ഒബാമയും ഭരണസ്തംഭനവും

By  ജോസഫ് പടന്നമാക്കൽ

അമേരിക്കൻ സർക്കാരിന്റെ ഇപ്പോഴുള്ള പ്രവർത്തനസ്തംഭനം ചരിത്രത്തിൽ രേഖപ്പെടുത്തിയിട്ടുള്ള ആദ്യസംഭവമല്ല. ഇന്നേക്ക്  18 വർഷങ്ങൾക്കുമുമ്പ് (1995-96) പ്രസിഡണ്ട്‌ ബിൽ ക്ലിന്റന്റെ കാലത്തുണ്ടായ സർക്കാർസ്തംഭനം 21 ദിവസങ്ങളോളം നീണ്ടുനിന്നു. ഒബാമയുടെ ആരോഗ്യപരിരക്ഷാപദ്ധതിയാണ് ഈ സംഭവത്തിന്റെ പിന്നിൽ മുഖ്യ ചർച്ചാവിഷയമായിരിക്കുന്നത്. ഇന്നുള്ള പ്രതിസന്ധിക്ക് റിപ്പബ്ലിക്കനും ഡെമോക്രാറ്റും പരസ്പരം കുറ്റാരോപണം നടത്തുന്നതല്ലാതെ രണ്ട് പാർട്ടികളിൽനിന്നും പരിഹാര മാർഗങ്ങൾക്കായി  ആത്മാർഥമായ ഒരു നീക്കമുണ്ടാകുന്നില്ല. ഈ മാസം പ്രശ്നങ്ങൾ പരിഹരിച്ചാൽത്തന്നെയും സർക്കാരിന്റെ നിലവിലുള്ള ഭീമമായ കടബാധ്യത വീണ്ടും വർദ്ധിക്കുമെന്നതാണ് മറ്റൊരു പ്രശ്നം. 

ഒരു വ്യക്തിക്ക് ക്രഡിറ്റ്കാർഡിൽനിന്നും പരമാവധി കടമെടുക്കാൻ (Credit rating) അനുവദിക്കുന്നതുപോലെ രാഷ്ട്രത്തിനും കടമെടുക്കാനുള്ള പരിധി നിശ്ചയിച്ചിട്ടുണ്ട്. മേടിച്ച പണം തിരിച്ചുകൊടുക്കാനാവാതെ സർക്കാരിന്റെ ഖജനാവ് കാലിയായിക്കൊണ്ടിരിക്കുന്നു. ഈ സാഹചര്യത്തിൽ രാജ്യത്തിന്റെ ക്രെഡിറ്റ്‌ ഉയർത്തി കൂടുതൽ പണം അനുവദിച്ചാൽ മാത്രമേ രാജ്യഭരണം സുഗമമാവുകയുള്ളൂ. അമേരിക്കയിൽ നടപ്പാക്കേണ്ട അത്യാവശ്യമല്ലാത്ത പദ്ധതികൾക്ക് ഫണ്ട് അനുവദിക്കാതെ പാഴ്ചെലവുകൾ ഒഴിവാക്കിയാൽ പ്രശ്നങ്ങൾക്ക് ശമനം കണ്ടെത്തുവാൻ സാധിക്കുമെന്നും കരുതുന്നു.

 

പ്രധാന രാഷ്ട്രീയ പാർട്ടികളായ റിപ്പബ്ലിക്കനും ഡമോക്രാറ്റും തമ്മിൽ  പണത്തിന്മേലുള്ള പന്തുകളി വാർത്തകളാണ് വാഷിംഗ്ടണിൽനിന്നും എന്നും കേട്ടുകൊണ്ടിരിക്കുന്നത്. പ്രശ്നങ്ങൾ തീർക്കാതെ ഉചിതമായ മറുപടിയുമായുള്ള ഒബാമയുടെ കടുംപിടുത്തവും വിമർശനങ്ങളിലുണ്ട്. ഏത് അടിയന്തിരാവസ്തയിലും കോണ്‍ഗ്രസ്സ് അംഗങ്ങൾക്കും സെനറ്റ് മെംബർമാർക്കും പ്രസിഡന്റിനും മുടങ്ങാതെ ശമ്പളം കിട്ടിക്കൊണ്ടിരിക്കും. അത് അമേരിക്കയുടെ നിയമവ്യവസ്ഥയിലുള്ളതാണ്‌. രാജ്യം നേരിടുന്ന ഈ ദുരവസ്ഥയിൽ റിപ്പബ്ലിക്കന്റെയും ഡെമോക്രാറ്റിന്റെയും ആദർശങ്ങൾ പൊക്കിയുയർത്തി വോട്ടുബാങ്കുകളുടെ ബലം വർദ്ധിപ്പിക്കാനാണ് പലരുടെയും ശ്രമം. അതിനായി രാഷ്ട്രീയപാർട്ടികൾ പരസ്പരം ചെളിവാരിയെറിയലല്ലാതെ ജനങ്ങളുടെ കഷ്ടപ്പാടിനെക്കുറിച്ച് ബോധവാന്മാരല്ല. അമേരിക്കൻ സർക്കാരിലുള്ള ചുവപ്പുനാടകൾ വാസ്തവത്തിൽ രാജ്യത്തിന്റെ പേരുതന്നെ കളങ്കപ്പെടുത്തിക്കൊണ്ടിരിക്കുകയാണ്‌. രാജ്യം അഭിമുഖികരിക്കുന്ന സാമ്പത്തിക ഞെരുക്കം അവർക്ക് പ്രശ്നമല്ല. അമേരിക്കയിലെ അദ്ധ്വാനിക്കുന്ന ജനവിഭാഗത്തെയാണ് സാമ്പത്തിക അസമത്വം ബാധിക്കുന്നത്. ഈ അടിയന്തിര സാഹചര്യം തരണം ചെയ്യാൻ സാധിക്കാത്ത സ്ഥിതിവിശേഷം സൃഷ്ടിച്ച തെരഞ്ഞെടുക്കപ്പെട്ടവരെ ഒന്നടങ്കം കുറ്റപ്പെടുത്തണം. പ്രത്യേക പാർട്ടികൾ മാത്രമല്ല ഇതിന് കാരണക്കാർ.  സ്വാർഥതയാണ് ഈ സാമ്പത്തിക വിവാദങ്ങളിൽ ദൃശ്യമാകുന്നത്. ലോകത്തിന്റെ മുമ്പിൽ എന്നും അഭിമാനത്തോടെ വിലസിയിരുന്ന സമ്പന്നമായ ഈ രാജ്യത്തെ മറ്റുള്ള ലോകരാജ്യങ്ങൾ ഇന്ന് കാണുന്നത് പരിഹാസരൂപത്തിലാണ്.

ഒബാമയുടെ ആരോഗ്യപരിരക്ഷാപദ്ധതികളിൽ അമർഷംപൂണ്ട ചിലരുടെ എതിർപ്പുകൾമൂലമാണ് ദേശത്തിന്റെ ആകസ്മികമായ ഈ മഹാവിപത്തിന് കാരണമായത്‌. വാസ്തവത്തിൽ ആരോഗ്യരക്ഷാപദ്ധതി അമേരിക്കയിലെ ഖജനാവുമായി നേരിട്ട് ബന്ധമില്ല. റിപ്പബ്ലിക്കിലെ യാഥാസ്ഥിതികർക്ക് ഈ പദ്ധതികൾ ദഹിക്കുന്നില്ലാത്തുകൊണ്ട് കിട്ടിയ അവസരം അവർ മുതലാക്കുന്നുവെന്നേയുള്ളൂ. രാജ്യത്തിലെ 13 ശതമാനം മാത്രമുള്ള താഴ്ന്ന വരുമാനക്കാർക്ക് മാത്രമേ ഒബാമ പദ്ധതികൊണ്ട് പ്രയോജനമുള്ളൂവെന്നും നികുതി കൊടുക്കുന്ന എല്ലാ ജനങ്ങൾക്കും തുല്യനീതി ലഭിക്കുന്നില്ലായെന്നും യാഥാസ്ഥിതിക റിപ്പബ്ലിക്കരായവരുടെ വാദങ്ങളാണ്.

എന്തുകൊണ്ട് സർക്കാർ പ്രവർത്തനങ്ങൾ നിലച്ചുവെന്നും അതിനുള്ള സാഹചര്യങ്ങൾ എന്തെല്ലാമെന്നും വിലയിരുത്തേണ്ടിയിരിക്കുന്നു. അമേരിക്കൻ ഭരണഘടനയനുസരിച്ച് സർക്കാരിന്റെ വരവുചെലവുകൾ സംബന്ധിച്ച ബില്ലുകൾ സെനറ്റും കോണ്ഗ്രസ്സും പാസാക്കി പ്രസിഡന്റ് ഒപ്പിടേണ്ടതായുണ്ട്. ചെറുകിട ബിസിനസ്കാർക്ക് കടം കൊടുക്കുന്നതുമുതൽ പാസ്പോർട്ട് ഏജൻസികളുടെ പ്രവർത്തനംവരെ ആവശ്യത്തിന് ഫണ്ട് ഉപയോഗിക്കാൻ ബില്ലുകൾ സെനറ്റ്ഹൌസ് മുതൽ അവതരിപ്പിക്കണം. സോഷ്യൽ സെക്യൂരിറ്റി,  ട്രാഫിക്ക് നിയന്ത്രണം, മിലിട്ടറി എന്നിവകൾക്കുള്ള പണം സർക്കാരിന്റെ പ്രവർത്തനം നിലച്ചാലും കൊടുത്തുകൊണ്ടിരിക്കണം. ഇവകൾ അത്യാവശ്യ സർവീസുകളാണ്. സർക്കാർ പ്രവർത്തനം നിന്നാലും സൈന്യങ്ങൾക്ക് യുദ്ധം ചെയ്തുകൊണ്ടിരിക്കാം. പോസ്റ്റൽ കത്തുകൾ കിട്ടികൊണ്ടിരിക്കും. അതുപോലെ കോണ്‍ഗ്രസ് അംഗങ്ങൾക്കും സെനറ്റ് അംഗങ്ങൾക്കും പ്രസിഡന്റിനും ശമ്പളം ലഭിച്ചുകൊണ്ടിരിക്കും. തെരഞ്ഞെടുക്കപ്പെട്ടവരായ ഇവരാണ് ഇന്ന് ജനങ്ങളുടെ നികുതിപ്പണം അമ്മാനമാടികൊണ്ട് സാധാരണക്കാരന്റെ ജീവിതത്തെ കുഴപ്പത്തിലാക്കുന്നത്.

സാധാരണ ബില്ലുകൾ വർഷത്തിന്റെ മധ്യകാലസമയങ്ങളിലാണ് അവതരിപ്പിച്ച് പാസാക്കാറുള്ളത്. സർക്കാരിന്റെ സാമ്പത്തികവർഷം ഒക്റ്റോബർ ഒന്നുമുതൽ തുടങ്ങി സെപ്റ്റംബർ മുപ്പതിന് അവസാനിക്കുന്നു.  കോണ്‍ഗ്രസിനും സെനറ്റിനും ചില പദ്ധതികൾക്കായി ഫണ്ട് അനുവദിക്കാതെയിരിക്കാം. രാഷ്ട്രത്തിന്റെ വരവുചെലവുമതിപ്പിൽ (budget ) പുതിയതായി ഉൾകൊള്ളിക്കേണ്ട ചില പദ്ധതികൾ വരുമ്പോഴാണ് സാധാരണ വാദപ്രതിവാദങ്ങൾ ഉണ്ടാകാറുള്ളത്. അങ്ങനെയാണ് ഒബാമായുടെ ആരോഗ്യ സുരക്ഷാപദ്ധതി കോണ്‍ഗ്രസിൽ വിവാദ വിഷയമായി തീർന്നത്. ആരോഗ്യ സുരക്ഷാപദ്ധതികൾ സാധാരണ ഫെഡറലിന്റെ നിയന്ത്രണത്തിലുള്ളതല്ല. ഒബാമയുടെ ആരോഗ്യ സുരക്ഷാപരിപാടികൾ സാമ്പത്തിക അപര്യാപ്തത വരുത്തുമെന്ന് ചില റിപ്പബ്ലിക്കൻ അംഗങ്ങൾ ആശങ്ക പ്രകടിപ്പിച്ചതുമൂലം പ്രശ്നങ്ങൾ സങ്കീർണ്ണമാകുവാനിടയായി. ഒബാമയുടെ ആരോഗ്യാരക്ഷാ നിയമങ്ങളനുസരിച്ച് അമേരിക്കയിലെ എല്ലാ പൌരന്മാർക്കും ആരോഗ്യ ഇൻഷുറൻസ് നിർന്ധമായും വേണമെന്നുള്ളതാണ്. ഇത് തൊഴിലുടമകൾക്ക് പ്രശ്നങ്ങൾ ഉണ്ടാക്കുന്നുവെന്ന് ഈ പദ്ധതിയെ എതിർക്കുന്നവർ പറയുന്നു. ഇൻഷുറൻസ് കമ്പനികൾ സാമ്പത്തിക സമ്മർദം കാരണം പ്രീമിയവും വർദ്ധിപ്പിക്കും. അധികം വരുന്ന ചെലവ് വഹിക്കേണ്ടതും തൊഴിൽ നൽകേണ്ടവരാണ്. തന്മൂലം ഉത്പാദന ചെലവുകൾ കൂടും. ഉൽപ്പന്നങ്ങൾക്ക് വില വർദ്ധിക്കുന്നതുമൂലം രാജ്യത്ത് വിലപ്പെരുപ്പം അനുഭവപ്പെടുകയും ചെയ്യും. എത്ര ഗുരുതരമായ രോഗമുള്ളവർക്കും സുരക്ഷാ പദ്ധതിയനുസരിച്ച് ഇൻഷുറൻസ് കൊടുക്കുന്നതുവഴി  ഇൻഷുറൻസ് കമ്പനികൾ പാപ്പരത്തത്തിലേക്ക് നീങ്ങുമെന്നും ഭയപ്പെടുന്നു.

റിപ്പബ്ലിക്കൻസ്കൂടി ഒത്തുചേർന്ന് പാസാക്കിയ ഒബാമാ ആരോഗ്യപരിരക്ഷാപദ്ധതി ബില്ല് ഒരു വർഷം കഴിഞ്ഞ് നടപ്പാക്കിയാൽ മതിയെന്നാണ് പുതിയ വാദങ്ങൾ. മറ്റൊന്ന് മെഡിക്കൽ ഉപകരണങ്ങൾ ഉൽപ്പാദിപ്പിച്ച് വിറ്റഴിക്കുന്ന കമ്പനികളുടെ അധിക നികുതിയിലുള്ള എതിർപ്പാണ്. ഒത്തുതീർപ്പിനുള്ള വഴികൾ കണ്ടുപിടിക്കാൻ സാധിക്കാതെ പോവുന്നതും മെഡിക്കൽ നിർമ്മാണകമ്പനികളെ തൃപ്ത്തിപ്പെടുത്താനുമാകാം. ഈ നികുതിയും ഒബാമയുടെ ആരോഗ്യരക്ഷാ പദ്ധതിയുടെ ഭാഗമാണ്. സർജറിക്കും മറ്റു മെഡിക്കൽ വകുപ്പുകൾക്കുംവേണ്ടി നിർമ്മിക്കുന്ന ഉപകരണങ്ങൾക്ക്‌ ഇപ്പോൾ രണ്ടര ശതമാനം നികുതി കൊടുക്കുന്നുണ്ട്. ഒബാമയുടെ തീരുമാനമനുസരിച്ച് ഇങ്ങനെ കണ്ടെത്തുന്ന അധികവരുമാനം ആരോഗ്യരക്ഷക്കായി പ്രയോജനപ്പെടുത്തണമെന്നാണ്. അമേരിക്കൻ ജനതയുടെ ആരോഗ്യമാണ് പ്രധാനമെന്നും അദ്ദേഹം അഭിപ്രായപ്പെട്ടു. ഈ ബില്ലിനെ റിപ്പബ്ലിക്കൻ പാർട്ടി എതിർക്കുന്നു. കമ്പനിയുടെ ഉത്ഭാതന ചെലവുകൾ കൂടുന്നതുമൂലം തൊഴിൽമേഖലകൾ വിദേശകമ്പനികൾ ഏറ്റെടുക്കുമെന്ന ഭയമാണ് മുമ്പിലുള്ളത്. ലക്ഷക്കണക്കിന് ജോലിക്കാർ ഈ തൊഴിൽ മണ്ഡലങ്ങളിൽ ജോലിചെയ്യുന്നുണ്ട്.

അമേരിക്കയിൽ 33 ലക്ഷം ജോലിക്കാർ അത്യാവശ്യവിഭാഗങ്ങളിൽ ജോലിചെയ്യുന്നവരാണ്. സർക്കാരിന്റെ പ്രവർത്തനം സ്തംഭിപ്പിച്ചതുമൂലം എട്ടുലക്ഷം ജോലിക്കാർ പ്രശ്നം അവസാനിക്കുംവരെ വീട്ടിൽ ഇരിക്കേണ്ടി വരുന്നു. അവർക്ക് ജോലിചെയ്യാതെ ശമ്പളം കൊടുക്കുന്നവഴി സർക്കാർ ഖജനാവ്‌ കാലിയായിക്കൊണ്ടിരിക്കും. സാമ്പത്തിക സമ്മർദം തുടർന്നുകൊണ്ടിരുന്നാൽ സ്റ്റോക്ക്മാർക്കറ്റും താഴേക്ക് പോവും. സർക്കാരിന്റെ പ്രവർത്തനസ്തംഭനം നീളുംതോറും അമേരിക്കൻ സാമ്പത്തികതയുടെ അടിത്തറ ഇളകും. ഏതാനും ദിവസങ്ങൾ മാത്രമേയുള്ളുവെങ്കിൽ സാരമായ പ്രശ്നങ്ങൾ ഉണ്ടാവുകയില്ല.  സർക്കാരിന്റെ പ്രവർത്തനാവസ്ഥ നിർജീവമായി നാലാഴ്ച തുടരുകയാണെങ്കിൽ 55 ബില്ല്യൻ ഡോളറിന്റെ സാമ്പത്തിക നഷ്ടമുണ്ടാകുമെന്ന് മൂഡിസ്‌ (Moody's ) കണക്കുകൾ വ്യക്തമാക്കുന്നു.   

