നിർബന്ധിക്കും. പ്രത്യേകിച്ച് മതമൗലികവാദികളുടെ കുടുംബങ്ങളിൽ അകപ്പെട്ടാൽ അവളുടെ ജീവിതം നരകതുല്ല്യമായിരിക്കും. വിവാഹത്തിനുമുമ്പ് ഇത്തരം കാര്യങ്ങളിൽ പരസ്പരം ധാരണ നല്ലതാണ്. പക്ഷെ മിക്ക കേസുകളിലും പുരുഷൻ വാക്ക് മാറുന്നതായിട്ടാണ് കണ്ടുവരുന്നത്‌. 

ബ്രിട്ടനിൽ കുടിയേറിയ ട്രിനിഡാട് (Trinidad) രാജ്യക്കാരനായ ജായ്ക്ക് എന്ന കറുത്തവംശജന്റെയും ബ്രിട്ടനിൽ ജനിച്ചുവളർന്ന മേരിയന്ന വെളുത്ത വർഗക്കാരിയുടെയും ജീവിതാനുഭവങ്ങൾ പങ്കുവെച്ചുകൊണ്ടുള്ള ഒരു ലേഖനം വായിച്ചു. അവരിരുവരും വ്യത്യസ്ത മതത്തിൽപ്പെട്ടവരായിരുന്നു. മതത്തേക്കാളുപരി അവർക്ക് സമൂഹം വിലക്കുകൽപ്പിച്ചത് നിറമായിരുന്നു. കറുത്ത വർഗക്കാരനും വെളുത്ത സ്ത്രീയുമായുള്ള സുദീർഘമായ 63 വർഷത്തെ ജീവിതം ഈ ദമ്പതികൾ വിവരിക്കുന്നുണ്ട്. 63 വർഷംമുമ്പ് അത്തരം ഒരു മിശ്രബന്ധം ചിന്തിക്കാൻ കഴിയാത്ത കാലത്ത് ബന്ധുജനങ്ങളുടെയോ സമൂഹത്തിന്റെയോ സഹകരണമില്ലാതെ അവരന്നു വിവാഹിതരായി. സ്കൂൾ ജീവിതത്തിൽ ഒന്നിച്ചു സ്നേഹിച്ച് പഠിച്ച മേരിക്ക് 19 വയസുള്ളപ്പോൾ ജായ്ക്കൊരുദിവസം  മേരിയെ വിവാഹം ചെയ്യണമെന്നാഗ്രഹം പ്രകടിപ്പിച്ചു. വർണ്ണവിവേചനം കൊടുമ്പിരികൊണ്ടിരുന്ന കാലഘട്ടവുമായിരുന്നു. മേരിയെ വീട്ടിൽനിന്ന് അപ്പനന്ന് പുറത്താക്കി. ഒരു ചെറിയ പെട്ടിയുമായി അന്നവർ പടിയിറങ്ങി. ക്രമേണ അവരുടെ ജീവിതം മെച്ചപ്പെട്ടു. മേരി റ്റീച്ചറായും ജായ്ക്ക് പോസ്റ്റോഫീസിലും ജോലിചെയ്തു. കഴിഞ്ഞ 63 വർഷം അവർ സ്നേഹിച്ചുതന്നെ ജീവിച്ചു. എന്നാൽ സമൂഹമെന്നും അവരെ ശല്ല്യം ചെയ്തുകൊണ്ടിരുന്നു. ജായ്ക്ക് കറുത്ത വർഗക്കാരനായതുകൊണ്ട് ജോലിസ്ഥലത്തെന്നും  അയാളെ ഒറ്റപ്പെടുത്തിയിരുന്നു. ജായ്ക്കിനെ വിവാഹം ചെയ്ത കാലംമുതൽ എന്നും അവരെ സമൂഹം പീഡിപ്പിക്കുമായിരുന്നുവെന്നും മേരി പറഞ്ഞു. ഒരിക്കൽ മേരി ബസിൽ യാത്രചെയ്യുമ്പോൾ ഒരാൾ കഴുത്തിൽ ചൊറിഞ്ഞുകൊണ്ട് കറുത്തവന്റെ ചെളി ദേഹത്തുമുഴുവനെന്നു പറഞ്ഞ് പരിഹസിച്ചു. ജായ്ക്കിനും തന്റെ ദാമ്പത്തിക കഥ പറയാനുണ്ട്. "മേരിയെ എനിക്ക് ലഭിച്ചതിൽ ഞാൻ ഭാഗ്യവാനാണ്. നീണ്ട 63 വർഷങ്ങളിലെ ദാമ്പത്യജീവിതം ഞങ്ങൾ സ്നേഹിച്ചു ജീവിച്ചു. പക്ഷെ സമൂഹം ഞങ്ങളെ  അംഗീകരിക്കാത്തതിൽ ഞാനെന്നും ദു:ഖിതനായിരുന്നു. "ചെറുപ്പക്കാരായ കറുത്ത വർഗക്കാരോട് ഒരു സമൂഹത്തിന്റെ വിലയെന്തെന്നുള്ള തന്റെ ജീവിതാനുഭവം പങ്കുവെയ്ക്കാറുണ്ടെന്നും ജായ്ക്ക് പറഞ്ഞു. ഇന്ന് മേരിക്ക് 81 വയസും ജായ്ക്കിന് 86 വയസുമുണ്ട്.

ഇന്നത്തെ ആഗോള വ്യവസായയുഗത്തിൽ ലോകത്തിന്റെ ഏതു ഭാഗത്തുനിന്നും വിവിധ സംസ്ക്കാരങ്ങളിൽനിന്നും ജീവിതപങ്കാളിയെ  തെരഞ്ഞെടുക്കാൻ പ്രയാസമില്ല. സൈബർലോകവും മീഡിയാകളുമതിന് സഹായകമാണ്. സ്വന്തം മതത്തിനും സംസ്ക്കാരത്തിനും ഭാഷക്കും രാജ്യങ്ങളുടെ അതിരുകൾക്കുമതീതമായി  യുവതലമുറകൾ  കമിതാക്കളാകാറുണ്ട്. അങ്ങനെ ജീവിതപങ്കാളിയെ കണ്ടെത്താറുണ്ട്. അമേരിക്കയിലെയും പാശ്ചാത്യനാടുകളിലെയും  ഇന്ത്യൻസമൂഹത്തെ സംബന്ധിച്ച് അവലോകനം ചെയ്യുകയാണെങ്കിൽ ആഗോളപരമായ മിശ്രമത, മിശ്രഭാഷ, മിശ്രസാംസ്ക്കാരിക തലങ്ങളിലുള്ള പുതിയൊരു തലമുറ ഇവിടെ ഉദയം ചെയ്തെന്നു  പറയാം. 

മിശ്രവിവാഹിതരാകുന്നവർ വിവാഹത്തിനുമുമ്പുതന്നെ ഇരുകൂട്ടരുടെയും കുടുംബങ്ങളുടെ മാനസികാവസ്ഥയെപ്പറ്റി മുൻകൂട്ടി മനസിലാക്കുന്നത് നന്നായിരിക്കും. വിവാഹത്തിനുശേഷം പലപ്പോഴും പ്രശ്നങ്ങളുണ്ടാകുന്നത്‌ വരന്റെ അല്ലെങ്കിൽ വധുവിന്റെ കുടുംബക്കാർ തമ്മിൽ ചില മാമൂലുകളിലുള്ള കടുംപിടുത്തത്തിനായിരിക്കും. മതസാംസ്ക്കാരിക തലങ്ങളിലും ചില വിചിത്രാചാരങ്ങളുടെ പേരിലും അരക്കിട്ടിറപ്പിച്ചിരിക്കുന്ന കുടുംബങ്ങളുടെ പശ്ചാത്തലമാണ് പലപ്പോഴും നീരസത്തിന് കാരണമാകുന്നതും കലഹത്തിലേക്ക്‌ നയിക്കുന്നതും. അമ്പലത്തിൽ കൊണ്ടുപോയി ജനിച്ചകുട്ടിയുടെ തല മുണ്ഡനം ചെയ്യണമെന്ന് ഹിന്ദുവായ ഭർത്താവ് പറയുമ്പോൾ കുട്ടിയുടെ തലയിൽ ഹാന്നാൻ വെള്ളം തളിച്ച് മാമ്മോദീസാ മുക്കണമെന്ന് ക്രിസ്ത്യാനിയായ ഭാര്യ പറയും. വിവാഹത്തിനുമുമ്പ് ഇത്തരം കാര്യങ്ങളിൽ ഗഹനമായ ചർച്ചകളിൽ തീരുമാനിച്ചിരുന്നെങ്കിലും വിവാഹശേഷം സർവ്വതും മറന്ന് ഭർത്താവിന്റെ തന്നിഷ്ടമാണ് പിന്നീട് നടപ്പിലാക്കുന്നത്. 

ഒരു വിവാഹമെന്നുള്ളത് രണ്ടു  കുടുംബങ്ങൾ തമ്മിലുള്ള ആത്മബന്ധം സ്ഥാപിക്കൽകൂടിയാണ്. ഇരുവിഭാഗങ്ങളും തമ്മിൽ പരസ്പരധാരണ ആവശ്യമാണ്. പൊതുചടങ്ങുകളിൽവെച്ച് മതത്തിന്റെ പേരിൽ അല്ലെങ്കിൽ മറ്റുള്ള തെറ്റിദ്ധാരണകളുടെ പേരിൽ അഭിപ്രായവിത്യാസങ്ങളും ചിലപ്പോൾ വഴക്കിലും അവസാനിക്കും. ഭാഷകളിൽ ഉണ്ടാകുന്ന വൈകല്യങ്ങളും ചില പ്രാദേശിക പ്രയോഗങ്ങളും മതി വഴക്കിന് കാരണമാകാൻ.  വടക്കേയിന്ത്യയിൽ പഠിച്ചിരുന്ന കാലത്തെ  എന്റെയൊരു   അനുഭവകഥയുമോർക്കുന്നു. ഒരിയ്ക്കലൊരു  വടക്കൻ കൂട്ടുകാരനെ 'അളിയാ' എന്ന് സ്നേഹംകൊണ്ട് വിളിച്ചതിൽ അർത്ഥം മനസിലാക്കിയ അയാൾ പിന്നെടെന്നും എന്റെ വിരോധിയായിരുന്നു. 'ഞങ്ങൾ സുഹൃത്തുക്കൾ പരസപരം സ്നേഹംകൊണ്ട് വിളിക്കുന്ന വാക്കാണെന്നു  പറഞ്ഞിട്ടും' അയാൾക്കത് അന്ന് ഉൾക്കൊള്ളാൻ  സാധിച്ചിരുന്നില്ല.

