6.ഭക്തിയുടെ മനശാസ്ത്രം

വിമാനറാഞ്ചികൾ യാത്രക്കാരെ തങ്ങളുടെ തടവുകാർ ആക്കാറുണ്ട്. ഭയാനകമായ ആ നിമിഷങ്ങളിൽ യാത്രാ തടവുകാരും റാഞ്ചികളും തമ്മിൽ  പലപ്പോഴും വൈകാരിക ബന്ധം സ്ഥാപിക്കുന്നതും സാധാരണമാണ്. ഇത് ഭയത്തിൽ‍നിന്നു ദയക്കുവേണ്ടി തടവുകാരുടെ മനസില്‍ വരുന്ന വികാരം മൂലം ഉണ്ടാകുന്നു. പിന്നീട് ജീവനു വെല്ലുവിളിയായി വന്നവരോട് തങ്ങളുടെ  ജീവനുവേണ്ടി യാചിക്കും. തടവുകാർ‍ക്ക് വിമാനറാഞ്ചികളോട് പ്രത്യേകം സ്നേഹവും ഉണ്ടാകും. അപകടം മുമ്പിൽ കണ്ടു കരുണക്കുവേണ്ടി കാത്തിരിക്കുന്ന തടവുകാർ പുറത്തു വന്നാലും തടവിലാക്കിയവരെപ്പറ്റി നല്ലതു മാത്രമേ സംസാരിക്കുകയുള്ളൂ. ഈ രോഗത്തിനു പേരിട്ടിരിക്കുന്നത് സ്റ്റോക്ക്‌ഹോം സിൻഡ്രം  (Stockholm Syndrom) എന്നാണ്‌. ഏതാണ്ട് ഇതിനോട് തുല്യമായ രോഗമാണ് റിലിജിയസ് ട്രൌമ സിൻഡ്രവും.

ഗയാനയിലെ കൂട്ട ആത്മഹത്യക്ക് ആഹ്വാനം ചെയ്ത ജിം ജോണ്‍സ് എന്ന മതവർഗ (Cult) നേതാവിന്റെ ചരിത്രം സമൂഹജീവിതത്തിൽ മതമൌലികതയുടെ  വിഷം കലർ‍ത്തിയതിനു പ്രധാന  ഉദാഹരണമാണ്. പീപ്പിള്‍ ഓഫ്  റ്റെമ്പിള്‍ എന്ന ക്രിസ്ത്യൻ കൾട്ട് സംഘടനയുടെ ആത്മീയ ഗുരുവായിരുന്നു ജിം ജോണ്‍സ്.  1978 നവംബർ പതിനെട്ടാം തിയതി അയാളുടെ ആഹ്വാനമനുസരിച്ചു സ്ത്രീകളും കുഞ്ഞുങ്ങളുമടക്കം 909 അനുയായികൾ സൈനൈഡു വിഷം  കഴിച്ചു കൂട്ട ആത്മഹത്യ ചെയ്തത് ലോകത്തെ ഞെട്ടിച്ച ഒരു ഭീകരസംഭവമായിരുന്നു.
സംഘടനയുടെ പല പീഡന, അഴിമതി രഹസ്യങ്ങളും അക്കാലത്ത് അമേരിക്കൻ വാർ‍ത്താ മാധ്യമങ്ങളിൽ പ്രസിദ്ധീകരിച്ചിരുന്നു.  ഇതു ജിം ജോണ്‍സിനെ അസ്വസ്ഥമാക്കിയിരുന്നു. വാർത്തകൾ ശരിയോയെന്ന് അന്വേഷിക്കുവാൻ ചെന്ന അമേരിക്കൻ കോണ്ഗ്രസ് അംഗം ഉൾപ്പെടെ നാല് വാർ‍ത്താലേഖകരെ കൾട്ട് അംഗങ്ങൾ വധിച്ചതും  സംഘടനയുടെ നില നില്‍പ്പിനു പ്രശ്നമായി. അന്നു വെടിയേറ്റ്‌ രക്ഷപ്പെട്ട റൈറ്റർ‍മാൻ എഴുതിയ "Raven: The untold story of the Rev. Jim Jones and his people  "  എന്ന 624 പേജുള്ള ബുക്കിൽ    ജിം ജോണ്സ് ഉൾപ്പടെ അനുയായികളുടെ കൂട്ട ആത്മഹത്യയെപ്പറ്റിയും കൾട്ടിനെപ്പറ്റിയും സവിസ്തരം വിവരിച്ചിട്ടുണ്ട്