സാധാരണക്കാരനെ ഇന്നുള്ള സർക്കാർ സ്തംഭനംമൂലം എങ്ങനെയെല്ലാം ബാധിക്കുമെന്ന് നോക്കാം. പോസ്റ്റൽ സേവനങ്ങൾക്ക് മുടക്കം വരില്ല. കത്തുകൾ ലഭിച്ചുകൊണ്ടിരിക്കും. സൈന്യങ്ങൾക്കുള്ള ഫണ്ട് സമയാസമയങ്ങളിൽ സേവനത്തിനായി വിനിയോഗിക്കും. യുദ്ധകാലത്തെങ്കിൽ സൈന്യം യുദ്ധം ചെയ്തുകൊണ്ടിരിക്കും. സോഷ്യൽ സെക്യൂരിറ്റി ചെക്കുകൾക്കും മുടക്കം വരുകയില്ല. എന്നാൽ വീട് മേടിക്കുന്നവർക്ക് ഫെഡറിലിൽനിന്നും കടമെടുക്കുവാൻ കാത്തിരിക്കേണ്ടിവരും. തോക്കിന് ലൈസന്സ് വേണമെങ്കിലും പാസ്പോർട്ട് ലഭിക്കണമെങ്കിലും കാലതാമസം വേണ്ടിവരും. തന്മൂലം വിദേശ സഞ്ചാരികൾക്കും ബുദ്ധിമുട്ട് അനുഭവപ്പെടും. 

സർക്കാർ സ്തംഭനംമൂലം ഒബാമാ ആരോഗ്യരക്ഷാ പദ്ധതിയെ നേരിട്ട് ബാധിക്കില്ല. ഈ പദ്ധതി നടപ്പിൽ വരുത്തുന്നത് പുതിയ നികുതി വരുമാനത്തിൽനിന്നാണ്. അതുപോലെ സർക്കാർ നടപ്പാക്കണമെന്ന് വിചാരിച്ചിരുന്ന പല അനാവശ്യപദ്ധതികളും വേണ്ടെന്നുവെച്ച് നീക്കി വെച്ചിരിക്കുന്ന പണം ആരോഗ്യരക്ഷാ പദ്ധതികൾക്കായി വിനിയോഗിക്കും. ഇപ്പോഴുണ്ടായിരിക്കുന്ന സാമ്പത്തിക അരാജകത്വത്തിന് ഹേതുവായുള്ള അഭിപ്രായവോട്ടിൽ പങ്കെടുത്ത ജനവിഭാഗങ്ങളിൽ 46 ശതമാനംപേർ റിപ്പബ്ലിക്കൻ പാർട്ടിയേയും 36 ശതമാനംപേർ പ്രസിഡന്റിനെയും 13 ശതമാനംപേർ രണ്ടുകൂട്ടരെയും ഒരുപോലെ കുറ്റപ്പെടുത്തുന്നുണ്ട്.

അമേരിക്കൻ സർക്കാരിന് 16.699 ട്രില്ലിയൻ ഡോളർ തുകയാണ് ക്രഡിറ്റ്  അനുവദിച്ചിരിക്കുന്നത്. കൂടുതൽ പണം അനുവദിക്കണമെങ്കിൽ നിലവിലുള്ള  ക്രഡിറ്റ്പരിധി വർദ്ധിപ്പിക്കണം. അതിനായി സർക്കാർ ആവശ്യപ്പെട്ടിട്ടുണ്ട്. സെനറ്റിൽ ഉടനെതന്നെ ബില്ലും അവതരിപ്പിക്കും. സർക്കാർ സ്തംഭനം തുടരുകയാണെങ്കിൽ അമേരിക്കയുടെ ക്രെഡിറ്റ് വിലയിരുത്തലിനെ ബാധിക്കുകയും തന്മൂലം സുപ്രധാനമായ പദ്ധതികൾ നടപ്പാക്കാൻ സാധിക്കാതെ വരുകയും ചെയ്യും.

അമേരിക്കയ്ക്ക് ഏറ്റവുമധികം കടംകൊടുക്കുന്ന രാജ്യമായ ചൈന അമേരിക്കൻ സാമ്പത്തിക പ്രശ്നത്തിൽ ആശങ്കയും പ്രകടിപ്പിച്ചുകഴിഞ്ഞു. ഒക്ടോബർ പതിനേഴാം തിയതിക്കുള്ളിൽ പ്രശ്നങ്ങൾ തീർക്കാൻ ആവശ്യപ്പെടുകയും ചെയ്തിട്ടുണ്ട്. ചൈനാ അമേരിക്കയുടെ സാമ്പത്തികഭദ്രതയെ വീക്ഷിച്ചുകൊണ്ടിരിക്കുകയാണ്. ചൈനയുടെ സാമ്പത്തിക നിക്ഷേപ പദ്ധതികൾക്കും ആഗോള സാമ്പത്തിക വളർച്ചക്കും തടസം വരുമെന്ന് ആ രാജ്യം ഭയപ്പെടുന്നു.

സ്തംഭനംമൂലം 300 മില്ല്യൻ ഡോളർ ദിനംപ്രതി സർക്കാരിന് നഷ്ടപ്പെടുന്നുണ്ട്. പൊതുപാർക്കുകളും കാലാവസ്ഥ നിർണ്ണയിക്കുന്ന ഓഫീസുകളും പ്രവർത്തനരഹിതമായി കഴിഞ്ഞു. തെരഞ്ഞെടുത്ത ജനപ്രതിനിധികളുടെ ഉത്തരവാദിത്തമില്ലായ്മയാണ് ഇവിടെ പ്രകടമാകുന്നത്. ഇത് തുടരുന്നപക്ഷം ഒബാമയ്ക്ക് യുദ്ധകാലംപോലുള്ള ദേശീയ അടിയന്തരാവസ്ഥ (National emergency) പ്രഖ്യാപിക്കേണ്ടി വരും. അതിനാലായിരിക്കാം വിട്ടുവീഴ്ചയില്ലാതെ ഒബാമഭരണകൂടം മുമ്പോട്ടുപൊകുന്നത്. ഗുരുതരമായ ഈ സാമ്പത്തിക കുഴപ്പങ്ങളിൽ റിപ്പബ്ലിക്കൻ പാർട്ടിയെയാണ് ജനം കൂടുതൽ പഴിചാരുന്നത്. ജോണ്‍ മക്കയിൻവരെ റിപ്പബ്ലിക്കൻപാർട്ടിയുടെ നിരുത്തരവാദിത്തത്തെ കുറ്റപ്പെടുത്തിയിട്ടുണ്ട്.  സാമ്പത്തിക തകർച്ച ഒഴിവാക്കാൻ ഒബാമാ ഭരണകൂടം ഒത്തുതീർപ്പിനായുള്ള ഒരു ഉപാധിക്ക് സമ്മതിക്കാതിരിക്കുന്നതും അദ്ദേഹത്തെ കുറ്റപ്പെടുത്തിക്കൊണ്ടുള്ള  ആരോപണങ്ങളിൽ ഉണ്ട്.

അമേരിക്കയുടെ ഈ സ്തംഭനാവസ്ഥ ഒരു രാഷ്ട്രീയമായി കരുതാൻ  സാധിക്കില്ല. സാമ്പത്തിക അസമത്വം മറയാക്കി കാര്യസാധ്യത്തിനായി തെരഞ്ഞെടുത്തവരുടെ ഒരു കുട്ടിക്കളിയെന്ന് വേണം അനുമാനിക്കാൻ.  ഇത്തരം സാമ്പത്തിക അരാജകത്തം ചരിത്രത്തിൽത്തന്നെ വിരളമാണ്. ഈ സാമ്പത്തിക പോരാട്ടത്തിൽ വിജയിയായിരിക്കുന്നത് ചൈനയാണ്. ഇവിടെ ജയിക്കുന്നത് പ്രസിഡന്റോ റിപ്പബ്ലിക്കനൊയെന്ന് തീരുമാനിക്കാനും പ്രയാസമാണ്. പരാജയപ്പെടുന്നത് അമേരിക്കൻ  ജനതയായിരിക്കും.  ഒബാമ ഒരു ഒത്തുതീർപ്പിന് തയ്യാറല്ലായെന്നും വ്യക്തമായി കഴിഞ്ഞു.  എന്തുകൊണ്ട്? മറ്റെല്ലാ പ്രസിഡന്റുമാരും ബിൽക്ലിന്റനും റൊണാൾഡ് റീഗനും ഇത്തരം സാഹചര്യങ്ങൾ വന്നപ്പോൾ വിജയകരമായി ഒത്തുതീർപ്പുണ്ടാക്കി. പ്രശ്നങ്ങൾ പരിഹരിച്ചു.  ബ്ലാക്ക്‌മെയിൽ ചെയ്ത് കാര്യം സാധിക്കുന്ന അംഗങ്ങളാണ് ജനപ്രതിനിധികളിലുള്ളത്. ഒരുതരം സാമ്പത്തിക ഭീകരതയെന്നും ഈ സർക്കാർപ്രവർത്തനങ്ങളുടെ മരവിപ്പിക്കലിനെ വിളിക്കാം. ജനാധിപത്യത്തിനും വ്യക്തിക്കും രാജ്യത്തിനും ഈ സ്തംഭനം അപകീർത്തികരമാണ്. അമേരിക്കയുടെ ഇന്നത്തെ ശോചനീയാവസ്ഥ  കണ്ട് കടലിന്റെ അഗാധതയിൽ കബറിനുള്ളിൽ കിടക്കുന്ന ബിൽലാഥന്റെ പ്രേതം ഒരു പക്ഷെ പൊട്ടിച്ചിരീക്കുന്നുണ്ടാകാം. വളരെക്കാലം നാം വിദേശഭീകരരെ ഭയപ്പെട്ടു. അവർ ഈ രാജ്യത്തിനെയും സമ്പത്തിനെയും ജനത്തെയും നശിപ്പിക്കുമെന്ന് ഭയപ്പെട്ടു. ഇന്ന് ഈ രാജ്യത്ത് നിയമങ്ങൾ ഉണ്ടാക്കുന്ന നുഴഞ്ഞുകയറിയവരെയാണ് ഭയപ്പെടേണ്ടത്. കഴിഞ്ഞകാലങ്ങളിൽ നാം ഭയപ്പെട്ട അതേ ഫലംതന്നെ ഇവർ രാജ്യത്തിന്‌ സമ്മാനിച്ചുകൊണ്ടിരിക്കുന്നു. ദൈവം കനിഞ്ഞനുഗ്രഹിച്ച കോടാനുകോടി ജനങ്ങളുടെ സ്വപ്നഭൂമിയായ അമേരിക്കയെ ഒബാമഭരണകൂടം പൂർവ സ്ഥിതിയിലേക്ക് മടക്കികൊണ്ടുവരുമെന്നും പ്രതീക്ഷിക്കാം.      

മാർപാപ്പായുടെ 'ഞാൻ പാപി' സഭയുടെ പാപം

സ്നേഹത്തിന്റെയും കരുണയുടെയും പ്രതിഫലനഭാഷയിൽ സംസാരിക്കുന്ന മാർപാപ്പായെ ഇന്ന് ലോകം മുഴുവൻ ശ്രവിക്കുന്നു. മാർപാപ്പായ്ക്കൊപ്പം സഭ എത്രമാത്രം വളരുമെന്നും കണ്ടറിയണം. സഭയുടെ മാറ്റങ്ങൾ ഒരു ദിവസംകൊണ്ടോ മാസങ്ങൾകൊണ്ടോ വർഷങ്ങൾകൊണ്ടോ സംഭവിക്കുന്നതല്ല. വലിയ മുക്കവൻ സഞ്ചരിക്കുന്നത് പടുകൂറ്റൻ കപ്പലിലാണ്. ആ വലിയ കപ്പൽ സാവധാനമേ തിരിയുകയുള്ളൂ.  അയല്ക്കാരനെ സ്നേഹിക്കുക, ശത്രുവിനെ സ്നേഹിക്കുക, പാപികളെ സ്നേഹിക്കുകയെന്നെല്ലാം സഭയുടെ പ്രമാണങ്ങളിലുണ്ട്.

ഞാൻ പാപിയാണ്‌ ”ഇപ്പറയുന്നത്‌ മാർപാപ്പയാണ്.എന്നാൽ പാപ്പാ സഭയുടെ സകല പാപങ്ങളുടെയും ഉത്തരവാദിത്വം ഏറ്റെടുക്കുന്നുവെന്നല്ലേ സത്യം. കഴിഞ്ഞകാലങ്ങളിൽ ആയിരക്കണക്കിന് പുരോഹിതർ കുഞ്ഞുങ്ങളെ പീഡിപ്പിച്ചത് സഭയുടെ പാപമല്ലേ? അവരുടെ കുറ്റങ്ങൾ മറച്ചുവെച്ച സഭതന്നെയല്ലേ പാപി.  "ഞാൻ പാപിയെന്ന്" പാപ്പാ പറഞ്ഞപ്പോൾ മനസിലാക്കേണ്ടത്‌ പാപി മാർപാപ്പായെന്നല്ല. പാപകൂമ്പാരം കൊണ്ട് വഹിക്കാൻ സാധിക്കാതെ നിലയില്ലാത്ത വെള്ളത്തിൽ നീന്തുന്ന സഭ തന്നെയാണ് മുറിവേറ്റ പാപി.  മാർപാപ്പ സഭയിലെ ഒരു വ്യക്തി മാത്രം. എന്നാൽ ഈ വ്യക്തി സഭയുടെ ഔദ്യോഗികനാവാണ്.  വാർത്താമാധ്യമങ്ങളോട് സംസാരിച്ചതും സഭയുടെ നാവാണ്.  ഒരു വ്യക്തിയെന്ന നിലയിൽ നമുക്ക് പാപം ചെയ്യാം. കുമ്പസാരിക്കാം. ആരും ഗൗനിക്കാറില്ല. പക്ഷെ സഭതന്നെ പാപം ചെയ്താലോ? തെരഞ്ഞെടുത്ത പുരോഹിതരും അഭിഷിക്തരും കൂട്ടമായി സഭയെ വ്യപിചരിച്ചുകൊണ്ടിരിക്കുന്നു. അഴിമതി, കള്ളപ്പണം, കൊള്ളപ്പണം, പുരോഹിത വ്യപിചാര,  കുട്ടികളെ പീഡിപ്പിക്കൽമുതൽ അഭയാവധംവരെയുള്ള പാപക്കറകൾക്ക് സഭയ്ക്കിന്നും മുക്തിയാവശ്യമാണ്.  യഹൂദ കൂട്ടക്കൊലകൾക്ക് മാപ്പ് പറഞ്ഞു.  ഗലീലിയോടും മാപ്പ് പറഞ്ഞു. ഇനി സഭയ്ക്കുവേണ്ടി മാർപാപ്പാ പാപത്തിന്റെ കുരിശുകൾ ചുമക്കുന്നു.       

വിവാഹത്തിനുമുമ്പുള്ള ലൈംഗികഭോഗം സഭയിൽ പാപമാണ്.  രണ്ടു വ്യക്തികൾ തമ്മിലുള്ള രതിക്രിയകൾ പാപമെന്ന് സദാചാരം പറയുമെങ്കിൽ പരിഹാരമുണ്ട്. സഭയുടെ അനുഷ്ഠാനങ്ങളിലുള്ള കൂദാശകളനുസരിച്ച് കുമ്പസാരിക്കൂ? പാപങ്ങൾ പൊറുക്കപ്പെടും. എന്നാൽ കുമ്പസാരക്കൂട്ടിൽനിന്നും കുമ്പസാരിപ്പിക്കുന്ന പുരോഹിതൻ വ്യപിചാരം ചെയ്‌താൽ അത് സഭയുടെ പാപമാണ്. പാപം ചെയ്യരുതെന്ന് ഉപദേശിക്കുന്നവന്റെ പാപം മാപ്പില്ലാത്തതാണ്. അതാണ്‌ യേശു അവരെ സർപ്പങ്ങളെന്നും വെള്ളയടിച്ച കുഴിമാടങ്ങളെന്നും വിളിച്ചത്.

മാർപാപ്പാ പറഞ്ഞു, "ഒരുവന്റെ ജീവിതത്തിലെ ആദ്ധ്യാത്മിക കാര്യങ്ങളെ തടസപ്പെടുത്തുവാൻ കഴിയുകയില്ല."  (It is not possible to interfere  spirituality in the life of a person)എങ്കിൽ സഭ ചെയ്ത പാപങ്ങളുടെ പരിഹാരമെന്ത്? ആയിരങ്ങളെ ചുട്ടുകരിച്ച് പരിവർത്തനങ്ങളിക്കൂടി കടഞ്ഞെടുത്ത സഭയാണ് പാപം എന്തെന്ന് എന്നും ഉച്ചത്തിൽവിളിച്ച് പറഞ്ഞുകൊണ്ടിരിക്കുന്നത്. ആദ്ധ്യാത്മികകാര്യങ്ങളിൽ ഇടപ്പെട്ടതുകൊണ്ടല്ലേ ലൂതറനീസം ഉണ്ടായത്. മഹറോൻശിക്ഷ എങ്ങനെയുണ്ടായി?.  സഭയെ വിമർശിച്ചാൽ മഹറോനു തുല്യമായ പാപമായി ഗൌനിച്ചിരുന്ന കാലവുമുണ്ടായിരുന്നു. അത് ഒരുവന്റെ അദ്ധ്യാത്മികതയിൽ ഇടപെടലല്ലേ?