വിവാഹിതരാകുന്ന പങ്കാളികൾ പരസ്പരം മതവിശ്വാസത്തിൽ സഹിഷ്ണതയുള്ളവരായിരിക്കണം. മതത്തിനുപരിയായി ചിന്തിക്കുന്നുവെന്ന് പുറമേ പറയുമെങ്കിലും എല്ലാവരുടെയും ഉള്ളിന്റെയുള്ളിൽ മതമുണ്ട്‌. അത് ചിലപ്പോൾ പുറത്തുവന്ന് പൊട്ടിത്തെറികളും ഉണ്ടാകാറുണ്ട്. ഒരു വെന്തിക്കോസുകാരൻ പാസ്റ്റർ ഭർത്താവാണെങ്കിൽ അയാൾ പോകുന്ന സ്ഥലങ്ങളിൽ ബൈബിളും കൈകളിൽ പിടിച്ചുകൊണ്ട് നടക്കണം. അവളുടെ ആഴമായ വിശ്വാസത്തെയും യേശുവിന്റെ അമ്മയേയും പരിഹസിക്കുന്നത് സഹിക്കണം. അയാൾ ഉയർത്തിപ്പിടിച്ചിരിക്കുന്ന ബൈബിളിനെ ഒരു ബിംബവുമാക്കണം. ഭർത്താവ് ഹിന്ദുവാണെങ്കിൽ ചെറുപ്പംമുതൽ മനസ്സിൽ പേടിയുണ്ടായിരുന്ന ബിംബങ്ങളുടെമുമ്പിൽ നിത്യവും ദീപം പ്രകാശിപ്പിക്കണം. പുരോഹിതരും ചുറ്റുമുള്ളവരും മനസ്സില് കയറ്റിയ ഭയത്തോടെ അന്നുമുതൽ അവളും ബിംബാരാധാനയുടെ ഭാഗം ആകണം.  പാരമ്പര്യ കത്തോലിക്കാ കുടുംബത്തിൽ പിറന്ന ഒരു പെണ്ണിന് പല ആചാരാനുഷ്ഠാനങ്ങളും സ്വീകാര്യമാവണമെന്നില്ല. ബിംബങ്ങളുടെ  മുമ്പിൽ ദീപവും കത്തിച്ച് നില്ക്കണമെന്ന് പറയുമ്പോൾ ക്രിസ്ത്യാനിയായി വളർന്ന പെണ്‍കുട്ടിയെ വേദനിപ്പിക്കും. ബിംബങ്ങൾ ദൈവത്തിന്റെ ശത്രുക്കളും ബീപത്സരൂപങ്ങളുമായിട്ടാണ് പുരോഹിതരും ചുറ്റുമുള്ള ജനവും അവളുടെ മനസ്സിൽ നിറച്ചിരിക്കുന്നത്.

മതത്തിനുപരി ചിന്തിക്കുവാൻ കഴിവുള്ളവർ ഇന്ന് സമൂഹത്തിൽ ഒരു ശതമാനംപോലും ഉണ്ടാവുമെന്ന് തോന്നുന്നില്ല. ഒരു ക്രിസ്ത്യാനിയായ പെണ്‍കുട്ടി വിവാഹശേഷം അവളുടെ ജീവിതം തുടരേണ്ടത് പുരുഷന്റെ മസ്ക്കുലിൻ ശക്തിയുടെ കീഴിലായിരിക്കും. പുരുഷന്റെ മതമനുസരിച്ച് അവൾക്ക് ജീവിക്കേണ്ടിവരും. കുഞ്ഞുനാളിലെ അപ്പനും അമ്മയും സഹോദരസഹോദരികളും സുഹൃത്തുക്കളും ഒന്നിച്ചാഘോഷിച്ചിരുന്ന ക്രിസ്തുമസും ഈസ്റ്ററും അവൾ പാടെ മറക്കേണ്ടിവരും. ഹിന്ദുവായ ഭർത്താവിനൊപ്പം അവളുടെ ആഘോഷങ്ങൾ പിന്നെ ഓണവും ശിവരാത്രിയും വിഷുവുമായി. മുസ്ലിമാണെങ്കിൽ ഈദും ബക്രീദുമാകും. പുരുഷന്റെ കടുംപിടുത്തത്തിൽ അവൾക്ക് ചിന്താസ്വാതന്ത്ര്യം അനുവദിച്ചെന്നിരിക്കില്ല.


പോർക്കും പശുവിറച്ചിയും തിന്നുജീവിച്ച ഒരു ക്രിസ്ത്യാനിപ്പെണ്ണ്‍ മുസ്ലീമാണ് ഭർത്താവെങ്കിൽ പോർക്കോ യാഥാസ്ഥിതികനായ ഹിന്ദുവാണ് ഭർത്താവെങ്കിൽ പശുവിറച്ചിയോ കറിവെച്ചാൽ കുടുംബജീവിതത്തിന്റെ താളപ്പിഴകൾ അവിടെ തുടങ്ങുകയായി. യാഥാസ്ഥികരായ പലരുടെയും മിശ്രവിവാഹത്തിൽക്കൂടിയുള്ള ജീവിതം താറുമാറാകുന്നത് മക്കൾ ഉണ്ടായശേഷമായിരിക്കും. മക്കളെ ഏത് പാരമ്പര്യത്തിൽ വളർത്തണമെന്നും വിവാദങ്ങൾ ആരംഭിക്കും. അക്കൂടെ അമ്പലത്തിൽ ചെന്ന് തലമുണ്ഡനം, സുന്നത്ത്, ഹാന്നാൻ വെള്ളം തലയിൽ ഒഴിക്കുക എന്നിവകളിൽ മുറുകെപ്പിടിക്കുന്നവർ എല്ലാ വിഭാഗങ്ങളിലുമുണ്ട്. ഏത് മതത്തിൽ വളർത്തണമെന്നുള്ളതും ഭാര്യാഭർത്താക്കന്മാർക്ക് ഒരു ധാരണയിലെത്താൻ  സാധിച്ചെന്നു  വരില്ല.     
ഉണ്ടാകുന്ന കുഞ്ഞുങ്ങളെ ഏതു മതത്തിൽ വളർത്തണമെന്ന് ധാരണയുണ്ടായാലും പ്രശ്നങ്ങൾ അവിടെ തീരുകയില്ല. കുഞ്ഞിന്റെ വല്ല്യപ്പൻ വല്യമ്മമാർ പിന്നീട് കടുംപിടുത്തവും തുടങ്ങും. ഇതിനിടയിൽ തീരുമാനങ്ങളെടുക്കാൻ കഴിയാതെ വിഷമിക്കുന്നത് മിശ്രവിവാഹജീവിതം നയിക്കുന്ന ദമ്പതികളായിരിക്കും. ഇങ്ങനെയുള്ള സാമൂഹിക വിവാദങ്ങളിൽ ദമ്പതികൾക്ക് നല്ല ക്ഷമയും പ്രശ്നങ്ങൾ കൈകാര്യം ചെയ്യാനുള്ള കഴിവുമാവശ്യമാണ്.  

മിശ്രവിവാഹത്തിൽ ദോഷവശങ്ങൾ വിശകലനം ചെയ്തെങ്കിലും നന്മയുടെ വശങ്ങളുമുണ്ട്. വ്യത്യസ്ത സംസ്ക്കാരത്തിൽനിന്ന് ജനിക്കുന്ന കുഞ്ഞുങ്ങൾ ബൌദ്ധികതലങ്ങളിൽ വളരെയധികം മുമ്പിലായിരിക്കും. രണ്ടു  മതസമൂഹങ്ങൾ തമ്മിലുള്ള വിവാഹത്തിൽ പരസ്പര ധാരണയോടെ ജീവിച്ചാൽ മതസഹിഷ്ണതയുള്ള ഒരു തലമുറയെ വാർത്തെടുക്കാം. വ്യത്യസ്തങ്ങളായ  മതങ്ങളുടെ സംസ്കാരവും ഉൾക്കൊള്ളാൻ സാധിക്കുന്നു. വിവാഹം, ഭാഷകൾക്കപ്പുറമെങ്കിൽ വളരുന്ന കുഞ്ഞുങ്ങള്ക്ക് കൂടുതൽ ഭാഷകൾ വശമാക്കാനുള്ള  അവസരവും ലഭിക്കുന്നു. രാജ്യങ്ങളുടെയും  അതിരുകൾക്കപ്പുറമുള്ള വിവാഹമെങ്കിൽ അന്തർദേശീയ സംസ്ക്കാരമുള്ള ഒരുൾക്കാഴ്ച്ച   കുടുംബത്തിനു  ലഭിക്കും. ചിലർ വെളുപ്പുനിറം സൗന്ദര്യമായി കാണുന്നു. അത്തരക്കാർക്ക് അവരുടെ ഭാവനയനുസരിച്ച്‌ സൗന്ദര്യമുള്ള കുഞ്ഞുങ്ങളെയും ലഭിക്കാം. ആധുനികകാലത്ത് മിശ്രവിവാഹം വളരെയേറെ ജനപ്രീതിയാർജിച്ച് വരുകയാണ്. സൈബർലോകത്തിന്റെ വളർച്ചയോടെ സമൂഹത്തിന്റെ ചിന്താഗതി യുവതലമുറകൾ ചിന്തിക്കാറില്ല. മിശ്രവിവാഹത്തോടെ ഒരു വ്യക്തിയെ മറ്റൊരു വ്യക്തിയാക്കുകയാണ്. സ്വന്തം സമൂഹത്തിന്റെ ദുഷിച്ച ചിന്താഗതികളെ തുലനം ചെയ്യുവാനും അവസരങ്ങൾ കിട്ടും. മറ്റുമതത്തിലോ സംസ്ക്കാരത്തിലോ ജീവിച്ചിരുന്ന ജീവിതപങ്കാളിയുമായി ജീവിക്കുന്നതുമൂലം പ്രായോഗിക ജീവിതത്തിലും പുതിയ ഒരു പരിജ്ഞാനം നേടുകയാണ്‌. വിവിധ ഭാഷകളും സംസ്ക്കാരങ്ങളും ഒത്തുചേർന്ന കുടുംബത്തിന് ലോകത്തെവിടെയും യാത്രചെയ്യുന്നതിന് ബുദ്ധിമുട്ടനുഭവപ്പെടുകയില്ല. ജീവിതത്തിലെ ഏതു വെല്ലുവിളികളെയും അഭിമുഖീകരിക്കാനും  സാധിക്കും.



മിശ്രവിവാഹത്തിൽക്കൂടി ഒരു പുതിയ തലമുറയുടെ തുടക്കം  കുറിക്കുകയാണ്. ജനിക്കുന്ന കുഞ്ഞുങ്ങളും മിശ്രമത മിശ്രസാമൂഹിക സംസ്ക്കാരത്തോടെ വളരും. സങ്കുചിത ലോകത്തിൽനിന്ന് തുറന്ന ഹൃദയത്തോടെയുള്ള ഒരു ലോകത്ത് അവർക്ക് ജീവിക്കാൻ സാധിക്കും. ചുരുക്കത്തിൽ    എല്ലാതരത്തിലുമുള്ള വിവാഹവും   ലോകത്തുണ്ട്. ശരിയായ തീരുമാനത്തോടെ ഒരാളിന്റെ ജീവിതപങ്കാളിയെ തെരഞ്ഞെടുക്കുകയെന്നതാണ് പ്രധാനമായും ചിന്തിക്കേണ്ടത്. ലോകത്തുള്ള എല്ലാ സമൂഹവും ഇന്ന് മിശ്രവിവാഹങ്ങൾക്ക്  പ്രോത്സാഹനങ്ങളും നൽകിവരുന്നു.  ഗുണദോഷവശങ്ങൾ   മിശ്രവിവാഹത്തിലുണ്ടെങ്കിലും വിവാഹിതരാവുന്നവരുടെ ശരിയായ തീരുമാനമാണ്   ജീവിതവിജയം നേടാൻ  കാലത്തിനാവശ്യമായുള്ളത്. 