ജിം ജോണ്‍സ് എന്ന കൾട്ട് ഗുരു അക്കാലത്ത് ജനങ്ങളിൽ മതവികാരങ്ങൾ ഇളക്കിമറിക്കുവാൻ അസാധാരണമായ ചാതുര്യം ഉണ്ടായിരുന്ന  കരിഷ്മാറ്റിക്ക് നേതാവായിരുന്നു. പ്രസംഗിക്കുവാൻ വാചാലനും. മനുഷ്യ മനസ്സിന്റെ ബലഹീനതയിൽ ഒരു മതമൌലികവാദിയുടെ ആഹ്വാനം അനുസരിച്ച് ആയിരങ്ങൾ ജീവൻ  ഒടുക്കിയത് മന:ശാസ്ത്രഞരുടെ സ്കൂളിൽ ഇന്നും ചര്‍ച്ചാവിഷയമാണ്. പീഡനങ്ങളും കുട്ടികളെ ദുരുപയോഗം ചെയ്യലും  ദൈവത്തിന്റെ പേരിൽ നടന്നു. അനുയായികൾ ജിം ജോണ്‍സ് ദൈവമാണെന്നു വിചാരിച്ചു.  അധികാരം മൂത്ത ജിം ജോണ്‍സിനെ   ചുറ്റുമുള്ളവർ ഭ്രാന്തുപിടിച്ച്  ആരാധിച്ചു. 276 കുഞ്ഞുങ്ങളും സ്ത്രീകളുമുൾപ്പടെ ആബാലവൃദ്ധ ജനങ്ങൾ ഒരു ഭ്രാന്തന്റെ കരവലയത്തിനുള്ളിൽ സ്വയം മരണം കൈവരിച്ചതും ചരിത്രത്തിന്റെ ഭാഗമാണ്.
  
അപ്പോസ്തോലിക പാരമ്പര്യത്തിൽ  ഒരു സാമൂഹ്യക വ്യവസ്ഥിതി   കെട്ടിപ്പെടുക്കുകയെന്നതായിരുന്നു  കൾട്ടിന്റെ ഉദ്ദേശവും. കുറച്ചു ഭക്ഷണവും  കൂടുതൽ ജോലിയും നല്‍കി അയാൾ അനുയായികളെ ഒരുമിപ്പിച്ചു നിർത്തി.  എങ്ങനെ  അവരുടെമേൽ  ഇത്രമാത്രം അയാൾക്ക്‌ സ്വാധീനിക്കുവാൻ സാധിച്ചുവെന്നുള്ളതും   വിസ്മയകരമാണ്.  അനുയായികളെ  അനുസരിപ്പിക്കുവാനുള്ള ട്രെയിനിംഗ് കഠിനവും ക്രൂരവും ആയിരുന്നു. മനസ്സിനെ നിയന്ത്രിക്കുവാനും രഹസ്യങ്ങൾ പുറത്തു പറയാതെയിരിക്കുവാനും ക്യാമ്പില്‍ പ്രത്യേക സംവിധാനങ്ങൾ ഉണ്ടായിരുന്നു. ഓരോ അംഗവും പരസ്പരം ചാരന്മാർ ആയിരുന്നു. തന്മൂലം സംഘടനയിലെ ചെറിയ കാര്യങ്ങൾപോലും അധികാരികളുടെ കാതുകളിൽ എത്തിയിരുന്നു. അനുസരിക്കാത്തവർ‍ക്ക് കഠിന ശിക്ഷകളും നല്‍കിപ്പോന്നു.അസഹിഷ്ണമായ ഡ്രില്ലുകളിലൂടെ സ്വയം മരിക്കുവാനും പഠിപ്പിച്ചിരുന്നു.

അമേരിക്കന്‍ പട്ടണജീവിതത്തില്‍നിന്നും ഗയാനയിലെ കാട്ടുപ്രദേശങ്ങളിലേക്ക് അയാളും അനുയായികളും കുടിയേറിയത് വര്‍ണ്ണവ്യവസ്ഥയില്‍നിന്നും രക്ഷപ്പെടുവാന്‍ ആയിരുന്നു.  ഗയാനയിലെ അജ്ഞാത വനപ്രദേശങ്ങളില്‍ എന്തു  ചെയ്യണമെന്നറിയാതെ  അനുയായികൾ  നേതാവിനെ അനുസരിച്ചു വന്നു.  ഏകാന്തത, ലോകവും ആയുള്ള ബന്ധം അറ്റുവെന്ന തോന്നല്‍, എന്നിവകള്‍ അവരില്‍ അനുഭവപ്പെട്ടു. നേതാവിനെ ദൈവമായി കണ്ടു കരുണക്കായി  ഒന്നടങ്കം പ്രാര്‍ഥിച്ചിരുന്നു. തെറ്റായ വിവരങ്ങള്‍ നല്‍കിയും ഹിപ്നോട്ടിസവും മനസ്സില്‍ ഭയമുണ്ടാക്കുന്ന തന്ത്രങ്ങള്‍വഴിയും  അനുയായികളെ ഒന്നിപ്പിച്ചിരുന്നു. ഇങ്ങനെ മനസ്സിനെ രോഗതുല്ല്യമാക്കി.  രക്ഷപ്പെട്ടവരില്‍ ഭയത്തില്‍നിന്നുള്ള അസുഖമായ പാനിക്ക്   ഡിസ്‌ഓര്‍ഡര്‍ (Panic disorder)രോഗലക്ഷണങ്ങളും കണ്ടിരുന്നു.