കത്തോലീക്കാസഭ സ്വവർഗാനുരാഗം പാപമായി കരുതുന്നു. അതേസമയം എതിർലിംഗത്തോടുള്ള അനുരാഗം ആദ്ധ്യാത്മികതയുടെ നിയന്ത്രണത്തിലുമാണ്. ജീവവിജ്ഞാന ശാസ്ത്രത്തിലെ ഒരേ ശരീരത്തിലെ ഒരേ അനുരാഗങ്ങളിൽ ഒന്ന് നന്മയും മറ്റേത് തിന്മയുമാണ്. ദൈവം മനുഷ്യന് കൽപ്പിച്ച പ്രക്രിയകളിൽ പാപവും പുണ്യവും ഒരുപോലെ സമ്മിശ്രമാക്കുന്നു. പ്രത്യേകിച്ച് അനുരാഗം സന്താനോത്ഭാതനമെങ്കിൽ കൂടുതൽ പുണ്യവും. ഇത്തരം വിരോധാഭാസങ്ങൾ സഭയുടെ ചട്ടകൂട്ടിനുള്ളിലെ ചോദ്യംചെയ്യാൻ പാടില്ലാത്ത നിയമങ്ങളാണ്. മാർപാപ്പാ പറഞ്ഞു, "സ്വവർഗാനുരാഗം പാപമെന്ന് തീരുമാനിക്കാൻ ഞാൻ ആര്"  അപ്രമാദിത്വത്തിന്റെ ചുരുളുകളിൽ അകപ്പെട്ടിരിക്കുന്ന നൂലാമാലകളിലെ കെട്ട് മാർപാപ്പ അവിടെ അഴിക്കാൻ ശ്രമിക്കുന്നുവെന്ന് വേണം കരുതാൻ. ദൈവം തന്ന അനുഗ്രഹീത അനുരാഗനിമിഷങ്ങളെ ചോദ്യം ചെയ്യാൻ സഭയ്ക്കെന്തവകാശമെന്നുകൂടി മാർപാപ്പ ചോദിക്കണമായിരുന്നു.   അങ്ങനെയെങ്കിൽ സഭയിൽ ഒരു പൊട്ടിത്തെറി പ്രതീക്ഷിക്കാമായിരുന്നു. അടിച്ചമർത്തപ്പെട്ട വിശ്വാസിയുടെ മനസിന്‌ ആശ്വാസം ലഭിക്കുമായിരുന്നു.

സഭ പാപികളെ സ്നേഹിക്കണമെന്ന് പറയുന്നു. എന്നാൽ സ്വവർഗദമ്പതികളെ  ഉൾകൊള്ളാൻ സഭയ്ക്ക് സാധിക്കില്ല. യൂറോപ്പിലും അമേരിക്കയിലും അവരടെ ശക്തി തെളിയിച്ചു കഴിഞ്ഞു. ചില നവീകരണസഭകൾ അവരുടെ ലൈംഗിക ജീവിതരീതികളെ അംഗീകരിക്കുകയും ചെയ്തു. അമേരിക്കയിലെ മിക്ക സ്റ്റേറ്റുകളും അവരുടെ വിവാഹം നിയമാനുസൃതമാക്കി. എങ്കിലും സഭ ഇവരുടെ പാപങ്ങൾക്ക് മാപ്പ് കൊടുക്കില്ല. മോഷണം, കൊലപാതകം, ചതി, വഞ്ചന എന്നീ അധർമ്മങ്ങൾക്കെല്ലാം മാപ്പുണ്ട്. സ്വന്തം ശരീരത്തിലെ സ്വവർഗഭ്രമങ്ങൾ സ്വയം നിയന്ത്രിക്കാൻ സാധിക്കാത്ത ഈ പാപികൾക്ക് വാതിലുകൾ തുറന്നുകൊടുക്കാൻ സഭ തയാറാവുകയില്ല.

ലോസാഞ്ചൽസിലെ കർദ്ദിനാൾ മഹോണിയുടെ രൂപതകളിൽ കുട്ടികളെ പീഡിപ്പിച്ചതെല്ലാം വെറും സംഭവിക്കാത്ത ചരിത്രങ്ങളാക്കി.   പരിശുദ്ധാത്മാവിനോടുള്ള പാപങ്ങൾ പൊറുക്കാൻ സാധിക്കില്ലായെന്നുള്ള വചനം സഭയിലെ പവിത്ര നശിപ്പിക്കുന്ന പുരോഹിതരെ ഉദേശിച്ചുള്ളതാണ്. സഭയുടെ ചൈതന്യം നശിപ്പിച്ച് മൃതശരീരത്തിന് തുല്യമാക്കിയത് സഭയെ നയിക്കുന്നവർ തന്നെയാണ്. പുരോഹിത അഭിഷിക്ത പാപങ്ങൾ വഹിക്കാൻ ഇതാ സഭയുടെ തന്നെ സൈന്യങ്ങളുടെ നേതാവ് മുമ്പോട്ട്‌ വന്നിരിക്കുന്നു. പാപത്തിൽ മുങ്ങിയിരിക്കുന്ന കോട്ടകൾകൊണ്ട് കെട്ടിപൊക്കിയിരിക്കുന്ന അഭിഷിക്ത മണിമന്ദിരങ്ങളും കത്തീഡ്രലുകളും പത്രോസിന്റെ പാറയിൽ ഇന്ന് ഉറച്ചിരിപ്പില്ല. മണൽകൂമ്പാരങ്ങളിൽ പണിതെടുത്ത ഈ സൗധങ്ങളെല്ലാം എന്നുവേണമെങ്കിലും കാറ്റത്തുലഞ്ഞ് നിലം പതിക്കാം. യൂറോപ്പിലും അമേരിക്കയിലും ദേവാലയങ്ങളും പുരോഹിതരുടെ സ്കൂളുകളും മനുഷ്യർക്ക് വേണ്ടെന്നായി.   പ്രവചനങ്ങൾക്കതീതമായി സഭ മുമ്പോട്ട് ചലിക്കണമെങ്കിൽ സഭയിലുണ്ടായിരുന്ന ആദിമചൈതന്യം കൈവരിച്ചേ മതിയാവൂ.

കുഞ്ഞുപിള്ളേരെ പീഡിപ്പിച്ച പുരോഹിതരെ ദൂരസ്ഥലങ്ങളിലും മെക്സിക്കോയിലും സ്ഥലമാറ്റം കൊടുത്തശേഷം കർദ്ദിനാൾ മഹോണി പറഞ്ഞതിങ്ങനെ, "അവരുടെ പാപങ്ങൾ ദൈവം പൊറുത്തു." പാപം ചെയ്യാതെ സ്വയം പാപിയെന്ന് പറയുന്ന മാർപാപ്പായുടെ പാപങ്ങൾ ദൈവം പൊറുക്കുന്നുവെന്ന് പാപ്പാ പറയുന്നില്ല. ഒരു കാര്യം തീർച്ച. സഭയുടെ കാലഹരണപ്പെട്ട തത്ത്വങ്ങൾ മാറുകയില്ല. സ്വവർഗം, സ്വവർഗ വിവാഹം, ഗർഭനിരൊധനം എന്നീ വിവാദങ്ങളിൽ സഭയ്ക്ക് ഒന്നും ചെയ്യാൻ സാധിക്കില്ല. കുടുംബാസൂത്രണ പദ്ധതികൾ സഭയുടെ തത്ത്വങ്ങൾക്കെതിരായി തുടർന്നുകൊണ്ടിരിക്കും. ഒരു ചോദ്യം, മാർപാപ്പായുടെ തെറ്റാവരത്തിന് എന്തുപറ്റി?   യേശുവിന്റെ അമ്മ മറിയാമിൽ പാപമില്ലെന്ന് തെറ്റാവരത്തിന്റെ ശക്തിയിൽ പന്ത്രണ്ടാംപീയുസ് മാർപാപ്പാ വിളംബരം ചെയ്തു. മാറ്റത്തിനുവേണ്ടി നിലകൊള്ളുന്ന ഫ്രാൻസീസ് മാർപാപ്പാ സഭയുടെ തെറ്റാവരം അബദ്ധമെന്നും ചിന്തിക്കുന്നുണ്ടാവാം.     

യേശു ഒരു വാക്കുപോലും സ്വവർഗ അനുരാഗരതികളുമായി നടക്കുന്നവർക്കെതിരെ പറഞ്ഞിട്ടില്ല. യേശു സംസാരിച്ചത് അമിത ധനം ഉപയോഗിക്കാതെ പൂഴ്‌ത്തി വെക്കുന്നവർക്കെതിരെയായിരുന്നു.  നീതിക്കുവേണ്ടി ദാഹിക്കുന്നവർക്കായും അധികമുള്ളവർ ദരിദ്രരെ സഹായിക്കുവാനും പറഞ്ഞു. അങ്ങനെയെങ്കിൽ വളർന്നു വന്നിരിക്കുന്ന സ്വവർഗരതികളെ ക്രിസ്ത്യാനികൾ എന്തിന് വെറുക്കണം. സ്നേഹത്തിന്റെ ഭാഷ സംസാരിക്കുന്ന ക്രിസ്ത്യൻ തത്ത്വശാസ്ത്രത്തിൽ വെറുപ്പിന്റെ ഭാഷയില്ല. സ്വവർഗരതികളെ സംബന്ധിച്ച് പറയുമ്പോൾ സഭയെന്നും വെറുപ്പിന്റെ ഭാഷ ഉപയോഗിക്കുമായിരുന്നു. അതിനൊരു മാറ്റം വരാനായിരിക്കാം മാർപാപ്പാ പറഞ്ഞത്, "അവർ പാപികളെന്നു വിധിക്കാൻ ഞാൻ ആര്"?  ഇത്തരം വൈകൃതങ്ങളായ രതിവികാരമുള്ളവരെയും ദൈവം സ്രുഷ്ടിച്ചവരാണ്. വികാരങ്ങളിൽ അടിമപ്പെട്ട ഈ മനുഷ്യജീവികളിൽ ഉള്ളതും ദൈവം സൃഷ്ടിച്ച ശരീരങ്ങളുടെ താല്പര്യങ്ങൾ തന്നെയാണ്. അവരിൽ അടങ്ങിയിരിക്കുന്ന ലൈംഗികമോഹങ്ങളെ ശമിപ്പിച്ച് നിയന്ത്രിക്കുകയും എളുപ്പമല്ല. അങ്ങനെയുള്ള സ്വവർഗപ്രേമികളായ ദൈവമക്കളെ ആദ്ധ്യാത്മികതയിൽനിന്നും മാറ്റിനിർത്തുന്നത് നീതികരിക്കുക സാധ്യമല്ല. സഭ അവരെ രണ്ടാംക്ലാസ് പൌരന്മാരായി കാണുന്നു. ഭൂമിയിലെ മനുഷ്യർക്ക് അവരുടെ ആദ്ധ്യാത്മികതയിൽ ഇടപെടുവാൻ അവകാശമെന്തെന്നുള്ള ചോദ്യത്തിനുത്തരമാണ് മാർപാപ്പ പറഞ്ഞത്.   മനുഷ്യരാരും അവരെ പാപികളെന്ന് വിധിക്കാൻ അർഹരല്ല. സഭയുടെ നയങ്ങൾ എന്നും  അവർക്കെതിരെയായിരുന്നു. സഭയ്ക്ക് വിധിക്കാൻ അവകാശമില്ലാത്ത സ്വവർഗക്കാരുടെ പ്രശ്നങ്ങൾ ദൈവത്തിന് വിട്ടുകൊടുത്ത് അവരെ സഭാമക്കളായി കാണുവാൻ സഭയ്ക്ക് കഴിയുമോ? കൂദാശകൾ അവർക്ക്  നിഷേധിക്കുന്നതുവഴി സഭ അദ്ധ്യാത്മിക കാര്യങ്ങളിൽ ഇടപെടുന്നുവെന്ന് വ്യക്തമാണ്. അവർക്കുള്ള കൂദാശ നിഷേധിക്കലും മാർപാപ്പാ പറഞ്ഞതിന് തികച്ചും പരസ്പരവിരുദ്ധമായ സഭയുടെ പ്രവർത്തിയാണിതെന്നതിൽ സംശയമില്ല. ലൈംഗിക വിഭാഗിയചിന്തകളോടെ അവരെ അകത്തിനിർത്തി സഭ യാഥാസ്ഥിതികത്വം തുടർന്നുകൊണ്ടിരിക്കുന്നു.  ബനഡിക്ററ് മാർപാപ്പായുടെ പതിവ് പല്ലവികൾ എന്നും സ്വവർഗ അനുരാഗികൾക്കെതിരെയായിരുന്നു.  

അമ്പത് വർഷങ്ങൾക്കുമുമ്പ് നടന്ന രണ്ടാം വത്തിക്കാൻ കൌണ്‍സിലെ ചർച്ചകളടങ്ങിയ ഫയലുകൾ കാലഹരണപ്പെട്ട് ചിതലരിച്ചുപോയി.  സുനഹദോസിന് തുരങ്കം വെച്ച അന്നുള്ള വൃദ്ധന്മാർ മണ്ണിലടിയിൽ പോയി.  സഭയുടെ ചെറിയ ഒരു മാറ്റംപോലും അനുവദിക്കാതെ ഇന്നും തലപ്പത്ത് ഇരിക്കുന്നത് അവരുടെ പിൻഗാമികൾ തന്നെയാണ്. സഭയ്ക്കുണ്ടായിരുന്ന പരിശുദ്ധിയും അപ്പോസ്തോലീകാ പാരമ്പര്യവും വിട്ടുവീഴ്ചയില്ലാത്ത കർദ്ദിനാൾമാർ പണ്ടേ കാറ്റിൽ പറപ്പിച്ചു കഴിഞ്ഞു.  സത്യമായ സഭ മരിച്ചുപോയി. സഭയ്ക്കുള്ളിലെ പരിശുദ്ധി മടക്കികൊണ്ടുവരുവാൻ മാർപാപ്പാമാത്രം ശ്രമിച്ചാൽ ഇനി സാധിക്കില്ല.  സഭയിലെ പുരോഹിതർ കുഞ്ഞുങ്ങളെ ദുരുപയോഗപ്പെടുത്തികൊണ്ട് പരിശുദ്ധാത്മാവിനെതിരെ പാപം ചെയ്ത് സഭയെ നശിപ്പിച്ചു. 

ഭ്രൂണഹത്യ, ഗർഭം അലസിപ്പിക്കൽ എന്നീ സഭയുടെ നയങ്ങളെ മാർപാപ്പ വിലയിരുത്തിയതും വ്യത്യസ്തമായിട്ടായിരുന്നു. സഭയിലെ നീറുന്ന മറ്റു സംഗതികളിൽ അത്തരം പ്രശ്നങ്ങൾ ഉൾപ്പെടുത്തി പ്രാധാന്യം കല്പ്പിക്കരുതെന്നും നിർദ്ദേശിച്ചു.  ഈ വിഷയം വിവാദങ്ങളിൽനിന്നും ഒഴിവാക്കാനാണ് മാർപാപ്പാ അഭിപ്രായപ്പെട്ടത്. മാർപാപ്പായുടെ ഗർഭച്ഛിന്ദ്രത്തെപ്പറ്റിയുള്ള അഭിപ്രായം ജീവന്റെ തുടിപ്പിലുള്ള അനുഭാവികൾക്ക് (pro life) എതിർപ്പുകൾ ഉണ്ടാക്കി. ലോകത്തിലേക്ക് പ്രവേശിക്കുവാൻ പോവുന്ന 50000  കുഞ്ഞുങ്ങളാണ് ഭ്രൂണഹത്യമൂലം ഒരാഴ്ചയ്ക്കുള്ളിൽ മരിക്കുന്നത്. നിശബ്ദമായി അത് കണ്ടില്ലെന്ന് എങ്ങനെ നടിക്കുമെന്ന് ഭ്രൂണഹത്യക്കെതിരായവർ ചോദിക്കുന്നു. ദൈവം കുഞ്ഞുങ്ങളെ ഉദരത്തിൽ സൃഷ്ടിച്ചു. ഭൂമിയിലേക്ക്‌ പിറക്കാൻ പോവുന്ന അവരെ നമ്മൾ കൊല്ലുന്നു. അക്കാര്യങ്ങളിലെ വിവാദങ്ങൾ ഒഴിവാക്കാൻ മാർപാപ്പാ ലോകത്തോട്‌ പറഞ്ഞു. സ്വവർഗ അനുരാഗികളുടെ ആത്മീയതയിൽ മാർപാപ്പാ ഇടപെടരുതെന്ന് ആഗ്രഹിക്കുന്നു.  എന്നാൽ ഭൂമിയിലേക്ക്‌ വരുന്ന കുഞ്ഞുങ്ങളുടെ ജീവനായുള്ള അവകാശങ്ങൾക്കായി മുറവിളി കൂട്ടുന്നവരുടെ ആത്മീയചിന്താഗതികളിൽ ഇടപെടാൻ മാർപാപ്പയ്ക്ക് മടിയില്ല. ഗർഭച്ഛിന്ദ്രം പോലുള്ള ഗുരുതരമായ പാപങ്ങൾ സഭ അനുവദിക്കുകയില്ലെന്നും മനസിലാക്കുവാനുള്ളതേയുള്ളൂ.