Love against the odds: Mary's father threw her out when she decided to marry Jake in 1948

അദ്വൈതവും 'ഞാൻ' ദൈവവും'

അദ്വൈതമെന്നാൽ ഏകത,  ഒരേ ശക്തികിരണമായ അവിടെ രണ്ടില്ല. ഇക്കാണുന്ന പ്രപഞ്ചവും പ്രപഞ്ചത്തിലെ പരമാണുവും  ഒരേ സത്ത.   സകല ശക്തിഗുണങ്ങളുടെയും ഉറവിടം ഒന്നിൽനിന്നുമാത്രം ബന്ധിപ്പിച്ചിരിക്കുന്നു. എല്ലാ ഭൌതിക സൃഷ്ടികളുടെ അടിസ്ഥാന കാരണവും അദ്വൈതത്തിൽ തന്നെ. സൃഷ്ടികളെല്ലാം ബന്ധിച്ചിരിക്കുന്നത്‌ ഏകതയിൽ നിന്നെങ്കിലും സൃഷ്ടിയിലെ വസ്തുതകളെല്ലാം വ്യത്യസ്തങ്ങളായി അനുഭവപ്പെടും. ദുർബലമായ മനുഷ്യമനസുകളുടെ ചിന്തകൾക്കതീതമാണ് അദ്വൈതം അഥവാ ഏകതായെന്ന തത്ത്വസംഹിത.

 
നമ്മുടെ തന്നെ കൈകളിലേക്ക് ഒരു നിമിഷം നോക്കൂ. വിസ്മയങ്ങളായ ആയിരമായിരം പ്രതിഭാസങ്ങൾ ആ കൈവിരലുകളിൽ ഉണ്ട്. ഓരോ വിരലുകളും പരസ്പര വിരുദ്ധങ്ങളായി കാണുന്നില്ലേ? എന്നാൽ അതെല്ലാം വ്യത്യസ്തങ്ങളോ? ഒരേ കൈകളിൽനിന്ന് വ്യത്യസ്തങ്ങളായ അഞ്ചുവിരലുകൾ പരസ്പരം ബന്ധിച്ചിരിക്കുന്നു. അതുതന്നെയാണ് അദ്വൈതത്തിന്റെ തത്ത്വവും. ഇക്കാണുന്ന പ്രപഞ്ചവും ലോകവും ജനവും പക്ഷിമൃഗാദികളും കാഴ്ചയിൽ തീർച്ചയായും വ്യത്യസ്തങ്ങളാണ്. എന്നാൽ അദ്വൈതമായ ഏകതയിൽ സർവതും കൈകളിലെ കൈവിരലുകൾപോലെ  പരസ്പരം ബന്ധിച്ചിരിക്കുന്നു.  ഒന്നായ പ്രപഞ്ചശക്തിയുടെ ബന്ധിപ്പിച്ചിരിക്കുന്ന വ്യത്യസ്തകളാണ് ഏകതയാകുന്ന അദ്വൈതം.

 

കൈപ്പത്തിക്കുള്ളിലെ വിരലുകൾ  ഒരു നിമിഷംകൂടി ശ്രദ്ധിക്കൂ. ഒരേ സത്ത, ഒരേ ആറ്റം.  മനുഷ്യ ശരീരത്തിലെ സെല്ലുകളും നാഡി വ്യൂഹങ്ങളും കാഴ്ചയും കേൾവിയുമെല്ലാം ഏകമായ ഒരേ മനുഷ്യശരീരത്തിന്റെ പ്രവർത്തനങ്ങളാണ്. നാം എല്ലാം കോടാനുകോടി ഗുണവിശേഷങ്ങളോടെ അദ്വൈതമായ  പ്രപഞ്ചത്തിന്റെ ഭാഗമാണ്. പ്രപഞ്ചത്തിലെ ഓരോ പരമാണുവും അദ്വൈത തത്ത്വത്തിൽ അലിഞ്ഞുചേർന്നിട്ടുണ്ട്.

 

'ഞാൻദൈവം’ എന്നത് അദ്വൈതത്തിലെ  തത്ത്വജ്ഞാനിയുടെ ജ്ഞാനത്തിൽനിന്നും വരുന്ന ചിന്തകളാണ്. യേശുവും പറഞ്ഞത് ഗഹനമായി ചിന്തിച്ചാൽ ‘ഞാൻ’ ദൈവത്തെ’പ്പറ്റി തന്നെയാണ്.‘ഞാൻ’ ഒന്നേയുള്ളൂ അത് ‘ഞാൻ’ മാത്രം. യേശുവും ദൈവവും നിത്യതയും പരമാത്മാവും അനന്തതയും‘ഞാൻ’ തന്നെയാണ്. യേശു 'ആത്മ'ത്തെ കണ്ടെത്തി സ്വയം ദൈവമെന്ന് പറഞ്ഞു. അതിനർത്ഥം ഒരോ പരമാണുവും ഭൂമിയും പ്രപഞ്ചവും ഞാനും ഒന്നായ സത്യമെന്ന അദ്വൈതമാണ്. 'ഞാൻ' മനസോ ശരീരമോ അല്ല.  മനസും ശരീരവും പദാർഥങ്ങളാണ്. 'ഞാൻ' ആരെന്നാൽ അഹം തത്ത്വം. ഒരു വസ്തുവിന്റെയും ഭാഗമല്ല.  മനസോ, ശരീരമോ എന്നിലുള്ളതല്ല. 'ഞാൻ' പരിശുദ്ധമായ 'ആത്മം' മാത്രം. ആത്മം തന്നെയാണ് ദൈവവും പരമാത്മാവിന്റെ സ്ഫുരണവും. ജീവനിലെ ഗുണമഹിമകൾ പദാർഥങ്ങളിൽ മാത്രമുള്ളതാണ്. ദൃശ്യങ്ങളായ വസ്തുതകളും അദൃശ്യങ്ങളായ ഗുണങ്ങളും പരസ്പരം ബന്ധപ്പെട്ടിരിക്കുന്നു. കണ്ണുള്ളവർ കാണുന്നതും ചെവിയുള്ളവർ കേൾക്കുന്നതും മനസിലെ പ്രവർത്തനങ്ങളും ചിന്തിക്കുന്നതും രുചിക്കുന്നതും നീതികരിക്കുന്നതുമെല്ലാം അഹംബോധവും ശരീരവുമാണ്. എന്നാൽ 'ഞാൻ' ഇതൊന്നുമല്ല. ഇക്കാണുന്ന ഗുണങ്ങളിൽനിന്നും 'ഞാൻ' സ്വതന്ത്രനാണ്. ഗുണങ്ങളിൽ മാറ്റംവരാം. എന്നാൽ 'ഞാൻ' സമയപരിധിയിലോ ശൂന്യമായ ആകാശത്തിലൊ ഭൂമിയിലെ ഇടങ്ങളിലോ ഇല്ല. എന്നും മാറ്റമില്ലാത്തവനാണ്. പ്രപഞ്ചത്തിലെ അതിരുകൾക്ക് അധീനനല്ല. അനാദികാലം മുതൽ 'ഞാൻ' ഉണ്ടായിരുന്നു. 'ഞാൻ' നിത്യതയാകുന്നു. അനന്തമാകുന്നു. തിരമാലകൾ ഉയർന്നാലും താന്നാലും സമുദ്രം കണക്കേ ‘ഞാൻ’ മാറ്റത്തിനടിമയല്ല. 'ഞാൻ' എന്ന സത്ത  സമുദ്രത്തിലെ തുള്ളിയോ തുള്ളികളായ സമുദ്രമോ ആകാം. 'ഞാൻ' എന്നും ആകാരരൂപമല്ലാത്ത പ്രപഞ്ചരൂപങ്ങൾക്ക്‌ അതീതമാണ്.

'ഞാൻ' പിന്നെ ആര്? സ്ഥായിയും പ്രകൃതിയുടെ പരിശുദ്ധിയുമാണ്. അവബോധമനത്തിന്റെ ഉള്ളറയിൽ അജ്ഞാതനായിരിക്കുന്ന മായയായ ആത്മമാണ്. വിശുദ്ധിയുടെ അന്ത:കരണപ്രകാശവും സ്വയം പ്രകാശിക്കുന്നവനും ‘ഞാനാ’കുന്ന അനന്തതയും ഒന്നേയൊന്നുമാത്രം. അത് രണ്ടല്ല. ഞാനല്ലാതെ മറ്റൊന്നില്ല. 'ഞാൻ' ഗുണങ്ങളോ, സപ്തരാഗങ്ങളോ ശബ്ദങ്ങളൊ നിറങ്ങളോ മണമോ രൂപമോ രൂപഭംഗിയോ ഇല്ലാത്തവനാണ്.  അവബോധമനസിലെ രൂപമില്ലാത്ത അനന്തമാണ്. എന്നെച്ചുറ്റിയുള്ള വൈരുദ്ധ്യങ്ങളും വൈവിധ്യങ്ങളുമെല്ലാം ക്ഷണികങ്ങളും നിമിഷങ്ങൾക്കുള്ളിൽ ചാമ്പലാകുന്നതുമാണ്. ഞാനാണ് പ്രകാശം; ലോകം അത് സാക്ഷിപ്പെടുത്തുന്നു.  അതെ, ചുറ്റുമുള്ള നീയും ലോകവും പ്രകാശത്തിന്റെ സാക്ഷിമാത്രം.

 
ഒരുവൻ സ്വപ്നത്തിൽ  സ്വപ്നങ്ങൾകൊണ്ട് നൂലാമാലകൾ കോർത്തിണക്കുന്നു. അതെല്ലാം വെറും സ്വപ്നങ്ങളായിരുന്നുവെന്നും അവൻ മനസിലാക്കുന്നു. ഞാൻ ഈ ലോകത്തെ സൃഷ്ടിച്ചു. അതിലൊരു ജീവനായി ഈ ലോകത്തെത്തി. വാസ്തവികമായ സത്യത്തിൽ ‘ഞാൻ’ ഉൾബോധത്തിനുള്ളിലെ 'ആത്മം' മാത്രം.  സ്വപ്നത്തിൽ ഒരുവൻ നൂറായിരം വസ്തുക്കൾ സൃഷ്ടിക്കുന്നതുപോലെ ഇക്കാണുന്ന സ്വപ്നമല്ലാത്ത ലോകത്തിന്റെ ഭൌതികവസ്തുക്കളും അതിന്റെ സൃഷ്ടിയും ഞാനാകുന്നു. പരിശുദ്ധിയുടെ ആത്മമായി 'ഞാൻ' ആകുന്നുവെങ്കിൽ 'ബ്രഹ്മനും' ഞാൻ' തന്നെയാകുന്നു. എനിക്കുചുറ്റുമുള്ള ലോകവും പ്രപഞ്ചവും സൃഷ്ടിയും ഞാൻ തിരിച്ചറിയുന്നുവെങ്കിൽ 'ഞാൻ’ തന്നെയാകുന്നു ഈശ്വരനും. എന്റേതായ മനസിന്റെ വൈകല്യങ്ങൾ ഞാൻ മനസിലാക്കുന്നെങ്കിൽ 'ഞാനാകുന്നു' ജീവൻ. അതുതന്നെയാണ്, യേശു പറഞ്ഞതും. ഞാൻ ജീവനും വഴിയും പ്രകാശിക്കുന്നവനും സത്യവുമാകുന്നു. പ്രകാശവും പ്രതിഫലനവും പ്രതിഫലിക്കുന്ന ജീവനും ഈശ്വരനും ഒന്നേയൊന്നുള്ളൂ. അത് 'ഞാൻ' മാത്രം.