പുരോഹിതരും പാസ്റ്ററും പള്ളിയും കരിഷ്മാറ്റിക്കുമായി പതിവായി അലിഞ്ഞു ജീവിക്കുന്നവരുടെയിടയിൽ കാണുന്ന  രോഗലക്ഷണത്തെ  റിലിജിയസ് ട്രൌമ സിൻഡ്രം  എന്നു പറയുന്നു. ഇതിനു കാരണം  ഭക്തരുടെ  മനസ്സിൽ  തട്ടുന്ന  ചിന്താവൈകല്യമാകാം. ജിം ജോണ്‍സും അനുയായികളും ഭക്തിരോഗം മൂത്ത് കൂട്ട ആത്മഹത്യാ ചെയ്തത്  ഈ രോഗത്തിന്  ഉദാഹരണമാണ്. രോഗലക്ഷണം   ഒരു മതവിഭാഗത്തിൽനിന്നോ വർഗസംഘടനയിൽ നിന്നോ ഉണ്ടാകാം.മതത്തിന്റെ മൌലികതത്ത്വങ്ങളിൽ അടിമപ്പെട്ട ലക്ഷക്കണക്കിനു ജനവിഭാഗത്തിനും ഈ രോഗം ബാധിച്ചിട്ടുണ്ട്. മറ്റുള്ള മതങ്ങളിൽ രക്ഷയില്ലായെന്നുള്ള തെറ്റായ വിശ്വാസം രോഗത്തിനു വഴി ഒരുക്കും. ഒരു സഭയിൽനിന്ന് മറ്റൊരു സഭയിലേക്കു പോവുമ്പോഴും ഭയത്തിൽനിന്നു  രോഗം ഉണ്ടാകാം. അമിതമായ പുരോഹിതഭക്തിയും പ്രാർഥനയും  രോഗത്തിന്റെ ഭാഗമാണ്.

മനുഷ്യൻ മനുഷ്യനെ നിയന്ത്രിക്കുവാൻ മതങ്ങൾ സൃഷ്ടിച്ചു. മതങ്ങൾ ബുദ്ധിപൂർവ്വം പച്ചക്കള്ളങ്ങൾകൊണ്ട് മനുഷ്യമനസ്സിനെ മയക്കി. ക്രിസ്തുമതത്തിൽ തന്നെ എത്രയോ ആത്മഹത്യകൾ നടക്കുന്നു. ദൈവം തന്നെ വെറുക്കുന്നുവെന്ന തോന്നൽ ചിലരെ രോഗത്തിന് അടിമയാക്കുന്നു. അർത്ഥ ശൂന്യങ്ങളായ തത്ത്വങ്ങൾ വിശ്വസിപ്പിച്ചു സഭാനേതൃത്വം വിശ്വാസികളെ അടിമകൾ ആക്കിയിരിക്കുകയാണ്.  ആർ. ടി. എസ് എന്ന വിഷം വിശ്വാസികളിൽ കുത്തിവെച്ച്  പൌരാഹിത്യ വ്യവസ്ഥതിക്ക് അങ്ങനെ കെട്ടുറപ്പുണ്ടാക്കി. പ്രത്യക്ഷത്തിൽതന്നെ കാണപ്പെടുന്ന ഈ അസുഖത്തിനു തീർച്ചയായും അനേകം  കാരണങ്ങളും കാണാം. ശൈശവത്തിലെ മനസ്സിനെ ദുർബലപ്പെടുത്തുന്ന   മതവികാരങ്ങൾ ഇതിനു  കാരണമാണ്.   രോഗം ബാധിച്ചവർക്ക്‌ ചീകത്സയുണ്ടെന്നും മന:ശാസ്ത്രജ്ഞർ അഭിപ്രായപ്പെടുന്നു. മതഭ്രാന്തുമൂലം ദുർബലമായ മനസ്സിനെ സൌഖ്യപ്പെടുത്തി രോഗിയെ ആരോഗ്യമുള്ള മനസ്സായി മാറ്റിയെടുത്തു സന്തുഷ്ടമായ ജീവിതത്തിലേക്കു മടക്കികൊണ്ടുവരുവാൻ സാധിക്കുമെന്നാണ്  വിദക്തരുടെ അഭിപ്രായവും. അമിത മതഭക്തിമൂലം ഉണ്ടാകുന്ന ഹിസ്റ്റീരിയാ രോഗത്തിനു  കാരണങ്ങൾ പലതാണ്. അവബോധ മനസ്സും, സാമൂഹികവും സാംസ്ക്കാരികവുമായ സംഘടനങ്ങളും വൈകാരികപ്രശ്നങ്ങളും രോഗലക്ഷണങ്ങൾക്ക് കാരണങ്ങളാവാം.
1. അവബോധ മനസ്സ്: 
സ്വയം കണ്ടു മനസ്സിലാക്കുവാനും ഗ്രഹിക്കുവാനുമുള്ള കഴിവുകൾ ഇല്ലാതാവുകയെന്നത്   അവബോധ മനസിന്റെ പ്രവര്‍ത്തനങ്ങളാണ്. ഈ രോഗം ഉള്ളവർ സദാസമയവും ചിന്താക്കുഴപ്പങ്ങളിൽപ്പെട്ടു കിടക്കും. ചിന്തിക്കുവാനുള്ള കഴിവിന്റെ പരിമിതികൾ  തനിയേയും ഏകാന്തതയിലും  അനുഭവപ്പെടും. സ്വയം കഴിവിനെ മാനിക്കാതെ ബലഹീന വിശ്വാസങ്ങളിൽ അടിയുറച്ചു വിശ്വസിക്കും. ഇക്കൂട്ടർ  മാറി മാറി മനസ്സ് വ്യതിചലിച്ചു പരിഭ്രത്തിലും ആകാറുണ്ട്. സ്വന്തമായി തീരുമാനങ്ങൾ എടുക്കുവാൻ കഴിവു കാണുകയില്ല. പലപ്പോഴും പ്രശ്നപരിഹാരത്തിന് പുരോഹിതന്റെ ഉപദേശങ്ങൾ തേടിപ്പോവും. അദ്ദേഹത്തിന്‍റെ  വാക്കുകൾ വേദവാക്യങ്ങളായി കരുതും. ഇതെല്ലാം മതത്തിന്റെ ചട്ടക്കൂട്ടിൽ മാത്രം ചിന്തിക്കുന്നവരുടെ രോഗ ലക്ഷണമായി വിദക്തർ കരുതുന്നു. മാനസ്സിക വിക്ഷോഭങ്ങളും വിഷാദരോഗവും കോപവും അഗാധ ദു:ഖവും ഏകാന്തതയും മതങ്ങളുടെ കൂട്ടായ്മയിൽ പ്രവർത്തിക്കുന്നവർക്ക് കൂടുതലായി കാണുന്നു. ഭൌതിക സുഖങ്ങളില്‍നിന്നും അകന്നു ജീവിച്ച് അർഥമില്ലാത്ത ഒരു ലോകത്തെയും കണ്ടെത്തും.
2. സാമൂഹികമായ കാരണങ്ങൾ:
 മതഭക്തിയുടെ തീക്ഷ്ണതയിൽ ടെലിവിഷന്‍, സിനിമാകൾ, കമ്പ്യൂട്ടര്‍നെറ്റ് മുതാലായ സാമൂഹിക  മാധ്യമങ്ങളിൽ താല്‍പ്പര്യം കുറയും. കുടുംബ ജീവിതത്തിൽ പൊട്ടിത്തെറികൾ സാധാരണമാണ്. വികൃതമായ സ്വഭാവം, ലൈംഗിക വേഴ്ച്ചകളിൽ ബുദ്ധിമു ട്ട്, സ്വന്തം ജോലി കാര്യങ്ങളിൽ അശ്രദ്ധ , സദാസമയവും ദൈവം ശരണമെന്നു പറഞ്ഞു നടക്കൽ, നാലു നേരവും പ്രാര്‍ഥനയും ഉപവാസവും അനുഷ്ഠിക്കൽ, ദൈവത്തിന്റെ കാര്യം മാത്രം സംസാരിക്കൽ  മുതലാവകൾ രോഗലക്ഷണമായി കരുതാം. ഇത്തരക്കാരെ സമൂഹം ഒറ്റപ്പെടുത്തുമ്പോൾ നൈരാശ്യത്തിലേക്ക് ഉപബോധമനസ്സിനെ തിരിക്കുകയും ചെയ്യും.
 കവി ഇടശ്ശേരി ഗോവിന്ദൻ നായർ പാടിയിട്ടുണ്ട് :"ഭക്തിയാം ചൂണ്ടൽ ഒരിക്കൽ വിഴുങ്ങിയ ഭാഗ്യഹീനന്നില്ല മുക്തി പിന്നെ."
 