 
വൈമാനിക യാത്രക്കാരായ അഭിഷിക്തർക്കെതിരെയും മാർപാപ്പ സംസാരിച്ചു. സ്വന്തം കുഞ്ഞാടുകളെ നയിക്കാതെ ദേശാടനം ചെയ്ത് നടക്കുന്ന മെത്രാന്മാർക്കും കർദ്ദിനാൾമാർക്കും മാർപാപ്പായുടെ വാക്കുകളാലുള്ള ഈ താക്കീത് ഒരു പ്രഹരമായിക്കാണും.  " മാർപാപ്പാ പറഞ്ഞു, “കർമ്മനിരതരായി അവരെ സേവിക്കാൻ നിങ്ങൾ കടപ്പെട്ടവരാണ്. നിങ്ങളിൽ അർപ്പിച്ചിരിക്കുന്ന സേവനത്തിന്റെ ഉടമ്പടികൾ നിങ്ങളുടെ സമൂഹത്തിന് മാത്രമുള്ളതാണ്.  ദയവായി നിങ്ങളുടെ ജനത്തിനൊപ്പം ജീവിച്ചാലും."  ആരും യജമാനരല്ല സഭയുടെ സേവകരാണെന്നുള്ള വസ്തുത അഭിഷിക്തർ മറക്കുന്നു. ആട്ടിടയൻ ആടുകളുടെ മുമ്പാകെ നടക്കാതെ സ്വന്തം ആടുകളെ മേയിച്ച് പിന്നാലെ നടക്കുവാനാണ് മാർപാപ്പാ ആഗ്രഹിക്കുന്നത്. ആഗോള അഭിഷിക്തരുടെ ഒരു സമ്മേളനത്തിലാണ് മാർപാപ്പാ അഭിപ്രായ പ്രകടനങ്ങൾ നടത്തിയത്.  “നിങ്ങളുടെ സമൂഹത്തിൽ ജീവിക്കൂ ജീവിക്കൂ”യെന്ന് മാർപാപ്പാ ആവർത്തിച്ചു പറഞ്ഞു. ജനങ്ങളുമായി പരസ്പരം സ്നേഹത്തിലും കൂട്ടായ്മയിലും ജീവിക്കാനും അവരുടെ ദുഃഖങ്ങളിൽ പങ്കുചേരാനുമാണ് മാർപാപ്പാ ഉദേശിച്ചത്. അവിടെ ധനികനെന്നോ ദരിദ്രനെന്നോ, ദളിതനെന്നോ സ്ത്രീപുരുഷനെണോ വിത്യാസമില്ല.  പ്രേഷിതനായി ജനങ്ങളുടെ വികാരങ്ങളെ മനസിലാക്കി അവരുമൊത്ത് യാത്ര ചെയ്യാനാണ് മാർപാപ്പാ ആവശ്യപ്പെട്ടത്.

ഇന്ന് അഭിഷിക്തലോകം ധനികരെയും,രാഷ്ട്രീയ സാമുദായിക പ്രഭുക്കളെയും സുന്ദരികളെയും സുന്ദരന്മാരെയും സ്വന്തം അരമനകളിൽ സ്വീകരിക്കാൻ താല്പര്യപ്പെടുന്നു.   വൈരൂപ്യമുള്ളവരും സഭയുടെ മക്കളാണെന്നുള്ള ചിന്ത അഭിഷിക്തർക്കുണ്ടാകണമെന്നും മാർപാപ്പാ പറഞ്ഞു. സേവനമനസ്തിതിയോടെ എല്ലാ ജനങ്ങളുമായി ഒപ്പം ആശയവിനിമയം ചെയ്ത് സ്വന്തം ടെലിഫോണുകൾ മറ്റുള്ളവരെ എല്പ്പിക്കാതെ ഏതു സമയവും സ്വന്തം ജനങ്ങളോട്‌ സംസാരിക്കുന്നതിന് നെഞ്ചോട്‌ ചേർത്തുപിടിക്കാൻ സമ്മേളനത്തിൽ മാർപാപ്പ അഭിഷിക്തരോട് ആവശ്യപ്പെട്ടു. ആരോടും വിവേചനം കാണിക്കാതെ ഭവനത്തിന്റെ വാതിലുകൾ സദാ തുറന്നിരിക്കട്ടെയെന്നും ആശംസിച്ചു. വൈമനികനെപ്പോലെ ആകാശത്ത് സദാ സഞ്ചരിക്കാതെ ഭൂമിയിലെ സമതലങ്ങളിൽക്കൂടി യാത്ര ചെയ്ത് ക്രിസ്തുവിന്റെ സന്ദേശം പ്രചരിപ്പിക്കാനാണ് മാർപാപ്പാ ആഗ്രഹിക്കുന്നത്.  

------------------------------
ഒരച്ഛൻ മകൾയച്ച കത്ത്:

കുടുംബത്തിൽ പ്രശ്നങ്ങളുണ്ടാകുമ്പോൾ സാധാരണ മാതാപിതാക്കൾ മക്കളുടെ ദുഃഖങ്ങളിൽ പങ്കുചേരും. എന്നാൽ ഒരു മുത്തച്ഛൻ ഒരു പടികൂടി മുമ്പോട്ട് ചിന്തിച്ച് കൊച്ചുമകന്റെ ദുഃഖത്തിൽ പങ്കുചേരുന്നു. സ്വവർഗ പ്രേമിയാണ് താൻ എന്ന് ഒരു മകൻ അമ്മയോട് പറഞ്ഞപ്പോൾ അമ്മ മകനെ വീടിന് പുറത്താക്കി. ഇതിൽ ദുഖിതനായ അച്ഛൻ മകൾക്കെഴുതിയ ഒരു കത്ത് അമേരിക്കൻ പത്രങ്ങൾ പ്രാധാന്യത്തോടെ പ്രസിദ്ധീകരിച്ചിരുന്നു. കൊച്ചുമകനെ ന്യായികരിച്ചുകൊണ്ട്‌ മകളെ പിന്തിരിപ്പൻ, ഇടുങ്ങിയ ചിന്താഗതിക്കാരിയെന്നെല്ലാം അപ്പൻ കുറ്റപ്പെടുത്തുന്നുണ്ട്. സ്വവർഗാനുരാഗികൾ സമത്വത്തിനുവേണ്ടി മുറവിളി കൂട്ടുന്നതും ഇതേ കാരണങ്ങളാലാണ്. "അവരെ പാപികളെന്ന് വിളിക്കാൻ ഞാൻ ആര്, വിധിക്കാൻ എനിക്കന്തധികാര"മെന്ന് മാർപാപ്പാ പറഞ്ഞതും ഇതുതന്നെയാണ്.

ഒരച്ഛൻ മകൾക്കയച്ച എഴുത്തിന്റെ പൂർണ്ണരൂപം താഴെ മലയാളത്തിൽ കൊടുക്കുന്നു. ഇംഗ്ലീഷിൽ വായിക്കാൻ ഇതോടനുബന്ധിച്ച് ലിങ്കും കൊടുത്തിട്ടുണ്ട്.


പ്രിയ മകളെ ക്രിസ്റ്റീന,

" ഞാനിന്ന് നിന്നിൽ വളരെ നിരാശനാണ്. നമ്മുടെ കുടുംബത്തിന് മാനഹാനിയുണ്ടായിയെന്ന് നീ പറഞ്ഞത് അക്ഷരംപ്രതി ശരിതന്നെ. എന്നാൽ നിനക്ക് തെറ്റുപറ്റി. നിന്റെ മകൻ ‘ചാഡ്‌’ സ്വവർഗ രതിക്കാരനെന്ന് നിന്നെ അവൻ അറിയച്ചതിൽ കുപിതായായി നീ അവനെ വീടിനു പുറത്താക്കിയത് നീതികരിക്കാനാവില്ല. തന്മൂലം നിന്നെയും ഞാൻ ഹൃദയവേദനയോടെ കാണുന്നു. നിന്റെ തീരുമാനമാണ് കൂടുതൽ ജുഗുപ്ത്സാവഹമായത്. ഇക്കാരണംകൊണ്ട് മാതാപിതാക്കൾ മക്കളെ ഉപേക്ഷിക്കുന്നത് പ്രകൃതിനിയമത്തെപ്പറ്റി അറിവില്ലായ്മകൊണ്ടാണ്.

“എന്റെ മകനെ ഞാൻ വളർത്തിയത് സ്വവർഗ ലൈംഗികമോഹിയാകാനല്ലന്ന” നിന്റെ ന്യായവാദത്തിൽ വളരെയേറെ യുക്തിയുണ്ട്. ഞാനത് സമ്മതിച്ചു. നീ പറഞ്ഞത് തികച്ചും ശരിതന്നെയാണ്. തീർച്ചയായും നീ അങ്ങനെ അവനെ വളർത്തിയില്ല. എന്നാൽ നീ അറിയുക, അവൻറെ കുറ്റമല്ലാതെ അവൻ ജനിച്ചതും അത്തരം ശരീരപ്രകൃതത്തോടെയായിരുന്നു. ഇടതുകൈകൾകൊണ്ട് മാത്രം ഒരുവന് എഴുതാൻ സാധിക്കുന്നതുപോലെ അവന്റെ സ്വവർഗാനുരാഗവും ജന്മനാ പ്രകൃതി നിശ്ചയിച്ചതാണ്. എന്നാൽ നീ അവനെ പിന്തിരിപ്പമനസോടെ ഇടുങ്ങിയ ചിന്താഗതികളോടെ മനസ്സിൽ മുറിവേൽപ്പിക്കുന്ന വഴി തെരഞ്ഞെടുത്തു. അങ്ങനെ നാം ആ മകനെ ഉപേക്ഷിച്ചതുമൂലം ഈ നിമിഷം നിന്നോടും യാത്രപറയാൻ ഞാൻ നിർബന്ധിതനായി. സ്വവർഗപ്രേമിയെങ്കിലും അവിശ്വസിനീയമാംവിധം എനിക്കിന്ന് എന്റെ കൊച്ചുമകനെ ലഭിച്ചിരിക്കുന്നു. വാക്യാലങ്കാരങ്ങൾകൊണ്ട് ഹൃദയശൂന്യയായ ഒരു മകളുമായി ഞാൻ എന്തിന് സമയം ചെലവഴിക്കണം? കഠിനത വെടിഞ്ഞ് ഹൃദയശുദ്ധി കൈവരിക്കുന്നനാളിൽ നിനക്കിനി എന്നെ ബന്ധപ്പെടാം."

ഇവിടെ ആരാണ് മനുഷ്യത്വമുള്ളതെന്ന് ചോദ്യം വരുന്നു, അമ്മയോ, സഭയോ മുത്തച്ഛനൊ? സഭയുടെ ജനം പള്ളിയിലൊത്തുകൂടുമ്പോൾ അമ്മയോടും സഭയോടും ചേരും. ആ അമ്മ ആരാന്റെ അമ്മയല്ലേ? മകനിലുള്ള പുത്രദുഃഖം ഉണ്ടാകേണ്ടതും ആരാന്റെ അമ്മയ്ക്കല്ലേ?

എന്റെ മകൻ അത്തരം സ്വഭാവക്കാരനെങ്കിൽ സഭയുടെ നിയമതത്ത്വക്കൂട്ടിൽ അന്നെനിക്ക് കഴിയാൻ സാധിക്കുമെന്ന് തോന്നുന്നില്ല. അവന്റെ സന്തോഷത്തിൽ ഞാൻ ദുഖിതനെങ്കിൽ അന്നത്തെ പകൽ കഴിയുമ്പോൾ ഞങ്ങൾ അപ്പനും മക്കളും ഒന്നിച്ചുതന്നെ അത്താഴം കഴിക്കും. മകനെ നിന്നെ ഞാൻ സ്നേഹിക്കുന്നു, നിന്റെ സന്തോഷമാണ് എനിക്ക് വലുതെന്ന് ഞാൻ അവനോട് പറയും.

http://www.dailymail.co.uk/news/article-2442166/Grandfather-blasts-daughter-letter-kicks-gay-grandson.html

ഗുജറാത്തിന്റെ ശ്രീ നരേന്ദ്രമോഡി രാജ്യത്തിന്റെ മോഡിയാകുമോ?

By ജോസഫ് പടന്നമാക്കൽ

2014  മെയ്മാസത്തിൽ നടത്താൻ പോവുന്ന ഭാരതീയ പാർലമെന്റ് തെരഞ്ഞെടുപ്പിൽ ബിജെപിയുടെ പ്രാധാനമന്ത്രി സ്ഥാനാർത്ഥിയായി ശ്രീ നരേന്ദ്ര മോഡിയെയാണ് നേതൃത്വം തീരുമാനിച്ചിരിക്കുന്നത്.  ശ്രീ മോഡി വലതുപക്ഷ ചിന്താഗതിയുള്ള ഇന്ത്യൻ രാഷ്ട്രീയത്തിലെ പ്രമുഖനായ നേതാവാണ്‌. എന്നും അദ്ദേഹം ഒരു  വിവാദ നായകനായി അറിയപ്പെട്ടിരുന്നു. 2001 മുതൽ ഇന്ത്യയുടെ പടിഞ്ഞാറെത്തീരമായ ഗുജറാത്തിന്റെ മുഖ്യമന്ത്രിയായി നാലുപ്രാവിശ്യം അധികാരത്തിൽ വന്നു. എക്കാലവും വൈരുദ്ധ്യങ്ങളുടെയും വൈവിധ്യങ്ങളുടെയും മീതെ സഞ്ചരിച്ചിരുന്ന അദ്ദേഹം ഭാരതീയ ജനതാപാർട്ടിയുടെ മുതിർന്ന നേതാക്കളിൽ ഒരാളാണ്.


 ഇന്ത്യൻ രാഷ്ട്രീയത്തിന് നവചൈതന്യം പേറി പുത്തനായ നവീനാശയങ്ങളുമായി, ഭാരതത്തിന്റെ ഉന്നത പരമാധികാരത്തിനായി ജൈത്രയാത്ര ചെയ്യുന്ന ശ്രീ നരേന്ദ്ര മോഡി വിവാദങ്ങളിൽക്കൂടിയാണ് രാഷ്ട്രീയത്തിൽ സ്വയം സ്ഥാനമുറപ്പിച്ചത്.  സ്വന്തം അണികളിൽനിന്നും എതിർവിഭാഗ രാഷ്ട്രീയമല്ലന്മാരിൽനിന്നും ഒരുപോലെ മല്ലടിച്ച് ഉയർന്നുവന്ന ഒരു നേതാവാണ്‌ മോഡി. 1950 സെപ്റ്റംബർ 17 ന് ഗുജറാത്തിലെ വഡ്നാഗറിൽ ഒരു ചെറുകച്ചവടക്കാരന്റെ മകനായി ജനിച്ചു. അദ്ദേഹം ദാമോദരദാസ് മുല്ച്ചന്ദ് മോഡിയുടെയും ശ്രീമതി ഹീരാ ബെന്റെയും ആറു മക്കളിൽ മൂന്നാമനായിരുന്നു. സാധാരണക്കാരനിൽ സാധാരണക്കാരനായി എളിമയും വിനയവും ദൈവഭക്തിയുമുള്ള ഒരു കുടുംബത്തിൽ വളർന്നു.  ജീവിക്കാൻവേണ്ടി കൌമാര പ്രായത്തിൽത്തന്നെ തൊഴിലുകളിൽ ഏർപ്പടേണ്ടി വന്നു. സ്വന്തം സഹോദരനുമായി സ്ഥലത്തുള്ള ഒരു ബസ്ടെർമിനലിൽ ഒരു ചായക്കട നടത്തി. വിദ്യാഭ്യാസവും സ്വന്തം ഗ്രാമത്തിലുള്ള സ്കൂളിലായിരുന്നു.  പഠിക്കാൻ മിടുക്കനല്ലായിരുന്നു. ക്ലാസ് പരീക്ഷകളിൽ ഏറ്റവും മോശമായ ഗ്രേഡ്കളായിരുന്നു അദ്ദേഹത്തിന് ലഭിച്ചിരുന്നത്. എങ്കിലും ജനങ്ങളുടെ മനസിനെ പിടിച്ചുകുലുക്കാൻ കഴിവുള്ള ഒരു വാഗ്മിയായിരുന്നു. ഭാരതത്തിലെ സാംസ്ക്കാരിക ചിന്താധാരയിലെ വിവാദങ്ങളിൽ അസാമാന്യമായ പാടവം അദ്ദേഹമെന്നും പ്രകടിപ്പിച്ചിരുന്നു. പിന്നീട് ഗുജറാത്ത് സ്റ്റേറ്റ് ട്രാൻസ്പൊർട്ട് കാന്റീനിൽ ഒരു ജോലിക്കാരനായി. ആർ.എസ്.എസ് വക്താവാകുന്നവരെ  അവിടെ ജോലി ചെയ്തു. നാഗ്പൂറിൽനിന്നും ആർ.എസ്. എസ് പരിശീലനവും നേടി.  ആർ.എസ്.എസിന്റെ ഔദ്യോഗിക ഭാരവാഹിത്വം വഹിക്കുന്നതിന് ആ പരിശീലനം ആവശ്യമായിരുന്നു. ഇതിനിടെ കോളേജിൽ വിദ്യാഭാസവും നടത്തുന്നുണ്ടായിരുന്നു. അവിടെനിന്നും അഖിലഭാരത വിദ്യാർത്ഥി പരിഷത്തിന്റെ നേതാവായി.

  
എമർജൻസികാലത്ത് (Emergency) മോഡി ഒളിച്ചുനടന്നിരുന്ന ഒരു വിപ്ലവകാരിയായിരുന്നു. ഒളിത്താവളങ്ങളിൽനിന്ന് ലഘുലേഖകൾവഴി പ്രചരണങ്ങളും നടത്തിയിരുന്നു.  ആ കാലയളവിൽ വസന്ത് ഗജേന്ദ്ര ഗാഡ്ക്കർ, നഥൻ ലാൽ ജഗതാ മുതലായ പ്രമുഖ നേതാക്കന്മാരെ പരിചയപ്പെട്ടു. ഒരുപക്ഷെ മോഡിയുടെ രാഷ്ട്രീയഭാവിക്ക് വഴിത്തിരിവായതും ഈ നേതാക്കന്മാരായിരിക്കാം. തന്റെ ആദർശങ്ങളിൽ വിശ്വസിച്ചുകൊണ്ട് രാവും പകലും വിത്യാസമില്ലാതെ പാർട്ടിക്കുവേണ്ടി പ്രവർത്തിച്ചുകൊണ്ടിരുന്നു.  വിശ്രമവേളകളിൽ പാർട്ടിയുടെ അടിസ്ഥാന തത്ത്വങ്ങളെ സംബന്ധിച്ച ലഘുലേഘകളും വിതരണം ചെയ്തുകൊണ്ടിരുന്നു.  ഇതിനിടയിൽ ഗുജറാത്ത് യൂണിവേഴ്സിറ്റിയിൽനിന്ന് രാഷ്ട്രീയ സാമൂഹ്യശാസ്ത്രത്തിൽ (Political Science)   ബിരുദാനന്തരബിരൂദം നേടി. പിന്നീട് ബി.ജെ.പി. ജനറൽ സെക്രട്ടറിയെന്ന നിലയിൽ പ്രവർത്തനം ഡൽഹിയിലാക്കി. 1998ൽ മോഡി ബിജെപിയുടെ ദേശീയ സെക്രട്ടറിയുമായി. 2001 മുതൽ ഗുജറാത്ത് സംസ്ഥാനത്തിന്റെ വിശ്വവിഖ്യാതനായ മുഖ്യമന്ത്രിയുമായി സ്ഥാനമേറ്റു.