‘ഞാൻ’ ആകുന്നു സത്-ചിത്-ആനന്ദ (sat-chit-aananda). ഒരോ ജീവനിലും 'ആത്മൻ' നിലകൊള്ളുന്നതുപോലെ ഒപ്പം ആനന്ദവും അവനിൽ കുടികൊള്ളുന്നു. എങ്ങനെ? അവൻ അവന്റെതല്ലാത്ത ഭൂമിയിലെ സർവതും ത്യജിക്കണം. എന്നിട്ട് 'ഞാൻ' എന്ന സത്യത്തിൽ വരണം. എങ്കിൽ ഒളിഞ്ഞിരിക്കുന്ന സത്യവും ആനന്ദവും അവനിൽ ദൃശ്യമാകും. ഒരുവൻ ഉപാധികളില്ലാതെ ആനന്ദലഹരിയിൽ ലയിക്കാൻ ആഗ്രഹിക്കുന്നെങ്കിൽ മറ്റൊരുവന് അവനെ തടയാൻ കഴിയില്ല. അവനിലെ പരമമായ ആനന്ദത്തെ കെടുത്താൻ സാധിക്കില്ല. അങ്ങനെ 'ആനന്ദം' ജീവന്റെ സ്വതന്ത്രമായ അവകാശമാണ്. ‘ഞാൻ’ എന്ന പരമമായ സത്യത്തിൽ അലിഞ്ഞിരിക്കുന്നതാണ് ആ 'ആനന്ദം'. നീ അത് തിരിച്ചറിയുന്നില്ലെങ്കിൽ അത് നിനക്കുള്ളതല്ല. 'ഞാൻ' അങ്ങനെ നിത്യതയുടെ പരമമായ അവബോധം മാത്രമല്ല പരിശുദ്ധിയുടെ ആനന്ദമാണ്. 'ഞാനാണ്' ഇക്കാണുന്ന സർവതിലും അസ്ഥിത്വം പ്രദാനം ചെയ്യുന്നവൻ.  ജീവനിലും ജീവനില്ലാത്തതിലും പ്രപഞ്ചമൊന്നാകെയും ഉപബോധഉൾക്കടലിലും ആനന്ദമെന്നത്,'സത്-ചിത്-ആനന്ദ' അത് 'ഞാൻ' ആകുന്നു. ആ 'ഞാൻ' 'ആത്മം' വിശപ്പും ദാഹവും ഗുണങ്ങളും രൂപങ്ങളും മഹിമകളുമില്ലാത്ത അനന്തമാകുന്നു.  

ആത്മത്തെ കണ്ടെത്തുന്ന തീർത്ഥയാത്രികൻ പറയും, ദൈവമേ നീയാണ്‌ സത്‌-ചിത്‌-ആനന്ദം. നീയാണ്‌ ദ്രവ്യത്തിന്റെയും ഊര്‍ജ്ജത്തിന്റെയും 
 ശബ്ദതരംഗങ്ങളുടെയും നാഥൻ. നീയാണ്‌ എവിടെയും   അനന്തതയിലും  സ്ഥിതി ചെയ്തിരുന്ന എന്തിന്റെയും പ്രഭു. കണ്ടെത്തിയാലോ അവൻ 'ഞാനാ'കും, അനന്തവും!


'സത് ചിത് ആനന്ദ' എന്തെന്ന് ഒന്നുകൂടി വ്യക്തമാക്കട്ടെ. 'സത്' എന്നാൽ സത്യം. തെറ്റിനെയും, മായയേയും വഞ്ചനയെയും, പ്രലോഭനങ്ങളെയും നശിപ്പിക്കുന്ന ഒരു പ്രതിഭാസമാണ് സത്യം. അവാസ്തവികങ്ങളായവയെ വാസ്തവികങ്ങളിലേക്ക് നയിക്കുന്നു. അങ്ങനെ മറഞ്ഞുകിടക്കുന്ന മൂടുപടം മാറ്റി സത്യത്തിന്റെ ദീപം അവിടെ പ്രകാശിക്കുകയാണ്.


'ചിത്' എന്നു പറഞ്ഞാൽ 'അവബോധ മനസ്' 'ഉള്ളിന്റെ ഉള്ളിലുള്ള മനസാക്ഷി' എന്നൊക്കെ പറയാം. ഉറങ്ങികിടക്കുന്ന മനസാക്ഷിയിൽ മാലിന്യങ്ങൾ ഇല്ലാതാക്കി ഉണർവ്‌ വരുത്തണം. മനസിനുള്ളിൽ അലിഞ്ഞുചേർന്നതെല്ലാം ഉണർത്തുകയാണിവിടം. ‘ഉപബോധമനസ്’ നമ്മെത്തന്നെ പ്രകൃതിയുടെ സത്യമാക്കുകയാണ്. ജനിച്ചപ്പോൾ നമ്മിൽ പ്രകൃതിയുടെ സത്യം മാത്രമേയുണ്ടായിരുന്നുള്ളൂ. അവിടെയാണ് പുരോഹിതന്റെ 'ജന്മപാപം' എന്ന പരിശുദ്ധമായ നുണ സൃഷ്ടിച്ചത്.


'ആനന്ദം' എന്നാൽ സ്വർഗീയാനുഭൂതിയായ നിർവൃതിയെന്നർത്ഥം. സത്യമായ ഉപബോധമനസ്സിൽ പരിശുദ്ധിയുടെ ആനന്ദം കൈവരിക്കുന്നതുവരെ പുറകോട്ട് നോക്കരുത്. സത്യം നമ്മിൽ കുടികൊള്ളുന്നുവെങ്കിൽ അവിടം അറിയപ്പെടാത്ത ആത്മീയതയുടെ ഉൾകാഴ്ച നിറയുകയാണ്. 'ഓം തത് സത്' വാസ്തവികങ്ങളിലെ ആ സത്യം നമ്മൾ തന്നെയാണ്.


തത്ത്വചിന്തകൾ നാം പഠിക്കുന്നത് മനസിനെ ശാന്തമാക്കി സത്യത്തിലേക്ക് നയിക്കാനാണ്. മറ്റുള്ളവരുടെ മനസിനെ വേദനിപ്പിക്കാതെ മനസിനെ പരിശുദ്ധമാക്കുകയെന്നത് ഒരുവന്റെ കാതലായ തത്ത്വമെന്നും നാം മനസിലാക്കണം.

ഭാരതത്തിലെ വർദ്ധിച്ചുവരുന്ന സ്ത്രീപീഡനങ്ങൾ

By ജോസഫ് പടന്നമാക്കൽ  

വേദങ്ങളും പുരാണങ്ങളും ഭാരതസ്ത്രീകൾക്ക് അത്യുത്തമമായ സ്ഥാനമാണ് നല്കിയിരിക്കുന്നത്. "സ്ത്രീയെ പൂജിച്ചാൽ ദൈവങ്ങൾ പ്രസാദിക്കുമെന്നും അവളെ അവഹേളിച്ചാൽ പുരുഷന്റെ പുണ്യകർമ്മാനുഷ്ഠാനങ്ങൾ പാഴായിപോകുമെന്നും" വേദങ്ങളിലുണ്ട്.  ഭാരതീയ ധർമ്മത്തിലുള്ള വേദശാസ്ത്രഗ്രന്ഥങ്ങളിൽ സ്ത്രീയെ പുകഴ്ത്തികൊണ്ടുള്ള  അനേക തത്ത്വസംഹിതകൾ എഴുതി പിടിപ്പിച്ചിട്ടുണ്ട്. എന്നാൽ ഇന്ന് സ്ത്രീക്കെതിരെയുള്ള അതിക്രമകഥകളാണ് എന്നും വാർത്തകളിൽ മുഴങ്ങികേൾക്കുന്നത്. ബലാൽസംഗം, സ്ത്രീധനപീഡനം, കൊല, വധുവിനെ ചുട്ടുകരിക്കുക, മുതലായവ ഈ വേദഭൂമിയിലെ നിത്യസംഭവങ്ങളാണ്. ഇങ്ങനെ തിന്മകൾകൊണ്ട് സമൂഹമാകെ നിറഞ്ഞിരിക്കുകയാണ്. മനുഷ്യഹൃദയങ്ങൾക്ക് മാറ്റംവരാതെ ഇതിനൊരു ശ്വാശ്വതപരിഹാരം സാധ്യമല്ല.  കുറ്റം ചെയ്യുന്ന കള്ളനും കൊലപാതകിക്കും വ്യപിചാരിക്കും നിയമങ്ങൾ അറിയാം. എങ്കിലും കുറ്റങ്ങൾ അയാൾ ആവർത്തിച്ചുകൊണ്ടിരിക്കും. ശുദ്ധമായ മനസില്ലാത്തതാണ് കാരണം. ഒരുവൻ   സ്ത്രീയെ ബഹുമാനിച്ചാൽ അവൻ അമ്മയെയും പെങ്ങളെയും മകളെയും ബഹുമാനിക്കുകയും  സ്നേഹിക്കുകയും ചെയ്യും. 

 

ഭാരതത്തിലുടനീളം കേൾക്കുന്ന കൂട്ടബലാത്സംഗത്തിന്റെ കഥകൾ ഇന്ന് ആഗോളതലങ്ങളിലും പ്രമുഖ വാർത്തകളിലൊന്നാണ്. ടെക്കനോളജി യുഗങ്ങളിലെ ആധുനികമുന്നേറ്റം ലൈംഗികപീഡന പരമ്പരകളുടെ വർദ്ധനവിനും കാരണമായിട്ടുണ്ട്.  എന്നും പുരുഷമേധാവിത്വത്തിനടിമയായി ജീവിച്ച സ്ത്രീ ഇന്ന് ഫാക്ട്റ്ററികളിലും പാടങ്ങളിലും വ്യവസായ ഓഫീസുകളിലും ജോലിചെയ്ത് പുരുഷനോടൊപ്പം കുടുംബം പുലർത്തുന്നു.  സ്ത്രീയെ പൊതുനിരത്തിൽ കണ്ടാൽ പുരുഷനടക്കമില്ലാത്ത ഒരു സ്ഥിതിവിശേഷമാണ് ഇന്ന് ഭാരതത്തിലുള്ളത്. സ്ത്രീയെ  ലൈംഗിക ഭോഗവസ്തുവായിട്ടാണ് കാമന്ധമായ ഒരു സമൂഹം വീക്ഷിക്കുന്നത്. അത് അവളുടെ സുരക്ഷിതത്വത്തിനും വെല്ലുവിളിയായി തീർന്നിരിക്കുന്നു. പുരുഷനെപ്പോലെ അവളെ സ്വതന്ത്രയായി തെരുവുകളിൽ സഞ്ചരിക്കാൻ അനുവദിക്കുകയില്ല. പൊതുവാഹനങ്ങളിലും നിരത്തുകളിൽക്കൂടിയും ഉപജീവനം തേടി സ്ത്രീകൾക്ക് ജോലിക്കായി പോവണം. അവരിൽ അമ്മമാരും വല്യമ്മമാരും ഉണ്ട്. മൃഗീയതയുടെ സിരോരക്തം ഒഴുകുന്ന ബലാത്സംഗ ഭീകരർക്ക്‌  സ്ത്രീ ആരെന്ന് തിരിച്ചറിയാനുള്ള കഴിവുമില്ല.