സാമൂഹ്യ പരിപാടികളിലും വിവാഹ സദ്യകളിലും രോഗം ബാധിച്ചവർ സ്വന്തം മതക്കാരെ മാത്രം തേടിപ്പോവുന്നതും കാണാം. ഇവരുടെ വിഷയങ്ങൾ പള്ളി, ബിഷപ്പ്, തിരുമേനി, പിതാവ് എന്നിവരുടെ പുകഴ്ത്തലുകളിൽ മാത്രം ഒതുങ്ങി നില്‍ക്കും. ആദ്യമായി കാണുന്ന ഒരാൾ അപരനോട് "ഏതു പള്ളിയിലാണു പോവുന്നതെ"ന്നു  ചോദിക്കുന്നുവെങ്കിൽ അയാൾക്ക്  റിലീജിയസ് ട്രൌമാ സിൻഡ്രം (Religious Trauma Syndrome) ബാധിച്ചിട്ടുണ്ടെന്നു കരുതാം.  രോഗത്തിന്റെ തുടക്കവും ആവാം. സ്വന്തം സമുദായത്തിൽ തന്നെയും ചേരിതിരുവു കാണാം.  രോഗ ലക്ഷണം ഏറ്റവും കൂടുതൽ പ്രതിഫലിക്കുന്നത്  കരിസ്മാറ്റിക് കാരിൽ ആണ്.  ചിലർ പ്രാർഥിച്ചു സുഖപ്പെടുത്തുവാൻ നോക്കും. തുറന്ന മനസ്സോടെയുള്ള ജാതി വിഭാഗങ്ങളിൽ ഇത്തരം മനോരോഗികൾ കുറവാണ്.
3. സാംസ്കാരികം:  
മതേതര ലോകത്തെപ്പറ്റി ഗൌരവമില്ലായ്മ, സമൂഹത്തിൽ ഒറ്റപ്പെടുന്നുവെന്ന തോന്നൽ, വിവര സാങ്കേതികക്കുറവ്, സോഷ്യല്‍ നെറ്റുകളിൽ താല്പര്യം ഇല്ലായ്മ, ഇവകൾ ആര്‍. ടി. എസ് രോഗലക്ഷണങ്ങൾ ആണ്. പള്ളിമാത്രം ചിന്തിക്കുന്നവർക്ക് പരിണാമസിദ്ധാന്തം, ആധുനിക-ക്ലാസ്സിക്കൽ കലകൾ ഇവകളെ അറിയുവാൻ താത്പര്യം കാണുകയില്ല. പള്ളിസംഗീതം ഒഴിച്ച് കലാ സാംസ്ക്കാരിക രംഗങ്ങളിലും  ക്ലാസിക്കൽ-ആധുനിക സംഗീതങ്ങളിലും വെറുപ്പും പ്രകടിപ്പിക്കും. കുട്ടികളെ സിനിമായോ നാടകമൊ  ടീ.വി. പാരിപാടികളോ കാണുവാൻ ഇക്കൂട്ടർ സമ്മതിക്കുകയില്ല.
4. വൈകാരികത: 
പള്ളിയുടെയും രൂപക്കൂടിന്റെയും മുമ്പിൽനിന്നു പൊട്ടിക്കരയുക, പുണ്യാളന്മാരിലെ അത്ഭുതങ്ങളിൽ വിശ്വസിക്കുക, തിരുശേഷിപ്പുകൾ വന്ദിക്കുക, ദൈവത്തിന്റെ പേരിൽ തല മുണ്ഡനം ചെയ്യുക എന്നിവകൾ രോഗതുല്യങ്ങളായ പ്രവൃത്തികളാണ്. പള്ളിക്ക് എത്ര വേണമെങ്കിലും പണം കൊടുക്കും, എന്നാൽ ഭിക്ഷക്കാരൻ കൈ നീട്ടിയാൽ മുഖം തിരിക്കും. ചിലപ്പോൾ ആട്ടിയോടിക്കും. വൈകാരികമായി പള്ളിയോടു മാത്രം അടുപ്പം. എന്നാൽ, പള്ളിയുടെ പേരിൽ അയല്ക്കാരനെ വേണ്ടിവന്നാൽ പീഡിപ്പിക്കുകയും ചെയ്യും. കൊല്ലാനും മടിക്കുകയില്ല. ഇങ്ങനെ പോവുന്ന വൈകാരികതയിൽ അടിമപ്പെട്ട പള്ളി രോഗം. സ്വന്തം കുടുംബത്തിൽ ഉള്ളവരെക്കാളും  പള്ളിവികാരി എന്തു പറഞ്ഞാലും  അനുസരിക്കും. ഇത്തരം  രോഗം കുടുംബസമാധാനത്തെയും തകർക്കുന്നു.   ഈ അസ്വാഭാവികതകൾക്കു  കാരണം ചെറുപ്പകാലം മുതൽ വേദപാഠ ക്ലാസ്സുകളിൽപോയി  മനസ്സിനെ മുറിവേല്‍പ്പിച്ചതാണ്. 