  പ്രധാനമന്ത്രി സ്ഥാനത്തേക്കുള്ള മത്സരത്തിൽ പാർട്ടിസ്ഥാനാർത്ഥിയായി തെരഞ്ഞെടുക്കുന്നതുവരെ നരേന്ദ്രമോഡിയെ പ്രതിയോഗികൾ കണ്ടിരുന്നത്‌ ഒരു പിശാചിന് തുല്യമായിട്ടായിരുന്നു. ഗുജറാത്തിന്റെ പുരോഗതി അംഗീകരിക്കാൻ സാധിക്കാതെ, ഗുജറാത്തല്ല ഇന്ത്യായെന്നായി അവരുടെ മുദ്രാവാക്യം. ഹോളിവുഡിൽ വില്ലനായി അഭിനയിച്ചിരുന്ന റൊണാൾഡ് റീഗനെയും അമേരിക്കൻ ജനം ഒരിക്കൽ വില്ലനായി ചിത്രീകരിച്ചിരുന്നു.  പില്ക്കാലത്ത് ലോകം അറിയപ്പെട്ട ഏറ്റവും പ്രഗത്ഭനായ പ്രസിഡന്റായി റേഗൻ ചരിത്രത്തിൽ സ്ഥാനം പിടിച്ചു. ഡൽഹി അശോകറോഡിലെ ഇടുങ്ങിയ ഒരു മുറിയിൽ താമസിച്ച മോഡിയാണ് പില്ക്കാലത്ത് ഗുജറാത്തിലെ മുഖ്യമന്ത്രി ബംഗ്ലാവിൽ ദീർഘകാലം താമസിച്ച് ഗുജറാത്ത് ജനതയുടെ പ്രിയപ്പെട്ടവനായത്.


സോണീയാ ഗാന്ധികുടുംബം പോലെ അദ്ദേഹത്തിന് ആഗോളബന്ധമില്ല. നെഹ്രു കുടുംബംപോലെ പാരമ്പര്യമായി പേരും പെരുമയും ആർജിച്ച കുടുംബവുമല്ല.  ആനന്ദഭവൻപോലുള്ള സുഖസൌകര്യങ്ങൾ നിറഞ്ഞ മണിമന്ദിരങ്ങളിൽ വളർന്നില്ല. ഒരു പൈസാ പോലും പാർട്ടിഫണ്ടിൽനിന്നോ ജനങ്ങളുടെ നികുതിപ്പണത്തിൽനിന്നോ സ്വന്തം പോക്കറ്റിൽ ഇട്ടിട്ടില്ല. മറ്റു പല ബി.ജെ.പി. നേതാക്കന്മാരെപ്പോലെ അദ്ദേഹത്തിന്റെ പേര് പ്രസിദ്ധരായവരുടെ പട്ടികയിലില്ല. ഒന്നാതരം ഹോട്ടലുകളിൽ പാർട്ടികൾ നടത്തി സ്വയം പുകഴ്ത്തി നടന്നിരുന്ന നേതാവായിരുന്നില്ല. ഊണും ഉറക്കവുമില്ലാതെ ജോലി ചെയ്യണമെന്ന ചിന്തകളുമായി മാത്രം നടക്കുന്ന ഒരു ജോലി ഭ്രാന്തനാണദ്ദേഹം. വർക്ക്ഹോളിക്ക് (Workaholic) എന്ന് ഇംഗ്ലീഷിൽ പറയും. നാല് മണിക്കൂറാണ് ദിവസത്തിൽ ഉറങ്ങുന്നത്. കഴിഞ്ഞ ആറുവർഷമായി തന്റെ ഓഫീസില്നിന്നും ഒരു ദിവസംപോലും അവധിയെടുത്തില്ലെന്ന സത്യവും വിസ്മയമായി തോന്നാം.  പ്രമാണീ വർഗങ്ങളുമായി സമദൂരം പാലിച്ച് എന്നും സാധാരണക്കാരുമായി ഇടപെടാനാണ് അദ്ദേഹത്തിനിഷ്ടം. ഭരിക്കുകയെന്നത് തങ്ങളുടെ ജന്മാവകാശമെന്ന് ചിന്തിക്കുന്നവർ രാഷ്ട്രീയപാരമ്പര്യം ഇല്ലാതെ ജീവിച്ച ഇദ്ദേഹത്തെ എക്കാലവും പൊതുവേദികളിൽനിന്നും അകറ്റുവാൻ ശ്രമിച്ചിരുന്നു. എന്നും അപമര്യാദയായി അദ്ദേഹത്തെ കൂട്ടക്കൊലയാളി, വൈരൂപ്യനായ ഭാരതീയൻ, കാക്കക്കൂട്ടത്തിലെ പണ്ഡിതൻ എന്നൊക്കെ  പ്രതിയോഗികൾ മുഖത്തുനോക്കി വിളിച്ചിരുന്നു.  "തന്റെ മാന്യതയെ വീണ്ടെടുക്കൂ, എങ്കിൽ  മറ്റൊരുതരത്തിൽ നോക്കി തനിക്ക് വില കൽപ്പിക്കാമെന്നും" ചിലർ അദ്ദേഹത്തോട് പറയുമായിരുന്നു. 

 
അമേരിക്കയിലെ പ്രസിഡന്റ് തെരഞ്ഞെടുപ്പിൽ മത്സരിച്ച് പരാജിതനായ ഗോൾഡ്‌ വാട്ടറിന്റെ മുദ്രാവാക്യമാണ് ബി.ജെ.പി. പരസ്യങ്ങളിൽ ഉപയോഗിക്കുന്നത്. "നിങ്ങളുടെ ഹൃദയങ്ങളിൽ അദ്ദേഹം ശരിയെന്ന് നിങ്ങൾക്കറിയാം. നമ്മുടെ ഒരേ മനസും ഒരേ ചിന്താഗതിയുമുള്ള ഐക്യം ഒരേ സ്വരത്തിൽ ആഞ്ഞടിക്കട്ടെ." മോഡി പറയും,  “നികുതി കൊടുക്കുന്നവന്റെ പണം പാഴാക്കി കളയുന്നതല്ല രാഷ്ട്രീയം. അനാവശ്യ പാഴ്ചെലവുകൾ ഇല്ലാതാക്കുമ്പോഴാണ് സാമ്പത്തിക ശാസ്ത്രത്തിന്റെ അവബോധമുളവാകുന്നത്. ഗുജറാത്തല്ല ഇന്ത്യയെന്ന് പ്രതീക്ഷകൾ ഇല്ലാത്തവർ പറയും. ഗുജറാത്ത് മോഡലും ഭാരത മോഡലും പരസ്പര വിരുദ്ധമല്ല. മോഡിയുടെ  ഗുജറാത്തിൽ പുതിയ തന്ത്രങ്ങളിൽക്കൂടിയുള്ള സാമ്പത്തിക പരീക്ഷണങ്ങൾ അസൂയാവഹമായ നേട്ടങ്ങളാണ് കൈവരിച്ചത്.


 കുപിതരായ ഗുജറാത്തി ജനങ്ങളുടെ വിശ്വാസം മോഡി എങ്ങനെ നേടിയെടുത്തു? എങ്ങനെ അവരുടെ നെഞ്ചിനെ അമ്പത്താറിഞ്ചാക്കികൊണ്ട് ഗുജറാത്തിലെ ജനങ്ങളുടെ ആരോഗ്യനിലവാരം കൂട്ടി?  ഗുജറാത്ത് വോട്ടറും ഇന്ത്യൻ വോട്ടറുമായി യാതൊരു വിത്യാസവുമില്ലെന്ന് ബൌദ്ധിക ചിന്താലോകം വിശ്വസിക്കുന്നു. പ്രതീക്ഷകളോടെ സ്വപ്ന ഭാരതത്തിനായി നാളയുടെ പ്രധാനമന്ത്രിയെന്ന വെല്ലുവിളിയിൽ മോഡി മുന്നേറുന്നു. അദ്ദേഹത്തിന്റെ രാഷ്ട്രീയ പ്രതിയോഗികൾ ഗുജറാത്തിൽ മാത്രം എന്നേക്കും അദ്ദേഹത്തെ തളച്ചിടുവാനും ആഗ്രഹിക്കുന്നു. പ്രധാനമന്ത്രി സ്ഥാനത്തേക്ക് മോഡിയെ തെരഞ്ഞെടുത്തെങ്കിലും അദ്ദേഹം അഭിമുഖികരിക്കുന്ന വലിയ പ്രശ്നം സ്വന്തം പാർട്ടിയിൽനിന്നുമുള്ള കടുത്ത വിമർശനങ്ങളാണ്. രാഷ്ട്രീയത്തിലെ മുതിർന്നവരുടെ അസൂയയും മക്കൾ രാഷ്ട്രീയം തുടരാൻ ആഗ്രഹിക്കുന്നവരുടെ തൊഴുത്തിൽകുത്തും കാരണങ്ങളാണ്. പ്രധാന എതിരാളി എൽ.കെ. അദ്വാനി അദ്ദേഹത്തെ പ്രധാനമന്ത്രിസ്ഥാനത്തേക്ക് നിർദ്ദേശിക്കുവാൻപോലും തയാറല്ലായിരുന്നു.


വ്യവസായലോകത്ത് മോഡി വളരെയേറെ സമ്മതനാണ്. വളർന്നുവരുന്ന കൊച്ചുവ്യവസായികളുടെ ഇടയിലും ചെറു കൃഷിക്കാരുടെയിടയിലും പ്രിയപ്പെട്ടവനാണ്. വ്യവസായവൽക്കരണത്തോടെ അദ്ദേഹം ഗുജറാത്തിനെ ഇന്ത്യയിലെ അനുഗ്രഹീതവും സമ്പന്നവുമായ സംസ്ഥാനമാക്കി. ഇന്ത്യയുടെ 75 ശതമാനം വ്യവസായ പ്രമുഖർ മോഡിയെ പിന്താങ്ങുന്നു. സമ്പന്നമായ ഭാരതസ്വപ്നത്തിന് മോഡിയിൽ അവർ പ്രതീക്ഷകളും അർപ്പിക്കുന്നു. ഇന്ത്യയിലെ സാമ്പത്തിക മേഖലയിലെ പ്രമുഖപത്രങ്ങളെല്ലാം അദ്ദേഹത്തെ പിന്താങ്ങുന്നു. റോയിട്ടർ റിപ്പൊർട്ടനുസരിച്ചുള്ള അഭിപ്രായ സർവേയിൽ രാഹുൽ ഗാന്ധിയ്ക്ക് 7 ശതമാനം മാത്രമേ വ്യവസായ ലോകത്തിൽനിന്നുള്ള പിന്തുണയുള്ളൂ.  


എന്നിരുന്നാലും 2002 ലെ വർഗീയലഹളമൂലം മോഡിയുടെ രാഷ്ട്രീയഭാവിക്ക് മങ്ങലേറ്റിരുന്നു. ഗുജറാത്തിൽ ആയിരക്കണക്കിന് ജനം മരിച്ചു. അതിൽ ഭൂരിഭാഗവും മുസ്ലിങ്ങളായിരുന്നു. അന്ന് ആദ്യത്തെ തവണ മുഖ്യമന്ത്രിയായിരുന്ന കാലത്താണ് ഗുരുതരമായ ഈ സംഭവവികാസങ്ങൾ നടന്നത്. വർഗീയലഹളയുടെ കുറ്റം ആരോപിച്ച് 2005ൽ അമേരിക്കാ അദ്ദേഹത്തിന് വിസാ നിഷേധിച്ചു. കഴിഞ്ഞമാസവും പെൻസിൽവേനിയാ യൂണിവേഴ്സിറ്റിയിൽ ഒരു കൊണ്ഫെറന്സിന് സംബന്ധിക്കുവാൻ മോഡിക്ക് ക്ഷണം ഉണ്ടായിരുന്നു. എതിർപ്പുമൂലം പങ്കെടുക്കാൻ സാധിച്ചില്ല. 2002 ലെ ലഹളയിൽ മോഡിയിൽ കുറ്റാരോപണം നടത്തുന്നവർക്ക് അദ്ദേഹത്തിന്റെ പങ്കിനെപ്പറ്റി ഒന്നുംതന്നെ തെളിവുകൾ നിരത്തുവാൻ സാധിക്കുന്നില്ല. ആ ലഹളയുമായി താൻ ഒരു തെറ്റും ചെയ്തിട്ടില്ലെന്ന് ആവർത്തിച്ചാവർത്തിച്ച് അദ്ദേഹം പറയാറുണ്ട്‌. എങ്കിലും രാഷ്ട്രീയ പ്രതിയോഗികൾക്ക് സ്വയം കുഴിതോണ്ടാതിരിക്കാൻ അദ്ദേഹംമാത്രം കുറ്റക്കാരനെന്ന് ആരൊപിച്ചേ മതിയാവൂ. നിരപരാധിയെന്ന് സുപ്രീം കോടതിയുടെ സമഗ്രമായ അന്വേഷണത്തിൽനിന്നും വ്യക്തമായിട്ടും അവരുടെ നാവുകളെ അടയ്ക്കുന്നില്ല. എന്നിരുന്നാലും, രാഷ്ട്രീയ പ്രതിയോഗികൾ പലവിധ അടവുകൾ പ്രയോഗിച്ച് അദ്ദേഹത്തെ  തേജോവധം ചെയ്യാൻ ശ്രമിച്ചിട്ടും ഒരിക്കലും വിജയിച്ചിട്ടില്ല. മുഖ്യമന്ത്രി കസേരയിൽ മുസ്ലിംങ്ങളുടെയും  പ്രിയങ്കരനായ അദ്ദേഹം മുഖ്യമന്ത്രിയായി നീണ്ട വർഷങ്ങൾ ഗുജറാത്തിനെ ഭരിച്ചു. വിമർശനങ്ങളുടെ താവളങ്ങൾ ഇന്ന് ഗുജറാത്തിന് വെളിയിലായി മറ്റു സംസ്ഥാനങ്ങളിൽ സ്ഥാനം പിടിച്ചു.  കുറ്റം ചെയ്യാത്ത താനെന്തിന് കുറ്റമേൽക്കണമെന്നാണ് മോഡിയുടെ ചോദ്യം. 


അഭിമാനിക്കത്തക്ക അനേകമനേകം പദ്ധതികളും വിജയകരമായ നേട്ടങ്ങളുമാണ് ഗുജറാത്തിൽ മോഡി നേടിയെടുത്തത്. ഭാരതചരിത്രത്തിലെ ഒരു നേതാവിനും മോഡി കൈവരിച്ച നേട്ടത്തോളം പ്രകീർത്തിക്കാൻ സാധിക്കില്ല. ഗുജറാത്തിൽ തന്റെ ഭരണത്തിൽ എന്നും ശ്രദ്ധിച്ചിരുന്നത് മുസ്ലിംജനതയുടെ ഉന്നമനത്തിനായിരുന്നു. തന്മൂലം അദ്ദേഹത്തിന്റെ വ്യക്തിപ്രഭാവം ഗുജറാത്തിൽ അവരുടെയിടയിൽ എക്കാലത്തെക്കാളും പതിന്മടങ്ങ് വർദ്ധിച്ചിട്ടുണ്ട്. കഴിഞ്ഞ ഏതാനും വർഷങ്ങൾകൊണ്ട്‌ ഓരോ മുസ്ലിം ഗുജറാത്തിയുടെയും വരുമാനം ഇരട്ടിയായി. ഗുജറാത്തികളെപ്പോലെ ഭാരതം മുഴുവൻ ഇന്ന് നേട്ടങ്ങൾ കൈവരിച്ചിരുന്നുവെങ്കിൽ ഓരോ ഭാരതീയന്റെയും വരുമാനം അമ്പത് ശതമാനം വർദ്ധിക്കുമായിരുന്നുവെന്ന് സാമ്പത്തിക വിദക്തർ കണക്കാക്കുന്നു. എങ്കിൽ ഇന്ത്യയുടെ നേട്ടം ഫ്രാൻസിന്റെ നേട്ടത്തെക്കാളും മുമ്പിലാകുമായിരുന്നു. ഗുജറാത്തിൽ മോഡിയുടെ ഭരണത്തിൽക്കൂടി കച്ചവടക്കാർ,  വ്യവസായികൾ, കുടിയേറ്റക്കാർ, കൃഷിക്കാർ എന്നിങ്ങനെ ജീവിതത്തിന്റെ നാനാ തുറകളിലുള്ളവർ പുരോഗമിച്ചു കഴിഞ്ഞു.   അതുകൊണ്ടാണ് അദ്ദേഹത്തെ ജനം മുഖ്യമന്ത്രിയായിട്ട് തുടർച്ചയായി തെരഞ്ഞെടുക്കുന്നത്. വ്യവസായികളെ പ്രോത്സാഹിപ്പിക്കാൻ സൗകര്യപ്രദമായ സ്ഥലങ്ങളും ഊർജവും വൈദ്യുതിയും നല്കി സഹായിച്ചിരുന്നു. മനോഹരമായ വീതിയുള്ള റോഡുകളും ട്രാൻസ്പോർട്ട് സൗകര്യങ്ങളും സംസ്ഥാനമാകെ നിർമ്മിച്ചു. അഴിമതികൾ കുറവുള്ള ഉദ്യോഗസ്ഥരും ഗുജറാത്തിന്റെ വിജയരഹസ്യമായിരുന്നു.