കൂട്ട ബലാൽസംഗങ്ങളൂടെ കണക്ക് കൃത്യമായി രേഖപ്പെടുത്തിയിട്ടില്ലെങ്കിലും സ്ത്രീ ഇന്ന് സുരക്ഷിതയല്ലായെന്ന് സ്ഥിതിവിവര കണക്കുകളിൽ പ്രാവിണ്യം നേടിയവർ അഭിപ്രായപ്പെടുന്നു. സ്ത്രീക്കെതിരെ നാട് മുഴുവൻ പടർന്നുപിടിച്ചിരിക്കുന്ന കൂട്ടബലാൽസംഗ വാർത്തകൾ ജനങ്ങളിലിന്ന് വിപ്ലവ കൊടുങ്കാറ്റുവരെ സൃഷ്ടിച്ചിരിക്കുകയാണ്. സ്ത്രീയുടെ ജീവൻവെച്ചുള്ള പന്തുകളിയാണ് ഇന്ത്യയിൽ എവിടെയും. തന്മൂലം രാജ്യംതന്നെ അരാജകത്വമായി മാറുന്നു.

 

2012 ഡിസംബർ പന്ത്രണ്ടാം തീയതി ഡൽഹിയിൽ ഓടിക്കൊണ്ടിരുന്ന ഒരു ബസിനുള്ളിൽവെച്ച് കോളേജിൽ പഠിക്കുന്ന ഒരു വിദ്യാർഥിനിയെ മാനംകവർന്ന് അതിക്രൂരമാം രീതിയിൽ  ഒരുപറ്റം ചെറുപ്പക്കാർ ബലാല്സംഗം ചെയ്ത് പീഡിപ്പിച്ച വാർത്ത  ഭാരത മനസാക്ഷിയെതന്നെ മുറിവേൽപ്പിച്ചിരുന്നു.    ഏതാനും ദിവസങ്ങൾക്കുള്ളിൽ ലൈംഗീകദാഹികളുടെ ഇരയായ ആ കുട്ടി മരിച്ചുപോയി.  അവളുടെ മരണം ഡൽഹിയിൽ ഒരു ലഹളയിൽ അവസാനിച്ചു. പീഡനത്തിലെ കുറ്റക്കാരനായവരിൽ ഒരുവന് പ്രായപൂർത്തിയാകാഞ്ഞതിനാൽ സ്വഭാവരൂപീകരണത്തിനുള്ള ബാലപരിശീലനസ്കൂളിൽ മൂന്നുവർഷം ശിക്ഷ മാത്രമാണ് ലഭിച്ചത്.  അയാൾക്ക്‌ കൊടുത്ത ശിക്ഷയിൽ മരിച്ചുപോയ പെണ്‍കുട്ടിയുടെ മാതാപിതാക്കൾ അതൃപ്തരായി അപ്പീലിന് പോയിട്ടുണ്ട്. പെണ്‍കുട്ടിയുടെ ദുരഹമരണത്തിന് കാരണക്കാരായ പ്രായപൂർത്തി തികഞ്ഞ കുറ്റക്കാരുടെ വിധി നിർണ്ണയിച്ചിട്ടില്ല. മരണശിക്ഷവരെ ലഭിക്കാവുന്ന കുറ്റങ്ങളാണ് അവരുടെമേൽ  ചുമത്തിയിരിക്കുന്നത്.

 

അറിയപ്പെടാത്ത സ്ത്രീ പീഡനങ്ങളുടെ ചരിത്രങ്ങൾ ഇന്ത്യാ ഒട്ടാകെയുണ്ട്. അവയിൽ ഏറെയും സ്വന്തം ഭവനങ്ങളോട് ചുറ്റിയായിരിക്കും. എന്നാൽ ഇന്ന് പൊതുനിരത്തുകളിൽ കൂട്ടബലാൽസംഗം ചെയ്യുകയെന്നുള്ളത്‌ ഇന്ത്യയിൽ  വർദ്ധിച്ചുവെന്നതാണ്‌ സത്യം. എങ്കിലും തലസ്ഥാന നഗരിയായ ഡൽഹിയിൽ നടന്ന ക്രൂരത ദൽഹിമുഴുവൻ ആശങ്കയുണ്ടാക്കി. ഭാരതത്തിനുതന്നെ വിദേശരാജ്യങ്ങളിൽ അപമാനം വരുത്തിവെച്ചു. ആയിരങ്ങൾ തെരുവിലിറങ്ങി സ്ത്രീപീഡനങ്ങൾക്കെതിരെ പ്രതിക്ഷേധിച്ചു. സർക്കാരും ഇങ്ങനെയുള്ള ലൈംഗിക അഴിഞ്ഞാട്ടങ്ങൾ തടയുവാൻ വേണ്ട നടപടികൾ ആരംഭിച്ചിട്ടുണ്ട്. ഇത്തരം കേസുകൾ പെട്ടെന്ന് പരിഹരിക്കാൻ സ്പീഡ് കോടതികൾ സ്ഥാപിക്കാനും സ്ത്രീപീഡകർക്ക് ഇന്നുള്ള ശിക്ഷാകാലാവധി ഇരട്ടിയാക്കാനും അതിനുള്ള നിയമഭേദഗതികൾ വരുത്താനും തീരുമാനിച്ചു.

സൈക്കിളിൽ സഞ്ചരിച്ച ഒരു യുവതിയെ മധ്യപ്രദേശിൽ വെച്ചും ഒരു അമേരിക്കൻ യുവതിയെ വടക്കേഇന്ത്യയിൽ വെച്ചും  ഒരു പത്രപ്രവർത്തകയെ ബോംബെയിൽവെച്ചും ബലാൽസംഗം ചെയ്തത് വിദേശത്തുള്ള എല്ലാ വാർത്താമീഡിയാകളിലും പ്രധാന വാർത്തയായി പ്രസിദ്ധീകരിച്ചിരുന്നു. ഇന്ത്യയുടെ അഭിമാനത്തിനുതന്നെ ക്ഷതം പറ്റത്തക്കവിധം വാർത്തകൾ പെരുപ്പിച്ചും കാണിക്കാറുണ്ട്.

 

ഇന്ത്യയിൽ നടക്കുന്ന ബലാൽസംഗ കേസുകൾ  ഭൂരിഭാഗം തെളിയാതെ പോകുന്ന സ്ഥിതിവിശേഷമാണ് ഇന്നുള്ളത്. 90 ശതമാനം മാനഭംഗകേസുകളും ശ്രദ്ധിക്കാതെ പോവുന്നു. കുറ്റവാളികൾ  സ്വാധീനംകൊണ്ടും തെളിവിന്റെ അഭാവംകൊണ്ടും നിയമത്തിന്റെ മുമ്പിൽനിന്ന് രക്ഷപ്പെടും. മന്ത്രിമക്കളും രാഷ്ട്രീയത്തിലെ പ്രമുഖരും സിനിമാ പ്രവർത്തനങ്ങളിൽ പ്രസിദ്ധരായവരും കുറ്റവാളികളുടെ മുൻനിരയിൽ ഉണ്ടെങ്കിലും അവരെയാരെയും കോടതികൾ ശിക്ഷിച്ചതായി കേട്ടിട്ടില്ല.

 

ബലാത്സംഗം, കുഞ്ഞുങ്ങളെ പീഡിപ്പിക്കൽ, വ്യപിചാരം എന്നീ ചൂടുള്ള നൂതന വൃത്താന്തങ്ങളിൽ അന്തർദേശീയ വാർത്തകൾ ആനന്ദം കണ്ടെത്തുന്നു. അതുപോലുള്ള വാർത്തകൾ തന്നെയാണ് ഇന്ത്യൻ മീഡിയാകളിലും നിറഞ്ഞിരിക്കുന്നത്‌. അപ്പൻ മകളെ ലൈംഗികമായി പീഡിപ്പിക്കുക, അപ്പൻ പിമ്പായി മകളെ കൂട്ടികൊടുക്കുക എന്നെല്ലാമുള്ള ഞെട്ടിപ്പിക്കുന്ന വാർത്തകളും നാം കേട്ടു.  വടക്കേഇന്ത്യായിൽ ഒരു പെണ്‍കുട്ടി ഉദരത്തിൽ വളർന്നാൽ അതിനെ ഇല്ലാതാക്കും. ചില മാതാപിതാക്കൾ പെണ്‍കുഞ്ഞുങ്ങളെ വ്യപിചാരശാലക്ക്‌ വില്ക്കും. ഇതെല്ലാം ഇന്നും വർണ്ണവ്യവസ്ഥ പരിപാലിക്കുന്ന ജനതയുടെ മൃഗീയ സംസ്ക്കാരമാണ്. അധപതിച്ച സമൂഹത്തിന്റെ ഈ സംസ്ക്കാരംമൂലം പെണ്‍കുട്ടികളില്ലാത്ത അനേക ഗ്രാമങ്ങൾപോലും ഇന്ത്യയിൽ ഉണ്ട്. ഇത്തരം ഭീകരാന്തരീക്ഷം സൃഷ്ടിക്കുന്ന രാജ്യത്തെ എങ്ങനെ ശാക്തിക ചേരികൾ ഉൾക്കൊള്ളും?

 

ഒരു സ്ത്രീക്ക് സ്വന്തം രാജ്യത്ത് സ്വന്തം വീട്ടിൽനിന്നും ലൈംഗികപീഡകരെ ഭയന്ന് പുറത്തേക്കിറങ്ങുവാൻ സാധിക്കില്ലായെങ്കിൽ ഏതുസമയവും പുരുഷൻ ആക്രമിക്കുമെന്ന ഭയവുമായി ജീവിക്കുന്നുവെങ്കിൽ രാജ്യത്ത് സമൂലമായ ഒരു മാറ്റത്തിന്റെ ആവശ്യമുണ്ട്. ഒരു സ്ത്രീ ജോലി ചെയ്യുന്നതോ പുറത്തുപൊവുന്നതോ  പ്രശ്നമല്ല.  പുരുഷൻ മനുഷ്യത്വത്തിൽ സ്ത്രീക്ക് ബഹുമാനം കല്പ്പിക്കാത്തതാണ് പ്രശ്നം. പുരുഷൻ എങ്ങനെയാണ് ലോകത്ത് വന്നതെന്ന് ചിന്തിക്കുന്ന കാലം വരണം. അവൻ തന്റെ സ്വന്തം മാതാവിനെ ബഹുമാനിക്കാൻ പഠിക്കണം. മാതാപിതാക്കൾ പരസ്പര ബഹുമാനത്തോടെ ജീവിച്ചാലും മക്കൾക്ക്‌ മാതൃകയാകും. ദാരിദ്ര്യവും തൊഴിലില്ലായ്മയുമാണ് ഇത്തരം ക്രൂരകൃത്യങ്ങൾക്ക് ചിലരെ പ്രേരിപ്പിക്കുന്നതെന്നും അഭിപ്രായങ്ങൾ ഉണ്ട്. എന്നാൽ കോടാനുകോടി ദരിദ്രരായ ജനങ്ങൾ ഗ്രാമപ്രദേശങ്ങളിൽ ജീവിക്കുന്നുണ്ടെന്നും  മനസിലാക്കണം.  അവരുടെയിടയിൽ ഇത്തരം പൈശാചിക നീചപ്രവർത്തികൾ സംഭവിക്കുന്നില്ല. ദൽഹിയിലും ബോംബയിലും കൂട്ടബലാൽസംഗത്തിനായി നടക്കുന്ന തെരുവിന്റെ സന്തതികളായ സാമൂഹ്യദ്രോഹികളുണ്ട്. ജോലിയോ വിദ്യാഭ്യാസമോ ഇക്കൂട്ടർക്ക് കാണുകയില്ല. ഇങ്ങനെയുള്ള മൃഗീയമനുഷ്യരുടെ പുരുഷത്വം നശിപ്പിക്കാനുള്ള നിർദേശങ്ങളുമുണ്ട്.