 മാനസിക വ്യതിയാനങ്ങൾ കൊണ്ടുള്ള രോഗം  മൂത്താൽ ചീകത്സയും ആവശ്യമാണെന്നു മന:ശാസ്ത്രജ്ഞർ അഭിപ്രായപ്പെടുന്നു. പോട്ട  ആശ്രമത്തിൽ ഒരാഴ്ച കിടന്നവർ ധ്യാനഗുരുക്കന്മാരെ  പ്രവാചകരെപ്പോലെ ആരാധിക്കുന്നു. ആൾദൈവങ്ങളെ പൂജിക്കുന്നവരുടെ കഥയും ഇങ്ങനെ തന്നെ. പോട്ടയിൽകിടന്നു ഭ്രാന്തു മൂത്ത് ചിലര്‍ അമിത മതഭ്രാന്തരായതായും കാണുന്നു. മറ്റു മതങ്ങളെയും മതതത്ത്വങ്ങളെയും രൂക്ഷമായി വിമർശിച്ച് ഭക്തരുടെ മനസ്സിൽ ബന്ധനത്തില്‍ക്കൂടി വർഗീയവിഷം കുത്തി വെക്കുവാനും പോട്ട ഉപദേശികൾ വിരുതരാണ്. വിശ്വാസികളോട് അമ്പലമുറ്റത്തുകൂടിയും  കാവില്‍ക്കൂടിയും നടക്കരുതെന്നും വിഗ്രഹങ്ങളെ കടന്നുപോയാൽ ശപിക്കണമെന്നും ഉപദേശിക്കും. കരിസ്‌മാറ്റിക്ക് ധ്യാനങ്ങളില്‍പ്പെട്ടവർ സ്വന്തം ജോലികളിൽ ഉത്സാഹം കുറഞ്ഞു ബൈബിൾ വായനയിൽ സദാ സമയവും മുഴുകിയിരിക്കുന്നതും സാധാരണമാണ്. സുവിശേഷങ്ങളും യേശുവിനെപ്പറ്റിയും    മറ്റുള്ളവരെ അടിച്ചെല്‍പ്പിക്കുന്നതു കാണാം.  ഇതും റിലീജിയസ് ട്രൌമ സിൻഡ്രം  (Religious Trauma Syndrom) തന്നെ.