ഭാരതത്തിലെ പ്രധാനമന്ത്രിമാരുടെ ശരാശരി പ്രായം കണക്കാക്കുമ്പോൾ മോഡി ചെറുപ്പക്കാരുടെ നിരയിലേക്ക് വരും.  അദ്ദേഹത്തിന് ഭാരതത്തെപ്പറ്റിയുള്ള സ്വപ്നങ്ങൾ ഏറെയാണ്‌. വ്യവസായസാമ്രാജ്യം പടുത്തുയർത്താൻ സ്വകാര്യമൂലധനം രാജ്യത്ത് ഒഴുകണമെന്ന് ചിന്തിക്കുന്നു. പുതിയ തലമുറകൾക്ക്‌ ക്രിയാത്മകമായ ആധുനിക വിദ്യാഭ്യാസവും നല്കണം. ജോലി ചെയ്യാൻ ആഗ്രഹിക്കുന്നവന് ജോലി നല്കണം. പ്രതിരോധശക്തിയിൽ ഇന്ത്യാ ഉത്ഭാദന കേന്ദ്രമാകണം. വിദേശായുധങ്ങൾ  ഇറക്കുമതി ചെയ്യുന്നതിനെക്കാളും ആധുനികരിച്ച ആയുധങ്ങൾ ഇവിടെത്തന്നെ നിർമ്മിക്കണം. അങ്ങനെ ആയുധശാലകളും തൊഴിൽ നല്കുന്ന ശാലകളാകണം. സർക്കാരിന്റെ തൊഴിൽ നിയമങ്ങൾക്ക് അയവ് വരുത്തി സ്വകാര്യസ്ഥാപനങ്ങളിലും തൊഴിൽശാലകളിലും കൂടുതൽ തൊഴിലവസരങ്ങൾ സൃഷ്ടിക്കണം. ഇന്ത്യാ പുരോഗമിക്കണമെങ്കിൽ രാജ്യത്താകെ ദാരിദ്ര്യമില്ലാതാക്കണമെന്നും അദ്ദേഹം വിശ്വസിക്കുന്നു.


കറയറ്റ ശുദ്ധമായ ഒരു രാഷ്ട്രീയചരിത്രം മോഡിക്കുണ്ടെങ്കിലും ആകമാനമുള്ള  ഭാരതത്തിലെ  രാഷ്ട്രീയനേതാവായി അദ്ദേഹത്തെ കാണാൻ സാധിക്കില്ല. വിഭാഗിയ ചിന്തകളോടെ അദ്ദേഹത്തെ ജനം എക്കാലവും അകറ്റാൻ ശ്രമിച്ചിരുന്നു. അദ്ദേഹം നേതൃത്വം നല്കിയ വിപ്ലവാത്മകമായ ചിന്താഗതികളെ കുറച്ചുകാണിക്കാനെ എന്നും രാഷ്ട്രീയമോഹികൾ ആഗ്രഹിച്ചിട്ടുള്ളൂ. 1984ൽ ഇന്ദിരാഗാന്ധി കൊല്ലപ്പെട്ടപ്പോൾ പ്രതികാരദാഹികൾ ആയിരക്കണക്കിന് സിക്കുകാരെ കൊന്നൊടുക്കി. അതുതന്നെ ഇന്നും സംഭവിക്കുന്നു. കഴിഞ്ഞവർഷം ആസാമിൽ മുസ്ലിമുകളെ കൂട്ടക്കൊലകൾ നടത്തിയതിൽ കണക്കില്ലായിരുന്നു.  മതഭ്രാന്തിളകിയ ഒരു കൂട്ടം ജനങ്ങളുടെ വികാരങ്ങൾക്ക്‌ മോഡിയെയോ രാജീവ്‌ ഗാന്ധിയേയോ കുറ്റം പറയാൻ സാധിക്കില്ല. മോഡി മുസ്ലിമുകൾക്കായി ഗുജറാത്തിൽ അതിന് പരിഹാരം ചെയ്തു. ഇന്ത്യയുടെ മികച്ച പ്രധാന മന്ത്രിയാകണമെന്നുള്ള അദ്ദേഹത്തിന്റെ സ്വപ്നങ്ങൾ സഫലമാവണമെങ്കിൽ ഗുജറാത്തിലെപ്പോലെ ഇന്ത്യാ മുഴുവനായുള്ള 177 മില്ല്യൻ മുസ്ലിമുകളുടെ ഉണങ്ങാത്ത മുറിവുകൾ ഭേദപ്പെടുത്തണം. അവരുടെ ദുഃഖപൂർണ്ണമായ വികാരങ്ങൾക്ക് ശമനമുണ്ടാകണം. എങ്കിൽ സർവമതങ്ങളും ഒത്തൊരുമിച്ചുള്ള ഏകഭാരതമെന്ന കാല്പ്പനീക സാമ്രാജ്യം ഈ പുണ്യഭൂമിയിൽ സൃഷ്ടിക്കപ്പെടും.

വെടിയുണ്ടകളേറ്റിട്ടും തോൽക്കാൻ തയാറാകാത്ത മലാലായുടെ യൂ.എൻ. പ്രസംഗം

തർജിമ: ജോസഫ് പടന്നമാക്കൽ

മിസ്റ്റർ ബാൻ കീ മൂണ്‍, മിസ്റ്റർ ഗോർഡൻ ബ്രൌണ്‍,  സഹോദരീ സഹോദരന്മാരെ, കാരുണ്യവാനായ ദൈവത്തിന്റെ നാമത്തിൽ അസ്ലാം മാലൈക്കും. ഇന്ന് എന്റെ ജീവിതത്തിലെ അതിപ്രധാനമായ ഒരു ദിനമാണ്. ലോകത്തിന്റെ നാനാഭാഗത്തുമുള്ള ആദരണീയവരായവരുടെ മദ്ധ്യേ ഞാൻ സംസാരിക്കുന്നതിലും അഭിമാനിയാണ്‌. ഞങ്ങളുടെ പ്രിയപ്പെട്ട നേതാവായിരുന്ന ബേനസീർ ഭൂട്ടോ ധരിച്ചതുപൊലുള്ള വേഷമാണ് ഞാനും ഇന്ന് ധരിച്ചിരിക്കുന്നത്‌. എങ്ങനെ, എവിടെനിന്ന് എന്റെ പ്രസംഗം ആരംഭിക്കണമെന്ന് എനിക്കറിയില്ല. ഇവിടെ ആഗതരായിരിക്കുന്ന മഹനീയ വ്യക്തികൾ എന്നിൽനിന്നും എന്ത് പ്രതീക്ഷിക്കുന്നുവെന്നും അറിയില്ല. ആദ്യമായിട്ട് എനിക്കിവിടെ  സംസാരിക്കാൻ അവസരംതന്ന ദൈവത്തിനെ ഞാൻ സ്തുതിക്കട്ടെ. അവിടുത്തെ തിരുസന്നിധിയിൽ നാം എല്ലാം തുല്യരാണ്. വെടിയുണ്ടകൾ തുളച്ചുകയറിയ എന്റെ മുറിവുകൾ കരിഞ്ഞ് മരണത്തിൽനിന്ന് രക്ഷപ്പെട്ട് ജീവിതത്തിലേക്ക് മടങ്ങിവരാൻ ആഗ്രഹിച്ച ലോകമാന ജനതയോട് എന്റെ കൃതജ്ഞതയുടെ പൂച്ചെണ്ടുകൾ അർപ്പിക്കട്ടെ. എനിക്കിന്നൊരു പുതുജീവിതം ലഭിച്ചതും നിങ്ങളേവരുടെയും പ്രാർഥനകൾകൊണ്ടാണ്. എത്രമാത്രം സ്നേഹം ലോകം എന്നിൽ അർപ്പിച്ചുവെന്നും എനിക്ക് വിശ്വസിക്കാൻ സാധിക്കുന്നില്ല.   

 

എത്രയും വേഗം ഞാൻ സുഖം പ്രാപിക്കാൻ ആയിരക്കണക്കിന് മംഗളസന്ദേശങ്ങളും അഭിനന്ദനങ്ങളും സമ്മാനങ്ങളും എനിക്ക് ലോകത്തിന്റെ നാനാഭാഗത്തുനിന്നും ലഭിച്ചു. അവർക്കെല്ലാം എന്റെ ഹൃദയം നിറഞ്ഞ നന്ദിയുണ്ട്. എന്റെ ജീവന്റെ നിലനില്പ്പിനായി പടപൊരുതിയ നാളുകളിൽ എനിക്കുവേണ്ട മാനസികധൈര്യം തന്ന ലോകത്തിലെ അനേക നിഷ്കളങ്കരായ കുഞ്ഞുങ്ങളോടും എന്റെ നന്ദിയുണ്ട്. പ്രായത്തിൽ കൂടിയ മുതിർന്നവരായവരുടെ സ്നേഹാദരവുകളും എന്റെ മനസിന്‌ കുളിർമ്മ നല്കുന്നു. ബ്രിട്ടണിലും പാക്കിസ്ഥാനിലും എന്റെ ജീവനെ രക്ഷിക്കാൻ അഹോരാത്രം പണിചെയ്ത ഡോക്ടേഴ്സിനും  നേഴ്സസിനും അതിനോടനുബന്ധിച്ച് സേവനം ചെയ്തവർക്കും എന്റെ നന്ദിയുണ്ട്. യു.എ.ഇ സർക്കാരും സുഖം പ്രാപിക്കാൻ എനിക്കുവേണ്ട സാമ്പത്തിക സഹായം തന്നതിനും നന്ദി. എന്റെ വിദ്യാഭ്യാസ ചുമതലകൾ വഹിക്കുന്ന യൂ.എൻ. സെക്രട്ടറിജനറൽ മിസ്റ്റർ ബാൻ കീ മൂണിനും കൃതജ്ഞതയുടെ പൂക്കൾ. യൂ.എൻ നയതന്ത്രജ്ഞൻ മിസ്റ്റർ ഗോർഡൻ ബ്രൌണ്‍ന്റെ പ്രവർത്തനങ്ങളെയും ഈ അവസരത്തിൽ ഒർമ്മിക്കുന്നു.  എനിക്കുള്ള എല്ലാ സഹായവും എത്തിച്ചുതന്ന യൂ.എൻ. നേതൃത്വത്തിനും പ്രത്യേക നന്ദി.

 

സഹോദരീ സഹോദരരെ അറിയുക, മലാലദിനം എന്നത് എന്റേതല്ല. ഇന്നത്തെ ദിനം മനുഷ്യാവകാശങ്ങൾക്കായി ശബ്ദം ഉയർത്തിയ ഒരോ കുട്ടിയുടെയും സ്ത്രീകളുടെയും ദിനമാണ്. ആയിരക്കണക്കിന് സാമൂഹികപ്രവർത്തകർ ലോകത്തുണ്ട്. അവർ അവകാശങ്ങൾക്കായി ശബ്ദം ഉയർത്തുക മാത്രമല്ല, യാതനകളും അനുഭവിക്കുന്നു. അവർ ഭീകരർക്കെതിരെ സ്വന്തം ലക്ഷ്യങ്ങൾക്കായി, തങ്ങളുടെ മക്കളുടെ വിദ്യനേടുന്നതിനുള്ള അവകാശങ്ങൾക്കായി, സമാധാനത്തിനായി, സമത്വസുന്ദരമായ നാളേക്കായി പൊരുതി. ആയിരങ്ങൾ ഭീകരരുടെ വെടിയുണ്ടകളിൽ കൊല്ലപ്പെട്ടു. ലക്ഷക്കണക്കിന് ജനം മുറിവേറ്റു. ഞാൻ അവരിൽ ഒരാൾ മാത്രം. അങ്ങനെ ദുരിതമനുഭവിച്ച അനേകമായിരം ജനങ്ങളിലെ ഒരു പെണ്‍കുട്ടി മാത്രമാണ് നിങ്ങളുടെ മുമ്പിൽ നില്ക്കുന്നത്. അതുകൊണ്ട് ഞാൻ സംസാരിക്കുന്നത് എനിക്കുവേണ്ടി മാത്രമല്ല, ശബ്ദിക്കാൻ സാധിക്കാത്ത, അവകാശമില്ലാത്ത നിസഹായർക്കും വേണ്ടിയാണ്. അന്തസോടെ, സമാധാനത്തോടെ ജീവിക്കാനായുള്ള അവകാശസമരങ്ങൾക്കായി, സമത്വത്തിനായുള്ള  അവസരങ്ങൾക്കായി വിദ്യ നേടുന്നതിനുള്ള അവകാശത്തിനായി ഞാൻ അവർക്കുവേണ്ടിയും നിങ്ങളുടെ മുമ്പിൽ നില്ക്കുന്നു. 

 

പ്രിയപ്പെട്ട സുഹൃത്തുക്കളെ  2012  ഒക്റ്റോബർ ഒമ്പതാംതിയതി താലിബൻ എന്റെ നെറ്റിത്തടത്തിലെ ഇടതുവശത്ത് വെടിയുണ്ടകൾ തുളച്ചുകയറ്റി. എന്റെ കൂട്ടുകാരെയും അവർ വെടിവെച്ചു. ബുള്ളറ്റുകൾകൊണ്ട് ഞങ്ങളെ ശാന്തരാക്കാമെന്നും അവർ ചിന്തിച്ചു. എന്നാൽ അവർ പരാജയപ്പെട്ടു. അവിടെ ശാന്തതയല്ല പകരം ആയിരക്കണക്കിന് ജനതയുടെ ശബ്ദം ഉയർന്നു. എന്റെ ലക്ഷ്യങ്ങളെയും അഭിലാക്ഷങ്ങളെയും ഇല്ലാതാക്കുവാൻ സാധിക്കുമെന്ന് ഭീകരർ ഓർത്തു. എന്നാൽ എന്റെ ജീവിതത്തിൽ ഒരു മാറ്റവും വന്നില്ല. എന്നിലെ ഭയവും പ്രതീക്ഷയില്ലായ്മയും അവിടെ അസ്തമിച്ചു. പകരം എന്നിൽ ശക്തിയും ധൈര്യവും കൂടുതൽ ആർജിച്ചു. ഞാൻ അതേ മലാല തന്നെ. എന്റെ ലക്ഷ്യങ്ങളും പ്രതീക്ഷകളും ഇന്നും മാറ്റമില്ലാതെ തുടരുന്നു. എന്റെ സ്വപ്നങ്ങൾക്കും മാറ്റമില്ല. പ്രിയപ്പെട്ടവരേ ഞാൻ ആർക്കും എതിരല്ല. ആരോടും പ്രതികാരം ചെയ്യുന്നില്ല. ഞങ്ങളുടെ സ്വതന്ത്രമായ അവകാശങ്ങൾക്കായി, ജനാധിപത്യ സംസ്കാരമൂല്യങ്ങൾക്കായി, സംസാര സ്വാതന്ത്ര്യത്തിനായി, വിദ്യാഭ്യാസ അവകാശങ്ങൾക്കായി ഞാൻ ഏതു ഭീകരനോടും ഉച്ചത്തിൽത്തന്നെ സംസാരിക്കും.


താലിബന്റെയും ഭീകരരുടെയും കുഞ്ഞുങ്ങൾക്ക്‌ അർഹമായ വിദ്യാഭ്യാസം ലഭിക്കാൻ ഞാൻ ആഗ്രഹിക്കുന്നു. എന്നെ വെടിവെച്ച താലിബന്റെ കുഞ്ഞിനും വിദ്യ ലഭിക്കണം. എന്റെമുമ്പിൽ വെടിവെയ്ക്കാൻ തയാറായി നിൽക്കുന്ന ഭീകരനെ കൈവശം തോക്കുണ്ടെങ്കിലും ഞാൻ വെടിവെക്കില്ല.  പ്രവാചകനായ മുഹമ്മദിൽനിന്ന് ഞാൻ പഠിച്ച സ്നേഹമാണത്. ബുദ്ധന്റെയും കൃസ്തുവിന്റെയും കരുണയാണ് എന്നെ നയിക്കുന്നത്. മാർട്ടിൻ ലൂതർ കിംഗ്‌ എന്ന ഇതിഹാസ പുരുഷനിൽനിന്നും എനിക്ക് ലഭിച്ച ആവേശമാണിത്. അഹിംസയുടെ പ്രവാചകരായ മഹാത്മാഗാന്ധിജി, നെൽസണ്‍ മണ്ഡാല, ജിന്നാസാഹീബ് എന്നീ മഹാന്മാർ പഠിപ്പിച്ചതും ഇങ്ങനെതന്നെയായിരുന്നു. മദർ തെരസായുടെ സ്നേഹവും എന്നെ ആകർഷിച്ചു. ക്ഷമിക്കാൻ എന്നെ എന്റെ പ്രിയപ്പെട്ട ഉപ്പയും ഉമ്മയും പഠിപ്പിച്ചു. സ്നേഹിക്കുക, സമാധാനം കാംക്ഷിക്കുക എന്നീ ആദർശങ്ങളാണ് എന്നെ നയിക്കുന്നത്.

 

പ്രിയപ്പെട്ടവരെ പ്രകാശത്തിന്റെ പ്രാധാന്യം നമുക്കറിയാം. പക്ഷെ അന്ധകാരമാണ് നമുക്ക് ചുറ്റുമുള്ളത്. നമ്മുടെ അവകാശങ്ങൾക്കായുള്ള മുറവിളിയുടെ ആവശ്യകത നാം മനസിലാക്കുന്നു. എന്നാൽ നാം ശാന്തരാണ്. പേനയുടെയും പുസ്തകത്തിന്റെയും കാര്യവും ചിന്തനീയമാണ്. പക്ഷെ നാം കാണുന്നത് വെടിയുണ്ടകളും തോക്കുകളുമാണ്. ഒരു പേന തോക്കിനേക്കാളും ശക്തിയേറിയതെന്നു  ബൌദ്ധികലോകം പറയുന്നു. അത് സത്യമാണ്. ആഗോള ഭീകരർ പുസ്തകങ്ങളെ ഭയപ്പെടുന്നു. വിദ്യാഭ്യാസത്തിന്റെ ശക്തിയേയും അവർ ഭയപ്പെടുന്നു. സ്ത്രീയുടെ ശബ്ദത്തെ അവർ ഭയപ്പെടുന്നു. അതുകൊണ്ടാണ് അവർ പതിനാല് നിഷ്കളങ്കരായ സ്കൂൾകുട്ടികളെ കൊന്നത്. സമൂഹത്തിലെ മാറ്റങ്ങളെയും സ്വാതന്ത്ര്യത്തെയും സാഹോദര്യത്തെയും അവർ എതിർക്കുന്നതിന്റെ കാരണവും അതുതന്നെ. അന്നവിടെയുണ്ടായിരുന്ന റ്റീച്ചറിനെയും അവർ വധിച്ചു.