 

ഒരു അമേരിക്കൻ ചാനലിനുമുമ്പാകെ ഒരു സ്ത്രീ പറയുന്നത് ശ്രദ്ധിച്ചു. "കഴിഞ്ഞ കുറെക്കാലമായി ഇന്ത്യാ സന്ദർശിക്കണമെന്നത് എന്റെ ആഗ്രഹമായിരുന്നു. എന്നാൽ കുത്തഴിഞ്ഞ നിയമങ്ങളുള്ള ഒരു നാട്ടിലേക്ക് ഞാനില്ല. ഒരു ഡയിംപോലും ആ രാജ്യത്ത് ഞാൻ ചിലവാക്കില്ല. ബലാൽസംഗത്തിന് ബലിയാടാകുന്നവർക്ക് ആ രാജ്യത്ത് നീതിലഭിക്കുക എളുപ്പമല്ല".  ഇങ്ങനെയെല്ലാം ഇന്ത്യയെ താറടിക്കുന്ന മാധ്യമങ്ങൾ ബലാൽസംഗത്തിന്റെ ജ്വരങ്ങൾ ലോകം മുഴുവനുമുണ്ടെന്നുള്ള സത്യം മനസിലാക്കുന്നില്ല.

 

ജനാധിപത്യ വ്യവസ്ഥിതിയുള്ള ഇന്ത്യയിൽ ഇത്തരം സാമൂഹിക ദ്രോഹികൾക്കെതിരെ പ്രകടനവും  പ്രതിഷേധവും നടക്കുന്നതുകൊണ്ട് വാർത്തകൾ ലോകശ്രദ്ധയിൽപ്പെടുന്നു. അമേരിക്കയിൽ മോണ്ടാനയിൽ 47 വയസുള്ള ഒരു അദ്ധ്യാപകൻ 14 വയസുള്ള ഒരു കുട്ടിയെ ബലാൽസംഗം ചെയ്തു. നിരാശയായ ആ കുട്ടി ഉടൻ ആത്മഹത്യ ചെയ്തു. അയാൾക്ക്‌ കിട്ടിയ ശിക്ഷയോ വെറും 30 ദിവസം മാത്രം. അയാൾ ആ കുട്ടിയെ കൊന്നില്ലെന്നായിരുന്നു വിധിന്യായം. കുട്ടിയുടെ ആത്മഹത്യക്ക് ഇയാളല്ലേ,  പൂർണ്ണഉത്തരവാദി?  ഇങ്ങനെയുള്ള നൂറുനൂറ് സംഭവങ്ങൾ കണ്ണടച്ചുകൊണ്ടാണ് അമേരിക്കൻ റ്റീവികൾ ഇന്ത്യയെ പ്രതിക്കൂട്ടിൽ കയറ്റാറുള്ളത്. സ്വന്തം രാജ്യത്തിലെ പ്രശ്നങ്ങൾ ആദ്യം പരിഹരിച്ചിട്ട് വിദേശരാജ്യത്തിലേക്ക് കൈചൂണ്ടുകയല്ലേ ഏത് രാജ്യത്തിനും നല്ലത്.  

 

ദിനംപ്രതി കണ്ണുനീരിന്റെ കഥകളുമായി ഓടിവരുന്ന സ്ത്രീയുടെ ദുഖത്തിന് അധികാരലോകം പരിഹാരം കണ്ടേതീരൂ. ബലാൽസംഗത്തിനിരയായ അവളുടെ മനസും ചാരിത്രവും അവിടെ തകരുകയാണ്. അവൾക്ക്  നഷ്ടപ്പെട്ട മാനത്തിനും മനസിടിഞ്ഞതിനും അർഹമായ നഷ്ടപരിഹാരം പുരുഷനിൽനിന്ന് നേടാൻ ഇന്നുള്ള നിയമങ്ങൾ അപര്യാപ്തമാണ്. അതിനായി നിയമപാലകരും സർക്കാരും ജനവും ഒത്തുചേർന്ന് പുരുഷൻറെ മസ്ക്കുലിൻ ശക്തിയെ തകർക്കണം. ബലാല്ക്കാരത്തിനു തുനിഞ്ഞ പുരുഷനെ കുടുക്കത്തക്ക നിയമങ്ങളിൽക്കൂടി സ്ത്രീയെ ശക്തിപ്പെടുത്തണം. അവനിലെ മസ്ക്കുലിനെന്ന അഹങ്കാരത്തെ ഇല്ലാതാക്കണം. ഒരു സ്ത്രീ ബലാൽസംഗത്തിനിരയായാൽ സമൂഹമൊന്നാകെ കുറ്റപ്പെടുത്തുന്നത് സ്ത്രീയെയായിരിക്കും. മതവും യാഥാസ്ഥിതികരും അവളുടെ വസ്ത്രധാരണരീതിയെ പരിഹസിക്കും. എന്തേ,  അവളുടെതായ താൽപര്യമനുസരിച്ച് മാന്യമായി വസ്ത്രധാരണം ചെയ്യുവാൻ അവൾക്ക് അവകാശമില്ലേ? പുരുഷനെപ്പോലെ ബുദ്ധിയും വിവേകവുമുള്ള അവൾക്കും സ്വതന്ത്രമായി  പൊതുനിരത്തിൽക്കൂടി സഞ്ചരിക്കാനവകാശമില്ലേ?  മൃഗങ്ങൾക്ക് സമാനമായ പുരുഷന്റെ വികാരഭ്രാന്തിനെ എന്തുകൊണ്ട് കുറ്റപ്പെടുത്തുന്നില്ല? ഇങ്ങനെയുള്ള വാദങ്ങളിൽ യുക്തിയെവിടെ? ഭാരതത്തിന്റെ ഉൾനാടുകളിലുള്ള സ്ത്രീകൾ ദേഹത്തുമുഴുവൻ മുഖമുൾപ്പടെ വസ്ത്രം ധരിക്കുന്നവരാണ്. ഏന്നിട്ടും ഭൂമിയുടമകളും ഫ്യൂഡൽപ്രഭുക്കളും അവരെ ലൈംഗികമായി പീഡിപ്പിക്കുന്നു. രാഷ്ട്രീയക്കാരും സമൂഹവും സ്ത്രീയുടെ മാനവും അവകാശങ്ങളും സംരക്ഷിക്കാൻ താല്പര്യം കാണിക്കാറില്ലെന്നുള്ളതും നീതികരിക്കാൻ സാധിക്കാത്ത വസ്തുതകളാണ്.  

വില കുറഞ്ഞ ഉറുപ്പികയും ലാഭനഷ്ടങ്ങളും

By  ജോസഫ് പടന്നമാക്കൽ 

ആഗോളനിലവാരത്തിൽ രൂപയുടെ വിലയിടിയുന്നതായ വാർത്തകൾ ഇന്ത്യൻസാമ്പത്തിക മുന്നേറ്റത്തിനുതന്നെ വെല്ലുവിളിയായി തീർന്നിക്കുകയാണ്. സർക്കാർ ഡോളറിനെതിരെ രൂപയുടെ രക്ഷക്കായി   നടപടികൾ എടുത്തിട്ടും വിലയെ നിയന്ത്രിക്കാൻ സാധിക്കുന്നില്ല. ദിനംപ്രതി മൂല്യം ഇടിയുന്ന വാർത്തകളാണ് പത്രങ്ങളിലും മീഡിയാകളിലും നിറഞ്ഞിരിക്കുന്നത്‌. സർവ്വകാലറിക്കോർഡുകളും ഭേദിച്ച് ഡോളറുമായി 70 എന്ന അക്കത്തിലും രൂപയുടെ മൂല്യം നിർണ്ണയിക്കാറായി. ഈ വർഷംതന്നെ 19 ശതമാനത്തോളം വില താണുപോയി.

ഇന്ത്യയുടെ ധനതത്ത്വവിദക്തർ ഇതിന് പരിഹാരമായി എല്ലാ മാർഗങ്ങളും ആരായുന്നുണ്ടെങ്കിലും കാര്യമായ പുരോഗതിയില്ല. റിസേർവ്ബാങ്ക് ബില്ല്യൻ കണക്കിന് ഡോളർ മാർക്കറ്റിൽ ഒഴുക്കുന്നുണ്ട്. അതുകൊണ്ട് താല്ക്കാലികമായി ഡോളറിന്റെ വിലയെ കഴിഞ്ഞ ദിവസം പിടിച്ചു നിറുത്തുവാൻ സാധിച്ചു. കമ്പനികളും ഇന്ത്യയിൽ വസിക്കുന്നവരും  വിദേശത്ത് ഡോളർ നിക്ഷേപിക്കാൻ പാടില്ലാന്നും നിർദ്ദേശങ്ങളുണ്ട്.  

രൂപയുടെ മൂല്ല്യക്ഷയത്തിന് കാരണങ്ങളെന്തെല്ലാമായിരിക്കാം? സർക്കാരിന് എന്തുകൊണ്ട് താഴ്ച നിയന്ത്രിക്കാൻ സാധിക്കുന്നില്ല? ഇതെല്ലാം സാധാരണ ജനങ്ങളുടെ ചോദ്യങ്ങളാണ്. രൂപയുടെ തകർച്ചയിൽ ഭരിക്കുന്ന സർക്കാർ മാത്രമല്ല കുറ്റക്കാർ. ബാഹ്യമായ ആഗോള ധനമാർക്കറ്റും അന്തർദേശീയ വ്യവസായികളും അമേരിക്കാപോലുള്ള വൻകിടരാഷ്ട്രങ്ങളും മൂല്യക്ഷയത്തിൽ കാരണക്കാരാണ്. കയറ്റുമതി ഇറക്കുമതിയിൽക്കൂടി ലോകത്തിലെ എല്ലാ നാണയങ്ങളുമായി 'രൂപ' ബന്ധിതമായിരിക്കും. ഒരു ചെറിയ രാജ്യത്തിന്റെ ആഭ്യന്തരപ്രശ്നംപോലും അന്തരാഷ്ട്രനാണയ നിധിയെ ബാധിക്കും. പെട്രോളിയം ഉല്പ്പാദിപ്പിക്കുന്ന രാജ്യങ്ങളിൽ യുദ്ധം ഉണ്ടായാൽ പെട്രൊളിയത്തിനും പെട്രോളിയത്തിന്റെ അസംസ്കൃത വിഭവങ്ങൾക്കും വിലകൂടും. സിറിയായിലുള്ള യുദ്ധത്തിന്റെ ഭീഷണിയും രൂപയെ ബാധിച്ചേക്കാം.