ശിശുവായിരിക്കുമ്പോഴേ  പുരോഹിതൻ ബലഹീനരായ  കുഞ്ഞുങ്ങളുടെ മനസ്സിനെ അടിമയാക്കും. നരകവും സ്വർഗവും വേർതിരിച്ചു ഭയപ്പെടുത്തി സ്വർഗ്ഗത്തിന്റെ താക്കോൽ പുരോഹിതന്റെ കൈവശമെന്നു  വിശ്വസിപ്പിച്ച്  മാനസിക അടിമത്തം  സൃഷ്ടിക്കും. പിശാചെന്ന ഭീകരരൂപവും മനസ്സിൽ ഉണ്ടാക്കും. അങ്ങനെ പുരോഹിതൻ അല്മായനെ ജീവിതാവസാനംവരെ മാനസികമായി കീഴ്പ്പെടുത്തി ആര്‍. ടി. എസ്. എന്ന രോഗത്തിന് വിധേയമാക്കി കൊണ്ടിരിക്കും.

സഭയുടെ സ്വേച്ഛാധിപത്യ പ്രവണതയും വിഷമയമായ ദൈവശാസ്ത്രവും പള്ളികളിലും സ്കൂളിലും വീടുകളിലും പ്രാബല്യത്തിലുള്ളത് ആർ ടി എസ് (R.T.S)  രോഗ കാരണങ്ങളിൽ ഒന്നായി ചൂണ്ടികാണിക്കുന്നു. തദ്ഫലമായി   കുഞ്ഞുങ്ങളുടെ അവബോധ, സാമൂഹിക, വൈകാരിക , സന്മാർഗ നിലവാരങ്ങളിലുള്ള വളർച്ചക്കു തടസ്സമുണ്ടാകുന്നു. സ്വയം പരിപോഷിപ്പിക്കേണ്ട കഴിവുകളും ചിന്താശക്തിയും ഇല്ലാതാവുകയും ചെയ്യും. സ്വതന്ത്രമായി അന്വേഷണത്തിൽക്കൂടി ലഭിക്കേണ്ട അറിവുകളെ  അധികാരനേതൃത്വം നിയന്ത്രിക്കുന്നതുകൊണ്ട് പ്രായോഗികമല്ലാത്ത വിശ്വാസങ്ങളെ  ഉൾകൊള്ളുകയും പഠിക്കുകയും ചെയ്യേണ്ട ദുരവസ്ഥ കുഞ്ഞുങ്ങൾക്കുണ്ടാകുന്നു.  തന്നത്താൻ പോഷിപ്പിക്കേണ്ട ചിന്താഗതികൾക്ക് ഇവിടെ സഭ തടസ്സമാവുകയാണ്. ജനിച്ചു വളരുന്ന ചുറ്റുപാടിൽ മറ്റുള്ളവരിൽ നിന്നും  ലഭിച്ച ബാഹ്യമായ  അറിവുകൾ വെളിപ്പെടുത്തുന്നുവെങ്കിലും യുക്തിപൂര്‍വ്വം ചിന്തിച്ചു തനതായ വിജ്ഞാനത്തെ പരിപോഷിപ്പിക്കുവാൻ മതം അനുവദിക്കുകയില്ല. തീരുമാനങ്ങൾ എടുക്കുവാനും വിജ്ഞാനങ്ങളെ ചികയുവാനും യാഥാസ്ഥിതിക പൌരാഹിത്യത്തിന്റെ ചട്ടക്കൂട്ടിൽ നിന്നു മാത്രമേ സാധിക്കുകയുള്ളൂ.  