 

എന്തുകൊണ്ടാണ് താലിബാൻ വിദ്യാഭ്യാസത്തിന് എതിരു നില്ക്കുന്നത്? കാരണം ഒരു പുസ്തകത്തിനുള്ളിലുള്ളത് എന്തെന്ന് താലിബന് അറിയത്തില്ല. അവർ വിചാരിക്കുന്നത് ദൈവം എന്നത് വെറും ഒരു യാഥാസ്ഥിതികനെന്നാണ്. അവരുടെ സങ്കല്പ്പത്തിലുള്ള ദൈവം പെണ്‍കുട്ടികൾക്ക് വിദ്യാഭ്യാസം നിഷേധിക്കുന്നു. നരകവും വിധിക്കുന്നു. ഭീകരർ അവരുടെതായ വ്യക്തിതാല്പര്യങ്ങൾക്കുവേണ്ടി ഇസ്ലാമിനെ കളങ്കപ്പെടുത്തുന്നു. സമാധാനവും സഹവർത്തിത്വവും ആഗ്രഹിക്കുന്ന ഒരു ജനകീയസർക്കാരാണ് ഇന്ന് പാക്കിസ്ഥാനുള്ളത്.

 
ഇസ്ലാം സമാധാനത്തിന്റെയും മനുഷ്യത്വത്തിന്റെയും സാഹോദര്യത്തിന്റെയും മതമാണ്‌. ഇസ്ലാം ഒരോ കുഞ്ഞിനും വിദ്യാഭ്യാസം നൽകണമെന്ന് വിശ്വസിക്കുന്നു. അത് ഓരോ മുസ്ലിമിന്റെയും കടമയും ഉത്തരവാദിത്വവും ആണ്. വിദ്യ അഭ്യസിക്കാൻ രാജ്യത്ത് സമാധാനം ആവശ്യമാണ്. എന്നാൽ ലോകത്തിന്റെ പല ഭാഗത്തും പ്രത്യേകിച്ച് പാകിസ്ഥാനിലും അഫ്ഗാനിസ്ഥാനിലും ഭീകരത പ്രവർത്തിക്കുന്നു. കുഞ്ഞുങ്ങൾക്ക്‌ വിദ്യാഭ്യാസം നിഷേധിക്കുന്നു. ഇൻഡ്യയിൽ കുഞ്ഞുങ്ങളെക്കൊണ്ട് ബാലവേല ചെയ്യിപ്പിക്കുന്നു. സ്ത്രീകളും കുഞ്ഞുങ്ങളും പല തരത്തിലാണ് പീഡിതരാകുന്നത്. നൈജീറിയായിൽ അനേകം സ്കൂളുകൾ നശിപ്പിച്ചു. പതിറ്റാണ്ടുകളായി അഫ്ഗാനിസ്ഥാനിൽ കുഞ്ഞുങ്ങൾ ഭീകരർമൂലം കഷ്ടപ്പെടുന്നു. കുഞ്ഞുപെണ്‍കുട്ടികൾ വീടുകളിൽ പാത്രം കഴുകിയും ദാസ്യവേല ചെയ്തും ജീവിക്കണം. ചെറുപ്രായത്തിലെ വിവാഹം കഴിക്കാൻ നിർബന്ധിക്കുന്നു.


വിദ്യാഭ്യാസം നേടാൻ സമാധാനപരമായ ഒരു അന്തരീക്ഷം ആവശ്യമാണ്. ഭീകരരെകൊണ്ട് ജനം അക്ഷമരാണ്. ദാരിദ്ര്യം, അജ്ഞത, അനീതി, വർണ്ണവിവേചനം ഇവകളെല്ലാം സ്ത്രീ പുരുഷഭേദമേന്യേ പൊതുവായ പ്രശ്നങ്ങളാണ്. ഇന്ന് ഞാൻ സ്ത്രീകളുടെ വിദ്യാഭ്യാസത്തിനും അവകാശങ്ങൾക്കുമായി സമരം നയിക്കുന്നു. കാരണം അവരാണ് ഇന്ന് സമൂഹമാകെ സഹിക്കുന്നത്. ഒരിക്കൽ സാമൂഹിക പ്രവർത്തകരായ സ്ത്രീകൾ സ്ത്രീകളുടെ അവകാശങ്ങൾക്കായി പൊരുതാൻ പുരുഷന്മാരോട് ആവശ്യപ്പെട്ടിരുന്നു. എന്നാൽ ഇനിമുതൽ സ്ത്രീകളുടെ അവകാശങ്ങൾക്കായി ഞങ്ങൾതന്നെ സമരം ചെയ്യും. സ്ത്രീകളുടെ അവകാശങ്ങൾക്കായി പുരുഷന്മാർ പൊരുതരുതെന്നല്ലാ ഞാൻ പറയുന്നത്. സ്ത്രീകൾ സ്വതന്ത്രമായി അവകാശ സംരക്ഷണത്തിനായി മുമ്പോട്ട്‌ വരണമെന്നാണ് ഞാൻ ഉദ്ദേശിച്ചത്.


പ്രിയപ്പെട്ട സഹോദരീ സഹോദരരേ, ശബ്ദിക്കേണ്ട സമയം ഇപ്പോഴാണ്. സമാധാനവും ഐശ്വര്യവും കാംക്ഷിച്ചുകൊണ്ട് സ്ത്രീകളുടെ അവകാശ സംരക്ഷണത്തിനായി തങ്ങളുടെ നയങ്ങൾ ഉടച്ചുവാർക്കുവാൻ ലോകനേതാക്കളോട് ഞങ്ങൾ അഭ്യർദ്ധിക്കുന്നു. സ്ത്രീകളുടെ അവകാശങ്ങൾക്കെതിരെ എന്ത് തീരുമാനങ്ങളായാലും ഞങ്ങൾ അംഗീകരിക്കില്ല. ഓരോ കുഞ്ഞുങ്ങൾക്കും ജന്മാവകാശമായി സൗജന്യമായും നിർബന്ധമായും വിദ്യാഭ്യാസം നല്കുവാൻ ലോകമെമ്പാടുമുള്ള എല്ലാ ഭരണകൂടങ്ങളോടും ഞങ്ങൾ  ആവശ്യപ്പെടുന്നു. കൊടുംഭീകരതയും കുഞ്ഞുങ്ങളോടുള്ള മൃഗീയതയും ക്രൂരതയും ഇല്ലാതാക്കി കുഞ്ഞുങ്ങളെ സംരക്ഷിക്കാൻ  ഞങ്ങൾ ലോകസർക്കാരുകളോടും അഭ്യർത്ഥിക്കുന്നു.   വികസിച്ചുകൊണ്ടിരിക്കുന്ന രാഷ്ട്രങ്ങൾ പെണ്‍കുട്ടികൾക്ക്‌ വിദ്യാഭ്യാസത്തിനായുള്ള എല്ലാ അവസരങ്ങളും സഹായങ്ങളും നല്കാനും നിർദേശിക്കുന്നു. എല്ലാ സമൂഹങ്ങളും സഹനശക്തി ഉള്ളവരായിരിക്കണം. മതമോ വർഗമോ വർണ്ണമോ ഭേദമില്ലാതെ ജാതികളുടെ അതിരുകളില്ലാതെ സ്ത്രീകള്ക്കും സമത്വവും സ്വാതന്ത്ര്യവും വാഗ്ദാനം ചെയ്യണം. അവരും പുരുഷന്മാരെപ്പോലെ ജീവിതത്തിൽ മുന്നേറണം. സഹോദരീ സഹോദരരെ ധൈര്യമായി മുന്നേറാൻ, നമ്മിൽത്തന്നെ സ്വയം ധൈര്യം സമാഹരിച്ച് നമ്മുടെ കഴിവുകളെ പൂർണ്ണമായും സ്വയം ഗ്രഹിച്ച് മുന്നേറാൻ ഞാൻ നിങ്ങളോട് ആഹ്വാനം ചെയ്യുന്നു.
 

പ്രിയ സഹോദരീ സഹൊദരരേ ഞങ്ങളുടെ ഓരോ കുഞ്ഞുങ്ങൾക്കും നാളയുടെ ശോഭനമായ ഭാവി പടുത്തയർത്താൻ സ്കൂളുകളിൽ അർഹിക്കുന്ന വിദ്യാഭ്യാസം ആവശ്യമാണ്. സമാധാനത്തിന്റെയും വിദ്യ നേടുവാനുള്ള അവകാശങ്ങളുടെയും  സന്ദേശദൂതരായി ഞങ്ങൾ ഞങ്ങളുടെ തീർത്ഥയാത്ര തുടരും. ആർക്കും ഞങ്ങളെ തടയാനാവില്ല.  അവകാശങ്ങൾക്കായി ഉച്ചത്തിൽ ശബ്ദിക്കും. ഞങ്ങൾ മുഴക്കുന്ന ശബ്ദത്തിൽക്കൂടി മാറ്റങ്ങളുടെതായ ഒരു പുത്തൻയുഗത്തിന് തുടക്കമിടും. ലോകത്തിന്റെ ശക്തിയിലും യുവശക്തിയിലും അധികാരത്തിലും ഞങ്ങൾ വിശ്വസിക്കുന്നു. ഞങ്ങളുടെ ചുറ്റുമായ ലോകത്തിന് ഇന്നുള്ള വിവേചന ലോകത്തെ പരിവർത്തനങ്ങളിൽക്കൂടി മുഴുവനായും മാറ്റാൻ സാധിക്കും. കാരണം ഞങ്ങൾ ഇന്ന് ഏകമായ മനസോടെയാണ് മുന്നേറുന്നത്.  വിദ്യാഭ്യാസത്തിനുള്ള പൗരാവകാശത്തിനായി ഒന്നായി ഞങ്ങൾ ശക്തിയാർജിച്ചിരിക്കുന്നു. ഞങ്ങളുടെ ലക്‌ഷ്യം സഫലമാകണമെങ്കിൽ ഞങ്ങൾതന്നെ ശക്തിയാർജിക്കണം. അറിവെന്ന പൂർണ്ണമായ ആയുധമാണ് നമ്മുടെ ശക്തി. ഐക്യമത്യം മഹാബാലം നമ്മെ കാത്തുകൊള്ളും. അറിവ് നേടുകയെന്നത് നമ്മുടെ രക്ഷയ്ക്കായ ഒരു പരിചയാണ്.


പ്രിയപ്പെട്ട സഹോദരീ സഹോദരരെ കോടാനുകോടി ജനങ്ങൾ ഇന്ന് കൊടിയ ദാരിദ്ര്യത്തിലും അജ്ഞതയിലും അനീതിയിലും ദുരിതം അനുഭവിക്കുന്നത് നമുക്ക് മറക്കാൻ സാധിക്കില്ല. അനേകകോടി കുഞ്ഞുങ്ങൾ പ്രാഥമിക വിദ്യാഭ്യാസത്തിനുള്ള അവസരങ്ങൾ ഇല്ലാതെ കഴിയുന്നതും നാം കാണുന്നു. നല്ല ഭാവിക്കായി കാത്തിരിക്കുന്ന നമ്മുടെ സഹോദരീ സഹോദരരേയും അവരുടെ വികാരങ്ങളെയും മനസിലാക്കണം. അതുകൊണ്ട് അജ്ഞതക്കും ദാരിദ്ര്യത്തിനും  ഭീകരതക്കും എതിരെ പോരാടുന്ന ഒരു ലോകത്തിനായി നമുക്ക് കാത്തിരിക്കാം. അറിവിന്റെ നിദാനമായ പുസ്തകങ്ങളിൽക്കൂടി സംസാരിക്കാം. പുസ്തകങ്ങളാണ് ഏറ്റവും വലിയ ആയുധം. ഒരു കുഞ്ഞ്, ഒരു ഗുരു, ഒരു പുസ്തകം,ഒരു പേനാ മതി മാറ്റങ്ങളുടെതായ ഒരു നവലോകത്തെ സൃഷ്ടിക്കാൻ. അതിന് ഏകപരിഹാരം ആദ്യം വിദ്യ അഭ്യസിക്കുകയെന്നതാണ്. നമ്മുടെ ലക്ഷ്യബോധം ഇനിമേൽ വിദ്യ നേടുകയെന്നതാകട്ടെ.

സർ സെയ്ദ് എന്ന മഹാനും അലിഗഢ് മുസ്ലിം യൂണിവേഴ്സിറ്റിയും

By ജോസഫ് പടന്നമാക്കൽ

മുസ്ലിം സമുദായത്തിലെ സാമൂഹിക സാമുദായിക മണ്ഡലങ്ങളിൽ അതുല്യപ്രഭാവനായിരുന്ന സർ സെയ്ദ് അഹമ്മദ്ഖാൻ പത്തൊൻപതാം നൂറ്റാണ്ടിലെ നവോത്ഥാന ചിന്തകരിൽ ഏറ്റവും ആദരണീയനായിരുന്ന ഒരു മഹാനുഭാവനായിരുന്നു. സ്വതന്ത്രഇന്ത്യയുടെ ചരിത്രത്തിൽ അദ്ദേഹത്തിന് അർഹിക്കുന്ന സ്ഥാനം കല്പ്പിച്ചിട്ടുണ്ടോയെന്നും സംശയിക്കുന്നു. ബനാറസ് ഹിന്ദു യൂണിവേഴ്സിറ്റി സ്ഥാപകൻ ആരെന്നു ചോദിച്ചാൽ പണ്ഡിറ്റ് മദൻ മോഹൻ മാളവ്യായെന്ന് പാഠപുസ്തകങ്ങളിലും ചരിത്രകൃതികളിലും പഠിച്ച ഓർമ്മവരും.   അതുപോലെ ചരിത്രത്തിന് വിസ്മരിക്കാൻ സാധിക്കാത്ത സർ സെയിദ് അഹമദ്ഖാൻ  വിശ്വപ്രസിദ്ധമായ അലിഗർ മുസ്ലിം യൂണിവേഴ്സിറ്റിയുടെ സ്ഥാപകനാണ്. വിദ്യാഭ്യാസപ്രവർത്തന ചിന്തകരായവരുടെ ലോകത്തിൽ വാഴ്ത്തപ്പെട്ട ഇതിഹാസപുരുഷനായ ഈ മഹാൻ 1817 ഒക്ടോബർ പതിനേഴാംതിയതി ഡൽഹിയിൽ ജനിച്ചു. അലിഗഢ്  മുസ്ലിം യൂണിവേഴ്സിറ്റിയെന്ന വിശ്വസരസ്വതി ക്ഷേത്രം സർ സെയ്ദിന്റെ ബൌദ്ധികതലങ്ങളിൽനിന്നും ഉദയംചെയ്ത കാലംമുതൽ മരണമില്ലാത്തവനായി  ചരിത്രത്തിൽ അദ്ദേഹമെന്നുമുണ്ടായിരുന്നു.
 

അലിഗഢ്  മുസ്ലിം സർവകലാശാല തുടങ്ങിയകാലം മുതൽ ഒന്നരനൂറ്റാണ്ടിൽപ്പരം വർഷങ്ങളായി ശാസ്ത്രവിദ്യാഭ്യാസ ഗവേഷണങ്ങൾക്ക്  ഇവിടെ പ്രാധാന്യം കൊടുത്തുവരുന്നു. ഇസ്ലാമികലോകത്തിലെ പ്രസിദ്ധരായ പലരും ഈ സർവകലാശാലയിൽനിന്നും പഠിച്ചുയർന്നവരാണ്. അക്കൂടെ രാഷ്ട്രതന്ത്രജ്ഞരും ലോകനേതാക്കളും സാംസ്ക്കാരിക സാമൂഹിക രാഷ്ട്രീയ നേതാക്കളും ഉൾപ്പെടുന്നു. ഇന്ത്യൻ പ്രസിഡന്റായിരുന്ന ഡോക്ടർ സക്കീർ ഹുസൈനും ഇന്ത്യൻ വൈസ് പ്രസിഡന്റായിരുന്ന  ഡോക്ടർ അൻസാരിയും ഈ അത്മവിദ്യാലയത്തിൽനിന്നും പഠിച്ചുയർന്നവരാണ്. അതിർത്തി ഗാന്ധിയെന്നറിയപ്പെട്ടിരുന്ന അഫ്ഗാനിലെ ഖാൻ അബ്ദുൽ ഗാഫർ, പാക്കിസ്ഥാൻ പ്രസിഡന്റായിരുന്ന അയൂബ്ഖാൻ എന്നീ ലോകനേതാക്കന്മാരും ഈ സർവകലാശാലയിൽനിന്ന് ഉയർന്നുപോയവരാണ്. പാക്കിസ്ഥാനിലെ ആദ്യത്തെ രണ്ട് പ്രധാനമന്ത്രിമാരായിരുന്ന ലിയാഖാത് ആലിഖാനും (Liaquat Ali Khan)ഖാജാ നസിമുദീനും(Khawaja Nazimuddin) ഈ യൂണിവേഴ്സിറ്റിയിൽനിന്നും പഠിച്ചുപോയവരാണ്. കൂടാതെ ഇവിടെനിന്നും പുറത്തിറങ്ങിയ പാക്കിസ്ഥാനിലെയും ഇന്ത്യയിലെയും നേതാക്കന്മാരുടെ വലിയ നിരതന്നെയുണ്ട്. സ്വാതന്ത്ര്യ സമരകാലങ്ങളിൽ ജിന്നയും ഗാന്ധിയും നെഹൃവും ഒത്തൊരുമിച്ച് പല സുപ്രധാന തീരുമാനങ്ങൾ എടുത്തിരുന്നതും  അലിഗഢ്  സർവകലാശാലയുടെ ക്യാമ്പസിൽ നിന്നായിരുന്നു.