അടുത്തകാലത്ത് ഇന്ത്യയിൽ പണം നിക്ഷേപിച്ചിരുന്ന അനേക വിദേശകമ്പനികളും സ്റ്റീൽകമ്പനികളും പ്രവർത്തനം മതിയാക്കി മടങ്ങിപ്പോയി. 12ബില്ല്യൻ ഡോളറോളം പദ്ധതിയിട്ട് അമേരിക്കൻകമ്പനികളും ഇന്ത്യയിൽ പ്രവർത്തിക്കാൻ വന്നിരുന്നു. സർക്കാരിന്റെ നയംമൂലം പ്രവർത്തനം മതിയാക്കി പിന്തിരിയുകയായിരുന്നു. സ്ഥലംമേടിക്കലും സർക്കാരിന്റെ അനാസ്ഥയും സർക്കാർ നടപടികളുടെ കാലതാമസവും കൃത്യനിഷ്ഠയില്ലായ്മയും സർക്കാർതീരുമാനങ്ങളും പ്രതികൂലമായിരുന്നതുകൊണ്ട് വിദേശകമ്പനികൾ  ഇന്ത്യയിൽ പണം നിക്ഷേപിക്കാൻ താല്പര്യം ഇല്ലാതെ പ്രവർത്തനം മതിയാക്കി  മടങ്ങുകയായിരുന്നു. 50,0 0 0 കോടിരൂപാ മുതൽമുടക്കുമായി വന്ന മിറ്റൽകമ്പനിയും കർണ്ണാടക സർക്കാരിന്റെ ഉപേക്ഷമൂലം പദ്ധതികൾ ഉപേക്ഷിച്ച് മടങ്ങിപ്പോയി. വിദേശകമ്പനികൾ എകദേശം മൂന്നുബില്ല്യൻ ഡോളറോളം അവരുടെ പണനിക്ഷേപം പിൻവലിച്ചു. ആഗോളതലത്തിലുള്ള സ്റ്റോക്ക്മാർക്കറ്റിലെ വമ്പന്മാർ ഇന്ത്യൻസ്റ്റോക്കുകളുടെ വിലയും ഇടിച്ചു. സ്വർണ്ണം ഇറക്കുമതി ചെയ്യുന്നതും രൂപയുടെ തകർച്ചക്ക് കാരണമായി. കാർഷിക വ്യവസായങ്ങളിലെ ഉത്ഭാദനമേഖലകളിലും വിദേശകമ്പനികൾ പണം മുടക്കാൻ തയാറല്ലായിരുന്നു.

എന്നിരുന്നാലും പണത്തിന്റെ  മൂല്യക്ഷയത്തിന് പ്രധാനകാരണം രാജ്യത്തിന്റെ സാമ്പത്തിക അപര്യാപ്തയാണ്. രൂപയുടെ മൂല്യം പ്രധാനമായും നിയന്ത്രിക്കുന്നത്‌ കയറ്റുമതി ഇറക്കുമതി അനുസരിച്ചാണ്. ഈ വർഷം മൊത്തം കയറ്റുമതിയിൽ 4.8 ശതമാനം കുറഞ്ഞു. അത്രയും വിദേശവരുമാനത്തിൽ കുറവ് സംഭവിച്ചു. വിദേശനാണയത്തിന്റെ അപര്യാപ്തതയിൽ അന്തർദേശീയ നിധിയിൽനിന്ന് കൂടിയ നിരക്കിലുളള പലിശയിൽ പണം കടം എടുക്കേണ്ടി വന്നു . ഡോളറിന്റെ രാജ്യത്തിലേക്കുള്ള ഒഴുക്ക് കുറയുംതോറും കൂടുതൽ രൂപ കൊടുത്ത് ഡോളർ മേടിക്കാൻ നിർന്ധിതരാകും. മുമ്പ് 45 രൂപക്ക്‌ മേടിച്ചിരുന്ന ഡോളറിന് സാമ്പത്തിക അപര്യാപ്തതമൂലം 70 രൂപയോളം കൊടുക്കേണ്ടി വരുന്നു.


പരമ്പരാഗതമായി നാം കയറ്റുമതി ചെയ്തിരുന്ന രാജ്യങ്ങളിലെല്ലാം വിലയിലെ മത്സരംമൂലം കയറ്റുമതിയിൽ ഗണ്യമായി കുറവ് വന്നു. പുറംരാജ്യങ്ങളിലെ കയറ്റുമതിയിലുള്ള അനേക കരാറുകളും ഇന്ത്യക്ക് നഷ്ടപ്പെട്ടു. പുതിയ രാജ്യങ്ങളുമായി അക്കൌണ്ടുകൾ നേടുവാനും സാധിച്ചില്ല. ഇന്ത്യയിലെ ഉൽപ്പന്നങ്ങൾക്ക് ഗുണമേന്മ കുറഞ്ഞതെന്ന് ചില സ്ഥാപിതതാല്പര്യമുള്ള രാജ്യങ്ങൾ പ്രചരണം നടത്തിയതുകൊണ്ടും കയറ്റുമതിയെ സാരമായി ബാധിച്ചു. കയറ്റുമതി ചെയ്തുകൊണ്ടിരുന്ന പല വിദേശരാജ്യങ്ങളും ഇന്ത്യയോട് ചിറ്റമ്മനയം പുലർത്തിയിരുന്നു. ഇന്ത്യൻ ഉത്പന്നങ്ങൾ മേടിക്കാൻ പല രാജ്യങ്ങളും മടികാണിച്ചിരുന്നു. കൂടിയ വില, ഗുണംകുറഞ്ഞ ഉൽപ്പന്നങ്ങൾ എന്നൊക്കെയാണ് ഇന്ത്യയിലെ ഉൽപ്പന്നങ്ങളെ നിരസിക്കാൻ കാരണങ്ങളായി വിദേശികൾ ചൂണ്ടികാണിച്ചിരുന്നത്. ഇന്ത്യയിൽ ഉത്ഭാദനചെലവും തൊഴിൽവേതനവും  വർദ്ധിച്ചതുകൊണ്ട് ഉൽപ്പന്നങ്ങൾക്ക് വിലകൂടി. തന്മൂലം ഇന്ത്യയ്ക്ക് അന്തർദേശീയ മാർക്കറ്റുമായി മത്സരിക്കാൻ സാധിക്കാതെ വന്നു.
ആഗോളതലത്തിലെ മാർക്കറ്റിൽ ഈ വർഷം ഡോളറിന്റെ വില രണ്ട് ശതമാനം കൂടിയിട്ടുണ്ട്.  ഡോളറിന്റെ അന്തർദേശീയ വിലവർദ്ധന രൂപയെ സാരമായി ബാധിക്കുകയും ചെയ്തു. ഡോളറിന്റെ വിലകൂടുന്നതും അതുമൂലം രൂപ നിലംപതിക്കുന്നതും ഇന്ത്യൻ സർക്കാരിന്റെ നിയന്ത്രണത്തിൽ ഉള്ളതല്ല. വളരെയധികം താണുപൊയിരുന്ന ഇന്നത്തെ അമേരിക്കൻ സാമ്പത്തികവളർച്ച മൂന്നാം ചേരിയിലുള്ള അഭിവൃത്തി പ്രാപിച്ചുകൊണ്ടിരിക്കുന്ന രാജ്യങ്ങളെ ബാധിക്കും. തകർന്നുപോയ ഇന്ത്യൻരൂപയെ ആഗോളമാർക്കറ്റനുസരിച്ച് പഴയ മൂല്യത്തിലേക്ക് തിരിച്ചുകൊണ്ടുവരാനും ബുദ്ധിമുട്ടായിരിക്കും. 
  

ഡോളറിന്റെ മൂല്യം വർദ്ധിച്ചതോടെ ഡോളർക്ഷാമം ഇന്ന് ഇന്ത്യാ മുഴുവൻ വ്യാപിച്ചിട്ടുണ്ട്. കമ്പനികളും നിക്ഷേപകരും മത്സരിച്ച് ഡോളർ വാങ്ങിക്കാനും തുടങ്ങി. മാർക്കറ്റുവിലയേക്കാളും ഉയർന്ന പ്രീമിയം നൽകി കോർപ്പറേറ്റ്സ്ഥാപനങ്ങൾ ഡോളർ വാങ്ങിക്കുന്നതും രൂപയുടെ വില ഇടിയുവാൻ കാരണമാണ്.  റിസർവ്ബാങ്ക് വൻതോതിൽ ഡോളർ മാർക്കറ്റിൽ വിറ്റിട്ടും രൂപയുടെ വിലയെ പിടിച്ചു നിർത്തുവാൻ സാധിക്കുന്നില്ല. വിലയിടിവിൽ ഇനിയും വിദേശകറൻസിക്ക്‌ വില കൂടുമെന്ന ധാരണയോടെ പ്രവാസികൾ നാട്ടിലേക്ക് ഡോളർ അയക്കാൻ മടികാണിക്കുന്നതും വിലയെ സ്വാധീനിക്കുന്നുണ്ട്.
 

രൂപമൂല്യം ഇടിയുന്ന കാലങ്ങളിൽ ഏറ്റവുമധികം ബാധിക്കുന്നത് ഊർജംനല്കുന്ന പെട്രോളിയം കമ്പനികളെ ആയിരിക്കും. ഇറക്കുമതിയെ ആശ്രയിച്ചിരിക്കുന്ന ഇത്തരം കമ്പനികൾക്ക് കൂടുതൽ ഡോളർ കൊടുത്ത് പെട്രോളിയകൊണ്ടുള്ള അസംസ്കൃത സാധനങ്ങൾ മേടിക്കേണ്ടി വരുന്നു. ഡോളറിന്റെ അപര്യാപ്തതയിൽ സാമ്പത്തികമാന്ദ്യം അനുഭവപ്പെടും. ക്രെഡിറ്റ്റേറ്റിങ്ങും മോശമാവുന്നതുമൂലം കൂടുതൽ പലിശക്ക് വിദേശവായ്പ എടുക്കേണ്ടി വരുന്നു. ഇപ്പോൾതന്നെ ഭാരതപെട്രോളിയം കോർപ്പറേഷനും ഇന്ത്യൻഒയിൽകമ്പനിയും അമ്പതു ശതമാനത്തോളം വിദേശക്കടം വീട്ടാനുണ്ട്. സർക്കാരുകൾ സബ്സിഡി കൊടുത്താണ് സാധാരണ പെട്രോളിയം കമ്പനികളുടെ ഉൽപ്പന്നങ്ങൾക്ക് വില നിയന്ത്രിക്കുന്നത്‌. രൂപയുടെ വിലയിടിയുന്ന സമയത്ത് സർക്കാരിൽനിന്നുള്ള സബ്സിഡികൾ താമസിച്ചാൽ കമ്പനികളുടെ ദൈനംദിനാവശ്യങ്ങൾക്കുള്ള പണം തികയാതെ വരും. കമ്പനികളുടെ കടവും പലിശയും വീണ്ടും വർദ്ധിക്കും. വിലപ്പെരുപ്പവും രാഷ്ട്രീയ അസമത്വങ്ങളും കാരണമാകും.