ലൈംഗിക വിജ്ഞാനകാര്യങ്ങൾ ആരോഗ്യപരമായി സ്കൂൾ തലത്തിൽ പഠിപ്പിക്കുന്നതും സഭ എതിർത്തിട്ടുണ്ട്. തന്മൂലം വിവാഹം കഴിഞ്ഞാലും ലൈംഗികത  പാപമെന്ന ചിന്ത പലരുടെയും ഉപബോധമനസ്സിൽ ചെല്ലാറുണ്ട്‌. അച്ചടക്ക പരിപാലനത്തിനു നിസ്സാരകാര്യങ്ങൾക്കുപോലും  കുട്ടികളെ മര്‍ദ്ദിക്കുന്നതും കഠിനശിക്ഷകൾ നല്‍കുന്നതും അവരുടെ മാനസിക വളർ‍ച്ചക്കു തടസ്സമാകും. ജന്മ പാപമെന്ന സഭയുടെ കാതലായ വിശ്വാസവും നിത്യനരകമെന്ന സങ്കല്‍പ്പവും കുഞ്ഞുങ്ങളുടെ മനസ്സിൽ ഒരു സംഘട്ടനം തന്നെ ഉണ്ടാക്കും. തെറ്റുകാരനായി സ്വയം മനസ്സിൽ പ്രതിഷ്ഠിക്കും. നിത്യനരകമെന്ന വിധിയും നടപ്പിലാക്കും. കാണപ്പെടാത്ത രക്ഷയുടെ വഴി കണ്ടെത്തുവാൻ സ്വന്തം മനസ്സുതന്നെ പാകപ്പെടുത്തി പരീക്ഷണ വിധേയമാക്കണം. മരിക്കുവോളം ഈ വിശ്വാസം കാത്തു സൂക്ഷിക്കുകയും വേണം. നിത്യവും ചലിക്കുന്ന ലോകത്തിൽ തൊടുന്നതെല്ലാം പാപം, ഉടൻ പാപപരിഹാരവും വേണം. കൂടെ കൂടെ കുമ്പസാരിച്ചുകൊണ്ടിരിക്കണം. സ്വർഗത്തിലേക്കു  പോകുവാൻ എല്ലാ കൂദാശകർമ്മങ്ങളും ആവശ്യമാണ്. മനസ്സങ്ങനെ വേലിയേറ്റങ്ങളും വേലിയിറക്കങ്ങളുമായി  ചലിപ്പിച്ചുകൊണ്ടിരിക്കണം. കർമ്മങ്ങളെല്ലാം മുറതെറ്റാതെ അനുഷ്ഠിച്ചു മരിക്കുന്നതുവരെ അപമാനിതനായി ദൈവത്തിൽമാത്രം ആശ്വാസത്തെയും കണ്ടെത്തണം. സർക്കാർ ഉദ്യോഗസ്ഥൻ നികുതി കൊടുക്കാത്തവനോടു ചോദിക്കുമ്പോലുള്ള  ചോദ്യാവലിപോലെ കുമ്പസാരക്കൂട്ടിൽ പുരോഹിതന്റെ ചികഞ്ഞുള്ള ചോദ്യങ്ങൾക്കെല്ലാം പാപി ഉത്തരം പറഞ്ഞേ മതിയാവൂ. 'തിന്മ' സദാ ഉള്ളിൽ പ്രവര്‍ത്തിക്കുന്നുവെന്ന കുറ്റബോധം കുമ്പസാരിക്കുന്നവനിൽ ഉണ്ടാകുന്നു. സ്വയം കുറ്റപ്പെടുത്തുന്നു. എന്തോ പോരായ്മ തനിക്കുണ്ടെന്നും അനുഭവപ്പെടും. പാപം ഉള്ളിൽ ഉള്ള വിചിത്ര സ്വഭാവിയായ അവൻ തന്നെത്തന്നെ  വെറുക്കും.


 കാലം മാറി. വിഷം നിറഞ്ഞ അന്ധമായ മതവിശ്വാസങ്ങളെ ജനം ചോദ്യം ചെയ്യുവാൻ തുടങ്ങി. സമത്വം, സ്വാതന്ത്ര്യം, സാഹോദര്യം എന്നിവകളാണ് ഇന്നു ജനസമൂഹം ആഗ്രഹിക്കുന്നത്. അടിമത്തത്തിന്‍റെ യുഗം  വിലപ്പോവുകയില്ല. മാറി മാറി വരുന്ന ഭരണകൂടങ്ങൾ നിയമങ്ങളും അതിനടിസ്ഥാനമായി രചിച്ചിട്ടുണ്ട്. നിയമങ്ങൾ സൃഷ്ടിച്ചത് മനുഷ്യനു വേണ്ടിയാണ്. പീഡനം കൊടുക്കുവാനല്ല. മനസ്സില്ലാത്ത കുട്ടികളെ പള്ളിയിൽ പോകുവാൻ നിർബന്ധിക്കുന്നത്‌ കുറ്റകൃത്യമാണ്. പ്രത്യേക മതവർഗങ്ങളായി ജീവിക്കുന്ന കൾട്ടുകളും കരിസ്മാറ്റിക്കുകളും കുട്ടികളെ പള്ളിയിൽ പോകുവാൻ സമ്മർദം ചെലുത്താറുണ്ട്. മതാചാരങ്ങളുടെ കടുംപിടിത്തത്തിൽ ഇവിടെ കുട്ടികളെ മാനസികമായി അടിമപ്പെടുത്തുകയാണ്.  പ്രകൃതിയെയും സൃഷ്ടികർമ്മങ്ങളെയും സ്വയം ചിന്തിച്ചു തീരുമാനം എടുക്കേണ്ട ബാല മനസ്സുകളെ ദൈവവക്താക്കൾ നൂലാമാലക്കുരുക്കുകൾകൊണ്ട് ബന്ധിക്കുകയാണ്. മതനിയമങ്ങളുടെ അധികാരപരിധിക്കപ്പുറം മറുവാക്ക് ശബ്ദിദിക്കരുതെന്നു താക്കീതു കൊടുക്കും. ഒരിക്കൽ മനസ്സുവളരാത്ത അവന്‍ ബന്ധനസ്ഥനായാൽ കെട്ടിയിരിക്കുന്ന കുരുക്കിൽനിന്നു മോചനം നേടുവാനും ബുദ്ധിമുട്ടായിരിക്കും. മതത്തിന്റെ പ്രവർത്തനങ്ങളെയോ മതപ്രബോധനങ്ങളെയോ ആധികാരികങ്ങളായ ഗ്രന്ഥങ്ങളെയോ മതാധിപന്മാരെയോ ചോദ്യം ചെയ്യാൻ പാടില്ല. അടഞ്ഞ മനസ്സാണ് മതം കല്‍പ്പിക്കുന്നത്.  അത്തരം കാഴ്ചപ്പാടുകൾ മറ്റുള്ള ജനവിഭാഗങ്ങളെയും സ്വാധീനിക്കണം. വൈകാരികമായി പീഡിപ്പിച്ചു മനസ്സിനെ ബലഹീനമാക്കി, മതം മയക്കു മരുന്നായി ആർ. ടി. എസ് രോഗത്തിന് അടിമയായാൽ അനുസരണയുള്ള കുട്ടിയെപ്പോലെ ജീവിതകാലം മുഴുവൻ അവൻ ജീവിച്ചുകൊള്ളും.  പാരമ്പര്യ മതത്തിൽ‍നിന്നു വിട്ടു പോകുന്നവർക്കും ഭയം മൂലം ആർ. ടി. എസ്‌. രോഗം പിടിപെടാറുണ്ട്. മാനസിക ചീകത്സക്ക് ഡോക്റ്ററെ കാണുന്നത് പാപമാണെന്ന ഭയവും ചിലരുടെ മനസ്സിൽ കുടികയറും.ചീകത്സക്ക് ഡോക്റ്ററെ കാണുന്നത് വിലക്കാനും വേദാന്തങ്ങളുമായി മതമൌലികവാദികൾ രംഗത്തു വരാറുണ്ട്. ദൈവത്തിന്റെ മുമ്പിൽ   നീതീകരിക്കണമെങ്കിൽ ഒരു പാസ്റ്ററോടോ മത കൌണ്‍സിലറിനോടോ മാത്രമേ പ്രശ്നങ്ങൾ പറയുവാൻ പാടുള്ളൂ. ദൈവമാണ് മഹാവൈദ്യൻ എന്നു വിശ്വാസിയുടെ തലയിൽ നിറയ്ക്കും. ഇത്തരം രോഗം ബാധിച്ചവർ എന്തു ചെയ്യണമെന്നറിയാതെ മാനസ്സിക വിഭ്രാന്തിയിൽ കഴിയുന്നുണ്ട്.