മുഗൾ ചക്രവർത്തിമാരുടെ കുടുംബവംശാവലികളിലുള്ള ഒരു പ്രഭുകുടുംബത്തിലാണ് സർ സെയ്ദ് അഹമ്മദ് ഖാൻ ജനിച്ചത്‌.  അപ്പനേക്കാളും അമ്മയുടെ പരിലാളനയിലായിരുന്നു സർ സെയ്ദ് വളർന്നത്‌. അമ്മയുടെ പേര് 'അസീസ് നിസ്സാ' എന്നായിരുന്നു. ഈ അമ്മയായിരുന്നു സെയ്ദിന്റെ വളർച്ചയിലും സ്വഭാവരൂപീകരണത്തിലും മാർഗനിദാനമായിരുന്നതെന്ന് അദ്ദേഹത്തിൻറെ ജീവചരിത്രത്തിൽ ഉണ്ട്. 1838ൽ സെയ്ദിന്റെ പിതാവ് മരിച്ചു. അതിനുശേഷം കുടുംബം സാമ്പത്തികമായി വളരെയേറെ ബുദ്ധിമുട്ടുകൾ അനുഭവിച്ചു. ഇരുപത്തിയൊന്നാം വയസിൽ കുടുംബം പുലർത്താനായി സെയ്ദ് ഈസ്റ്റ്ഇന്ത്യാ കമ്പനിയിൽ ജോലി ആരംഭിച്ചു. പിന്നീട് നിയമത്തിൽ ഗുമസ്തപ്പണി ലഭിച്ചു. 1839ൽ അദ്ദേഹം മുൻസിഫ് ആയി ജോലി തുടങ്ങി. അവിടെനിന്നും മുറാദാബാദിൽ ഉദ്യോഗക്കയറ്റം ലഭിച്ച് ഒരു കോടതിയുടെ പരമാധികാരിയായി. സുപ്രധാനമായ നിയമകാര്യങ്ങൾ കൈകാര്യം ചെയ്യാനും വിധി പറയാനും ഒരു ജൂറിയ്ക്കുണ്ടായിരുന്ന അധികാരവുമുണ്ടായിരുന്നു.  പിന്നീട് അദ്ദേഹം വിജ്ഞാനഗവേഷണത്തിനായുള്ള ഒരു ജൈത്രയാത്ര തന്നെ തുടർന്നു.

ഇതിനിടയിൽ അനേക ഗ്രന്ഥങ്ങളുടെയും രചനകൾ നടത്തി. ലേഖനപരമ്പരകളുടെ ഒരു പ്രവാഹം തന്നെ അദ്ദേഹത്തിന്റെ തൂലികയിൽനിന്ന് ഉടലെടുത്തു. 1842 കാലയളവിൽ ഉർദുഭാഷയിൽ എഴുതിയതെല്ലാം കൂടുതലും മതപരമായ വിഷയങ്ങളായിരുന്നു. സാംസ്കാരികമായും സാമൂഹികപരമായും  അനേകം കൃതികൾ രചിച്ചതുകൊണ്ട് ദേശീയതലങ്ങളിലും പ്രസിദ്ധനായി തീർന്നിരുന്നു. 1857 ലെ ബ്രിട്ടീഷ്സൈന്യത്തിൽനിന്നും പൊട്ടിത്തെറിച്ച "ശിവാജി ലഹളയുടെ കാരണങ്ങൾ' എന്ന പുസ്തകം വളരെയേറെ ജനശ്രദ്ധ നേടിയിരുന്നു.കൂടാതെ 'ദേശീയവാദികളായ ഭാരതമുസ്ലിമുകൾ, മുഹമ്മദിന്റെ ജീവിതാദർശങ്ങൾ, ബൈബിളും ഖുറാനും'  എന്നീ കൃതികളെല്ലാം ഉർദുഭാഷയുടെ മുതൽകൂട്ടുകളാണ്. അദ്ദേഹത്തിന്റെ തൂലികയിൽനിന്ന് രചിച്ചതെല്ലാം അന്നത്തെ യുവതലമുറകളുടെ ഹരവുമായിരുന്നു. ബൈബിളിനെപ്പറ്റിയെഴുതിയ വ്യാഖ്യാനങ്ങളിൽ സാംസ്കാരികമായും പാരമ്പര്യമായും ഇസ്ലാമിനോട് ഏറ്റവും അടുത്ത ബന്ധമുള്ള മതം ക്രിസ്തുമതമാണെന്നും അദ്ദേഹം എഴുതിയിട്ടുണ്ട്. 

ഈസ്റ്റ്‌ഇന്ത്യാ കമ്പനിയിൽ ഉന്നത ഉദ്യോഗസ്ഥനായിരുന്നതുകൊണ്ട് സർ സെയ്ദിന് കൊളോണിയിൽ ഇന്ത്യയിലെ അനേക ഉന്നതരായ ബ്രിട്ടീഷ് ഉദ്യോഗസ്ഥരുമായി അക്കാലത്ത് അടുത്തബന്ധം സ്ഥാപിക്കാൻ സാധിച്ചിരുന്നു.  കോടതിയിലെ സേവനകാലത്ത് ഈസ്റ്റ്ഇന്ത്യാ കമ്പനിയെപ്പറ്റിയും കൊളോണിയൽ ഭരണത്തെ സംബന്ധിച്ചും അവരുടെ നയങ്ങളെയും അന്ന്‌ അദ്ദേഹത്തിന് പഠിക്കാൻ കഴിഞ്ഞു. 

1857ൽ വിപ്ലവം പൊട്ടിപുറപ്പെട്ടപ്പോൾ വിപ്ലവത്തെ സംബന്ധിച്ച് വിലയിരുത്തുവാൻ പ്രധാന ഓഫീസർ ആയി ബ്രിട്ടീഷ്സർക്കാർ നിയമിച്ചത് സർ സെയ്ദിനെയായിരുന്നു. അക്കാലത്ത് വടക്കേഇന്ത്യാ മുഴുവൻ അതിഘോരമായ വിപ്ലവാവേശത്തിലായിരുന്നു. ഭയാനകമാംവിധം രാജ്യത്തിലെ നിയമസമാധാനങ്ങൾ പാടെ തകർന്നിരുന്നു. ആയിരക്കണക്കിന് ജനം ലഹളയിൽ ദിനംപ്രതി മരിച്ചുകൊണ്ടിരുന്നു. ഡൽഹി, ആഗ്രാ, കാണ്‍പൂർ, ലക്നൗ എന്നീ പട്ടണങ്ങൾ ലഹളക്കാരെക്കൊണ്ട് കത്തിയെരിയുകയായിരുന്നു.  മുഗൾരാജവംശത്തിലെ ചെറുരാജ്യങ്ങൾ അക്കാലത്ത് അപ്പാടെ ഇല്ലാതായി. ഈ ലഹള വ്യക്തിപരമായും സർ സെയ്ദിനെ ബാധിച്ചിരുന്നു. അദ്ദേഹത്തിന്റെ അടുത്ത ബന്ധുജനങ്ങളിൽ അനേകർ ലഹളയിൽ കൊല്ലപ്പെട്ടു. ലഹളയിൽനിന്നും സ്വന്തം മാതാവിനെവരെ രക്ഷിച്ചെങ്കിലും അതിൽനിന്നുണ്ടായ വൈകാരിക ഭയംകൊണ്ട് അവർ അധികം താമസിയാതെ മരിച്ചുപോയി. ഈ ലഹളയെ മുസ്ലിം സമുദായത്തിന്റെ പരാജയമായി സർ സെയ്ദും കൂട്ടരും അക്കാലത്ത് വിലയിരുത്തിയിരുന്നു.

 ഒരുപക്ഷേ, സർ സെയ്ദിനെ പ്രശസ്തിയിലേക്ക് നയിച്ചത് സ്വാതന്ത്ര്യദാഹികൾക്കായുള്ള അദ്ദേഹത്തിന്റെ 1859ൽ പ്രസിദ്ധീകരിച്ച 'ഇന്ത്യൻ വിപ്ലവത്തിന്റെ കാരണങ്ങൾ' എന്ന പുസ്തകമായിരിക്കാം. പുസ്തക പ്രസിദ്ധീകരണം സ്വന്തം ജീവനുതന്നെ ഭീഷണിയായി. വിപ്ലവത്തിന് ചുക്കാൻ പിടിച്ചത് മുസ്ലിം സമുദായത്തിലെ  ബുദ്ധിജീവികളായിരുന്നുവെന്നുള്ള ആരോപണം  നിരസിച്ചുകൊണ്ട് ലഹളക്ക് കാരണം ബ്രിട്ടീഷ് ഈസ്റ്റ്ഇന്ത്യാ കമ്പനിയുടെ സാമ്രാജ്യ മോഹമായിരുന്നുവെന്ന് അദ്ദേഹം വാദിച്ചു. ഇന്ത്യൻ സംസ്കാരത്തെപ്പറ്റിയുള്ള ബ്രിട്ടീഷ് രാഷ്ട്രീയപ്രഭുക്കളുടെ അജ്ഞത ലഹളയ്ക്ക്  കാരണമായിരുന്നുവെന്നും കുറ്റപ്പെടുത്തി. സ്വന്തം ജീവൻ പണയപ്പെടുത്തിയെങ്കിലും തന്റെ സമുദായത്തിന്റെ നന്മക്കായി ബ്രിട്ടീഷ്കാരോട് പോരാടുമെന്നും പ്രഖ്യാപിച്ചു. സ്വന്തമായി എഴുതി അച്ചടിച്ച ബുക്കുകൾ കത്തിക്കാൻ പലരും ആവശ്യപ്പെട്ടിട്ടും വകവെയ്‌ക്കാതെ ഇതിന്റെ അനേക ഇംഗ്ലീഷ്തർജിമകൾ അദ്ദേഹം ബ്രിട്ടീഷ് പാർലമെന്റിന് അയച്ചുകൊടുക്കുകയാണ് ഉണ്ടായത്. എന്നാൽ അന്നത്തെ ബ്രിട്ടീഷ് ഗവർണ്ണർ ജനറലായ കാനിങ്ങ് (Canning) സത്യസന്ധമായ റിപ്പൊർട്ടെന്നു പറഞ്ഞ്‌ സെയ്ദിന്റെ പുസ്തകത്തെ അംഗീകരിക്കുകയാണുണ്ടായത്. അത് സർ സെയ്ദിനെ സംബന്ധിച്ച് വലിയ നേട്ടമായിരുന്നു. ഈ റിപ്പോർട്ട് ഇന്ത്യയിൽ പ്രസിദ്ധീകരിക്കില്ലെന്നുള്ള ഉറപ്പിൽ മറ്റുള്ള ബ്രിട്ടീഷ് പ്രഭുക്കളും സർ സെയ്ദിനെതിരെ പ്രശ്നങ്ങൾ സൃഷ്ടിക്കാതെ ശാന്തരായി.

1875 മെയ്മാസം ഇരുപത്തിനാലാംതിയതി സർ സെയ്ദ് അഹമ്മദ് ഖാൻ അലിഗഢിൽ മുഹമ്മദൻ ആംഗ്ലോ ഒറിയന്റൽ കോളേജിന് അടിസ്ഥാനം ഇട്ടു. ഇതിന്റെ പ്രവർത്തനം തുടങ്ങിയത് ഇംഗ്ലണ്ടിലുള്ള കേംബ്രിഡ്ജ് സർവകലാശാല മാതൃകയിലായിരുന്നു. ആഗോളതലങ്ങളിലെ നാനാഭാഗത്തുള്ള വിദ്യാർഥികൾ ഇവിടെ പഠിക്കുന്നത് സ്വയം അഭിമാനമായി കരുതുന്നു. ആരംഭത്തിൽ പാശ്ചാത്യ വിദ്യാഭ്യാസത്തിനും ശാസ്ത്ര വിഷയങ്ങൾക്കുമായിരുന്നു എം.എ.ഓ. കോളേജ് പ്രാധാന്യം നല്കിയിരുന്നത്. പൌരസ്ത്യ വിഷയങ്ങളിലും സാമൂഹികവും മതപരവുമായ വിഷയങ്ങളിലും ശ്രദ്ധ കേന്ദ്രികരിച്ചിരുന്നു. ആദ്യത്തെ ചാൻസലർ സുൽത്താൻ ജഹാൻ ബീഗം എന്ന കുലീന വനിതയായിരുന്നു. പ്രമുഖരായ ബ്രിട്ടീഷ് പ്രൊഫസർമാരും ആദ്യകാലങ്ങളിൽ ഇവിടെ പഠിപ്പിച്ചിരുന്നു.  കോളേജിന്റെ ആദ്യത്തെ പ്രിൻസിപ്പാൾ സർ സയ്ദിന്റെ ക്ഷണപ്രകാരം വന്ന ബ്രിട്ടീഷ് പ്രൊഫസറായ 'മിസ്റ്റർ തീയോഡർ ബക്ക്' ആയിരുന്നു. കോളേജ് ആദ്യം കൽക്കട്ടാ യൂണിവേഴ്സിറ്റിയുടെയും പിന്നീട് 1885 ൽ അലഹാബാദ് യൂണിവേഴ്സിറ്റിയുടെയും അംഗീകാരത്തോടെ പ്രവർത്തിച്ചു. സർ സെയ്ദിന്റെ മരണത്തിന് 22 വർഷങ്ങൾക്കുശേഷം 1920 ൽ കോളേജിനെ 'അലിഗഢ്  മുസ്ലിം യൂണിവേഴ്സിറ്റി'യെന്ന പദവിയിലേക്ക് ഉയർത്തി.

അലിഗഢ്  മുസ്ലിം യൂണിവേഴ്സിറ്റി ഇന്ത്യൻ സംസ്ക്കാരത്തിന്റെ പ്രതീകമാണ്. ചരിത്രം ഇവിടെ ഉറങ്ങുന്നു. ഈ സരസ്വതി ക്ഷേത്രം നിരവധി പ്രതിഭകളുടെ ഉറവിടമാണ്. മഹാത്മാഗാന്ധിമുതൽ അനേക മഹാത്മാക്കളുടെ കാൽപാദങ്ങൾ പതിഞ്ഞ പുണ്യഭൂമിയാണവിടം. മഹാനായ സർ സെയ്ദ് കുട്ടികളോടായി പറഞ്ഞത് "പ്രിയ കുഞ്ഞുങ്ങളേ, ഒരിക്കൽ നിങ്ങൾ വളർന്നു കഴിയുമ്പോൾ ഔന്ന്യത്യത്തിന്റെ കൊടുമുടിയിൽ എത്താവുന്നടത്തോളം എത്തുമ്പോൾ ഒരു പക്ഷെ നിങ്ങൾ എന്നെ മറക്കുമായിരിക്കാം. കാലം എന്നെ വിസ്മൃതിയിലേക്ക് നയിച്ചേക്കാം.സാംസ്കാരിക ലോകത്തിലെ ഉയരങ്ങളിലേക്ക് കുതിക്കുന്ന യാത്രയിൽ നിങ്ങളുടെ സ്വപ്നങ്ങളെല്ലാം പൂവണയുമെന്ന് തീർച്ചയാണ്. പൂർവിക തലമുറകൾക്ക് എത്താൻ സാധിക്കാത്ത ദൂരത്തോളം പറന്നെത്തി നിങ്ങൾ ഉന്നതപദവികൾ ഒരിക്കൽ അഭിമാനത്തോടെ അലങ്കരിക്കും."

'ഇല്ല സാഹിബ്, മറക്കില്ല. യുവാവായിരുന്നപ്പോൾ ഞാനും ആ വിശ്വകലാലയത്തിലെ വിദ്യാർഥിയായിരുന്നു. അങ്ങയുടെ മഹത്തായ ജീവിതത്തിൽ  ആവേശഭരിതനായിരുന്നു. ഇന്ന് അങ്ങേയ്ക്കായി ഈ ലേഖനം ഞാൻ കാഴ്ച്ചവെയ്ക്കുകയാണ്.'

സർ സെയ്ദ് 1898 മാർച്ചുമാസം ഇരുപത്തിയേഴാതിയതി മരിക്കുംവരെ വിദ്യാഭ്യാസപ്രവർത്തകനായി, സാമുദായിക ഉന്നമനത്തിനായി പ്രവർത്തിച്ചുകൊണ്ടിരുന്നു. അദ്ദേഹത്തിന്റെ പരിശ്രമങ്ങൾ മുസ്ലിം സമുദായത്തിന്റെ യാഥാസ്ഥിതികതയ്ക്ക് ഒരു വെല്ലുവിളിയായിരുന്നു. പാരമ്പര്യമായിട്ടുണ്ടായിരുന്ന പല തത്ത്വസംഹിതകളും പരിവർത്തനങ്ങളിൽക്കൂടി   കാലത്തിന് അനുയോജ്യങ്ങളായിത്തീരുകയും ചെയ്തു. ആധുനിക വിദ്യാഭ്യാസത്തിൽക്കൂടിയും ശാസ്ത്ര ഗവേഷണങ്ങളിൽക്കൂടിയും സാമൂഹികമായ ഉന്നതനിലവാരം ഭാരത മുസ്ലിമുകൾക്ക് കൈവരിക്കുവാനും സാധിച്ചു.  അലിഗഢ്  മുസ്ലിം യൂണിവേഴ്സിറ്റിക്യാമ്പസിൽ സർ സെയ്ദ് മസ്ജിദിന് സമീപമായി ഭാരതവിദ്യാധാരയിലെ ചിന്തകനും മുസ്ലിം സാമൂഹിക പരിഷ്കർത്താവും ഐതിഹാസിക വ്യക്തിത്വത്തിന്റെ ഉടമയുമായിരുന്ന സർ സെയ്ദ് അഹമ്മദ് ഖാൻ എന്ന മഹാൻ അന്ത്യവിശ്രമം കൊള്ളുന്നു.