രൂപയുടെ പതനം രാഷ്ട്രത്തിന്റെ ഖജനാവിനെയും വ്യക്തികളെയും എങ്ങനെ ബാധിക്കുന്നുവെന്നും ഒന്ന് അവലോകനം ചെയ്യാം.

1.ഏറ്റവുമധികം അനുഭവപ്പെടുന്നത്  ഇന്ധനങ്ങളുടെ വില വർധനവിലായിരിക്കും. തന്മൂലം വിദേശത്തുനിന്ന് ഇറക്കുമതി ചെയ്യുന്ന പെട്രോളിയം അസംസ്കൃത സാധനങ്ങളുടെയും വിലകൂടും.

2.വിദേശത്തേക്ക് യാത്ര ചെയ്യുന്നവർ വർദ്ധിച്ച വിമാനക്കൂലി കൊടുത്ത് യാത്രചെയ്യേണ്ടി വരും.

3.വിദേശത്തുള്ള ഹോട്ടലുകളിലും ഭക്ഷണം കഴിക്കുന്നതിലും ഷോപ്പിങ്ങിലും  വിദേശനാണയത്തിലെ ക്രയവിക്രയംമൂലം പണം കൂടുതൽ കരുതേണ്ടി വരും.
 
4.ഇറക്കുമതി ചെയ്യുന്ന എല്ലാ വിഭവങ്ങൾക്കും രൂപയിൽ കടുത്ത വില നല്കേണ്ടിവരും.

5.ഡോളർ അപര്യാപ്തത മൂലം വിദേശക്കടവും കൂടും. അമിതപലിശയിൽ വിദേശത്തുനിന്ന് കടം എടുക്കുവാൻ കമ്പനികൾ നിർബന്ധിതരാകുകയും ചെയ്യുന്നു.  

6.ഇറക്കുമതി ചെയ്യുന്ന സാധനങ്ങൾക്ക്‌ വില കൂടുമ്പോൾ രാഷ്ട്രം വിലപ്പെരുപ്പത്തെ നേരിടുകയാണ്. അത്യാവശ്യസാധനങ്ങൾക്ക് വിലകൂടുമ്പോൾ ബാധിക്കുന്നത് കൃത്യമായ വരുമാനത്തിൽ ജീവിക്കുന്ന സാധാരണക്കാരെയാണ്.

7.വിദേശസർവകലാശാലകളിൽ യോഗ്യതനേടി പഠിക്കുന്ന വിദ്യാർഥികളെയാണ് രൂപയുടെ തകർച്ച ഏറ്റവും കൂടുതൽ ബാധിക്കുന്നത്. ഈ വർഷം തന്നെ 20 ശതമാനത്തോളം വില താണു. അതിന്റെ അർഥം വിദേശപ്പണത്തിനായി പത്തുലക്ഷം രൂപാ കടം എടുക്കുന്ന ഒരു വിദ്യാർഥി അധികമായി രണ്ടുലക്ഷം രൂപാകൂടി കരുതണം. ഇങ്ങനെ അധികചെലവുമൂലം അനേക വിദ്യാർഥികൾ വിദേശത്തെ പഠനം ഉപേക്ഷിക്കുകയും ചെയ്തു.

8.വീട്ടാവശ്യങ്ങളിലും വിലഇടിവുമൂലം വിലപ്പെരുപ്പം അനുഭവപ്പെടും. അതുമൂലം ബാങ്കിലെ നിക്ഷേപവും കുറയും.

9.രാജ്യത്തിന്റെ സാമ്പത്തിക വളർച്ചയേയും ബാധിക്കുന്നതുകൊണ്ട് വിദേശകമ്പനികൾ ഈ രാജ്യത്ത് നിക്ഷേപത്തിന് തയ്യാറാവുകയില്ല.


രൂപയുടെ വിലയിടിവിനെ പിടിച്ചു നിർത്താൻ റിസർവ്ബാങ്ക് പല നടപടികളും സ്വീകരിച്ചിട്ടുണ്ട്. ഓയിൽകമ്പനികൾക്ക് നേരിട്ട് ഡോളർ വാങ്ങുവാൻ റിസർവ്ബാങ്ക് പ്രത്യേക സംവിധാനങ്ങൾ എർപ്പെടുത്തും. അങ്ങനെയെങ്കിൽ വലിയ വിലയ്ക്ക് കമ്പനികൾക്ക് ഡോളർ വാങ്ങേണ്ടി വരുകയില്ല. റിസർവ് ബാങ്കിന്റെ ഡോളർ നിക്ഷേപിച്ച ഖജനാവ് ശോഷിക്കുമെന്നുള്ള പോരായ്മയുണ്ട്. ഓയിൽകമ്പനികൾക്ക് ഡോളർ നല്കുന്നതിനൊപ്പം പണം തിരിച്ചടക്കാൻ കുറഞ്ഞ പലിശക്ക് കടപത്രവും നല്കും. രൂപയിൽ പണം മടക്കികൊടുത്താൽ മതിയാകും. വിലയെ നിയന്ത്രിക്കാൻ ഇത്തരം കമ്പനികൾക്ക് സബിസിഡിയും നല്കും. കയറ്റുമതിക്കാരോട് നേടുന്ന വിദേശപ്പണം ഉടൻ മാർക്കറ്റിൽ രൂപയാക്കി മാറ്റാൻ നിർദേശിക്കും. ആകർഷണീയമായ രീതിയിൽ പലിശ കൊടുത്ത് ബാങ്കുകളോട് കൂടുതൽ ഡോളർനിക്ഷേപം നേടുവാനും റിസർവ് ബാങ്ക് ആവശ്യപ്പെടും. അങ്ങനെ ലഭിക്കുന്ന വിദേശപണം വ്യവസായ മേഖലകൾക്ക് ഉപയോഗപ്പെടും. ഇറക്കുമതി ചെയ്യുന്ന ഉല്പന്നങ്ങളുടെ വില വിദേശകമ്പനികൾക്ക്‌ കൊടുക്കുന്നത് താമസിപ്പിക്കാൻ ബാങ്കുകൾ പ്രത്യേക നിയമം ഉണ്ടാക്കും. വിദേശത്ത് താമസിക്കുന്നവർക്കായി ഇന്ത്യയിൽ പണം നിക്ഷേപിക്കാൻ കൂടിയ പലിശനിരക്കിൽ കടപത്രങ്ങൾ ഇറക്കാൻ സാദ്ധ്യതയുണ്ട്.  ഡോളർവില എല്ലാക്കാലവും വർദ്ധിക്കുന്നതുമൂലം  വലിയ പലിശക്ക് കടപത്രം പുറപ്പെടുവിക്കുവാൻ റിസർവ്ബാങ്കിന് അഭിപ്രായം ഇല്ല.


എന്നിരുന്നാലും രൂപയുടെ വില ഇടിഞ്ഞതുമൂലം ലാഭം കൊയ്യുന്നവരുമുണ്ട്. കറൻസിയുടെ  മൂല്യക്ഷയത്തിൽ ചിലർക്ക് സന്തോഷവും മറ്റുചിലർക്ക് ദു:ഖവുമാണ്. ഏറ്റവുമധികം സന്തോഷിക്കുന്നത് വിദേശരാജ്യങ്ങളിലുള്ള പ്രവാസികളാണ്. രൂപയുടെ വിലയിടിവിൽ അവരുടെ കുടുംബാംഗങ്ങൾക്ക് കൂടുതൽ പണം ലഭിക്കും.വിദേശത്ത് താമസിക്കുന്നവർ പ്രത്യേകിച്ച് ഗൾഫ്നാടുകളിൽ ഉള്ളവർ കടംമേടിച്ചും കറന്സി വ്യതിയാനത്തിന്റെ മുതലെടുക്കുന്നുമുണ്ട്.
  

കയറ്റുമതിയെ ആശ്രയിച്ചുകഴിയുന്ന കമ്പനികൾക്കും പ്രയോജനം ഉണ്ട്. കയറ്റുമതിയിൽനിന്ന് നേടുന്ന വിദേശനാണയത്തിൽ കൂടിയനിരക്കിൽ രൂപാ നേടുന്നു. കേരളത്തിലെ റബ്ബർകൃഷിക്കാർക്കും ഗുണം ചെയ്തേക്കാം. റബ്ബർ കയറ്റുമതി ചെയ്യുന്ന ഉല്പ്പന്നമായതുകൊണ്ട് വിദേശനിരക്ക് കൂടുംതോറും റബറിന്റെ വിലകൂടും. കൃഷിക്കാരന് മൂല്യം കുറഞ്ഞ അധികരൂപയും നേടാം. വിദേശമാർക്കറ്റുമായി റബർവ്യവസായികൾക്ക് മത്സരിക്കാൻ സാധിക്കും. സ്വർണ്ണം ഇറക്കുമതി ചെയ്യുന്നതുകൊണ്ട് സ്വർണ്ണനിക്ഷേപകർക്ക് ഗുണവുമാകാം. വാങ്ങിക്കുന്നവർക്ക് കൂടിയവിലയും നല്കണം. അതുപോലെ കയറ്റുമതി ചെയ്യുന്ന സ്റ്റീൽകമ്പനികളും ആഹ്ലാദത്തിലാണ്‌.


പ്രവാസിമലയാളികൾ സന്തുഷ്ടരെന്ന് സൂചിപ്പിച്ചതുപോലെ അവരുടെ നിക്ഷേപംമൂലം നാട്ടിലെ വസ്തുക്കൾക്കും വിലകൂടും. ഇന്ത്യൻ സ്റ്റീൽകയറ്റുമതി കമ്പനികളും സന്തോഷത്തിലാണ്. പണത്തിന്റെ വിലയിടിവുമൂലം 25 ബില്ല്യൻ രൂപാ വിലയുള്ള 700, 000  ടണ്‍ സ്റ്റീൽ ഈ വർഷം കയറ്റുമതി പ്രതീക്ഷിക്കുന്നു. ഇന്ത്യാ ലിമിറ്റഡ്‌ സ്റ്റീൽ കമ്പനിയുടെ ചെയർമാൻ പ്രതീക്ഷിക്കുന്നത് ഈ സാമ്പത്തിക വർഷം കയറ്റുമതി ഇരട്ടിയാക്കാൻ സാധിക്കുമെന്നാണ്. വിലയിടിവുമൂലം ലോകകമ്പനികൾക്ക് ഇന്ത്യൻ കമ്പനികളെ വെല്ലാൻ സാധിക്കുകയില്ല. റ്റെക്സ്റ്റയിൽ കയറ്റുമതി കമ്പനികൾ, ഐ.ടി. കമ്പനികൾ, ടാറ്റാ മോട്ടോർ, ബജാജ് ഓട്ടോ എന്നീ കമ്പനികൾ രൂപയുടെ തകർച്ചയിൽ ലാഭം കൊയ്യാൻ കാത്തിരിക്കുന്നു.