യേശുവിന്റെ  രണ്ടാം വരവിലെ പീഡനകാലം കുഞ്ഞുങ്ങളുടെ മനസ്സിൽ ആഴമേറിയ മുറിവുകൾ സൃഷ്ടിക്കും. ചിലരിൽ  ജീവിതകാലം മുഴുവൻ അത് പേടിസ്വപ്നങ്ങൾ ഉണ്ടാക്കുന്നു. ഉറക്കത്തിൽ ഞെട്ടി ഉണരും. ഉച്ചത്തിൽ കാറും. തീയിൽ അകപ്പെട്ടുപോയ മാതാപിതാക്കളെ തേടും. നരകത്തിൽ മുഴുവനായി വെന്തുരുകുന്നതുപോലെ സ്വപ്നങ്ങൾ കാണും. വാ തുറന്നു കാറി കൊണ്ട് കുട്ടികൾ ഉറക്കത്തിൽ ഞെട്ടിയുണരും. ദൈവം എന്നെ ഇഷ്ടപ്പെടുന്നില്ല. ഞാൻ വിധിദിവസം മരിക്കുമെന്ന ചിന്താഗതി ഉപബോധമനസ്സിൽ വളർന്നു പ്രായമായാലും മനസ്സിനെ അലട്ടികൊണ്ടിരിക്കും.

വിശ്വസിക്കുന്നവന് എവിടെയും പാപങ്ങൾ മാത്രം. യേശുവിന്റെ വരവുവരെ അപകടം പിടിച്ച പിശാച്  എവിടെയും ഉണ്ട്. കൊടും നാശം എന്നു പറഞ്ഞു മതം ലോകത്തെ തന്നെ വിധിക്കുകയാണ്. വിശ്വസിച്ചു നടക്കുന്നവന് സ്വർ‍ഗം. നിത്യസൌഭാഗ്യത്തിലേക്ക് അവൻ കൂട്ടികൊണ്ടുപോവും. മറിച്ചാണെങ്കിലോ, അവനു മുമ്പിൽ അട്ടയും തേളും പൊള്ളുന്ന തീയും നിറഞ്ഞ ഘോരമായ ഒരു ലോകത്തിന്റെ വാഗ്ദാനവും. ഇതു വിശ്വസിക്കുവാൻ ആർ. ടി. എസ്. രോഗത്തിന് അടിമപ്പെട്ടവരുണ്ട്. മതപ്രഭാഷകർ പറയും നല്ലവരായവരിൽ പരിശുദ്ധാത്മാവ് നാവുകളിൽക്കൂടി സംസാരിച്ചുകൊണ്ടിരിക്കും. മന:ശാസ്ത്ര ജ്ഞർ  ഇതു മത്തുപിടിച്ച മതംകൊണ്ടുണ്ടായ ഹിസ്റ്റീരിയായെന്നും  കണക്കാക്കും.